Olketa Reference for Laef and Ministry Meeting Buk
JULY 4-10
GUD SAMTING FROM BIBLE | MEKTU SAMUEL 18-19
“Barzillai Luksavve lo Wat Hem Fit for Duim”
w07-E 7/15 14 ¶5
Barzillai Luksavve lo Wat Hem Fit for Duim
David hem barava tinghae lo help blo Barzillai. Hem laek for showimaot thankiu lo Barzillai, bat hem no ting for just provaedem olketa material samting bikos maet hem tingim hao Barzillai hem wanfala rich man and no needim help olsem. Maet David laekem hem for kam waka lo haos blo king bikos lo olketa gudfala wei blo hem. For stap olowe lo there hem bigfala privilege, and sapos Barzillai acceptim datwan bae hem kasem staka gud samting from wei for fren gud witim king.
w07-E 7/15 14 ¶7
Barzillai Luksavve lo Wat Hem Fit for Duim
Maet wanfala reason Barzillai mekem datfala disison hem bikos hem olo and luksavve hem no fit for duim staka samting. Maet Barzillai tingse hem klosap for dae. (Sams 90:10) Hem duim wanem hem fit for duim for sapotim David, bat hem luksavve tu hao wei for olo stopem hem for duim moa samting. Barzillai no letem tingting for laekem hae position and bigman stopem hem for luksavve lo wanem hem fit for duim and no fit for duim. Barzillai hem hambol, no olsem Absalom wea praod and aftarem hae position.—Provebs 11:2.
w07-E 7/15 15 ¶1-2
Barzillai Luksavve lo Wat Hem Fit for Duim
Example blo Barzillai showimaot iumi mas garem balance tingting. Iumi shud no rejectim wanfala privilege or hol bak for duim moa samting bikos iumi laekem normal laef, or tingse iumi no fit for duim wanfala responsibility. Sapos iumi depend lo God for wisdom and strong, hem savve mekem iumi fit.—Philippi 4:13; James 4:17; 1 Peter 4:11.
Bat iumi mas luksavve tu lo wanem iumi no fit for duim. Olsem example, tingim sapos wanfala Christian hem busy finis for duim staka samting lo waka blo Jehovah. Hem luksavve sapos hem acceptim samfala privilege moa, maet hem hard for hem duim samfala nara Christian responsibility, olsem for provaed for famili blo hem. Lo taem olsem, man wea hambol and balance bae no acceptim samfala privilege moa.—Philippi 4:5; 1 Timothy 5:8.
Faendem Gudfala Point
Ran for Kasem End blo Resis
19 Sapos iu no fit for duim staka samting nao and feel olsem olketa narawan no minim iu, example blo Mephibosheth maet encouragem iu. (Mektu Samuel 4:4) Mephibosheth mas deal witim wei wea hem sik, and wantaem King David duim samting wea showimaot hem no minim hem. Olketa problem wea kasem Mephibosheth hem no bikos hem duim eni rong samting. Nomata olsem, hem no letem datwan for mekem hem feel nogud. Hem tinghae lo olketa gud samting wea hem kasem lo laef blo hem. And hem tinghae lo kaenfala fasin wea David showim lo hem bifor. (Mektu Samuel 9:6-10) So taem David treatim hem nogud, Mephibosheth luksavve lo situation wea mekem David for duim datwan. Hem no letem mistek wea David duim for mekem hem feel nogud. And hem no blamem Jehovah for wanem David duim. Mephibosheth tingim nomoa wanem hem savve duim for sapotim king wea Jehovah nao appointim. (Mektu Samuel 16:1-4; 19:24-30) Jehovah putim example blo Mephibosheth lo Bible mekem iumi savve lane from datwan.—Rome. 15:4.
JULY 11-17
GUD SAMTING FROM BIBLE | MEKTU SAMUEL 20-21
“Jehovah Hem God blo Justice”
it-1-E 932 ¶1
Gibeon
Olketa Gibeonite gohed stap for plande handred year. Lo wanfala taem, King Saul garem nogud plan for trae finisim evriwan lo olketa. Bat olketa Gibeonite weitim Jehovah nao for deal witim diswan. Gogo Hem mekem bigfala hangre for kamap taem David hem king. Jehovah mekem David for savve datfala hangre hem kamap bikos lo wanem Saul hem duim wea mekem hem and olketa son blo hem guilty lo blood. David story witim olketa Gibeonite for faendemaot wanem compensation nao bae fitim for datwan. Olketa Gibeonite talem tru samting taem olketa sei “hard for mifala acceptim silver or gold,” bikos olsem Law talem, no eni ransom bae fitim for peim wei wea samwan killim dae narawan. (Nambas 35:30, 31) Olketa luksavve tu olketa no garem paoa for disaedem sapos man shud dae or nomoa. Dastawe bihaen David askem samfala kwestin moa abaotem datwan, olketa ask for David givim kam sevenfala son blo Saul for olketa killim dae. Saul and famili blo hem nao guilty saed lo blood. So nomata maet Saul nao hem lead for trae finisim olketa Gibeonite, masbi olketa son blo hem tu joinim hem lo datwan. (2Sa 21:1-9, NWT) Sapos olsem, diswan no brekem law wea sei olketa son shud no dae for sin blo dadi, (Diutronmi 24:16) bat hem followim law wea sei “laef nomoa savve changem laef.”—De 19:21, NWT.
Faendem Gudfala Point
Olketa Elder ‘Waka Tugeta Witim Iumi for Mekem Iumi Hapi’
14 Pipol bilong Jehovah evriwea long world gohed for worshipim hem nomata Satan and olketa narawan trae for stopem olketa. Samfala long iumi kasem olketa hard taem wea big tumas, wea olsem iumi feisim olketa giant. Bat from iumi barava trustim Jehovah, iumi kasem strong for gohed faithful long olketa hard taem hia, olsem David hem strong for killim dae Goliath. Taem iumi strong iumi savve deal witim olketa problem wea kasem iumi. Bat samfala taem, iumi no feel strong for gohed againstim world bilong Satan. Long taem olsem hem isi for olketa problem savve mekem iumi wikdaon. Maet wanfala elder luksavve long diswan and helpem iumi long barava taem. Diswan savve helpem iumi for gohed hapi for worshipim God. Staka long iumi kasem kaen help olsem. Wanfala pioneer sista wea winim 60 year hem sei: “Wantaem mi no mas feel gud, and preaching waka mekem mi feel taed. Wanfala elder hem luksavve long diswan and kam story witim mi. Mifala storyim samfala verse long Bible, and datwan encouragem mi. Mi followim olketa idea wea hem talem, and mi kasem gud samting from datwan.” Sista hia sei tu: “Datfala elder hem kaen tumas for helpem mi taem hem luksavve mi start for wikdaon!” Hem gud tumas for savve olketa elder tingim iumi and stanbae for helpem iumi, olsem Abishai hem stanbae for helpem David.
JULY 18-24
GUD SAMTING FROM BIBLE | MEKTU SAMUEL 22
“Depend lo Jehovah for Helpem Iu”
Waswe, Iu Savve Really “Kam Klos Long God”?
11 Iumi savve readim hao God hem “iusim bigfala paoa.” (Isaiah 40:26) Bat hem difren taem iumi readim hao hem sevem Israel thru long Red Sea and then lukaftarem datfala nation insaed wilderness for 40 year. Lukim, witim mind bilong iu, hao datfala big wata hem kat long haf. Iu savve piksarem datfala nation—maet 3,000,000 pipol—wakabaot long datfala drae graon wea hem botom bilong datfala sea, olketa wata hia standap tufala saed olsem barava haefala wall. (Exodus 14:21; 15:8) Iu savve lukim pruv hao God protectim and kea long olketa taem olketa insaed long wilderness. Wata hem ran kamaot from ston. Kaikai wea olsem white seed foldaon long graon. (Exodus 16:31; Numbers 20:11) Evri samting hia showimaot no just paoa bilong Jehovah bat hao hem iusim datwan for pipol bilong hem. Iumi barava kasem comfort taem iumi savve iumi garem wanfala strongfala God olsem wea herem prea bilong iumi, wea hem “wanfala ples for haed and wanfala strong, wanfala help wea isi for faendem long taem bilong trabol.”—Psalm 46:1.
w10-E 6/1 26 ¶4-6
“Bae Iu Faithful lo Man wea Faithful”
Iumi lukluk moa lo toktok blo David. Datfala Hebrew toktok wea iumi transleitim “faithful” savve minim tu “kaen and showimaot love.” Wei for faithful hem kam from love. Jehovah hem lovem olketa wea faithful lo hem.
Wei for faithful hem no just wanfala feeling nomoa, bat hem samting wea man savve showimaot. David luksavve Jehovah duim samting wea showimaot hem faithful. Taem David kasem olketa barava hard samting lo laef blo hem, Jehovah hem faithful for protectim and leadim datfala faithful king. David hem tinghae lo datwan and sei Jehovah nao sevem hem ‘from han blong olketa enemi blong hem.’—Mektu Samuel 22:1.
Hao nao toktok blo David helpem iumi? Jehovah hem no savve change. (James 1:17) Hem evritaem followim olketa standard blo hem and hem faithful for duim wanem hem promisim. Lo narafala psalm, David hem sei: “Jehovah . . . bae no lusim olketa wea faithful lo hem.”—Psalm 37:28; NWT.
Faendem Gudfala Point
Iumi Mas Traem Best for Hambol
7 David barava tinghae long wei wea God hem hambol. Hem sei long Jehovah: “Iu sevem mi witim shield bilong iu, and from iu hambol datwan nao mekem mi important.” (2 Sam. 22:36) David luksavve reason why hem kamap important man long Israel hem bikos Jehovah hem hambol. From Jehovah hem hambol datwan mekem hem tingim and helpem David. (Ps. 113:5-7) Long sem wei, evri samting wea iumi garem olsem gudfala wei bilong iumi, savve, or eni privilege wea iumi kasem, Jehovah nao givim long iumi bikos hem hambol. (1 Cor. 4:7) Taem Jesus sei man wea hambol hem “important,” hem minim wei wea Jehovah savve iusim datfala man for duim plande gud samting. (Luke 9:48) Bae iumi storyim samfala gud samting hia.
JULY 25-31
GUD SAMTING FROM BIBLE | MEKTU SAMUEL 23-24
“Waswe, Samting Iu Duim for Jehovah Hem Wanfala Sakrifaes?”
it-1-E 146
Araunah
Luk olsem Araunah willing for givim David datfala area, witim olketa buluka and nara samting for datfala sakrifaes. Hem no askem eni selen. Bat David laekem tumas for pei. Mektu Samuel 24:24 showimaot David hem peim 50 silver shekel ($110) for olketa buluka and for datfala area wea olketa iusim for aotem wheat. Bat lo 1 Chronicles 21:25 (NWT) hem sei David peim 600 gold shekel nao (c. $77,000) for datwan. Second Samuel hem storyim nomoa ples for datfala altar witim sakrifaes wea kamap. So price wea hem storyim hem for olketa samting hia nomoa. Bat First Chronicles storyim olketa samting wea join witim temple wea olketa bae wakem lo datfala area bihaen. So price wea hem storyim join witim datfala construction wea bae kamap. (1Ch 22:1-6; 2Ch 3:1, NWT) From area wea temple stap hem big tumas, luk olsem datfala 600 gold shekel hem for bigfala area hia nao, no smol area wea David laek peim lo firstaem for altar wea hem buildim.
Lanem Tru Samting Abaotem God From Law
8 Wanfala Israelite savve chus for givim sakrifaes for showimaot hem tinghae long Jehovah. Hem savve chus tu for givim sakrifaes wea olketa bonem bikos hem laekem Jehovah for hapi long hem. Long taem olsem, bae hem willing for givim best animal wea hem garem. Distaem iumi no need for givim olketa animal sakrifaes wea Law bilong Moses storyim, bat iumi savve givim olketa difren kaen sakrifaes. Iumi iusim taem, strong, and samting wea iumi garem for worshipim Jehovah. Aposol Paul sei samfala sakrifaes wea iumi savve givim for mekem Jehovah hapi nao hem for “iusim mouth bilong iumi for talemaot” hope wea iumi garem and for “duim gud samting and for sharem samting wea [iumi] garem witim olketa narawan.” (Heb. 13:15, 16) Sapos iumi duim best for worshipim Jehovah, datwan showimaot iumi tinghae long wanem hem duim for iumi. Olsem olketa Israelite, iumi tu mas duim best bilong iumi for worshipim Jehovah.
Faendem Gudfala Point
Olketa Main Point From Buk Bilong Second Samuel
23:15-17. From David garem bigfala respect for law bilong God saed long laef and blood, hem no willing for duim samting sapos datwan luk olsem wei for brekem datfala law. Iumi mas garem semkaen tingting abaotem olketa komand bilong God.
AUGUST 1-7
GUD SAMTING FROM BIBLE | FAS KINGS 1-2
“Waswe, Iu Savve Lane From Olketa Mistek blo Iu?”
it-2-E 987 ¶4
Solomon
Taem Adonijah and olketa wea sapotim hem for kamap king herem saond blo datfala music lo Gihon, wea no farawe, and herem pipol singaot and sei “Letem King Solomon gohed for laef,” olketa konfius, olketa fraet, and olketa ranawe. Sapos Adonijah nao kamap king, hem bae killim dae Solomon. Bat Solomon showimaot hao peace bae kamap anda lo rul blo hem taem hem disaed for no pei bak lo Adonijah. Adonijah ran go lo temple for protection, so Solomon givim order for olketa holem Adonijah and tekem hem kam lo hem. Solomon sei hem bae gohed laef sapos hem no duim olketa nogud samting, then hem talem hem for go bak lo haos blo hem.—1Ki 1:41-53, NWT.
it-1-E 49
Adonijah
Bat bihaen David hem dae, Adonijah askem Bath-sheda for go talem Solomon hem laek maritim Abishag, wea hem nao datfala young naesbola nurse blo David. Adonijah hem sei: “Mi nao fit fo kamap king, an evriwan long Israel i tingse bae hemi olsem nao.” Hem sei hem luksavve God chusim Solomon, bat nara samting wea hem talem showimaot hem feel nogud abaotem datwan. (Fas Kings 2:13-21) Hem tru, maet hem askem Abishag bikos lo tingting blo hem, hem shud kasem compensation for wei wea hem no kamap king. Bat toktok blo hem barava showimaot tu hem laekem yet for kamap king. Iumi savve talem olsem bikos lo datfala taem, sapos wanfala king hem dae, then man wea garem raet for changem hem bae kasem tu olketa waef and concubine blo hem. (Comparem Mektu Samuel 3:7; 16:21.) Hem nao tingting blo Solomon tu abaotem why Adonijah askem datwan, so hem givim order for Benaiah go kwiktaem and killim dae Adonijah.—Fas Kings 2:22-25.
Faendem Gudfala Point
Olketa Main Point From Buk Bilong First Kings
2:37, 41-46. Hem danger tumas for iumi tingse iumi savve brekem law bilong God and no kasem panis! Olketa wea chus for go difren from ‘datfala smolfala road wea lead go long laef’ bae kasem nogud samting wea kamap from wei wea olketa no disaed long wisefala wei.—Matthew 7:14.
AUGUST 8-14
GUD SAMTING FROM BIBLE | FAS KINGS 3-4
“Wisdom Hem Barava Important”
Lane From Gud and Nogud Samting wea Solomon Duim
4 Taem Solomon kamap king, God story long hem long wanfala dream and talem Solomon for ask for eni samting wea hem laekem. Solomon askem God for wisdom bikos hem savve hem need for lanem staka samting. (Readim 1 Kings 3:5-9.) God hapi long Solomon bikos hem ask for wisdom. So God givim hem “heart wea wise and minim samting” and hem givim tu staka rich samting nomata Solomon no ask for datwan. (1 Ki. 3:10-14) Jesus storyim Solomon garem bigfala wisdom and taem queen bilong Sheba herem nius abaotem datwan, hem kam from farawe for herem wise toktok bilong Solomon.—1 Ki. 10:1, 4-9.
5 Iumi shud no tingse Jehovah bae givim wisdom long iumi long mirakol wei. Solomon sei “Jehovah nao givim wisdom” bat hem sei iumi mas waka hard for kasem datwan. Hem sei: “Lisin gud long wisdom, mekem heart bilong iu savve minim samting.” Solomon talem tu for iumi “ask for” wisdom and “gohed for lukaotem” wisdom. (Prov. 2:1-6) Tru tumas, iumi savve kasem wisdom.
6 Tingim diswan: ‘Waswe, mi tu laek for kasem wisdom olsem Solomon?’ Staka pipol busy long waka bikos olketa garem problem saed long selen. And datwan affectim tu disison wea olketa mekem saed long wanem education and haomas education nao olketa shud kasem. Wanem nao tingting bilong iu and famili? Waswe, samting wea iu disaedem showimaot iu lukaotem wisdom olsem samting wea garem hae price? Waswe, iu need for changem tingting bilong iu abaotem education mekem iu savve duim moa samting for kasem wisdom from God? Wisdom wea iumi kasem bae helpem iumi for olowe. Solomon sei: “Sapos iu duim olsem, bae iu luksavve wanem hem stret and gud, and hao for duim stret samting.”—Prov. 2:9.
Faendem Gudfala Point
w98 2/1 11 ¶15
Jehovah Hem God Bilong Olketa Covenant
15 From olketa laen pikinini bilong Abraham organize olsem wanfala nation under long Law, Jehovah blessim olketa fitim promis bilong hem long Abraham. Long 1473 B.C.E., man wea change-im Moses, Joshua, leadim Israel go insaed long Canaan. Way wea bihaen olketa divaedem datfala land midlwan long olketa tribe hem fulfillim promis bilong Jehovah for givim datfala land long seed bilong Abraham. Taem Israel hem faithful, Jehovah fulfillim promis bilong hem for mekem olketa win ovarem olketa enemy bilong olketa. Diswan hem moa tru long taem wea King David hem rul. Kasem taem wea son bilong David, Solomon hem rul, mek-three part long covenant bilong Abraham hem fulfill. “Judah and Israel olketa staka, olsem olketa sandbis long saed sea wea staka tumas, olketa kaikai and drink and hapi.”—1 Kings 4:20.
AUGUST 15-21
GUD SAMTING FROM BIBLE | FAS KINGS 5-6
“Heart blo Olketa Muvim Olketa for Build”
w11-E 2/1 15
Waswe, Iu Savve?
Pipol laekem tumas olketa cedar tree lo Lebanon bikos olketa strong, luk naes, smel naes, and olketa insect no savve kaikaim olketa. So Solomon hem iusim olketa best timba for wakem temple. Bifor, staka cedar tree stap lo olketa maunten lo Lebanon, bat distaem olketa cedar tree stap lo tu-thri smol area nomoa.
it-1-E 424
Cedar
From olketa iusim staka timba from cedar tree olsem, olketa needim staka thousand wakaman for katem olketa tree hia and sendem datfala timba go lo Tyre or Sidon wea stap klosap lo Mediterranean Sea. Luk olsem olketa savve taengem staka timba tugeta olsem rafta, putim go lo sea, and then pushim go lo Joppa wea stap lo saed sea tu. Then olketa savve karem go lo Jerusalem. Arrangement hia hem followim wanfala kontrak midolwan lo Solomon and Hiram. (Fas Kings 5:6-18; Mektu Kronikols 2:3-10) Disfala arrangement gohed, gogo ‘cedar hem kamap staka olsem olketa sycamore tree’ lo taem wea Solomon hem rul.—1Ki 10:27, NWT; comparem Aesaea 9:9, 10.
it-2-E 1077 ¶1
Temple
Taem Solomon organizem datfala waka, hem markem 30,000 man lo Israel for go lo Lebanon and waka lo olketa shift. Ten thousand savve waka lo Lebanon for wanfala month, then rest lo hom for tufala month taem nara ten thousand changem olketa. (Fas Kings 5:13, 14) Hem markem 70,000 wakaman lo Israel wea no Jew for karekare, and 80,000 lo olketa for katem olketa ston. (Fas Kings 5:15; 9:20, 21; Mektu Kronikols 2:2) Solomon markem 550 man nao for leadim datfala waka witim 3,300 man for helpem olketa. (Fas Kings 5:16; 9:22, 23) Luk olsem 250 lo olketa man hia hem olketa Israelite, and 3,600 hem olketa “wea no Israelite.”—2Ch 2:17, 18, NWT.
Faendem Gudfala Point
g-E 5/12 17, box
Bible hem Buk wea Talem Olketa Tru Profesi—Part 1
BIBLE TALEM BARAVA TAEM WEA SAMTING HAPPEN
Iumi savve lanem staka samting from wei wea Bible talem barava taem wea samting happen. Example blo diswan hem lo Fas Kings 6:1, wea storyim taem wea King Solomon start for wakem temple lo Jerusalem. Hem sei: “Long 480 yia [479 full year] bihaen long taem wea olketa olo blong Israel i kamaot from Ijip, an long mekfoa yia wea King Solomon hemi rul ovarem Israel, an long mans long Sif wea hemi mektu mans blong yia ya, King Solomon hemi stat fo bildim Tambuhaos blong [Jehovah].”
From olketa record insaed Bible, iumi savve hao mek-foa year blo rul blo Solomon hem 1034 B.C.E. Taem iumi start lo datfala year and kaont go bak 479 year, iumi kasem 1513 B.C.E. wea hem nao year wea olketa Israelite go aot from Egypt.
AUGUST 22-28
GUD SAMTING FROM BIBLE | FAS KINGS 7
“Wat Iumi Savve Lanem From Tufala Post”
w13-E 12/1 13 ¶3
‘Bae Iu Digim Copper From Olketa Maunten’
King Solomon iusim staka copper for wakem olketa samting for temple lo Jerusalem. Staka copper hia, dadi blo hem, David, tekem taem hem win lo olketa faet againstim Syria. (Fas Kronikols 18:6-8) Olketa wakem datfala “molten sea” lo copper. Hem nao bigfala basin wea olketa priest iusim for wasim samting, and hem savve holem 66,000 liter wata and hevi blo hem samting olsem 30 ton. (Fas Kings 7:23-26, 44-46) Tufala maeti copper post tu olketa standap lo door blo temple. Tol blo olketa 8 meter and capital wea sidaon antap hem 2.2 meter. Olketa post hia olsem pipe, wea thick blo hem 7.5 centimeter and diameter hem 1.7 meter. (Fas Kings 7:15, 16; Mektu Kronikols 4:17) For wakem olketa samting hia needim staka copper tumas.
it-1-E 348
Boaz, II
Nambawan temple wea Solomon wakem garem tufala post for sapotim varanda lo front. Post lo north saed garem nem Boaz, wea maet mining blo datwan hem “From Strong.” Nara post lo south saed garem nem Jachin, wea minim “Jehovah Mekem for Stap Olowe.” So sapos iu standap lo east saed and readim tufala nem hia from raet go kasem left hem bae sei ‘Jehovah bae mekem for stap olowe from strong blo hem.’—1Ki 7:15-21, NWT; lukim CAPITAL.
Faendem Gudfala Point
it-1-E 263
Swim
Body blo man wea worshipim Jehovah mas klin and holy. Diswan hem showaot saed lo arrangement for worship lo tabernacle and then lo temple bihaen. Taem Aaron and olketa son blo hem kamap priest, olketa mas swim bifor olketa werem datfala kaleko blo priest. (Eksodas 29:4-9; 40:12-15; Levitikas 8:6, 7) Olketa priest iusim wata from datfala copper basin lo courtyard blo tabernacle for wasim hand and leg, and lo temple blo Solomon, olketa iusim wata from datfala molten sea. (Ex 30:18-21; 40:30-32; 2Ch 4:2-6, NWT) Lo Atonement Day hae priest hem swim tufala taem. (Levitikas 16:4, 23, 24) Olketa wea tekem go aotsaed long camp datfala goat for Azazel, olketa leftova from olketa animal sakrifaes, and datfala red buluka, mas swim and wasim kaleko blo olketa bifor olketa savve kam bak insaed lo camp.—Levitikas 16:26-28; Nambas 19:2-10.
AUGUST 29–SEPTEMBER 4
GUD SAMTING FROM BIBLE | FAS KINGS 8
“Hambol Prea blo Solomon wea Kam From Heart”
Prea Bilong Iu Savve Kamap Barava Gud Taem Iu Studyim Bible
9 Sapos iumi laekem God for herem iumi taem iumi prea, iumi mas prea from heart bilong iumi. Long 1 Kings chapter 8, Solomon talem prea olsem long God. Hem prea front long pipol wea hipap long Jerusalem long taem for dedicatem temple bilong Jehovah long 1026 B.C.E. Solomon praisem God bihaen olketa putim ark bilong covenant insaed long Most Holy and cloud bilong Jehovah stap evriwea long temple.
10 Taem iu studyim gud prea bilong Solomon, bae iu lukim plande taem hem storyim heart bilong man. Solomon sei Jehovah nomoa savve wanem nao long heart bilong man. (1 Ki. 8:38, 39) Prea wea Solomon talem showimaot man wea duim sin savve ‘fren bak moa witim God.’ Sapos pipol bilong God fren gud witim hem, hem bae herem prea bilong olketa taem enemy tekem olketa. (1 Ki. 8:48, 58, 61) Dastawe iu mas prea from heart bilong iu.
w99 1/15 17 ¶7-8
Liftimap Olketa Loyal Hand Long Prea
7 Nomata iumi prea front long pipol or seleva, wanfala important Bible principle wea iumi mas tingim hem for showimaot humble fasin long prea bilong iumi. (2 Chronicles 7:13, 14) King Solomon showimaot humble fasin taem hem prea long dedication bilong temple bilong Jehovah long Jerusalem. Solomon just finisim wanfala barava naes building wea man buildim long earth. Nomata olsem, hem prea long humble way olsem: “Waswe, God bae really stap long earth? Lukim! Olketa heven, yes, olketa heven bilong heven no big fitim iu; so hao nao disfala haos wea mi buildim bae fitim iu!”—1 Kings 8:27.
8 Olsem Solomon, iumi mas humble taem iumi prea for nara pipol. Nomata iumi no laek for saond holy-holy, voice bilong iumi savvy showimaot iumi humble. Olketa prea wea humble no showoff or ova tumas. Olketa no apim man wea prea, but dat Wan wea olketa prea go long hem. (Matthew 6:5) Humble fasin hem showaot long wanem iumi talem insaed long prea. Sapos iumi prea long humble way, iumi bae no saond olsem iumi talem God wanem for duim followim tingting bilong iumi. But, bae iumi askim Jehovah for duim samting fitim holy will bilong hem. Man wea raetem psalm showimaot stretfala tingting taem hem ask: “Distaem, Jehovah, please sevem mifala! Distaem, Jehovah, please mekem mifala win!”—Psalm 118:25; Luke 18:9-14.
Faendem Gudfala Point
it-1-E 1060 ¶4
Skae
Solomon, wea hem nao man wea wakem temple lo Jerusalem, hem sei “nomata skae wea hem big tumas” bat hem no big fitim Jehovah. (1Ki 8:27, NWT) From Jehovah wakem skae and full universe, Hem stap barava hae winim olketa, and “nem blo hem hae tumas. Glory blo hem hae winim earth and skae.” (Ps 148:13, NWT) Hem isi tumas for Jehovah measurem universe olsem hao man savve measurem samting witim hand blo hem. (Aesaea 40:12) Samting wea Solomon talem no minim God no garem eni ples for stap lo hem. And hem no minim tu God hem stap evriwea and lo evri samting. Iumi savve talem olsem bikos Solomon storyim hao Jehovah hem here kam “from ples blo hem lo heven,” wea hem nao ples wea olketa spirit stap lo hem.—1Ki 8:30, 39, NWT.