Showimaot Iumi Tinghae Memorial Bae Kamap Long April 3
1. Why nao kwestin bilong man wea raetem psalm hem barava fitim taem bilong Memorial?
1 From man wea raetem psalm tinghae long wei wea Jehovah showimaot mercy and sevem pipol, hem ask olsem: “Wanem nao mi savve givim long Jehovah for evri gudfala samting wea hem givim long mi?” (Ps. 116:12) Distaem, olketa wea worshipim God garem staka reason for showimaot olketa tinghae. Staka handred year bihaen man hia raetem datfala psalm, Jehovah givim nambawan present long olketa man, hem nao ransom bilong Jesus. Taem iumi redyim tingting bilong iumi for rememberim dae bilong Jesus long April 3, iumi garem olketa gudfala reason for showimaot iumi tinghae.—Col. 3:15.
2. Why nao iumi tinghae long datfala ransom?
2 Olketa Blessing From Ransom: From ransom bilong Jesus, iumi savve kasem “forgiveness for sin bilong iumi.” (Col. 1:13, 14) Diswan mekem iumi garem konsens wea klin taem iumi worshipim Jehovah. (Heb. 9:13, 14) Iumi savve feel free for story long Jehovah taem iumi prea. (Heb. 4:14-16) Olketa wea showimaot faith long datfala ransom garem nambawan hope for laef olowe!—John 3:16.
3. Wanem nao iumi savve duim for showimaot iumi tinghae long Jehovah wea givim iumi datfala ransom?
3 Showimaot Iumi Tinghae: Wanfala wei for showimaot iumi barava tinghae hem for duim Memorial Bible reading each day and ting raonem wanem iumi readim. Wanfala article long Wastaoa for April-June 2011 wea garem title “Waswe, Iu Redi for Datfala Barava Important Day Long Year?” hem helpem iumi long datwan. Taem iumi prea, iumi savve talem Jehovah iumi barava tinghae long datfala ransom. (1 Thess. 5:17, 18) Iumi showimaot iumi tinghae taem iumi kam long Memorial bikos iumi obeyim komand bilong Jesus. (1 Cor. 11:24, 25) And tu, iumi savve showimaot bigfala love olsem Jehovah taem iumi invaetem staka pipol for kam joinim iumi long Memorial.—Isa. 55:1-3.
4. Wanem nao iumi laek for duim?
4 Pipol bilong Jehovah wea tinghae long Memorial, bae no tingim datfala hipap olsem nara meeting nomoa. Hem important winim eni nara meeting long year! Taem Memorial hem klosap, hem bae gud for iumi duim samting wea man wea raetem psalm hem talem. Hem sei: “Mi laek for praisem Jehovah and no forgetim evri samting wea hem duim.”—Ps. 103:2.