Savve Hao for Iusim Gud Bible
1. Hao nao iumi savve iusim gud Bible?
1 Wei for iusim gud Bible savve helpem iumi for teachim tru samting, and iumi savve helpem pipol for luksavve long olketa laea teaching and for no followim olketa kastom.—2 Tim. 2:15; 1 Pet. 3:15.
2. Wanem nao bae helpem iumi for faendem olketa scripture?
2 Savve Gud Long Bible: Taem iumi iusim wanfala tul evritaem, bae iumi savve gud hao for iusim datfala tul. Taem iumi readim full Bible iumi bae minim main samting wea Bible storyim. And tu, datwan bae helpem iumi for rememberim olketa scripture and for faendem olketa scripture. Wei for savve gud long Bible bae mekem iu no fraet for preach long ministry and long pipol wea iumi meetim long olketa nara ples.—1 Thess. 1:5.
3, 4. (a) Wanem nao samfala samting wea iumi savve duim wea bae helpem iumi savve gud long Bible? (b) Waswe, iu traem eni nara samting wea helpem iu for savve gud long Bible?
3 Taem iumi long meeting, hem gud for iumi openem Bible and luk followim taem brata hem readim olketa scripture. Taem iumi duim study seleva and prepare for olketa kongregeson meeting, readim and ting raonem olketa Scripture and hao iumi savve followim. Samfala faendem hem gud for evritaem readim olketa scripture long Bible winim wei for readim long computer or for printim olketa scripture, bikos datwan helpem olketa for kwiktaem faendem olketa scripture taem olketa preach.—John 14:26.
4 Samfala famili lane for baeheartim samfala scripture taem olketa duim Famili Worship. Maet olketa iusim olketa card wea long wansaed hem garem scripture and long narasaed hem garem toktok from datfala scripture. Taem wanfala showim saed wea garem scripture, olketa narawan mas talem toktok bilong datfala scripture, or sapos hem showim saed wea garem toktok bilong scripture, olketa mas trae for tingim wanem scripture nao talem datwan. Wei for practicem wanem iumi bae talem long ministry and hao iumi bae iusim Bible for ansarem eni kwestin, savve helpem iumi for savve gud long Bible.
5. Why nao iumi laek for savve gud long Bible?
5 No eni nara buk hem olsem Bible. Bible nomoa garem olketa toktok wea savve mekem pipol “wise and wea savve sevem [olketa].” (2 Tim. 3:15) Plande pipol long territory bilong iumi no savve long gudfala samting wea stap insaed long Bible. Dastawe iumi mas savve gud long Bible, mekem iumi savve teachim olketa trufala samting wea Bible storyim.—Prov. 2:1-5.