Kwestin From Reader
Wanem samting nao happen wea mekem Judah duim sex witim wanfala woman wea hem tingse hem wanfala jury woman, olsem Genesis 38:15, 16 story abaotem?
Nomata Judah tingse hem duim sex witim wanfala jury woman, really hem no wanfala jury woman. Long Genesis chapter 38, diswan nao samting wea happen.
Bifor firstborn son bilong Judah hem garem eni pikinini witim waef bilong hem Tamar, olketa killim hem dae bikos hem “kamap nogud long eye bilong Jehovah.” (Genesis 38:7) Long datfala taem, olketa followim kastom bilong wei for maritim brata-in-law. Diswan minim sapos wanfala man hem dae and no garem eni pikinini, brata bilong hem mas givim widow bilong brata bilong hem wanfala pikinini. Nomata olsem, Onan, mek-tu son bilong Judah, no want for acceptim datfala responsibility. So, God judgem hem and hem dae. Then Judah sendem dota-in-law bilong hem Tamar go bak long haos bilong dadi bilong hem go kasem taem wea Shelah, mek-thri son bilong hem grow big and fit for maritim Tamar. Bat, taem olketa year go pas, Judah no givim Shelah for maritim Tamar. So taem wife bilong Judah hem dae, Tamar mekem wanfala plan for garem pikinini from Judah, datfala Israelite man wea dadi-in-law bilong hem bifor. Hem duim olsem taem hem werem kaleko olsem wanfala jury woman bilong temple and hem sidaon long saed road wea hem savve Judah bae wakabaot followim.
Judah no savve hu nao Tamar and hem duim sex witim hem. Olsem pei for datwan, Tamar hem kleva bikos hem askem Judah for givim samfala samting bifor hem sleep witim, and bihaen, hem showim olketa samting hia for pruvim hao Judah nao mekem hem babule. Taem evriting hia showaot klia, Judah no blamem Tamar bat hem hambol for sei olsem: “Hem moa raeteous winim mi, bikos mi no givim son bilong mi Shelah long hem.” And “hem no duim sex moa witim hem.”—Genesis 38:26.
Judah duim samting wea no stret taem hem no givim son bilong hem Shelah long Tamar olsem hem bin promisim. Hem duim sex tu witim wanfala woman wea hem tingse hem jury woman bilong temple. Diswan hem againstim purpose bilong God, hem nao for man duim sex only insaed long marit arrangement. (Genesis 2:24) Bat really, Judah hem no duim sex witim wanfala jury woman. Tru nao, hem no savve hao hem changem son bilong hem Shelah for duim brata-in-law marit and kamap dadi bilong tufala son wea twin long wei wea fitim law.
Long saed bilong Tamar, hem no duim dirty fasin. Pipol no ting long tufala son bilong hem wea twin olsem olketa son bilong fornication. Taem Boaz bilong Bethelem duim brata-in-law marit witim datfala Moabite woman Ruth, olketa olo man long Bethlehem tok hae abaotem Perez, son bilong Tamar, taem olketa sei olsem long Boaz: “Letem haos bilong iu kamap olsem haos bilong Perez, wea Tamar bornem from Judah, from pikinini wea Jehovah bae givim long iu from disfala young woman.” (Ruth 4:12) Perez tu hem stap long list bilong olketa laen dadi bilong Jesus Christ.—Matthew 1:1-3; Luke 3:23-33.