PART 8

Wanem Nao Iu Savve Kasem From Dae Bilong Jesus?

Jesus hem dae mekem iumi savve kasem laef. John 3:16

Olketa woman luk go insaed cave wea olketa putim body bilong Jesus bat hem emti

Thrifala day bihaen Jesus dae, samfala woman go long cave wea olketa putim body bilong hem, bat cave hia hem emti nao. Jehovah hem mekem Jesus for laef bak finis.

Jesus go long olketa aposol, then bihaen hem go ap long heven

Bihaen, Jesus kam long olketa aposol bilong hem.

Jehovah hem mekem Jesus for laef bak and hem kamap wanfala angel wea garem bigfala paoa wea no savve dae. Olketa disaepol bilong Jesus lukim hem go ap long heven.

God hem mekem Jesus laef bak and hem mekem hem kamap King long Kingdom bilong God. Daniel 7:13, 14

Jesus sidaon long throne long Kingdom for rulim pipol wea stap long paradaes earth

Jesus hem givim laef bilong hem olsem price for sevem pipol. (Matthew 20:28) From datwan, God mekem wei for iumi savve laef olowe.

Jehovah chusim Jesus for King wea bae rulim earth. Bible hem sei 144,000 pipol wea faithful long earth bae laef bak for rul witim hem long heven. Jesus and 144,000 bae kamap olketa king long Kingdom bilong God long heven, wea datwan hem wanfala raeteous gavman.—Revelation 14:1-3.

Kingdom bilong God bae mekem earth kamap paradaes. Bae no eni war, no eniwan brekem law, no eniwan poor, and no eniwan hangre. Pipol bae hapi tumas.—Psalm 145:16.