Jehovah Hem Man for Helpem Iumi

“Jehovah nao man wea helpem mi, man wea wakem heven and earth.”—PSALM 121:2.

1, 2. (a) Why nao iumi evriwan needim help samfala taem? (b) Jehovah hem wanem kaen man for givim help?

IUMI evriwan needim help. Samfala taem iumi needim help for deal witim wanfala big problem, or help for kasem comfort taem samwan iumi lovem hem dae, or for stand strong taem iumi kasem hardfala test. Taem man needim help, staka taem hem savve story witim wanfala spesol fren. Wei for talemaot hevi bilong iu long kaen fren olsem maet mekem moa isi for iu feisim datwan. Nomata olsem, olketa man maet no savve helpem iumi evribit. And tu, olketa maet no fit for givim help long taem iumi needim.

² Bat, wanfala man for help hem stap wea garem bigfala paoa and staka samting wea hem savve iusim for helpem iumi. Hem promisim tu hao hem bae nating lusim iumi. Hem nao datwan wea man wea raetem psalm trustim evribit taem hem sei: “Jehovah nao man wea helpem mi.” (Psalm 121:2) Why nao man wea raetem psalm barava sure Jehovah bae helpem hem? For savve long ansa, bae iumi lukluk long Psalm 121. Diswan bae mekem iumi lukim why iumi tu savve trustim Jehovah olsem man for helpem iumi.

Help wea No Savve Fail

3. Man wea raetem psalm maet luk go long wanem grup bilong olketa maunten, and why nao olsem?

³ First point wea man for raetem Psalm 121 hem storyim hem join witim wei wea Jehovah hem Creator. Datwan nao hem gudfala reason for iumi trustim hem. Hem sei: “Mi bae luk go long olketa maunten. Wea nao bae mi kasem help? Jehovah nao man wea helpem mi, man wea wakem heven and earth.” (Psalm 121:1, 2) Man wea raetem psalm hem luk go long wanfala spesol grup bilong olketa maunten. Taem hem raetem olketa toktok hia, temple bilong Jehovah hem stap long Jerusalem. Datfala taon, wea stap hae ap long olketa maunten bilong Judah, hem piksarem ples wea Jehovah hem stap. (Psalm 135:21) Maet man wea raetem psalm hem luk go long olketa maunten bilong Jerusalem, ples wea temple bilong Jehovah stap. Hem trustim wei wea Jehovah bae givim help. Why nao man wea raetem psalm hem barava sure Jehovah savve helpem hem? From Jehovah nao “man wea wakem heven and earth.” Hem olsem man wea raetem psalm hem talem, ‘No eniting savve stopem Creator, wea garem barava bigfala paoa, for helpem mi!’—Isaiah 40:26.

4. Hao nao man wea raetem psalm showimaot Jehovah evritaem luksavve long wanem pipol bilong hem needim, and why nao datwan comfortim iumi?

⁴ Next samting wea man wea raetem psalm talem hem wei wea Jehovah hem evritaem savve long wanem olketa servant bilong hem needim. Hem sei: “Hem kanduit letem leg bilong iu for seksek. Datwan wea protectim iu hem kanduit garem feeling for laek sleep. Man wea protectim Israel bae no garem feeling for laek sleep and bae hem no sleep tu.” (Psalm 121:3, 4) God kanduit letem olketa wea trustim hem for “seksek” or foldaon and no savve getap. (Proverbs 24:16) Why nao olsem? From Jehovah hem olsem wanfala shepherd wea barava wekap gud taem hem protectim sheep bilong hem. Datwan hem barava comfortim iumi, iaman? From hem lukluk long pipol bilong hem day and naet, hem bae evritaem givim wanem olketa needim.

5. Hao nao Jehovah hem stap long “raet hand” bilong pipol bilong hem?

⁵ From man wea raetem psalm hem trustim wei wea Jehovah hem loyal for protectim pipol bilong hem, hem raet olsem: “Jehovah hem protectim iu. Jehovah hem shade for raet hand bilong iu. Long daytaem sun bae no spoelem iu, and long naetaem moon tu bae no spoelem iu.” (Psalm 121:5, 6) Long Middle East, man wea wakabaot bae laekem tumas eni shade wea bae protectim hem from sun. Jehovah hem olsem wanfala shade for pipol bilong hem, hem protectim olketa from bigfala trabol wea olsem hot bilong sun. Lukim hao datfala scripture sei Jehovah hem long “raet hand” bilong olketa. Long taem bilong war bifor, no eniting protectim raet hand bilong soldia bikos hem holem shield long left hand bilong hem. Sapos soldia garem wanfala loyal fren, maet fren hia savve protectim hem long wei for standap and faet long raet saed bilong hem. Jehovah hem olsem fren hia taem hem loyal for standap saed long olketa wea worshipim hem. Hem stanbae evritaem for helpem olketa.

6, 7. (a) Long wanem wei nao toktok bilong man wea raetem psalm hem mekem iumi sure Jehovah bae evritaem helpem pipol bilong hem? (b) Why nao iumi savve garem sem wei for trust olsem man wea raetem psalm?

⁶ Waswe, enitaem Jehovah bae no helpem pipol bilong hem? Barava nomoa nao. Man wea raetem psalm sei olsem: “Jehovah nao bae protectim iu from evri trabol. Hem bae protectim soul bilong iu. Jehovah seleva bae protectim iu taem iu go aot and kam insaed, start long distaem and for olowe.” (Psalm 121:7, 8) Long verse 5, man wea raetem psalm hem sei ‘Jehovah hem protectim iu’ wea minim hem duim datwan distaem. Long verse 7 and 8, hem sei ‘Jehovah bae protectim iu,’ wea minim hem bae duim datwan long future. Olketa wea worship long stretfala wei fit for feel sure hao Jehovah bae helpem olketa distaem and long future. Nomata wea olketa go, nomata wanem trabol olketa kasem, hem bae evritaem redi for helpem olketa.—Proverbs 12:21.

⁷ Tru nao, man wea raetem Psalm 121 hem sure olmaeti Creator hem lukluk long olketa servant bilong hem olsem wanfala loving shepherd, and luk aot gud olsem security wea duim gud waka bilong hem. Iumi tu savve garem full trust olsem man wea raetem psalm, bikos Jehovah no savve change. (Malachi 3:6) Waswe, diswan minim bae hem evritaem protectim iumi long physical wei? Nomoa, bat sapos iumi depend long hem for helpem iumi, bae hem protectim iumi from eniting wea savve spoelem iumi long spiritual wei. Maet iu ask: ‘So long wanem wei nao Jehovah helpem iumi?’ Iumi bae lukluk gud long fofala wei wea hem helpem iumi. Long disfala article, bae iumi storyim hao hem helpem olketa servant bilong hem bifor. Long next article, bae iumi storyim hao hem helpem pipol bilong hem distaem.

Help From Olketa Angel

8. Why nao olketa angel interest tumas for olketa servant bilong God long earth mas stap gud?

⁸ Jehovah hem komanda bilong staka million angel. (Daniel 7:9, 10) Olketa spirit son hia faithful for duim will bilong hem. (Psalm 103:20) Olketa barava savve hao Jehovah garem bigfala love for olketa man wea worshipim hem and hem laek for helpem olketa. Dastawe olketa angel interest tumas for olketa servant bilong God long earth mas stap gud. (Luke 15:10) For sure, olketa angel hapi tumas taem Jehovah iusim olketa for helpem olketa man. Hao nao Jehovah iusim olketa angel for helpem olketa servant bilong hem long bifor?

9. Wanem example nao showimaot olketa angel kasem paoa from God for protectim olketa man wea faithful?

⁹ Olketa angel kasem paoa and strong from God for protectim and sevem olketa man wea faithful. Tufala angel helpem Lot and olketa dota bilong hem for ranawe bifor Sodom and Gomorrah distroe. (Genesis 19:1, 15-17) Wanfala angel nomoa killim dae 185,000 soldia bilong Assyria wea reredi for attakim Jerusalem. (2 Kings 19:35) Taem olketa torowem Daniel insaed hol bilong olketa lion, Jehovah “sendem kam angel bilong hem and satem mouth bilong olketa lion.” (Daniel 6:21, 22) Wanfala angel aotem Peter from prison. (Acts 12:6-11) Bible hem storyim staka nara example bilong wei wea olketa angel protectim olketa man. Diswan showimaot hao disfala toktok bilong Psalm 34:7 hem tru: “Angel bilong Jehovah stap raonem olketa wea fraet long hem, and hem sevem olketa.”

10. Hao nao Jehovah iusim wanfala angel for encouragem profet Daniel?

¹⁰ Samfala taem Jehovah iusim olketa angel for encouragem and strongim olketa man wea faithful. Wanfala nambawan example hem stap long Daniel chapter 10. Long datfala taem, Daniel hem klosap 100 year. Luk olsem profet hia hem barava feel wikdaon bikos Jerusalem stap emti and olketa no kwiktaem for buildim bak temple long there. And tu, hem lukim wanfala vision wea mekem hem fraet tumas. (Daniel 10:2, 3, 8) From God lovem hem, hem sendem wanfala angel for encouragem hem. Winim wantaem angel hia talem Daniel hao hem “barava spesol” long eye bilong God. Wanem nao kamaot from datwan? Datfala olo profet sei olsem long angel hia: “Iu strongim mi nao.”—Daniel 10:11, 19.

11. Wanem nao wanfala example bilong wei wea olketa angel leadim waka for preach abaotem gud nius?

¹¹ Jehovah iusim tu olketa angel for leadim waka for preach abaotem gud nius. Wanfala angel leadim Philip for go preach abaotem Christ long wanfala eunuch from Ethiopia, wea bihaen, hem baptaes. (Acts 8:26, 27, 36, 38) No longtaem bihaen, hem will bilong God for olketa Gentile wea no circumcise for herem gud nius. Long wanfala vision, wanfala angel hem kam long Cornelius, wanfala Gentile man wea fraet long God, and talem hem for askem aposol Peter for kam long hem. Taem olketa man for pasim message from Cornelius faendem Peter, olketa sei: “Cornelius . . . kasem instruction from God thru long wanfala holy angel for askem iu for kam long haos bilong hem and for herem olketa samting wea iu laek for talem.” Peter hem go long hem and Cornelius kamap first Gentile wea no circumcise for join insaed long Christian kongregeson. (Acts 10:22, 44-48) Tingim hao nao bae feeling bilong iu sapos wanfala angel helpem iu for go lukim wanfala man wea garem fasin fitim laef olowe!

Help From Holy Spirit

12, 13. (a) Why nao olketa aposol bilong Jesus garem gudfala reason for bilivim hao holy spirit savve helpem olketa? (b) Long wanem wei nao holy spirit strongim olketa Christian long first century?

¹² No longtaem bifor hem dae, Jesus promisim olketa aposol hao hem bae givim samting for helpem olketa. Dadi bilong hem bae givim wanfala ‘samting for helpem olketa, datfala holy spirit.’ (John 14:26) Olketa aposol garem gudfala reason for bilivim hao holy spirit savve helpem olketa. Tru tumas, Bible hem fulap witim olketa example bilong wei wea Jehovah iusim holy spirit, paoa wea winim eni nara paoa long full universe, for helpem pipol bilong hem.

¹³ Staka taem, Jehovah iusim holy spirit for strongim olketa man for duim will bilong hem. Holy spirit strongim olketa Judge for sevem Israel. (Judges 3:9, 10; 6:34) Datfala sem spirit hem strongim olketa Christian long first century for gohed strong for preach nomata olketa kasem enikaen persecution. (Acts 1:8; 4:31) Wei wea olketa win for duim ministry bilong olketa hem barava pruvim hao holy spirit hem helpem olketa. Dastawe olketa man wea “no skul gud and man nating” fit for talemaot message bilong Kingdom long evri ples long earth long datfala taem!—Acts 4:13; Colossians 1:23.

14. Hao nao Jehovah iusim holy spirit for mekem pipol bilong hem garem fasin for minim samting?

¹⁴ Jehovah iusim tu holy spirit bilong hem for mekem pipol bilong hem garem fasin for minim samting. From spirit bilong God helpem Joseph, hem fit for talemaot mining bilong olketa dream bilong Pharaoh. (Genesis 41:16, 38, 39) Jehovah iusim spirit bilong hem for showimaot olketa purpose bilong hem long hambol pipol, bat hem haedem datwan from olketa praod pipol. (Matthew 11:25) So, saed long olketa samting wea Jehovah provaedem for “olketa wea lovem hem,” aposol Paul hem sei: “God hem showimaot olketa samting hia long iumi thru long spirit bilong hem.” (1 Corinthians 2:7-10) Holy spirit nomoa savve helpem man for minim evribit will bilong God.

Help From Word Bilong God

15, 16. Wanem nao God talem long Joshua mekem hem savve duim samting long wisefala wei?

¹⁵ Word bilong Jehovah hem “gud for teach,” and hem mekem olketa servant bilong God “fit evribit, barava redi for duim evri gudfala waka.” (2 Timothy 3:16, 17) Bible hem garem staka example bilong wei wea pipol bilong God bifor kasem help from olketa part bilong Bible wea stap long datfala taem.

¹⁶ Bible givim gudfala advaes for olketa wea worshipim God. Taem Joshua kasem responsibility for leadim Israel, God talem hem olsem: “Disfala buk bilong law [wea Moses hem raetem] hem mas samting wea iu readim evritaem, and iu mas readim smol day and naet, mekem iu careful for duim evri samting wea olketa raetem insaed long hem; bikos diswan savve mekem wei bilong iu for win and iu bae duim samting long wisefala wei.” Lukim hao God no promis for duim mirakol for givim wisdom. Bat, sapos Joshua readim and ting raonem datfala “buk bilong law,” then bae hem duim samting long wisefala wei.—Joshua 1:8; Psalm 1:1-3.

17. Long wanem wei nao Daniel and King Josiah kasem help from olketa part bilong Bible wea stap long taem bilong olketa?

¹⁷ Word bilong God help tu long wei wea hem showimaot will and purpose bilong hem. Olsem example, Daniel luksavve from samting wea Jeremiah raetem, haomas year nao Jerusalem bae stap emti. (Jeremiah 25:11; Daniel 9:2) Tingim tu samting wea happen taem King Josiah bilong Judah hem rul. Datfala nation hem lusim Jehovah finis, and luk olsem olketa king no raetem seleva copy bilong Law and followim datwan. (Deuteronomy 17:18-20) Bat taem olketa fixim temple, olketa faendem “buk bilong law.” Maet hem copy wea Moses nao raetem 800 year bifor datfala taem. Bihaen olketa readim datwan long Josiah, hem luksavve hao datfala nation barava againstim will bilong Jehovah, and hem duim samting for followim wanem stap insaed long datfala buk. (2 Kings 22:8; 23:1-7) Hem klia tumas hao pipol bilong God bifor kasem help from olketa part bilong Bible wea stap long taem bilong olketa.

Help From Olketa Christian Brata

18. Taem wanfala Christian helpem narawan, why nao iumi fit for sei Jehovah nao bihaenem diswan?

¹⁸ Staka taem, help wea Jehovah givim hem kam from olketa Christian brata. For tok stret, taem wanfala Christian helpem narawan, God nao bihaenem diswan. Why nao iumi fit for sei olsem? Tufala reason nao stap. First wan, holy spirit bilong God nao muvim hem for givim help. Olketa wea letem holy spirit affectim olketa showimaot olketa frut bilong hem, olsem love and gudfala fasin. (Galatians 5:22, 23) Dastawe, taem wanfala servant bilong God helpem narawan, diswan pruvim spirit bilong Jehovah nao bihaenem datwan. Mek-tu, God wakem iumi long image bilong hem. (Genesis 1:26) Diswan minim iumi savve showimaot olketa fasin bilong hem, olsem kaenfala fasin and wei for garem feeling for narawan. So, taem eni servant bilong Jehovah helpem narawan, really man wea help nao hem Datwan wea iumi showimaot olketa fasin bilong hem, Jehovah.

19. Olsem Bible talem, long wanem wei nao Jehovah givim help thru long olketa Christian brata?

¹⁹ Insaed Bible, hao nao Jehovah givim help thru long olketa Christian brata? Staka taem Jehovah mekem wanfala servant bilong hem for givim kaonsel long narawan, olsem taem Jeremiah givim kaonsel wea sevem laef bilong Baruch. (Jeremiah 45:1-5) Samfala taem, olketa tru worshiper givim material samting for helpem olketa nara Christian brata, olsem taem olketa Christian long Macedonia and Achaia laek tumas for helpem olketa brata long Jerusalem wea garem need. Aposol Paul sei kaenfala fasin olsem hem mekem wei for sei “thankiu long God” hem kamap.—2 Corinthians 9:11.

20, 21. Hao nao olketa brata from Rome strongim Paul?

²⁰ Olketa story abaotem olketa servant bilong Jehovah wea duim samting for strongim and encouragem each other savve barava muvim iumi. Tingim wanfala example bilong samting wea happen long aposol Paul. Taem Paul hem wanfala prisoner, hem gogo for Rome long road wea garem nem Appian Way. Lastfala part long datfala road hem no mas gud, bikos olketa mas go thru long olketa flat ples wea mud and wata stap.a Olketa brata long kongregeson long Rome savve Paul hem kakam. Wanem nao bae olketa duim? Waswe, bae olketa weit long haos bilong olketa long taon go kasem taem Paul arrive, then olketa just go for meetim hem?

²¹ Man wea raetem Bible, Luke, wea gogo witim Paul long datfala taem, hem talem iumi samting wea happen. Hem sei: “From there [Rome] olketa brata, taem olketa herem nius abaotem mifala, kam for meetim mifala long Market bilong Appius and Three Taverns.” Trae tingim samting wea happen. From olketa savve Paul hem kakam, wanfala grup bilong olketa brata lusim Rome for go meetim hem. Samfala long olketa weit long Market bilong Appius, ples wea pipol savve rest taem olketa gogo followim datfala road wea hem stap samting olsem 74 kilometer from Rome. Olketa narawan weit long Three Taverns, wanfala ples for rest wea 58 kilometer from taon bilong Rome. Hao nao diswan affectim Paul? Luke hem sei: “Taem hem lukim olketa, Paul sei thankiu long God and feel strong.” (Acts 28:15) Tingim—taem hem lukim nomoa olketa brata hia wea kam farawe for meetim hem, diswan hem barava strongim and comfortim Paul! And hu nao Paul sei thankiu long hem for disfala help wea hem kasem? Hem thankiu long man wea bihaenem diswan, Jehovah God.

22. Wanem nao yeartext bilong 2005, and wanem nao bae iumi storyim long next article?

²² Tru tumas, olketa samting wea God duim long Bible showimaot Jehovah hem man for helpem iumi. No eniwan savve helpem iumi olsem hem. Dastawe Olketa Jehovah’s Witness bae iusim disfala toktok bilong Psalm 121:2 olsem yeartext for 2005: “Jehovah nao man wea helpem mi.” Bat hao nao Jehovah helpem iumi distaem? Bae iumi storyim diswan long next article.

[Footnote]

Waswe, Iu Remember?

Hao nao Jehovah givim help thru long—

• olketa angel?

• holy spirit?

• Bible?

• olketa nara Christian brata?

[Blurb long page 15]

Yeartext for 2005 hem: “Jehovah nao man wea helpem mi.”—Psalm 121:2.

[Piksa long page 16]

Paul sei thankiu long God for help wea olketa brata long Rome givim long hem