Why Iumi Mas Holy

1. Bible buk Leviticus savve helpem iumi long wanem wei?

PIPOL bilong Jehovah mas holy. Long Bible buk Leviticus hem storyim wei for holy staka taem winim eni nara buk long Bible. Sapos iumi minim gud and tinghae long disfala buk Leviticus, datwan bae helpem iumi for showimaot iumi holy, wea minim iumi mas klin saed long worship, samting wea iumi duim, and long physical wei.

2. Wanem nao samfala samting wea stap insaed Bible buk Leviticus?

² Bible buk Leviticus hem part bilong “olketa Holy Raeting” wea “savve teachim pipol.” Moses nao raetem disfala buk. (2 Tim. 3:16) Nem bilong God, Jehovah, hem stap samting olsem tenfala taem insaed evri chapter long disfala buk. Sapos iumi minim gud wanem Leviticus storyim, datwan bae strongim iumi for no duim eni samting wea savve mekem pipol ting daonem nem bilong God. (Lev. 22:32) Disfala toktok, “Mi nao Jehovah” hem stap staka taem long Leviticus, and diswan shud mekem iumi laek for obeyim God evritaem. Long disfala study and long nextfala study, iumi bae storyim samfala nambawan samting long Leviticus wea bae helpem iumi for showimaot iumi holy taem iumi worshipim God.

PIPOL BILONG GOD MAS HOLY

3, 4. Wei wea Aaron and olketa son bilong hem wasim body bilong olketa for kamap klin hem piksarem wanem? (Lukim piksa long start bilong study.)

³ Readim Leviticus 8:5, 6. Jehovah markem Aaron for kamap hae priest long Israel, and olketa son bilong hem for kamap olketa priest long datfala nation. Aaron piksarem Jesus, and olketa son bilong Aaron piksarem olketa anointed Christian. So taem Aaron wasim body bilong hem long wata for kamap klin, wanem nao datwan piksarem? Waswe, datwan piksarem samting wea Jesus mas duim for kamap klin? Nomoa. Jesus hem “holy” and hem no garem sin. (Heb. 7:26; 9:14) Bat taem Aaron wasim body bilong hem and kamap klin, datwan hem piksarem wei wea Jesus hem klin and raeteous. So wei wea olketa son bilong Aaron wasim body bilong olketa for kamap klin hem piksarem wanem?

⁴ Taem olketa son bilong Aaron wasim body bilong olketa for kamap klin, datwan piksarem wei wea God mekem olketa wea bae priest long heven kamap klin. Waswe, taem olketa hia baptaes nao olketa kamap klin? Nomoa. Wei for baptaes hem no aotem sin bilong man, bat hem showimaot man hem dedicatem laef bilong hem long God. “Toktok bilong God” long Bible nao mekem olketa anointed Christian kamap klin, dastawe olketa mas followim olketa teaching bilong Christ long laef bilong olketa. (Eph. 5:25-27) Taem olketa duim datwan, olketa kamap holy and klin. Bat waswe long “olketa nara sheepsheep”?—John 10:16.

5. Hao nao Bible mekem olketa nara sheepsheep kamap holy and klin?

⁵ Olketa son bilong Aaron no piksarem datfala “big crowd” wea garem hope for laef long earth. (Rev. 7:9) Nomata olsem, Bible mekem olketa nara sheepsheep hia for kamap holy and klin. Olketa wea garem hope for laef long earth showimaot faith long wanem Bible talem abaotem sakrifaes bilong Jesus, and datwan mekem olketa laek for worshipim Jehovah “evri day and evri naet.” (Rev. 7:13-15) From Bible gohed for mekem olketa anointed Christian and olketa nara sheepsheep kamap klin, olketa “evritaem showimaot gudfala wei.” (1 Pet. 2:12) Jehovah hapi tumas taem hem lukim pipol bilong hem obeyim Jesus, and olketa klin and garem wan mind!

6. Why nao iumi shud lukluk gud long iumiseleva evritaem?

⁶ Wanem nao iumi lanem from wei wea olketa priest long Israel mas wasim body bilong olketa for kamap klin? Hem mekem iumi laek for klin tu. Iumi keepim ples wea iumi worship hem klin, and lukluk and kaleko bilong iumi tu hem klin. Staka pipol wea iumi studyim Bible witim olketa luksavve long diswan. Nara samting tu, pipol wea worshipim Jehovah mas garem “heart wea klin.” (Readim Psalm 24:3, 4; Isa. 2:2, 3.) So taem iumi worshipim Jehovah, mind bilong iumi, heart bilong iumi, and body bilong iumi tu mas klin. Iumi mas lukluk gud long iumiseleva evritaem. Samfala taem maet iumi need for mekem samfala bigfala change long laef, mekem iumi savve gohed for holy. (2 Cor. 13:5) Olsem example, eni Christian wea baptaes wea lukluk long rabis piksa shud tingim disfala kwestin: ‘Waswe, samting wea mi duim showimaot mi holy?’ Then hem shud askem olketa elder for helpem hem for stop for duim disfala barava nogud samting.—Jas. 5:14.

WEI FOR OBEY SHOWIMAOT IU HOLY

7. Wanem gudfala example nao Jesus showimaot, wea semsem witim olketa priest wea Leviticus 8:22-24 storyim?

⁷ Taem Aaron and olketa son bilong hem startim waka bilong olketa olsem priest, Moses putim blood bilong man sheepsheep long raet ear, long big finger long raet hand, and long big toe long raet leg bilong Hae Priest Aaron, and olketa son bilong hem. (Readim Leviticus 8:22-24.) Disfala samting wea Moses duim witim datfala blood showimaot olketa priest hia bae obeyim evri samting wea God askem olketa for duim. Jesus wea hem hae priest, hem tu obeyim God. Hem showimaot nambawan example for olketa anointed Christian and olketa nara sheepsheep. Hem lisin long wanem God talem, hem duim wanem Jehovah laekem, and hem evritaem followim olketa wei bilong Jehovah.—John 4:31-34.

8. Wanem nao iumi evriwan mas duim?

⁸ Iumi evriwan wea worshipim Jehovah mas followim example bilong Jesus, wea faithful long God evritaem. Iumi mas evritaem obeyim wanem Bible talem bikos iumi no laek for “mekem holy spirit bilong God feel sorre.” (Eph. 4:30) Iumi mas “wakabaot followim stretfala road.”—Heb. 12:13.

9. Wanem nao thrifala brata wea waka witim olketa member bilong Governing Body talem, and hao nao toktok bilong olketa savve helpem iumi for showimaot iumi holy?

⁹ Distaem bae iumi storyim samting wea thrifala brata talem. Olketa hia waka witim olketa member bilong Governing Body for staka year finis. Wanfala brata sei: “Hem barava spesol privilege for waka witim olketa brata hia. Nomata olsem, taem mi waka witim olketa mi luksavve olketa brata hia wea God anointim witim holy spirit olketa no perfect tu. Bat, wanfala goal bilong mi hem for evritaem obeyim olketa wea lead long organization.” Nara brata sei: “Olketa scripture olsem 2 Corinth 10:5 wea story abaotem wei for ‘obeyim Christ’ helpem mi for obey and waka tugeta witim olketa wea lead. Mi laek for obeyim olketa.” Mek-thri brata hem sei: “Sapos iumi lovem wanem Jehovah lovem and heitim wanem hem heitim, and iumi evritaem laek for followim wanem hem talem and mekem hem hapi, iumi mas followim direction wea kam from organization bilong hem and obeyim olketa wea hem iusim for leadim waka bilong hem long earth.” Brata hia tingim yet gudfala example bilong Brata Nathan Knorr, wea acceptim samting wea organization talem insaed long 1925 Watch Tower article wea garem title “Birth of the Nation,” nomata olketa narawan no acceptim. Datfala brata tinghae long wei wea Brata Knorr hem willing for obey. Long bihaen, Brata Knorr kamap wanfala member bilong Govening Body. Sapos iumi ting raonem wanem thrifala brata hia talem, datwan savve helpem iumi for obeyim God and gohed showimaot iumi holy.

OBEYIM LAW BILONG GOD ABAOTEM BLOOD

10. Why nao hem important for obeyim law bilong God abaotem blood?

¹⁰ Readim Leviticus 17:10. Jehovah talem olketa Israelite olketa mas no kaikaim blood bilong olketa man or animal. Olketa Christian tu kasem komand for stap klia long blood bilong olketa man or animal. (Acts 15:28, 29) Iumi no laek for duim eni samting wea bae mekem God barava no hapi long iumi and aotem iumi from kongregeson. Iumi lovem Jehovah and laek for obeyim hem. Nomata sapos laef bilong iumi stap long danger, iumi bae no letem pipol wea no savve long Jehovah and wea no lovem hem, for forcem iumi for no obeyim hem. Maet samfala tok spoelem iumi bikos iumi no laek tekem blood, bat iumi laek for obeyim God. (Jude 17, 18) Wanem nao bae helpem iumi for stap klia long wei for kaikaim blood, and for no tekem blood transfusion?—Deut. 12:23.

11. Samting wea happen long Atonement Day hem helpem iumi for luksavve long wanem?

¹¹ Samting wea hae priest long Israel duim wantaem evri year long Atonement Day (day wea olketa Israelite askem God for forgivim sin bilong olketa), hem helpem iumi for minim tingting bilong God abaotem blood. Jehovah letem olketa Israelite for iusim blood for wanfala spesol reason nomoa. Hem nao for askem Jehovah for forgivim sin bilong olketa mekem olketa savve fren gud witim God. God sei hae priest mas putim lelebet blood bilong buluka and goat front long kava bilong datfala ark bilong agreement. (Lev. 16:14, 15, 19) Bikos long datfala blood, God savve forgivim sin bilong olketa Israelite. Jehovah sei tu, sapos eni Israelite killim wanfala animal for kaikaim, hem mas pourimaot blood bilong animal hia and kavarem witim graon bikos laef bilong datfala animal hem stap long blood bilong hem. (Lev. 17:11-14) Olketa komand hia important. Staka handred year bifor, God stopem Noah and olketa pikinini bilong hem for no kaikaim blood. (Gen. 9:3-6) Wanem nao olketa Christian lanem from diswan?

12. Paul sei wanem nao mas happen mekem God savve forgivim sin bilong man?

¹² Aposol Paul sei blood hem garem paoa for mekem man kamap klin. Hem sei: “Law hem showimaot blood savve mekem klosap evri samting hem klin, and sapos no eni blood hem kapsaet, God no savve forgivim sin bilong pipol.” (Heb. 9:22) Nomata olsem, olketa animal sakrifaes no savve finisim sin. Paul sei olketa sakrifaes hia mekem olketa Israelite luksavve olketa born sin, and olketa needim wanfala sakrifaes wea winim olketa animal sakrifaes, for finisim sin bilong olketa. Bible sei Law bilong Moses “hem no olketa gudfala samting wea bae kam, bat hem shadow nomoa bilong olketa gudfala samting hia.” (Heb. 10:1-4) So hao nao olketa man bae kasem forgiveness for sin bilong olketa?

13. Why nao iumi tinghae long wei wea Jesus givim price bilong blood bilong hem long Jehovah?

¹³ Readim Ephesus 1:7. Jesus sakrifaesim laef bilong hem for evri man, and olketa wea lovem Jesus and Dadi bilong hem barava tinghae long diswan. (Gal. 2:20) Bat samting wea Jesus duim bihaen hem laef bak nao hem mekem iumi kamap free from sin. Bihaen Jesus laef bak, hem go long heven and givim price bilong blood wea hem sakrifaesim long God. (Heb. 9:6, 7, 11-14, 24-28) Samting wea happen long Atonement Day hem piksarem datfala samting wea Jesus duim. Taem hae priest hem go insaed long Barava Holy Rum, hem olsem hem go standap front long God. Insaed datfala rum nao hae priest hem givim blood bilong olketa animal long God. (Lev. 16:11-15) Iumi barava hapi bikos God savve forgivim sin bilong iumi and iumi savve garem klin konsens from iumi showimaot faith long sakrifaes bilong Jesus!

14, 15. Why nao hem important for iumi minim law bilong God abaotem blood and obeyim datwan?

¹⁴ Waswe, olketa samting hia helpem iu for minim why nao Jehovah givim komand for no kaikaim blood bilong eni samting? (Lev. 17:10) Waswe, iu luksavve why nao God ting long blood olsem samting wea holy? Blood hem piksarem laef. (Gen. 9:4) Iumi luksavve iumi shud garem tingting bilong God abaotem blood and iumi shud obeyim komand bilong hem for stap klia long blood. Sapos iumi laek for fren gud witim God, iumi mas showimaot faith long ransom sakrifaes bilong Jesus, and luksavve blood hem barava spesol samting long God.—Col. 1:19, 20.

¹⁵ Maet eniwan long iumi seknomoa kasem samting wea mekem olketa doctor laek givim iumi blood transfusion. Long taem olsem maet iumi need for disaedem tu sapos iumi bae acceptim blood fraction, or eni treatment wea iusim blood bilong iumiseleva. So hem important for iumi prea long Jehovah, duim research, and disaedem wanem iumi bae duim bifor eni samting olsem hem happen long iumi. Datwan bae helpem iumi for obeyim komand bilong God for stap klia long blood. Iumi no laek for duim eni samting wea bae mekem Jehovah feel sorre! Distaem staka doctor and olketa narawan savve encouragem pipol for donatem blood bikos olketa sei datwan bae sevem laef bilong narawan. Bat iumi pipol bilong Jehovah savve Jehovah nao garem raet for talem olketa man hao for iusim blood. Long tingting bilong hem, blood hem samting wea holy. So iumi mas obeyim law bilong hem saed long blood. And tu, taem iumi followim olketa standard bilong hem long laef bilong iumi, datwan showimaot iumi tinghae long blood wea Jesus sakrifaesim. Blood bilong Jesus nomoa savve mekem wei for iumi kasem forgiveness for olketa sin bilong iumi and kasem laef olowe.—John 3:16.

IUMI MAS HOLY BIKOS JEHOVAH HEM HOLY

16. Why nao iumi wea worshipim Jehovah mas holy?

¹⁶ Taem Jehovah mekem olketa Israelite kamap free from Egypt, hem sei long olketa: “Mi nao Jehovah, wea tekem iufala kamaot from Egypt for showimaot mi nao God bilong iufala, and iufala mas holy, bikos mi nao mi holy.” (Lev. 11:45) Jehovah sei olketa Israelite mas holy bikos hem nao hem holy. Iumi wea worshipim Jehovah distaem tu mas holy. Bible buk Leviticus mekem iumi luksavve long diswan.

17. Wanem gudfala samting nao iu kasem from disfala study?

¹⁷ Iumi kasem gud samting from disfala study wea iumi storyim samfala point insaed Bible buk Leviticus. Diswan helpem iumi for tinghae long disfala Bible buk, and for minim gud why iumi mas holy. Wanem nao samfala nara samting wea iumi savve lanem long Leviticus? Hao nao disfala buk savve helpem iumi for worshipim God long wei wea hem laekem? Bae iumi storyim diswan long nextfala study.