Olketa Reference for Laef and Ministry Meeting Buk
NOVEMBER 7-13
GUD SAMTING FROM BIBLE | 2 KINGS 5-6
“Olketa lo Saed blo Iumi, Staka Winim Olketa”
it-1-E 716 ¶4
Elisha
Syria No Win for Attakim Israel. Lo taem wea King Jehoram rul lo Israel, Syria plan for attakim olketa haed. Winim wanfala taem, Elisha hem talem King Jehoram wanem olketa blo Syria bae duim, wea spoelem olketa plan blo Ben-hadad II. Lo firstaem, Ben-hadad tingse samwan lo army blo hemseleva saedem king blo Israel and talemaot plan blo hem. Bat taem hem faendemaot Elisha nao duim datwan, hem sendem army go lo Dothan, and olketa raonem datfala taon witim olketa horse and chariot for kasholem Elisha. (PICTURE, Vol. 1, p. 950) Taem wakaman blo Elisha lukim army hia hem barava fraet, bat Elisha hem prea lo God for openem eye blo wakaman blo hem, “and hem luk go and lukim, olketa area lo olketa maunten hem fulap lo olketa horse and olketa war chariot blo fire evriwea raonem Elisha.” Taem army blo Syria kakam for tufala, Elisha hem prea moa, and sei: “Plis, mekem disfala nation for blind.” Then Elisha hem sei lo olketa, “Iufala followim mi,” datwan showimaot hem no holem hand blo olketa and leadim olketa, so olketa no really blind, bat olketa just no savve minim wat nao gohed for happen. Olketa no luksavve lo Elisha wea olketa kam for kasholem and olketa no savve lo wea nao hem leadim olketa go lo hem.—2Ki 6:8-19.
Elisha Lukim Olketa Chariot wea Laet Olsem Fire—Waswe, Iu Tu Lukim?
Nomata olketa enemy stap raonem Elisha long Dothan, hem nating wari nomoa. Why nao olsem? Bikos hem garem strongfala faith long Jehovah. Iumi tu mas garem strongfala faith. So iumi shud askem God for holy spirit mekem iumi garem faith and olketa nara gudfala wei.—Luke 11:13; Gal. 5:22, 23.
it-1-E 343 ¶1
Wei for Blind
Samting wea Elisha askem Jehovah for duim lo army blo Syria no mekem olketa really blind bat hem mekem olketa no minim samting wea olketa lukim. Sapos full army hem really blind, bae olketa needim samwan for holem hand and leadim olketa go. Bat Elisha hem sei nomoa: “Diswan hem no stret road, and diswan hem no taon wea iufala lukaotem. Iufala followim mi.” Lo buk blo hem, Principles of Psychology (1981, Vol. 1, p. 59), William James hem sei: “Wanfala sik wea savve kasem brain savve mekem man blind, no lo physical wei bat lo wei wea affectim tingting blo hem. Hem savve lukim samting witim eye blo hem, bat hem no savve minim samting wea hem lukim.” Hem nao wat happen lo army blo Syria. Taem olketa arrive lo Samaria, Jehovah aotem datkaen wei for blind from olketa. (2Ki 6:18-20) Maet hem nao kaen wei for blind wea kasem tu olketa man lo Sodom, bikos story lo Bible showimaot hao olketa no seke from olketa blind, bat olketa gohed nomoa for lukaotem door blo haos blo Lot.—Ge 19:11.
Faendem Gudfala Point
Olketa Main Point From Buk Bilong Second Kings
5:15, 16—Why nao Elisha no acceptim present from Naaman? Elisha no acceptim datfala present bikos hem luksavve hao mirakol for healim Naaman hem kam from paoa bilong Jehovah and no bilong hemseleva. Hem bae no ting for kasem eni gud samting for hemseleva from waka wea God markem hem for duim. Distaem tu olketa trufala worshiper bilong Jehovah no ting for kasem gud samting for olketa seleva from service bilong olketa long Jehovah. Olketa followim disfala kaonsel bilong Jesus: “Iufala kasem samting free, givim samting free.”—Matthew 10:8.
NOVEMBER 14-20
GUD SAMTING FROM BIBLE | 2 KINGS 7-8
“Jehovah Duim Samting wea No Eniwan Expectim”
it-1-E 716-717
Elisha
Bat bihaen, Ben-hadad II hem kam witim full army and hem raonem Samaria. Datwan hem mekem Samaria for barava kasem hard taem gogo king herem story hao wanfala woman kaikaim son blo hem. King Jehoram, wea hem pikinini blo Ahab and “son blo man for killim man dae,” sei hem bae killim dae Elisha. Bat hem no duim datwan. Taem Jehoram and bigman blo hem kasem haos blo Elisha, Jehoram talem hao hem luksavve Jehovah bae no helpem hem. Elisha promisim king lo next day staka kaikai bae stap. Bigman blo king hem nating bilivim and tingse hem karangge so Elisha sei lo hem: “Iuseleva bae lukim lo eye blo iu, bat iu bae no kaikaim.” Jehovah mekem army blo Syria for herem noes wea mekem olketa tingse bigfala army kam againstim olketa, and olketa ranawe and lusim evri samting bihaen, witim kaikai tu. Taem king herem olketa blo Syria ranawe, hem markem bigman blo hem for security lo gate blo Samaria, and lo there nao hem dae taem olketa Israelite wea hangre fogud step antap lo hem taem olketa pushpush for go aot lo gate blo taon. Hem lukim datfala kaikai, bat hem no kaikaim.—2Ki 6:24–7:20.
Faendem Gudfala Point
it-2-E 195 ¶7
Lamp
Olketa King lo Laen blo David. Jehovah God mekem David for kamap king blo Israel, and from David hem followim direction and wisdom blo God hem leadim gud datfala nation. Dastawe olketa kolem hem “lamp blo Israel.” (2Sa 21:17) Taem Jehovah mekem kingdom agreement witim David, Hem talem promis lo hem and sei: “Rul blo iu bae stap for olowe.” (2Sa 7:11-16) Dastawe laen blo olketa king start lo David and then son blo hem, Solomon, hem olsem wanfala “lamp” for Israel.—1Ki 11:36; 15:4; 2Ki 8:19; 2Ch 21:7.
NOVEMBER 21-27
GUD SAMTING FROM BIBLE | 2 KINGS 9-10
“Jehu No Fraet, Barava Willing, and Disaed Strong for Duim Samting”
Jehu Strong for Sapotim Tru Worship
Long taem bilong Jehu, olketa Israelite kasem nogud samting. Bihaen Ahab dae, son bilong hem Jehoram kamap king. Nomata olsem, mami bilong hem Jezebel nao kontrolem evri samting. Jezebel laekem pipol for worshipim Baal winim wei for worshipim Jehovah. Hem killim dae olketa profet bilong God and mekem olketa Israelite for worshipim idol and for duim samting wea join witim devildevil. (2 Ki. 9:22; 1 Ki. 18:4,13) Jehovah sei evriwan long famili bilong Ahab bae dae. Datwan minim Jehoram and Jezebel tu. Jehu nao main wan wea Jehovah markem for killim olketa dae.
Jehu Strong for Sapotim Tru Worship
King Jehoram sendem tufala man long Jehu bat Jehu les for talem eni nius long tufala. So King Jehoram witim King Ahaziah go long chariot bilong tufala seleva for meetim Jehu. Jehoram ask olsem: “Jehu, iu kam for mek peace?” Bat Jehu tok olsem: “Hao nao mifala savve mek peace? Mami bilong iu gohed for durong and duim staka samting wea join witim devildevil!” Jehoram seke long datwan and trae for ranawe. Bat Jehu kwiktaem tekem bow and sutim Jehoram. Arrow hia go thru long heart bilong Jehoram and Jehoram foldaon insaed chariot and dae. Nomata Ahaziah ranawe, Jehu faendem hem bihaen and killim hem dae tu.—2 Ki. 9:22-24, 27.
Bihaen datwan, Jehu go for killim dae rabis queen, Jezebel. Jehovah talem finis hem bae panisim Jezebel. Taem Jehu kasem Jezreel, hem lukim Jezebel lukluk kam daon from window long haos bilong hem. Semtaem nomoa Jehu talem olketa bigman bilong kot for torowem kam daon Jezebel. Then Jehu draevem chariot bilong hem go antap long hem. Bihaen datwan, Jehu killim dae tu olketa narawan long famili bilong Ahab.—2 Ki. 9:30-34; 10:1-14.
Jehu Strong for Sapotim Tru Worship
Nomata Jehu killim dae staka man, Bible sei hem no fraet for mekem olketa Israelite kamap free from olketa nogud samting wea Jezebel and famili bilong hem duim. No eni leader long Israel savve duim datwan sapos hem no strong and no fraet. Wanfala Bible dictionary sei hem no isi for duim datfala waka bat leader wea duim datwan hem nating givap and hem duim evri samting wea hem mas duim. Sapos hem no strong for duim kaen samting olsem, bae hem hard for stopem pipol long Israel for no worshipim Baal.
Iumi luksavve for olketa Christian winim hard taem wea kasem olketa, olketa need for garem olketa wei olsem Jehu. Olsem example, sapos iumi kasem test for duim samting wea Jehovah no laekem, iumi shud disaed strong for duim stret samting and no fraet. Iumi mas no letem eni samting spoelem wei wea iumi worshipim Jehovah.
Faendem Gudfala Point
Jehu Strong for Sapotim Tru Worship
Luk olsem Jehu laekem ten tribe kingdom bilong Israel for difren from tufala tribe kingdom bilong Judah, dastawe hem letem olketa long ten tribe for worshipim buluka. Jehu duim tu sem samting wea olketa nara king bifor duim. Datwan showimaot hem no garem faith long Jehovah, wea markem hem for king.
Jehovah praisem Jehu bikos hem ‘duim wanem hem laekem.’ Nomata olsem, Jehu “no followim olketa law bilong Jehovah long full heart bilong hem.” (2 Ki. 10:30, 31) Taem iumi tingim olketa gud samting wea Jehu duim firstaem, maet iumi sorre long samting wea hem duim bihaen. Nomata olsem, iumi lanem wanfala important leson. Iumi mas no ting nating long wei wea iumi fren witim Jehovah. Evriday iumi mas faithful long God. Iumi need for studyim Bible, ting raonem, and prea long Dadi bilong iumi long heven. So iumi mas duim best bilong iumi for gohed followim law bilong Jehovah long full heart bilong iumi.—1 Cor. 10:12.
NOVEMBER 28–DECEMBER 4
GUD SAMTING FROM BIBLE | 2 KINGS 11-12
“Wanfala Woman wea Praod and Wicked Kasem Panis”
it-1-E 209
Athaliah
Olsem mami blo hem Jezebel, Athaliah encouragem hasband blo hem, Jehoram, for duim samting wea Jehovah barava no laekem lo eitfala year wea hem rul olsem king. (1Ki 21:25; 2Ch 21:4-6) And olsem mami blo hem duim, Athaliah killim dae staka pipol wea no guilty lo eni samting. Taem nogud son blo hem Ahaziah dae bihaen hem rul for wanfala year nomoa, Athaliah killim dae evri narawan lo laen blo king. Baby Jehoash nomoa no dae bikos hae priest and waef blo hem, wea hem aunty blo Jehoash, tufala haedem hem. Bihaen datwan, Athaliah mekem hemseleva for queen for sixfala year, c. 905-899 B.C.E. (2Ch 22:11, 12) Olketa son blo hem stealim olketa holy samting from temple blo Jehovah and iusim for givim sakrifaes lo Baal.—2Ch 24:7.
it-1-E 209
Athaliah
Taem Jehoash hem seven year, Hae Priest Jehoiada tekem hem kamaot from ples hem haedem hem, putim kraon lo hed blo hem and mekem hem kamap king. Taem Athaliah herem diswan, hem ran go lo temple, and taem hem lukim samting wea happen hem singaot, “Olketa againstim queen! Olketa againstim queen!” Hae Priest Jehoiada givim order for olketa mas tekem Athaliah go aotsaed lo temple area and killim hem dae lo horse gate. Luk olsem hem nao last wan blo datfala wicked famili blo Ahab. (2Ki 11:1-20; 2Ch 22:1–23:21) Bible hem sei: “Evri toktok blo Jehovah wea Jehovah talem againstim famili blo Ahab, bae hem happen,” and datwan hem barava kamap tru!—2Ki 10:10, 11; 1Ki 21:20-24.
Faendem Gudfala Point
it-1-E 1265-1266
Jehoash
Taem Hae Priest Jehoiada hem laef hem olsem dadi and man for givim advaes lo Jehoash, taem olsem, rul blo datfala young king hem gohed gud. Jehoash marit taem hem 21, and hem garem tufala waef. Nem blo wanfala waef hem Jehoaddan. Hem garem olketa son and dota from tufala waef hia. So lo wei olsem, laen blo David, wea hem nao laen wea lead go lo Messiah, hem gohed for stap nomata Athaliah trae for finisim.—2Ki 12:1-3; 2Ch 24:1-3; 25:1.
DECEMBER 5-11
GUD SAMTING FROM BIBLE | 2 KINGS 13-15
“Kasem Staka Blessing Taem Iu Duim Samting Witim Full Heart”
Waswe, Iu Barava Followim Christ?
11 Tingim King Jehoash long Israel bifor. Samting wea happen long laef bilong hem showimaot hem important tumas for man strong for duim waka bilong God. From Jehoash fraet nogud Syria kam faetem Israel and winim olketa, hem go krae long Elisha. Profet Elisha talem hem for sutim go wanfala arrow go aot long window wea feisim Syria. Datwan showimaot Jehovah savve helpem Israel for winim Syria. Wanem Elisha talem shud barava strongim king. Then Elisha talem Jehoash for tekem olketa arrow and hitim graon. Jehoash hitim graon thrifala taem. Elisha kros tumas taem hem lukim diswan bikos hem savve sapos Jehoash hitim graon faevfala or sixfala taem, datwan showimaot “olketa bae barava winim Syria.” From datwan, Jehoash bae win lelebet nomoa long thrifala faet. From Jehoash no strong for duim wanem Elisha talem, hem no win long bigfala wei. (2 Kings 13:14-19) Wanem nao iumi savve lanem from datfala story? Jehovah bae blessim iumi nomoa sapos iumi strong for duim waka bilong hem witim full heart.
‘God Bae Givim Gud Samting Long Olketa wea Barava Lukaotem Hem’
Hu nao Jehovah bae givim gud samting long olketa? Paul hem sei, “olketa wea barava lukaotem hem.” Wanfala buk wea helpem olketa wea transleitim Bible sei datfala Greek word wea olketa transleitim “barava lukaotem” hem no minim for savve long hem nomoa, bat hem minim for traem best for worshipim God. Nara buk hem sei datfala Greek verb hem minim for barava waka hard. Tru tumas, Jehovah hem givim gud samting long olketa wea strong for worshipim hem and lovem hem from olketa garem faith.—Matthew 22:37.
Wanem nao gud samting wea Jehovah bae givim long olketa wea faithful for worshipim hem? Hem promis for givim long olketa wanfala nambawan future, wea hem nao for laef olowe long Paradaes long earth. Datwan showimaot Jehovah hem kaen tumas and garem bigfala love. (Revelation 21:3, 4) Nomata distaem tu, olketa wea barava lukaotem Jehovah kasem olketa nambawan blessing. Olketa hapi and satisfae from holy spirit bilong God helpem olketa and olketa followim olketa gudfala advaes long Bible.—Psalm 144:15; Matthew 5:3.
Faendem Gudfala Point
Olketa Main Point From Buk Bilong Second Kings
13:20, 21—Waswe, disfala mirakol mekhae long wei for mekem wanfala samting kamap holy? Barava nomoa nao. Bible nating showim hao pipol mekhae long olketa bon bilong Elisha. Mirakol hia kamap from paoa bilong God, olsem evri nara mirakol wea Elisha duim taem hem laef.
DECEMBER 12-18
GUD SAMTING FROM BIBLE | 2 KINGS 16-17
“Jehovah Bae No Patient Olowe”
it-2-E 908 ¶5
Shalmaneser
Tekovarem Israel. Lo taem wea King Hoshea hem rul lo Israel (c. 758-740 B.C.E.), Shalmaneser V tekovarem Palestine and Hoshea mas serve anda lo rul blo hem and mas peim tax go lo hem. (2Ki 17:1-3) Gogo, Hoshea no peim datfala selen and hem saed witim King So blo Egypt. (Lukim SO.) So Shalmaneser putim Hoshea lo prison and army blo hem hipap raonem Samaria for thrifala year, gogo, hem tekovarem datfala taon, and olketa Israelite kamap prisoner lo Assyria.—2Ki 17:4-6; 18:9-12; comparem Hosia 7:11; Esikiel 23:4-10.
it-1-E 414-415
Prisoner
Main reason why olketa lo ten-tribe kingdom blo Israel lo north and tu-tribe kingdom blo Judah lo south kamap prisoner lo nara kantri hem bikos olketa lusim klin worship blo Jehovah and worshipim olketa laea god. (De 28:15, 62-68; 2Ki 17:7-18; 21:10-15) Jehovah gohed sendem olketa profet blo hem for warnim olketa. (2Ki 17:13) Jeroboam hem first king blo tenfala tribe lo north and hem startim wei for aotem worship wea no klin, bat olketa nara king blo tenfala tribe wea kam bihaen no strong for aotem worship wea no klin. Judah, lo south, no herem olketa warning wea Jehovah givim lo olketa, and no tinghevi tu lo wei wea tenfala tribe lo north kamap prisoner from datwan. (Jeremaea 3:6-10) Gogo olketa from tufala Kingdom evriwan kamap prisoner winim wanfala taem.
Faendem Gudfala Point
it-2-E 847
Samaritan
Firstaem wea datfala toktok “olketa blo Samaria” hem kamap insaed Bible hem bihaen Assyria tekova lo ten tribe kingdom blo Samaria lo 740 B.C.E. Olketa wea stap lo tenfala tribe hia bifor lo 740 B.C.E. nao olketa Samaritan, no olketa nara pipol wea kam lo there from olketa nara ples wea Assyria rul ovarem. (2Ki 17:29) Luk olsem olketa blo Assyria no aotem evri Israelite from there bikos lo 2 Chronicles 34:6-9 (comparem 2Ki 23:19, 20) hem showimaot hao taem King Josiah hem rul, samfala Israelite still stap lo there yet. Gogo, Bible iusim datfala toktok “olketa blo Samaria” for olketa Israelite wea stap yet lo there and nara pipol wea olketa blo Assyria tekem kam lo there tu. So masbi samfala hia pikinini blo olketa Jew wea maritim man from nara kantri. Then bihaen moa, Bible iusim datfala nem “Samaria” for man wea followim olketa biliv wea kamap big lo Shecham and Samaria and wea olketa biliv hia barava difren from biliv blo olketa Jew.—Joh 4:9.
DECEMBER 19-25
GUD SAMTING FROM BIBLE | 2 KINGS 18-19
“Hao Olketa wea Againstim Iumi Trae for Mekem Iumi Wikdaon”
Olketa Main Point From Buk Bilong Second Kings
18:19-21, 25—Waswe, Hezekiah mekem agreement witim Egypt? Nomoa. Samting wea Rabshakeh talem hem no tru, olsem tu wei wea hem sei, “Jehovah nao sendem mi kam.” King Hezekiah wea faithful hem depend nomoa long Jehovah.
“Iu No Fraet. Bae Mi Helpem Iu”
Rabshakeh trae for mekem olketa Israelite daotem Jehovah. Hem sei: “Waswe, hae ples and altar bilong [Jehovah] nao Hezekiah aotem finis? . . . Jehovah sei long mi: ‘Iu mas againstim and barava spoelem disfala land.’” (2 Ki. 18:22, 25) Rabshakeh sei hard tumas for Jehovah faet for pipol bilong hem bikos hem no hapi long olketa. Bat datwan nating tru. Jehovah hapi witim Hezekiah and olketa Jew bikos olketa duim tru worship moa.—2 Ki. 18:3-7.
Hu Nao Sevenfala Man for Lukaftarem Sheepsheep and Eitfala Man wea Lead Distaem
14 King bilong Assyria and army bilong hem olketa camp long Lachish, southwest long Jerusalem. Hem sendem thrifala man long Jerusalem for talem olketa for sarenda. Rabshakeh nao main wan for talem datfala message, and hem story witim pipol long Jerusalem long languis bilong olketa. Firstaem hem talem pipol hia for mas no lisin long Hezekiah bat for obeyim olketa bilong Assyria. Then hem laea long olketa taem hem promis for tekem olketa go long wanfala ples wea olketa bae stap gud. (Readim 2 Kings 18:31, 32.) And tu, Rabshakeh sei olketa god bilong olketa nara nation nating protectim pipol wea worshipim olketa, and bae Jehovah no protectim olketa Jew tu. Olketa pipol long Jerusalem wise for no herem olketa laea story hia. Staka taem pipol bilong Jehovah distaem followim example bilong olketa.—Readim 2 Kings 18:35, 36.
yb74-E 177 ¶1
Part 2—Germany
Datfala grup SS savve talem enikaen laea samting for trikim man for saenem datfala pepa. Then plande taem, olketa barava againstim and spoelem olketa wea saenem datwan. Karl Kirsch hem sei: “Olketa savve laea lo Olketa Jehovah’s Witness and trae for trikim olketa, winim eni nara prisoner lo olketa concentration camp. Olketa tingse hem nao wei for switim olketa for saenem datfala pepa. Staka taem nao olketa askem mifala for saenem. Samfala saenem datwan, then plande taem olketa mas weit for winim wanfala year bifor olketa kamap free. Taem olketa weit, datfala SS tok spoelem olketa front lo evriwan and kolem olketa pipol for laea and sei olketa fraet tumas and forcem olketa for wakabaot front lo olketa brata for mek shame lo olketa bifor olketa go aot from datfala camp.”
Faendem Gudfala Point
it-1-E 155 ¶4
Archaeology
Olsem example, Bible hem sei, tufala son blo King Sennacherib blo Assyria, wea hem nao Adrammelech and Sharezer, killim hem dae, and nara son blo hem, Esar-haddon, kamap king for changem hem. (Mektu Kings 19:36, 37) Bat wanfala raeting from Babylon lo datfala taem, hem sei, lo mek-20 day blo Tebeth, son blo Sennacherib againstim hem and killim hem dae. Berossus, wea hem wanfala priest lo Babylon lo samting olsem 2,300 year bifor, and Nabonidus, wea hem king blo Babylon lo samting olsem 2,600 year bifor, tufala hia tu sei wanfala son blo Sennacherib nomoa killim hem dae. Bat no longtaem go nomoa, olketa faendem wanfala pis ston wea kam from datfala Prism blo Esar-haddon, wea hem nao son wea kamap ruler bihaen lo Sennacherib. Raeting lo datfala pis ston talem klia olketa brata blo hem nao againstim dadi blo olketa wea mekem olketa killim hem dae and then ranawe. Lo datfala buk Universal Jewish History (1948, Vol. I, p. 27), Philip Biberfeld hem sei: “Datfala raeting from Babylon bifor, witim samting wea Nabonidas and Berossus talem, hem rong. Distaem hem showaot klia, samting wea Bible talem nao hem tru. Information lo datfala Prism blo Esar-Haddon abaotem disfala samting wea happen lo history blo Babylon and Assyria hem showimaot Bible hem tru winim samting wea olketa nara man blo Babylon lo datfala taem olketa talem. Diswan hem strongim need for mas barava careful taem wanfala raeting from bifor kam hem talem samting wea difren from wanem Bible hem talem.”
DECEMBER 26–JANUARY 1
GUD SAMTING FROM BIBLE | 2 KINGS 20-21
“Prea Savve Mekem Jehovah for Duim Samting”
ip-1-E 394 ¶23
King Kasem Reward for Faith blo Hem
23 Lo firstaem wea Sennacherib kam for attakim Judah, Hezekiah hem barava sik big. Isaiah talem hem bae hem dae. (Aesaea 38:1) King Hezekiah, wea hem 39 year, hem sorre fogud. Hem no sorre for hemseleva nomoa, bat hem wari abaotem pipol blo hem tu. Olketa blo Assyria kam for attakim Jerusalem and Judah. Sapos Hezekiah hem dae, hu nao bae lead for faetem olketa? Lo datfala taem, Hezekiah no garem eni son for kamap king bihaen lo hem. Hezekiah hem barava prea strong and begim Jehovah for showimaot mercy lo hem.—Aesaea 38:2, 3.
Worshipim Jehovah Long Full Heart Bilong Iu!
16 Bihaen, Hezekiah hem sik and klosap for dae. Long datfala hard taem, hem askem Jehovah for no forgetim wei wea hem faithful long hem and for Jehovah helpem hem. (Readim 2 Kings 20:1-3.) Jehovah herem prea bilong Hezekiah and hem healim hem. Iumi lanem insaed long Bible, iumi no expectim Jehovah for duim mirakol for healim iumi taem iumi sik or for mekem iumi laef longtaem. Bat olsem Hezekiah, iumi savve depend long Jehovah for helpem iumi. Iumi savve sei long Jehovah: “Jehovah, plis no forgetim wei wea mi evritaem faithful for duim wanem iu laekem and worshipim iu long full heart bilong mi.” Waswe, iu trustim Jehovah bae evritaem lukaftarem iu, nomata long taem wea iu sik tu?—Ps. 41:3.
Hao Nao Prea Savve Helpem Mi?
Long taem bilong Bible samfala man bilong faith kasem olketa stret—samtaem olketa mirakol—ansa for prea bilong olketa. Olsem example, taem King Hezekiah faendaot hem garem wanfala sik wea bae killim hem dae, hem askem God for sevem hem. God ansa: “Mi herem prea bilong iu. Mi lukim olketa wata long eye bilong iu. Distaem mi healim iu.” (2 Kings 20:1-6) Olketa nara man and woman wea fraet long God kasem olketa sem samting tu taem God duim samting for olketa.—1 Samuel 1:1-20; Daniel 10:2-12; Acts 4:24-31; 10:1-7.
Faendem Gudfala Point
it-2-E 240 ¶1
Tul for Levelem Samting
Man savve iusim tul for levelem samting taem hem building haos or for chekim hao strong nao datfala haos. Jehovah sei hem bae iusim lo Jerusalem tu “string for measurem samting wea [hem] iusim lo Samaria,” witim tu, “tul for levelem samting wea [hem] iusim lo famili blo Ahab.” Taem God measurem Samaria and famili blo King Ahab, datwan showimaot olketa nogud tumas and mas finis. Lo sem wei, God bae judgem Jerusalem and olketa king blo hem. Hem bae showimaot olketa nogud tumas and finisim datfala taon. Olketa samting hia hem happen lo 607 B.C.E. (2Ki 21:10-13; 10:11) Isaiah talem olketa nogud pipol and ruler lo Jerusalem wanem bae kasem olketa and hem talem disfala toktok blo Jehovah: “Stretfala wei fo jajem pipol bae hemi olsem string fo mesarem faondesin, an wei fo duim stret long evrisamting bae hemi olsem ledlaen fo mekem wolston fo hemi stret.” Olketa standard for wanem hem stret and tru bae showimaot klia sapos man worshipim God or nomoa wea bae mekem hem savve laef or mas dae.—Aesaea 28:14-19.