Olketa reference for Laef and Ministry Meeting Book—March
MARCH 1-7
GUD SAMTING FROM BIBLE | NAMBAS 7-8
“Olketa Leson Iumi Lanem From Camp blo Israel”
it-1-E 497 ¶3
Kongregeson
Lo Israel olketa markem samfala man for lead. (Esra 10:14) Dastawe olketa “leader blo olketa tribe” givim samfala samting for olketa Levite iusim lo tabernacle bihaen olketa apim datfala tent. (Nambas 7:1-11) And tu, lo taem blo Nehemiah olketa leader hia witim olketa priest and Levite, olketa agree lo wanfala promis and olketa putim spesol mark blo olketa lo datfala agreement for pruvim datwan. (Nehemaea 9:38–10:27) Taem olketa Israelite wakabaot lo wilderness, 250 lo olketa leader hia joinim Korah, Dathan, Abiram, and On for againstim Moses and Aaron. (Nambas 16:1-3) Moses followim direction from Jehovah for chusim 70 lo olketa elder lo Israel wea lead for helpem hem “lukaftarem olketa pipol” mekem hem savve sharem datfala hevi witim olketa leader hia. (Nambas 11:16, 17, 24, 25) Levitikas 4:15 storyim “olketa leader,” and luk olsem olketa man hia hem olketa elder, judge, and man wea lead.—Nambas 1:4, 16; Josua 23:2; 24:1.
it-2-E 796 ¶1
Reuben
Lo camp blo Israel, olketa Reubenite stap lo south saed blo tabernacle witim olketa blo Gad and Simeon. Taem Israel march, thrifala tribe hia, wea tribe blo Reuben nao lead, olketa go followim nara thrifala tribe, wea hem nao Judah, Issachar, and Zebulan. (Nambas 2:10-16; 10:14-20) Sem order nao olketa tribe hia followim taem olketa givim sakrifaes blo olketa lo day wea olketa dedicatem tabernacle.—Nambas 7:1, 2, 10-47.
Samfala Main Point From Buk Bilong Numbers
8:25, 26. For mekem waka bilong olketa Levite go ahed gud, and for respectim olketa wea moa olo, olketa man wea moa olo kasem komand for retire from waka wea olketa mas duim. Bat, olketa savve volunteer for helpem olketa nara Levite. Nomata olketa wea talemaot Kingdom distaem no savve retire from datfala waka, principle bilong disfala law teachim iumi wanfala important leson. Sapos wanfala olo Christian kanduit duim samfala responsibility, hem savve duim olketa waka wea fitim strong wea hem garem.
Olketa Gudfala Point
it-1-E 835
Firstborn
From olketa firstborn son lo Israel bae kamap hed blo olketa famili, olketa hia stand for full nation. Taem Jehovah storyim full nation, hem kolem datwan “firstborn” blo hem bikos lo agreement wea hem mekem witim Abraham. (Eksodas 4:22) From hem sevem datfala nation, Jehovah talem komand for olketa ‘mektambu long evri fasbon boe wetem evri fasbon manwan long olketa animol,’ bikos olketa blo hem. (Eksodas 13:2) So God ownim olketa firstborn son.
MARCH 8-14
GUD SAMTING FROM BIBLE | NAMBAS 9-10
“Hao Jehovah Leadim Pipol blo Hem”
it-1-E 398 ¶3
Camp
Wei wea bigfala nation hia lusim wanfala ples go lo nara ples hem barava showimaot wei for organize. Lo Nambas 33 Moses storyim 40-fala taem wea olketa duim olsem. Taem datfala cloud gohed stap antap lo tabernacle, olketa bae stay nomoa. Taem datfala cloud hem muv, olketa bae muv tu. Hem Jehovah nao wea talem olketa for stap or for muv. (Nambas 9:15-23) Olketa savve blowim tufala trumpet wea olketa wakem lo silver for showimaot hem taem for muv or taem for stap moa. (Nambas 10:2, 5, 6) Olketa savve blowim trumpet lo spesol wei for showimaot hem taem for muv. Firstaem for camp hia muv hem lo “mek-tu year [1512 B.C.E.], lo mek-tu month, lo mek-twelv day.” First thrifala tribe for muv nao hem Judah wea lead, witim Issachar then Zebulan. Olketa hia karem ark blo agreement. Olketa Gershonite and Merarite wea karem samfala part blo tabernacle go followim olketa. Next hem tribe blo Reuben wea lead, and then tribe blo Simeon and Gad. Olketa Kohathite wea karem sanctuary go followim olketa. Next hem tribe blo Ephraim wea lead, witim tribe blo Manasseh and Benjamin. Last sekson for muv, wea olketa hia lo bihaen kam, hem tribe blo Dan wea lead, witim tribe blo Asher and Naphtali. So tufala sekson wea garem staka man nao gaedem full nation lo front and lo bihaen kam.—Nambas 10:11-28.
Waswe, Iu Luksavve Hao God Leadim Iu?
Wanem nao iumi savve duim for showimaot iumi tinghae long wei wea God leadim iumi? Aposol Paul sei: ‘Obeyim and stap anda long olketa wea leadim iufala.’ (Heb. 13:17) Maet samfala taem hem no isi for duim datwan. Tingim sapos iu wanfala Israelite long taem bilong Moses wea wakabaot followim datfala cloud. Gogo datfala cloud stap long wanfala ples and hem no muv. Maet iu start for tingting olsem: Hao long nao bae datfala cloud stap olsem? Waswe, bae hem no muv for wanfala day, wanfala week, or staka month? Maet iu ting olsem, ‘Waswe, mi shud aotem evri samting from basket nao or weit firstaem?’ Maet firstaem, iu aotem nomoa olketa samting wea iu need for iusim. Tu-thri day bihaen iu start for aotem evri samting. Bat then seknomoa cloud start for muv taem iu just finis for aotem evri samting, and iu mas putim bak evri samting insaed basket moa! Maet hem no isi for duim datwan. Nomata olsem, olketa Israelite mas “followim nao” datfala cloud.—Num. 9:17-22.
Taem eni change kamap, wanem nao first samting wea iumi duim? Waswe, iumi kwiktaem “followim” datwan? Or waswe, iumi gohed nomoa for duim samting wea iumi getius long hem? Waswe, iumi followim olketa change wea kamap abaotem hao for conductim Bible study, for preach long pipol wea story long difren languis, for evritaem duim Famili Worship, waka tugeta witim Hospital Liaison Komiti, and for showimaot gudfala example taem iumi hipap long convention? Iumi showimaot iumi tinghae long wei wea God leadim iumi taem iumi acceptim kaonsel tu. Taem iumi disaedem olketa important samting, iumi no depend long savve bilong iumiseleva bat trustim Jehovah and organization bilong hem for leadim iumi. And olsem pikinini hem ran go long dadi and mami for protectim hem long taem bilong bigfala thunder, iumi tu savve kasem protection from organization bilong Jehovah taem iumi kasem olketa bigfala problem.
Olketa Gudfala Point
it-1-E 199 ¶3
Assembly
Why Hem Important for Hipap. Datfala Pasova evri year hem mekhae long why hem important for hipap tugeta for kasem gud samting from arrangement blo Jehovah for feedim iumi lo spiritual wei. Sapos eni man hem klin, and hem no gogo for wanfala ples, hem mas celebratem Pasova. Sapos nomoa, olketa mas killim hem dae. (Nambas 9:9-14) Taem King Hezekiah sendem message for olketa blo Judah and Israel mas kam lo Jerusalem for celebratem Pasova, hem sei: ‘Pipol blo Israel, kambaek long Jehovah . . . Iufala mas no bikhed olsem olketa dadi and wantok bifor. Yufala mas obeim Jehovah. Hemi mekem Tambuhaos blong hem long Jerusalem fo kamap holi moa, an bae hemi stap holi olowe. Yufala kam long Tambuhaos ya fo wosipim hem, mekem hemi no kros moa long yufala. . . . God blong yufala Jehovah, hemi kaen tumas, an hemi save sore long pipol. An sapos yufala kambaek long hem, bae hemi hapi fo mekem yufala stap gudfala moa wetem hem.’ (Mektu Kronikols 30:6-9) Sapos man les for go, datwan bae showimaot hem lusim God. And nomata olketa Christian no duim olketa celebration olsem Pasova, hem fitim hao Paul encouragem olketa for no ting smol long wei for hipap evritaem witim olketa wea worshipim God. Hem sei: “Iumi mas barava tingim narawan mekem iumi savve encouragem olketa for showimaot love and duim olketa gudfala samting. No misstim wei for hipap tugeta olsem samfala savve duim, bat encouragem narawan and gohed for duim datwan moa taem iufala lukim datfala day hem kakam klosap.”—Heb 10:24, 25; lukim KONGREGESON.
MARCH 15-21
GUD SAMTING FROM BIBLE | NAMBAS 11-12
“Why Iumi Mas Stap Klia lo Wei for Komplen?”
No Kamap Pipol wea Herem Nomoa and Forgetim
20 Planti Christian nating duim dirty fasin. Nomata olsem, iumi need for careful for no letem iumi seleva followim wanfala wei wea lead for komplen evritaem wea mekem God no appruvim iumi. Paul warnim iumi: “No letem iumi testim Jehovah, olsem samfala long olketa [Israelite] testim hem, gogo olketa snek killim dae olketa. And no kamap pipol for komplen, olsem samfala long olketa komplen, gogo olketa dae from wanfala trabol.” (1 Corinthians 10:9, 10) Olketa Israelite komplen againstim Moses and Aaron—yes, againstim God tu—taem olketa komplen abaotem manna wea olketa kasem thru long mirakol. (Numbers 16:41; 21:5) Waswe, fornication bilong olketa mekem Jehovah feel nogud winim wei wea olketa komplen? Story bilong Bible showimaot hao planti wea komplen dae taem snek baetem olketa. (Numbers 21:6) Bifor datwan, winim 14,700 wea bighed for komplen olketa dae. (Numbers 16:49) So iumi mas no testim patient fasin bilong Jehovah long wei for no respectim samting wea hem provaedem..
“No Garem Fasin for Komplen”
7 Tingting bilong Israel barava change nao! Long firstaem, wei wea olketa tinghae and thankiu long God for wei wea olketa kamap free from Egypt and sev thru long Red Sea muvim olketa for singim olketa praise long Jehovah. (Exodus 15:1-21) Bat from olketa garem hard living long wilderness and olketa fraetem pipol long Canaan, olketa lusim datfala feeling for tinghae, and start for no satisfae witim datwan. Olketa shud thankiu long God for freedom wea olketa kasem, bat olketa rong for sei olketa no garem wanem olketa needim and olketa blamem hem nao. So fasin for komplen hem showimaot wei for no tinghae long olketa samting wea Jehovah provaedem. Iumi minim nao why hem sei: “Hao long nao bae disfala wicked pipol gohed long komplen bilong olketa againstim mi?”—Numbers 14:27; 21:5.
it-2-E 719 ¶4
Raoa
Komplen. Wei for komplen savve spoelem narawan. No longtaem bihaen olketa Israelite aot from Egypt, olketa komplen againstim Jehovah from olketa no hapi witim wei wea Moses and Aaron leadim olketa. (Eksodas 16:2, 7) Gogo, wei for komplen hia barava mekem Moses for wikdaon and laek for dae. (Nambas 11:13-15) Wei for komplen savve kamap bigfala danger for man wea duim datwan. Jehovah ting lo samting wea olketa talem againstim Moses olsem wanfala komplen abaotem wei wea Hemseleva nao leadim nation. (Nambas 14:26-30) Staka dae from wei wea olketa komplen olsem.
Olketa Gudfala Point
it-2-E 309
Manna
Hem olsem wanem. Manna hem white olsem coriander seed. Hem “luk olsem” bdellium gum, bikos hem lelebet luk olsem wax and hem sheip olsem pearl. Hem garem teist olsem ‘bisket wea garem honey insaed’ or ‘bisket wea swit and garem oil insaed.’ Bihaen man hem hammerim datfala manna, hem savve boelem lo wata or wakem bisket lo hem and bonem.—Eksodas 16:23, 31; Nambas 11:7, 8.
MARCH 22-28
GUD SAMTING FROM BIBLE | NAMBAS 13-14
“Hao Faith Mekem Iumi for No Fraet”
Faith and Fasin for Fraet Long God Hem Mekem Man No Fraet
5 Bat Joshua and Caleb laekem tumas for go insaed long datfala Promis Land. Tufala sei olsem: ‘Olketa Canaanite olsem kaikai for iumi. No eni samting stap for protectim olketa, and Jehovah hem stap witim iumi. No fraet long olketa.’ (Numbers 14:9) Waswe, Joshua and Caleb hope krangge nomoa? Barava nomoa nao! Tufala and evri narafala Israelite lukim taem Jehovah iusim Tenfala Trabol for mek shame long strongfala nation bilong Egypt and olketa god bilong olketa. Then olketa lukim taem Jehovah hem draonem Pharaoh and army bilong hem long Red Sea. (Psalm 136:15) Tru tumas, barava no eni reason stap for tenfala spae and olketa nara pipol wea agree witim olketa for fraet. Jehovah talemaot sorre feeling bilong hem from olketa garem kaen tingting olsem, hem sei: “Hao long nao olketa bae no garem faith long mi nomata olketa lukim evri saen wea mi duim?”—Numbers 14:11.
6 Datfala toktok bilong Jehovah hem showimaot wanem nao really kosim datfala problem. Wei wea pipol hia fraet showimaot olketa no garem faith. Tru nao, faith and fasin for no fraet barava join tugeta, dastawe aposol John raet abaotem spiritual faet wea Christian kongregeson feisim and sei: “Samting wea mekem iumi winim world nao hem faith bilong iumi.” (1 John 5:4) From olketa garem faith olsem Joshua and Caleb, winim six million Witness bilong Jehovah, olketa wea young and olo, strong and wik, olketa preachim gud nius abaotem Kingdom evriwea long world. No eni enemy hem win for stopem disfala maeti army wea nating fraet.—Romans 8:31.
Olketa Gudfala Point
it-1-E 740
Land wea God Givim lo Israel
Land wea God promis for givim lo Israel hem barava gudfala land. Taem Moses sendem go olketa spae for spaem land hia and for tekem kam bak samfala samting, olketa holem kam olketa fig, pomegranate, and olketa bunch grape wea big tumas and wea needim tufala man nao for karem lo wanfala stik! Olketa spae hia fraet and faith blo olketa no strong. Nomata olsem, olketa sei: ‘Mifala faendemaot wea graon blong lan hemi gudfala tumas, an oltaem hemi garem kaikai long hem.”—Nambas 13:23, 27.
MARCH 29–APRIL 4
GUD SAMTING FROM BIBLE | NAMBAS 15-16
“Careful lo Wei for Praod and Trustim Seleva”
Waswe, Jehovah Savve Gud Long Iu?
12 Taem olketa Israelite gogo for Promis Land, Korah tingse wei wea Jehovah leadim olketa hem no stret, so hem laek for changem samfala samting. Gogo 250 Israelite saedem Korah. Olketa tingse Jehovah hapi long wanem olketa duim. Olketa sei long Moses: “Iufala tumas nao, bikos evriwan wea hipap hia olketa holy and Jehovah stap midolwan long olketa.” (Num. 16:1-3) Wanem olketa talem and duim showimaot olketa praod tumas and olketa tingse wei wea olketa duim samting nao stret. Moses talem olketa: “Jehovah bae showimaot klia hu nao olketa bilong hem.” (Readim Numbers 16:5.) Long end bilong next day, Korah and olketa wea saedem hem olketa dae.—Num. 16:31-35.
Waswe, Jehovah Savve Gud Long Iu?
11 Tingim example bilong Moses and Korah abaotem wei for respectim samting wea Jehovah disaedem and arrangement bilong hem. Wanem tufala duim hem barava difren and datwan affectim wei wea Jehovah ting long tufala. Korah hem wanfala Kohathite Levite. Luk olsem hem stap taem Jehovah duim mirakol for olketa Israelite katkros long Red Sea. Maet hem sapotim judgment bilong Jehovah againstim olketa Israelite wea no obey taem olketa stap long Maunt Sinai. And maet hem help tu for karem ark bilong agreement. (Ex. 32:26-29; Num. 3:30, 31) Luk olsem staka Israelite respectim Korah bikos hem faithful long Jehovah for plande year finis.
Olketa Gudfala Point
w98 9/1 20 ¶1-2
Mas Putim Important Samting Firstaem!
Jehovah ting moa hevi long disfala samting. “Go-go,” Bible hem say, “Jehovah say long Moses: ‘Iu mas no fail for killim dae datfala man.’” (Numbers 15:35) Why nao Jehovah tinghevi long wanem datfala man duim?
Pipol hia garem sixfala day for hipimap firewood and for lukaftarem need long saed long kaikai, kaleko, and haos. Mek-seven day hem for spiritual need bilong olketa. Nomata hem no rong for hipimap firewood, hem rong for iusim taem wea man should markem for worshipim Jehovah for duim diswan. Nomata olketa Kristian no stap under long Law Bilong Moses, waswe, disfala samting wea happen no teachim iumi wanfala leson long way for markem olketa important samting distaem?—Philippians 1:10.
APRIL 5-11
GUD SAMTING FROM BIBLE| NAMBAS 17-19
“Evrisamting wea Yufala Nidim Hemi Kam From Mi”
Waswe, Iu Trustim Jehovah for Lukaftarem Iu?
9 Tingim olketa Levite wea no kasem eni pis land. From olketa kasem waka for lead long tru worship, olketa mas trustim Jehovah for lukaftarem olketa and provaedem wanem olketa needim. (Num. 18:20) Nomata iumi no waka long temple olsem olketa priest and Levite bifor, iumi savve trustim Jehovah tu. From end hem klosap tumas, hem barava important for iumi trustim God for lukaftarem iumi.—Rev. 13:17.
Jehovah Nao Lukaftarem Mi
4 Taem Jehovah chusim olketa Levite for waka for hem, hao nao hem lukaftarem olketa? Hem no givim pis land long olketa bat hem givim important waka for olketa duim. Olketa bae “waka olsem priest for Jehovah.” (Josh. 18:7) Numbers chapter 18 helpem iumi for luksavve Jehovah bae provaedem material samting wea olketa Levite needim. (Readim Numbers 18:19, 21, 24.) Olketa Levite kasem “smol haf bilong evri samting wea pipol bilong Israel garem for helpem olketa duim waka bilong olketa.” Diswan minim olketa Israelite mas givim smol haf long kaikai wea olketa harvestim and smol haf long olketa animal wea olketa garem. Then olketa Levite mas givim smol haf long “best samting wea olketa kasem” for helpem olketa wea waka olsem priest. (Num. 18:25-29) Olketa priest kasem tu “olketa present wea holy” wea olketa Israelite givim long God long ples for worship. So olketa priest savve trustim Jehovah bae provaedem wanem olketa needim.
Olketa Gudfala Point
g02-E 6/8 14 ¶2
Solt—Important Samting for Garem
Gogo, solt savve piksarem wei wea samting hem stedy and bae no change. Dastawe lo Bible olketa savve kolem agreement, “agreement lo solt.” Plande taem olketa wea insaed agreement hia savve kaikai tugeta, and putim solt long datfala kaikai olsem saen for showimaot datfala agreement hem start. (Nambas 18:19) Lo Law blo Moses, olketa savve putim solt lo olketa sakrifaes wea olketa bonem lo altar for showimaot datfala meat hem no rotten.
APRIL 12-18
GUD SAMTING FROM BIBLE | NAMBAS 20-21
“Gohed Hambol Nomata Iu Kasem Pressure”
Traem Best for Hambol and Mekem Jehovah Hapi
19 Bae hem helpem iumi for no mekem staka mistek. Tingim moa example bilong Moses. For staka year hem gohed hambol and mekem Jehovah hapi. Then, klosap long end bilong 40 year wea olketa stap long wilderness, Moses no showimaot hambol fasin. Sista bilong hem, wea luk olsem hem nao help for sevem laef bilong hem long Egypt, hem just dae and olketa berem long Kadesh. And long datfala taem olketa Israelite komplen moa and sei no eniwan lukaftarem olketa gud. Olketa komplenim Moses bikos no eni wata. Nomata Jehovah iusim Moses for duim staka mirakol and nomata Moses evritaem showimaot hem tingim olketa pipol wea hem leadim, olketa gohed komplenim hem. Olketa no komplen bikos no eni wata nomoa, bat olketa sei Moses nao mekem olketa no garem eni wata for drink.—Num. 20:1-5, 9-11.
Traem Best for Hambol and Mekem Jehovah Hapi
20 From Moses barava kros tumas hem no hambol nao. Winim wei for garem faith and tok long datfala ston olsem Jehovah komandim hem, Moses tok kros long olketa pipol and hem mekhae long hemseleva. Then, hem whipim datfala ston tufala taem and wata kamaot from. Wei for praod and kros mekem hem for duim wanfala serious mistek. (Sams 106:32, 33) From Moses no hambol for lelebet taem hia, Jehovah no letem hem for go long Promis Land.—Nambas 20:12.
21 Iumi savve lanem olketa nambawan leson from disfala example. First samting, iumi mas evritaem waka hard for keepim wei for hambol. Sapos iumi no hambol for lelebet taem, wei for praod bae kamap and datwan mekem iumi for talem and duim samting wea no stret. Mek-tu samting, wei for stress and wari savve mekem hem no isi for iumi gohed hambol. So iumi mas traem best for hambol, nomata taem iumi stress and wari.
w09-E 9/1 19 ¶5
Judge wea Strong for Duim Stret Samting
First samting, God no talem Moses for story long olketa pipol or for judgem olketa wea bighed. Mek-tu samting, Moses and Aaron no givim glory long God. God sei long tufala: “Iutufala no showimaot faith long mi.” (Verse 12) Wei wea Moses hem sei “mitufala bae mekem wata for kamaot,” mekem hem for here olsem Moses and Aaron nao givim datfala wata, no God. And mek-thri samting, panis wea God givim long tufala hem semsem witim panis wea hem givim finis long olketa narawan bifor. God hem stopem finis olketa Israelite wea bighed for go insaed long Canaan, so hem duim sem samting long Moses and Aaron. (Nambas 14:22, 23) Mek-foa samting, Moses and Aaron leadim olketa Israelite. Olketa wea God givim bigfala responsibility long olketa mas ansa long hem for samting wea olketa duim.—Luke 12:48.
Olketa Gudfala Point
Garem Sem Tingting Olsem Jehovah Abaotem Olketa wea Wik
12 Hem fitim for Jehovah stretawe panisim Aaron taem hem duim olketa mistek hia. Bat Jehovah luksavve Aaron hem no wanfala nogud man nomata hem wik samfala taem. Hem mekem samfala mistek bikos long olketa hard samting wea hem mas deal witim and hem followim rong tingting bilong narawan. Nomata olsem, Aaron willing for talemaot sin bilong hem, and acceptim kaonsel wea Jehovah givim long hem. (Ex. 32:26; Num. 12:11; 20:23-27) Aaron lovem Jehovah and hem repent. So Jehovah forgivim hem. Dastawe staka handred year bihaen, man wea raetem psalm sei Aaron and famili bilong hem faithful for worshipim Jehovah.—Ps. 115:10-12; 135:19, 20.
APRIL 19-25
GUD SAMTING FROM BIBLE | NAMBAS 22-24
“Jehovah Mekem Wanfala Curse for Kamap Blessing”
Talemaot “Gud Nius Abaotem Jesus”
5 Pipol spoelem olketa Christian distaem tu bat datwan nating stopem olketa for preach. Nomata pipol putim olketa Christian long prison or forcem olketa for go stap long nara kantri, datwan givim chance long olketa for preach long pipol long olketa ples hia. Olsem example, nomata staka Jehovah’s Witness stap long olketa raf prison long taem bilong World War II, olketa gohed preach long narawan. Wanfala Jew wea meetim olketa Witness long there sei: “Wei wea olketa prisoner wea Jehovah’s Witness gohed strong and no fraet mekem mi for luksavve wanem olketa bilivim hem kam from Bible. So mi tu kamap wanfala Witness.”
it-2-E 291
Karangge
Man wea Againstim Jehovah Hem Karangge. Datfala profet Balaam hem karangge tumas for trae talem profesi againstim Israel mekem hem savve kasem selen from Balak, wea hem King blo Moab. Jehovah stopem hem for duim datwan. Aposol Peter storyim Balaam, and sei: “Wanfala donkey wea toktok olsem man hem stopem disfala profet for no duim datfala krangge samting.” Greek word for karangge hia hem pa·ra·phro·niʹa, wea savve minim “mentol.”—2Pe 2:15, 16; Nambas 22:26-31.
Olketa Gudfala Point
Samfala Main Point From Buk Bilong Numbers
22:20-22—Why nao Jehovah barava kros long Balaam? Jehovah talem profet Balaam hao hem shud no cursim olketa Israelite. (Numbers 22:12) Bat, datfala profet min for cursim Israel taem hem go witim olketa man bilong Balak. Balaam laek for mekem king bilong Moab hapi and kasem reward from hem. (2 Peter 2:15, 16; Jude 11) Nomata Balaam no cursim, bat mas blessim Israel, hem still laekem king for tinghae long hem so hem plan for iusim olketa woman wea worshipim Baal for switim olketa man bilong Israel. (Numbers 31:15, 16) So, reason why God barava kros long Balaam, hem from greedy fasin bilong hem.
APRIL 26–MAY 2
GUD SAMTING FROM BIBLE | NAMBAS 25-26
“Waswe, Samting wea Wanfala Man Duim Savve Changem Wanfala Situation?”
“Ranawe From Eni Samting wea Switim Iufala for Durong”
TINGIM man wea go long ples wea hem savve fishing olowe. Hem savve finis wanem kaen fish nao hem laekem. Hem chusim bait and putim long huk. Then hem torowem fishing laen long sea. No longtaem nomoa, hem feelim samting pullim laen. So hem isisi pullim kam. Taem hem lukim fish wea hem pullim, hem hapi nao bikos hem savve hem iusim stretfala bait.
2 Datfala tokpiksa mekem iumi tingim samting wea happen long year 1473 B.C.E. Balaam ting raonem wanem kaen bait nao for hem iusim. Hem no laek kasem fish bat hem laek switim pipol bilong God wea stap long olketa flat ples long Moab taem olketa klosap kasem Promis Land. Balaam sei hem profet bilong Jehovah, bat hem greedy man nomoa wea nara man nao peim hem for talem toktok for mekem trabol kasem olketa Israelite. Nomata olsem, Jehovah mekem Balaam for talem nomoa toktok for blessim olketa Israelite. Balaam laekem tumas for kasem selen wea olketa promis for givim hem, so long tingting bilong hem, sapos hem savve switim pipol bilong God for duim bigfala sin, then maet God talem toktok for mekem trabol kasem olketa. So Balaam iusim wanfala bait for switim olketa Israelite, wea hem nao olketa young gele long Moab wea luk naes tumas.—Numbers 22:1-7; 31:15, 16; Revelation 2:14.
“Ranawe From Eni Samting wea Switim Iufala for Durong”
4 Why nao olketa Israelite kasem barava nogud samting olsem? Bikos staka Israelite garem nogud heart from olketa lusim Jehovah. Olketa lusim Jehovah nomata hem nao tekem olketa go aot from Egypt, givim kaikai long olketa taem olketa stap long wilderness, and tekem olketa go long Promis Land. (Hebrew 3:12) Aposol Paul tingim datwan and hem sei: “Iumi mas no durong tu olsem samfala long olketa duim, gogo 23,000 long olketa dae insaed wanfala day.”—1 Corinth 10:8.
Olketa Gudfala Point
it-1-E 359 ¶1-2
Spialaen
So luk olsem olketa divaedem datfala land followim tufala samting. Olketa divaedem followim samting wea olketa lot (ston wea olketa iusim olsem daes) showimaot, and followim big blo each tribe. Maet datfala lot showim nomoa wanfala area wea tribe bae kasem. Maet hem showim wanfala sekson blo datfala land olsem lo North, or South, east or West, maet lo wanfala area wea saedem sea, or lo olketa maunten. Samting wea lot showimaot hem kam from Jehovah so datwan bae stopem wei for wanfala tribe jealous lo nara tribe, or wei for raoa. (Provebs 16:33) So lo wei olsem, Jehovah hem savve mek sure samting wea each tribe kasem hem bae followim profesi wea Jacob talem for olketa lo Jenesis 49:1-33, bifor hem dae.
Bihaen datfala lot hem showim area for wanfala tribe, olketa mas disaedem wea nao for putim olketa spialaen followim size blo datfala tribe. God hem sei: “Bae yufala mas divaedem olketa lan ya go long olketa traeb blong yufala, falom namba blong olketa. Bikfala lan hemi mas go long bikfala traeb, an smolfala lan hemi mas go long smolfala traeb. An yufala mas yusim tufala spesol ston fo divaedem olketa lan ya, an long wei wea tufala ston i foldaon hem nao wei wea evri traeb save garem lan blong hem.” (Nambas 33:54) Olketa bae followim samting wea lot hem showimaot, bat olketa savve changem spialaen followim big blo tribe. Dastawe, taem olketa lukim land blo Judah hem big tumas, olketa givim samfala sekson blo datfala land lo tribe blo Simeon.—Josua 19:9.