Olketa Reference for Laef and Ministry Meeting Buk
MAY 2-8
GUD SAMTING FROM BIBLE | FAS SAMUEL 27-29
“Hao David Planim Olketa Faet”
it-1-E 41
Achish
Taem David ranawe from Saul, tufala taem nao hem haed lo area wea King Achish rul ovarem. Lo firstaem wea hem go lo there, Achish tingse David hem enemy nao, so David act olsem hem mentol mekem Achish no killim hem dae. (Fas Samuel 21:10-15; Ps 34:Sup; 56:Sup, NWT) Lo mek-tu taem, David witim 600 man wea sapotim hem witim evri famili blo olketa kam stap lo there, so Achish markem olketa for go stap lo Ziklag. Olketa stap lo there for 16-fala month. Taem olketa stap lo there, David witim olketa man hia savve go evritaem for attakim olketa Geshurite, Girzite, and Amalekite, bat David mekem Achish for tingse olketa attakim olketa taon lo Judah. (Fas Samuel 27:1-12) From Achish barava bilivim samting wea David talem, hem markem David for kamap security blo hem taem olketa Philistine redi for attakim King Saul. Bat olketa bigman blo olketa Philistine no trustim David and forcem Achish for sendem David and olketa man wea sapotim hem go bak lo Ziklag. (Fas Samuel 28:2; 29:1-11) Gogo David kamap king and hem faet againstim Gath, bat luk olsem Achish hem no dae lo datfala faet. Hem laef go kasem taem wea Solomon hem rul.—Fas Kings 2:39-41; lukim GATH.
Hao Nao Iufala Young Brata Savve Kasem Olketa Spiritual Goal?
8 Tingim nara samting wea David mas deal witim. Bihaen Samuel anointim David for king, hem mas weit for staka year bifor hem kamap king lo Judah. (Fas Samuel 16:13; Mektu Samuel 2:3, 4) Wanem nao helpem David for patient for staka year olsem? Hem iusim datfala taem for duim samting and no stap nating nomoa. For example, taem David ranawe and stap lo ples blo olketa Philistine, hem faetem olketa enemy blo Israel. From hem duim datwan, olketa enemy no tekovarem land blo Judah.—Fas Samuel 27:1-12.
it-2-E 245 ¶6
Laea
Hem tru, Bible showimaot hem barava rong for laea witim goal for spoelem samwan, bat datwan no minim iumi mas talem tru samting lo pipol wea no fit for herem datwan. Jesus Christ hem sei: “No givim olketa samting wea holy long olketa dog, and no torowem olketa pearl long olketa pigpig, nogud olketa purubutim olketa pearl hia then tane kam and attakim iufala.” (Mt 7:6) Dastawe samfala taem Jesus no talem evri information abaotem samting or hem no barava ansarem samfala kwestin mekem hem savve misstim wanfala trabol. (Mt 15:1-6; 21:23-27; Joh 7:3-10) Luk olsem Abraham, Isaac, Rahab, and Elisha tu no talem evri information lo pipol wea no worshipim Jehovah for olketa sem reason wea Jesus duim datwan.—Jenesis 12:10-19; chap 20; 26:1-10; Josua 2:1-6; Jas 2:25; Mektu Kings 6:11-23.
Faendem Gudfala Point
w10-E 1/1 20 ¶5-6
Waswe, Olketa wea Dae Finis Savve Helpem Olketa wea Laef?
Ting raonem diswan. Bible hem sei taem man hem dae hem “go bak lo graon” and “tingting blo hem finis.” (Psalm 146:4, NWT) Saul and Samuel savve finis God hem tambuim wei for iusim olketa kastom man. Lo bifor, Saul hem barava strong for stopem evrikaen wei for duim spiritism lo Israel!—Levitikas 19:31.
Tingim olketa kwestin hia: Sapos Samuel hem laef yet olsem wanfala spirit, waswe, bae hem brekem law blo God and duim samting wea woman for duim spiritism hem talem mekem hem savve story witim Saul? Jehovah hem lusim Saul finis and no laek story witim hem. So waswe, wanfala woman for duim spiritism savve forcem Olmaeti God for iusim Samuel wea dae finis, for story witim Saul? Nomoa. Hem klia, disfala “Samuel” hem no datfala faithful profet blo God wea dae finis, bat hem wanfala demon blo Satan wea act olsem hem Samuel.
MAY 9-15
GUD SAMTING FROM BIBLE | FAS SAMUEL 30-31
“Depend lo Jehovah for Strongim Iu”
Fraet Long Jehovah and Bae Iu Hapi!
12 Wei wea David fraet long Jehovah hem no just stopem hem for duim samting wea no stret, bat hem strongim hem for no hol bak for duim wise samting long olketa hard taem. For wan year foa month, David and olketa man bilong hem haed from Saul long Ziklag wea stap long land bilong olketa Philistine. (1 Samuel 27:5-7) Wantaem, taem olketa man hia go, olketa Amalekite kam and bonem taon bilong olketa and tekem evri waef, pikinini, and animal bilong olketa. Taem David and olketa man bilong hem kam bak and lukim samting wea happen, evriwan krae. Kwiktaem nomoa olketa finis for sorre and kamap kros and olketa man bilong David sei bae olketa sutim hem witim ston for killim hem dae. Nomata David wari tumas, hem no lus hope. (Proverbs 24:10) Wei wea hem fraet long God muvim hem for depend long Jehovah, and hem ‘kasem strong from Jehovah.’ God helpem David and olketa man bilong hem for winim olketa Amalekite and tekem bak evri samting.—1 Samuel 30:1-20.
Jehovah Protectim Iumi for Sevem Iumi
14 David kasem staka hard taem and sorre samting long laef bilong hem. (1 Sam. 30:3-6) Bible showimaot Jehovah savve long feeling bilong David. (Readim Psalm 34:18; 56:8.) God savve long feeling bilong iumi tu. God hem savve taem iumi “sorre tumas” and “barava wikdaon.” Diswan comfortim iumi, olsem hem comfortim David tu, wea sei olsem: “Mi hapi tumas long wei wea iu kaen long mi. Iu savve long samting wea spoelem mi and hard taem wea kasem mi.” (Ps. 31:7) Jehovah no lukim nomoa hard taem wea kasem iumi bat hem comfortim and encouragem iumi for helpem iumi gohed strong. Wanfala wei wea hem duim diswan hem long olketa meeting.
Faendem Gudfala Point
Olketa Main Point From Buk Bilong First Samuel
30:23, 24. Disfala samting wea olketa disaedem, wea kam from principle long Numbers 31:27, hem showimaot hao Jehovah hem tinghae long olketa wea duim waka for givim sapot insaed kongregeson. So nomata wanem nao iumi duim, iumi mas “duim witim full soul for Jehovah, and no for man.”—Colossians 3:23.
MAY 16-22
GUD SAMTING FROM BIBLE | MEKTU SAMUEL 1-3
“Wat Nao Iumi Lanem From Datfala Singsing ‘Bou’?”
Honorim Olketa wea Kasem Paoa Ovarem Iu
9 Waswe, David hem barava wari taem olketa deal nogud witim hem? ‘Samfala . . . ruler stap wea lukaotem soul bilong mi,’ David hem krae olsem long Jehovah. (Psalm 54:3) Hem pourimaot heart bilong hem long Jehovah: “Sevem mi from olketa enemy bilong mi, O God bilong mi . . . Olketa strong wan attakim mi, mi nating againstim olketa, no eni sin long saed bilong mi, O Jehovah. Nomata no eni rong, olketa ran and stap redy. Kam taem iu herem kol bilong mi and lukim.” (Psalm 59:1-4) Waswe, enitaem iu feel olsem—iu no duim eni rong long wanfala man wea garem paoa, bat hem go ahed for givim iu hardfala taem? David nating fail for showimaot respect long Saul. Long dae bilong Saul, David no hapi, bat hem raetem wanfala song bilong sorre: “Saul and Jonathan, tufala wea fit for kasem love and olketa gud wan long laef bilong tufala . . . Tufala fast winim olketa eagle, tufala strong winim olketa lion. Iufala olketa dota bilong Israel, krae for Saul.” (2 Samuel 1:23, 24) Barava gudfala example bilong trufala respect for man wea Jehovah anointim, nomata Saul hem duim rong samting long David!
Wei for No Faithful Kamap Big Long Olketa Last Day!
8 Bible storyim tu example bilong staka pipol wea faithful. Bae iumi storyim tufala example and wanem iumi savve lanem from olketa. First wan hem Jonathan wea faithful for sapotim David. From Jonathan hem firstborn son bilong King Saul, fitim hem nao for kamap nextfala king long Israel. Bat Jehovah chusim David nao for kamap king. Jonathan respectim wanem God disaedem and hem no jealous long David. Jonathan “barava fren gud witim David” and hem promis for faithful for sapotim hem. Jonathan givim David kaleko, sword, bow, and belt bilong hem wea showimaot hem ting long David olsem man wea bae kamap king. (1 Sam. 18:1-4) Jonathan duim best bilong hem for sapotim David. Hem protectim David nomata datwan minim Saul bae laek killim dae Jonathan. Hem sei long David: “Iu nao bae king long Israel, and mi bae sapotim rul bilong iu.” (1 Sam. 20:30-34; 23:16, 17) Dastawe, taem Jonathan dae David singim wanfala song wea showimaot hem lovem Jonathan and hem sorre tumas from hem dae.—2 Sam. 1:17, 26.
Faendem Gudfala Point
it-1-E 369 ¶2
Brata
“Brata” hem word wea iumi savve iusim tu for olketa wea garem olketa sem goal and tingting olsem iumi. Olsem example, King Hiram lo Tyre sei King Solomon hem brata blo hem, no just from tufala evriwan king nomoa, bat maet bikos tufala garem sem goal for provaedem timba and olketa nara samting for temple tu. (Fas Kings 9:13; 5:1-12) David hem sei, “Hem barava gud tumas for olketa brata stap gud tugeta lo wan mind!” Diswan showimaot pipol savve stap gud tugeta and garem wan mind and peace nomata olketa no olketa really brata. (Ps 133:1, NWT) David and Jonathan no tufala really brata, bat David sei Jonathan hem brata blo hem bikos tufala lovem each other and interest lo olketa sem samting. (Mektu Samuel 1:26) Iumi fit for sei tufala man olketa brata sapos tufala garem sem wei and tingting, nomata sapos wei blo tufala hem nogud.—Provebs 18:9.
MAY 23-29
GUD SAMTING FROM BIBLE | MEKTU SAMUEL 4-6
“Mas Fraet for Mekem Jehovah No Hapi”
Olketa Main Point From Buk Bilong Second Samuel
6:1-7. Nomata David tingse hem duim stret samting, wei wea hem trae for muvim Ark antap long wanfala wagon hem againstim law bilong God and hem fail. (Exodus 25:13, 14; Numbers 4:15, 19; 7:7-9) And tu, wei wea Uzzah trae for holem Ark showimaot hao nomata man tingse hem duim gud samting, datwan no savve changem samting wea God askem.
Jehovah Hem Evritaem Duim Stret Samting
20 Tingim hao Uzzah shud savve finis long Law. Ark hem piksarem wei wea Jehovah hem stap witim pipol bilong hem. Law talem stret hao olketa wea Jehovah markem nomoa savve tasim, and eniwan wea no obeyim datwan bae dae. (Numbers 4:18-20; 7:89) Dastawe, for muvim datfala Ark hem serious samting. Luk olsem Uzzah hem wanfala Levite (nomata hem no wanfala priest), so hem shud savve finis long Law. And tu, samfala year bifor, olketa muvim datfala ark go long haos bilong dadi bilong hem for keepim sef. (1 Samuel 6:20–7:1) Hem stap long there for samting olsem 70-fala year, go kasem taem David disaed for muvim. So start from taem hem pikinini, masbi Uzzah savve finis long law saed long datfala Ark.
Jehovah Hem Evritaem Duim Stret Samting
21 Olsem iumi storyim finis, Jehovah hem lukim heart bilong man. From Bible sei datfala samting wea Uzzah duim “barava no showimaot respect,” maet Jehovah hem luksavve long wanfala selfish reason wea muvim Uzzah, nomata Bible no storyim datwan. Waswe, Uzzah hem wanfala man wea maet praod and garem fasin for duim samting wea hem shud no duim? (Proverbs 11:2) Waswe, hem tinghae long hemseleva from wei wea famili bilong hem keepim datfala Ark wea hem leadim front long evri pipol? (Proverbs 8:13) Waswe, Uzzah no garem eni faith hao Jehovah savve stopem datfala holy box for foldaon? Nomata wanem nao ansa for olketa kwestin hia, iumi savve sure Jehovah hem duim stret samting. Luk olsem hem luksavve long samting long heart bilong Uzzah wea muvim Hem for judgem hem kwiktaem.—Proverbs 21:2.
Faendem Gudfala Point
w96 4/1 29 ¶1
Torowem Hevi Bilong Iu Long Jehovah Evritaem
David, from hem king, hem karem samfela responsibility for diswan. Samting wea hem duim showim aot hao olketa wea fren gud withim Jehovah savvy garem rong tingting samfela taem tu taem badfela samting kamap. Firstaem David feel kros for gud. Then hem start for fraet. (2 Samuel 6:8, 9) Way wea hem fren gud withim Jehovah hem barava kasem test nao. Diswan hem wanfela taem wea luk olsem hem fail for torowem hevi bilong hem long Jehovah, taem hem no followim olketa komand bilong hem. Waswe, maet datwan kasem iumi samfela taem tu? Waswe, iumi savvy blame-im Jehovah for olketa problem wea kamap from iumi no followim olketa instruction bilong hem?—Proverbs 19:3.
MAY 30–JUNE 5
GUD SAMTING FROM BIBLE | MEKTU SAMUEL 7-8
“Jehovah Mekem Wanfala Covenant Witim David”
‘Kingdom Bilong Iu Bae Stap Strong for Olowe’
Jehovah tinghae long wanem David laek for duim, bikos datwan nao samting wea kamaot from heart bilong hem. God mekem covenant witim David bikos David tinghae and lovem trufala worship. Followim wanem Bible profesi talem finis, God promisim hao wanfala king bae kamap from laen bilong David wea bae rul for olowe. Nathan storyim promis bilong God long David taem hem sei: “Haos and kingdom bilong iu bae barava strong, rul bilong iu bae strong tumas.” (Verse 16) Olsem disfala covenant talem, hu nao bae Rul for olowe?—Psalm 89:20, 29, 34-36.
‘Kingdom Bilong Iu Bae Stap Strong for Olowe’
Jesus from Nazareth hem kam from laen bilong David. Bifor Jesus hem born, wanfala angel hem sei: “Jehovah God bae mekem hem king olsem dadi bilong hem, David, and bae hem king ovarem pipol bilong Jacob for olowe, and kingdom bilong hem bae no savve finis.” (Luke 1:32, 33) So disfala covenant witim David hem kamap tru long Jesus Christ. Jesus garem raet for rul for olowe, no from olketa man chusim hem for rul, bat from God nao promisim. Hem gud for iumi tingim hao olketa promis bilong God kamap tru evritaem.—Isaiah 55:10, 11.
Garem Strongfala Faith Long Kingdom
14 Jehovah talem wanfala promis long King David. Datfala promis hem agreement wea God mekem witim David. (Readim 2 Samuel 7:12, 16.) Jehovah promisim David bae Messiah kam from laen bilong hem. (Luke 1:30-33) Taem Jehovah duim datwan, hem helpem pipol for luksavve Messiah bae kam from laen bilong David. Jehovah sei datwan wea kam from laen bilong David bae “garem raet” for kamap King long datfala Messiah Kingdom. (Ezek. 21:25-27) Rul bilong David bae “gohed for olowe” bikos Jesus, wea kam from laen bilong David, bae “laef for olowe. Rul bilong hem bae stap for olowe, olsem sun hem stap for olowe.” (Ps. 89:34-37) Iumi sure olketa gud samting wea datfala Kingdom bae duim bae no savve finis, and no enitaem rul bilong Jesus bae duim nogud samting!
Faendem Gudfala Point
it-2-E 206 ¶2
Olketa Last Day
Profesi blo Balaam. Bifor olketa Israelite go insaed lo Promis Land, datfala profet Balaam story lo Balak, wea hem nao king blo Moab, and hem sei: “Mi laek talem long iu evri samting wea pipol blo Israel bae duim long olketa pipol blo iu lo end blo olketa day. . . . Wanfala star bae kamap from laen blo Jacob, and wanfala king bae kamap lo Israel. And hem bae brekem hed blo Moab and blo evri man wea faet lo war.” (Nu 24:14-17, NWT) Profesi hia kamap tru taem King David, wea hem nao datfala “star,” hem win lo faet againstim olketa Moabite. (Mektu Samuel 8:2) So luk olsem “end blo olketa day” hem start taem David kamap king. From David hem piksarem Jesus taem hem rul olsem king, profesi hia hem kamap tru lo Jesus tu lo taem wea hem win againstim olketa enemy blo hem.—Aesaea 9:7; Sams 2:8, 9.
JUNE 6-12
GUD SAMTING FROM BIBLE | MEKTU SAMUEL 9-10
“David Showimaot Loyal Love”
Tru Nao, Iu Savve Hapi
“David hem raet: ‘Hapi nao man wea tingim olketa man nating; long taem bilong bigfala trabol Jehovah bae sevem hem. Jehovah seleva bae protectim hem and keepim hem laef. Bae hem hapi.’ (Psalm 41:1, 2) Wanfala example wea showimaot stretfala wei for ting long olketa man nating, hem loving kea wea David showim long Mephibosheth, datfala cripple son bilong fren bilong David, Jonathan.—2 Samuel 9:1-13.
Olketa Main Point From Buk Bilong Second Samuel
9:1, 6, 7. David keepim promis bilong hem. Iumi tu mas trae for duim samting wea iumi promis for duim.
Olketa Bin Deal Witim Nila Long Body
10 Samfala year bihaen, King David, from bigfala love for Jonathan, showimaot loving-kaeness long Mephibosheth. David givim evri property bilong Saul long hem and markem servant bilong Saul, Ziba for lukaftarem land hia. David sei olsem tu long Mephibosheth: ‘Iu bae kaikaim bred long tebol bilong mi evritaem.’ (2 Samuel 9:6-10) Iumi sure loving-kaeness bilong David hem barava comfortim Mephibosheth and help for daonem pain bilong wei wea hem disable. Datwan hem gudfala example! Iumi shud showimaot kaenfala fasin long olketa wea mas go ahed for deal witim nila long body.
Faendem Gudfala Point
it-1-E 266
Beard
Staka pipol lo taem blo Bible, and olketa Israelite tu, ting lo beard olsem samting wea mekem man fit for kasem respect and olketa tinghae lo datwan. Law wea God givim lo Israel stopem olketa for no katem hair wea stap midolwan ear and eye, witim end blo beard tu. (Levitikas 19:27; 21:5) Masbi hem givim datfala law bikos hem kastom blo samfala heathen lo datfala taem for savve katem beard olsem.
JUNE 13-19
GUD SAMTING FROM BIBLE | MEKTU SAMUEL 11-12
“No Letem Feeling for Laek Duim Olketa Nogud Samting Kontrolem Iu”
Stap Klia lo Olketa Trap blo Satan!
10 Narawan wea kamap greedy hem King David. Jehovah givim David staka samting, olsem riches, hem mekem David kamap king, and hem helpem David for winim olketa enemy. David tinghae lo wanem Jehovah duim for hem and hem sei olketa samting hia “barava plande tumas.” (Sams 40:5) Bat gogo David no satisfae lo wanem Jehovah givim and hem laekem samfala samting moa. Nomata David garem staka waef finis, hem kavetem waef blo Uriah, Bath-sheba. David durong witim Bath-sheba and hem kamap babule. Then David duim samting wea nogud winim datwan. Hem mekem plan for olketa killim dae Uriah. (Mektu Samuel 11:2-15) Nomata David faithful lo Jehovah for staka year finis, hem foldaon lo trap for greedy and hem kasem nogud samting from datwan. Bat David luksavve hem duim sin and repent from datwan. Hem hapi nao Jehovah forgivim hem!—Mektu Sam. 12:7-13.
Why Nao Iumi Willing for Stap Anda lo Jehovah, and Hao Nao Iumi Savve Duim Datwan?
15 Jehovah appointim David olsem hed, no for famili blo hemseleva nomoa bat for full nation blo Israel tu. Olsem wanfala king, David garem bigfala paoa for disaedem samting. Bat samfala taem hem iusim datfala paoa lo rongfala wei, and duim olketa serious mistek. (Mektu Samuel 11:14, 15) Bat hem showimaot hem stap anda lo Jehovah taem hem acceptim discipline. Hem prea and barava talemaot full heart blo hem lo Jehovah. And hem traem best for followim kaonsel from Jehovah. (Sams 51:1-4) And tu, hem hambol for acceptim gudfala advaes no from olketa man nomoa, bat from olketa woman tu. (Fas Samuel 19:11, 12; 25:32, 33) David lane from olketa mistek blo hem, and hem mekem wei for worshipim Jehovah kamap main samting lo laef blo hem.
Letem Olketa Law and Principle Bilong God Trainim Konsens Bilong Iu
7 Iumi no need for brekem olketa law bilong God and kasem nogud samting from datwan bifor iumi fit for lanem wanem hem stret or no stret. Iumi savve lane from olketa wea duim mistek bifor wea Bible story abaotem. Provebs 9:9 hem sei: “Tisim waes man bae hemi waes go moa.” Olketa teaching wea kam from God savve barava helpem iumi, olsem wei for lane from example bilong olketa man insaed Bible. Olsem example, tingim olketa nogud samting wea David kasem taem hem no followim law bilong Jehovah and hem durong witim Bathsheba. (Mektu Samuel 12:7-14) Taem iu readim and ting raonem disfala story, askem iuseleva: ‘Hao nao David fit for misstim olketa problem hia? Wanem nao bae mi duim sapos mi kasem sem test olsem David? Waswe, bae mi olsem David or bae mi ranawe olsem Joseph?’ (Jenesis 39:11-15) Taem iumi ting raonem nogud samting wea kamaot from wei for duim sin, datwan strongim iumi for “heitim olketa rabis samting.”
Faendem Gudfala Point
it-1-E 590 ¶1
David
Bat Jehovah hem lukluk kam and hem no letem David for haedem diswan. Hem no letem olketa judge for deal witim David and Bath-sheba followim samting wea law blo Moses talem bikos sapos olketa judgem tufala, tufala mas dae and baby blo tufala wea no born yet bae dae tu. (Diutronomi 5:18; 22:22) Jehovah seleva nao deal witim datfala case and hem showimaot mercy lo David bikos lo datfala Kingdom promis. (Mektu Samuel 7:11-16) Nara reason hem showimaot mercy hem bikos David hem savve showimaot mercy tu, (Fas Samuel 24:4-7; comparem Jas 2:13) and bikos hem lukim tufala hia repent. (Sams 51:1-4) Nomata olsem, hem panisim tufala. Jehovah iusim profet Nathan for talem olsem lo tufala: “Bae mi mekem iu for kasem bigfala trabol lo famili blo iu.”—2Sa 12:1-12, NWT.
JUNE 20-26
GUD SAMTING FROM BIBLE | MEKTU SAMUEL 13-14
“Amnon Kasem Nogud Samting From Hem Selfish”
it-1-E 32
Absalom
Killim dae Amnon. Sista blo Absalom, Tamar, hem wanfala naesbola gele. Amnon, wea hem haf brata blo Absalom, barava laekem tumas Tamar. So hem act olsem hem sik, and then hem ask for Tamar mas tekem kam kaikai lo hem. Taem Tamar kam, Amnon reipim hem nao. Bihaen hem reipim Tamar, Amnon hem start for barava les lo hem and hem talem wakaman blo hem for raosem Tamar go aot. Tamar brekem datfala kaleko blo hem wea showimaot hem wanfala dota blo king wea no sleep witim eni man, and hem putim asis lo hed blo hem. Taem Absalom lukim hem, hem luksavve lo wanem hem happen and hem feel sure Amnon nao man wea reipim hem bikos hem savve hem laekem Tamar tumas. Bat Absalom talem sista blo hem for no accusim Amnon, and hem tekem hem go bak for stap lo haos blo hem.—Mektu Samuel 13:1-20.
Gohed Garem Wei for Kontrolem Seleva
11 Bible storyim example bilong olketa wea no rejectim wei for durong. And tu, Bible helpem iumi for luksavve long olketa nogud samting wea savve kamaot taem iumi no kontrolem iumiseleva. Sapos iu feisim semkaen samting wea kasem Kim, ting raonem story bilong krangge young man wea Proverbs chapter 7 storyim. Tingim tu example bilong Amnon and nogud samting wea kamaot from wanem hem duim. (2 Sam. 13:1, 2, 10-15, 28-32) Olketa dadi and mami savve helpem pikinini for garem gudfala tingting and wei for kontrolem seleva taem olketa storyim tugeta olketa example hia long famili worship.
it-1-E 33 ¶1
Absalom
Tufala year bihaen datwan, lo taem for katem hair blo olketa sheepsheep, wea datwan nao hem taem for enjoyim olketa feast tu, Absalom hem arrangem wanfala feast lo Baal-hazor, wea datwan hem 22 kilometer from Jerusalem, lo north east. Hem invaetem David and olketa son blo hem for kam lo datfala feast. Taem David no willing for kam, Absalom ask strong lo David for mas sendem kam firstborn son blo hem Amnon, for changem hem. (Provebs 10:18) Taem Amnon stap lo datfala feast and wine mekem heart blo hem for feel hapi, Absalom orderim olketa wakaman blo hem for killim hem dae. Bihaen datwan, olketa nara son gogo bak lo Jerusalem, and Absalom go stap lo kingdom blo Geshur witim grani blo hem, wea hem man lo Syria. Geshur hem lo east saed blo Sea lo Galilee. (Mektu Samuel 13:23-38) Samting wea happen hia showimaot datfala “sword” wea profet Nathan storyim, hem kam lo “famili” blo David nao and bae gohed for olsem go kasem David hem dae.—2Sa 12:10, NWT.
Faendem Gudfala Point
g04-E 12/22 8-9
Kaen Lukluk wea Important Nao
Iumi savve comparem David witim son blo hem Absalom. Nomata Absalom luk naes tumas, hem garem olketa nogud wei. Bible hem sei: “No eni nara man lo Israel hem luk naes tumas olsem Absalom. Start lo hed blo hem go kasem leg, man hia hem luk perfect tumas.” (2 Samuel 14:25, NWT) Nomata olsem, from hem laekem tumas for garem paoa, hem againstim dadi blo hem and trae for aotem hem from king. Hem duim sex witim olketa concubine blo dadi tu. From diswan, Jehovah barava kros lo Absalom and gogo hem dae lo bigfala pain.—Mektu Samuel 15:10-14; 16:13-22; 17:14; 18:9, 15.
Waswe, iu tinghae lo Absalom? Nomoa nao. Hem kaen man wea iumi savve les lo hem. Nomata hem barava luk naes, hem bighed and hem no faithful. Luk naes blo hem no stopem hem for kasem nogud samting tu. Bible storyim staka man and woman wea wise and wea garem gudfala wei, bat no storyim lukluk blo olketa. So luk olsem samting wea important nao hem wei blo olketa, no lukluk blo olketa.
JUNE 27–JULY 3
GUD SAMTING FROM BIBLE | MEKTU SAMUEL 15-17
“Absalom Againstim King Bikos Hem Praod”
it-1-E 860
Ran Go Firstaem Lo King
Hem wei blo olketa bifor for olketa man savve ran go firstaem lo chariot blo king for announcem hem bae kam, for redyim olketa samting for hem, and for helpem king taem hem arrive. (Fas Samuel 8:11) Hem nao samting wea Absalom and Adonijah duim for mekhae lo olketa seleva and mekem pipol for sapotim olketa. Tufala evriwan markem 50 man for ran go firstaem lo chariot blo olketa—Mektu Samuel 15:1; Fas Kings 1:5.
Worshipim God wea Mekem Iumi Free
5 Bible story abaotem staka man wea spoelem gudfala wei bilong narawan. Wanfala nao hem Absalom wea hem son bilong King David. Absalom hem wanfala naesbola man. Olsem Satan hem duim, Absalom letem feeling for laekem samting wea no stret for grow long heart bilong hem. Hem laek for aotem dadi bilong hem mekem hemseleva nao kamap king, nomata hem no garem raet for kamap king. Hem ososo long pipol for mekem olketa tingse hem laek helpem olketa bat King David no laek helpem olketa. Olsem Satan duim long garden bilong Eden, Absalom mekem pipol tingse hem tingim olketa, and long semtaem hem laea abaotem dadi bilong hem.—2 Sam. 15:1-5.
it-1-E 1083-1084
Hebron
Samfala year bihaen, Absalom, wea hem nao son blo David, go bak lo Hebron and trae for aotem dadi blo hem from king. Hem no win for duim datwan lo datfala taem. (Mektu Samuel 15:7-10) Luk olsem hem chusim Hebron for trae duim datwan bikos Hebron hem kapitol blo Judah, and hem hom blo hem tu. Gogo, grani blo David, King Rehoboam, nao buildim bak Hebron. (Mektu Kronikols 11:5-10) Taem olketa Jew go bak lo Judah bihaen lo staka year wea olketa kamap prisoner lo Babylon, samfala stap moa lo Hebron (Kiriath-arba).—Nehemaea 11:25.
Faendem Gudfala Point
Waswe, Iu Savve Long Tru Story?
11 Maet samtaem iumi kasem nogud samting bikos samwan talem story abaotem iumi wea no really tru or lelebet part bilong hem nomoa tru. Tingim samting wea happen long King David and Mephibosheth. David kaen long Mephibosheth and givim hem bak land bilong grandadi bilong hem, King Saul. (Mektu Samuel 9:6, 7) Bat bihaen, David herem wanfala nogud story abaotem Mephibosheth. David no mek sure long datfala story, bat hem disaed for tekem bak evri property wea hem givim long Mephibosheth. (Mektu Samuel 16:1-4) Gogo, David story witim Mephibosheth, and hem luksavve hem mekem wanfala mistek. So, hem givim bak samfala part long datfala property long Mephibosheth. (Mektu Samuel 19:24-29) Nogud samting wea kasem Mephibosheth hard for happen sapos David mek sure firstaem long full story and no kwiktaem for followim laea information.