Olketa Reference for Laef and Ministry Meeting Buk
© 2022 Christian Congregation of Jehovah’s Witnesses
JANUARY 2-8
GUD SAMTING FROM BIBLE | 2 KINGS 22-23
“Why Nao Iumi Mas Hambol?”
Jehovah Hapi Long Hambol Man Josiah
Start long early morning, olketa wakman waka for repairim temple. Iumi sure Josiah thankiu long Jehovah from olketa wakman wakem bak samting wea olketa wicked laen dadi bilong hem duim for spoelem haos bilong God. Taem waka go ahed, Shaphan kam for reportim wanfala samting. Bat wanem nao hem holem? Tru nao, hem karem wanfala scroll! Hem sei Hae Priest Hilkiah faendem “buk bilong law bilong Jehovah wea Moses hem raetem.” (2 Chronicles 34:12-18) Wanfala spesol samting nao olketa faendem—barava first copy bilong Law!
Josiah barava laek herem evri toktok insaed disfala buk. Taem Shaphan read, king hem trae for luksavve hao nao each komand fitim hem and olketa pipol. Hem barava tinghae long wei wea buk hia mekhae long tru worship, wea talem hao pipol bae kasem trabol and lusim kantri bilong olketa sapos olketa joinim giaman religion. From hem luksavve distaem hem no followim yet samfala komand bilong God, Josiah brekem kaleko bilong hem and givim order long Hilkiah, Shaphan, and samfala moa: ‘Askem Jehovah abaotem olketa toktok long disfala buk; bikos bigfala kros bilong Jehovah bae kam againstim iumi bikos olketa laen dadi bilong iumi nating lisin long toktok bilong disfala buk.’—2 Kings 22:11-13; 2 Chronicles 34:19-21.
Jehovah Hapi Long Hambol Man Josiah
Olketa man for karem message bilong Josiah go long Huldah datfala woman profet long Jerusalem and tekem kam bak wanfala report. Huldah talemaot toktok bilong Jehovah, wea showim hao olketa trabol wea disfala buk wea olketa just faendem hem storyim bae kasem disfala apostate nation. Bat, from Josiah stap hambol front long Jehovah God, hem bae no kasem trabol. Hem bae stap witim laen dadi bilong hem and olketa bae tekem hem go long grev bilong hem long peace.—2 Kings 22:14-20; 2 Chronicles 34:22-28.
Faendem Gudfala Point
Iu Savve Win Nomata Wanem Training Iu Kasem Taem Iu Pikinini
Nomata long olketa nogud samting wea happen taem hem pikinini yet, Josiah go ahed for duim gud samting long eye bilong Jehovah. Rul bilong hem barava win evribit, dastawe Bible hem sei: “No eni king bifor long hem olsem hem long wei for kam bak long Jehovah witim full heart bilong hem and witim full soul and witim full strong bilong hem, long wei for followim evribit law bilong Moses; and no eniwan wea kamap bihaen long hem olsem hem.”—2 Kings 23:19-25.
Example bilong Josiah savve barava encouragem olketa wea mas deal finis witim barava nogud samting taem olketa pikinini yet! Wanem nao iumi savve lanem from example bilong hem? Wanem nao helpem Josiah for chusim stretfala wei and go ahed for followim?
JANUARY 9-15
GUD SAMTING FROM BIBLE | 2 KINGS 24-25
“Mas Gohed for Redi Distaem”
Judgment Day Bilong Jehovah Hem Klosap!
2 Wei wea Zephaniah strong for talemaot profesi hem helpem young Josiah for barava luksavve long need for aotem dirty worship long Judah. Bat, olketa samting wea king duim for aotem giaman religion from datfala land hem no finisim evri wicked fasin from olketa pipol or kavarem olketa sin wea grandadi bilong hem, King Manasseh, hem duim, wea “fulimap Jerusalem witim blood wea no guilty.” (2 Kings 24:3, 4; 2 Chronicles 34:3) So, judgment day bilong Jehovah hem mas kam.
Olketa Main Point From Buk Bilong Jeremiah
Hem year 607 B.C.E. and hem mek-11 year long rul bilong Zedekiah. Army bilong King Nebuchadnezzar bilong Babylon stap raonem Jerusalem for 18 month finis. Long mek-seven day long mek-faev month long mek-19 year long rul bilong Nebuchadnezzar, Nebuzaradan, wea hem chief bilong bodygard, hem ‘kam kasem,’ or arrive long Jerusalem. (2 Kings 25:8) Maet taem hem stap long camp bilong hem aotsaed long olketa wall bilong datfala taon, Nebuzaradan lukluk long olketa samting wea gohed and hem mekem wanfala plan for duim samting. Thrifala day bihaen, long mek-ten day bilong datfala month, hem ‘kam insaed,’ wea minim hem go insaed Jerusalem. And hem bonem datfala taon.—Jeremiah 52:12, 13.
Faendem Gudfala Point
Olketa Main Point From Buk Bilong Second Kings
24:3, 4. From Manasseh guilty for killim dae olketa man, Jehovah “no willing for forgivim” Judah. God no ting nating long blood bilong man wea no duim eni rong samting. Iumi sure Jehovah bae pei bak long wei for finisim pipol wea killim dae olketa wea no duim eni rong samting.—Psalm 37:9-11; 145:20.
JANUARY 16-22
GUD SAMTING FROM BIBLE | 1 CHRONICLES 1-3
“Bible—Buk wea Talem Tru Samting, No Kastom Story”
w09-E 9/1 14 ¶1
Waswe, Adam and Eve Tufala Real Person?
Olsem example, tingim list blo geneaology wea stap lo First Chronicles chapter 1 go kasem chapter 9 and lo Luke chapter 3. Wanfala list garem record blo 48 genereson and narawan garem 75 genereson. Luke storyim geneaology blo Jesus Christ, bat Chronicles showim laen blo olketa king and priest blo Israel. Tufala list evriwan garem nem blo olketa man olsem Solomon, David, Jacob, Isaac, Abraham, Noah, and then Adam. Evri nem lo olketa list hia hem olketa real pipol wea stap bifor, and Adam nao first real person lo olketa list hia.
Noah and Flood Wanfala Tru Story
Tufala buk long Bible wea storyim famili laen showimaot Noah hem wanfala man wea stap bifor. (1 Chronicles 1:4; Luke 3:36) Ezra and Luke, wea raetem tufala buk hia barava chekim gud samting wea olketa raetem. Luke hem storyim famili laen bilong Jesus Christ go kasem Noah.
w09-E 9/1 14-15
Waswe, Adam and Eve Tufala Real Person?
Olsem example, tingim Bible teaching wea staka lo religion tinghae lo hem, wea hem nao teaching abaotem ransom. Jesus Christ givim perfect laef blo hem olsem ransom for sevem pipol from sin blo olketa. (Matthew 20:28; John 3:16) Ransom hem price wea man peim for kasem bak samting wea lus, and price wea hem peim mas semsem olsem price blo datfala samting wea lus. Dastawe Bible sei Jesus nao datfala “price wea semsem.” (1 Timothy 2:6) Maet iumi ting, wat nao price hia semsem witim? Bible sei: “Evriwan dae bikos long Adam, and tu, evriwan bae laef bak bikos long Christ.” (1 Corinth 15:22) Perfect laef wea Jesus sakrifaesem for baem bak olketa man wea obey hem semsem witim perfect laef wea Adam lusim taem hem sin lo Eden. (Rome 5:12) So sapos Adam hem no wanfala real person, ransom sakrifaes blo Christ bae barava iusles nomoa.
Faendem Gudfala Point
it-1-E 911 ¶3-4
Genealogy
Nem blo Olketa Woman. Samfala taem olketa savve raetem nem blo olketa woman insaed lo geneology lo bifor sapos datwan hem important saed lo history. Luk olsem nem blo Sarai (Sarah) stap lo Genesis 11:29, 30, for showimaot datfala Pikinini wea God promisim bae kam from laen blo Sarah and no from nara waef blo Abraham. Maet nem blo Milcah stap bikos hem grani blo Rebekah wea hem nao waef blo Isaac. Diswan hem for showimaot Rebekah kam from laen blo olketa relative blo Abraham, wea datwan hem important bikos Abraham hem sei, Isaac mas no tekem waef from olketa nara nation. (Ge 22:20-23; 24:2-4) Lo Genesis 25:1, hem garem nem blo Keturah wea hem mek-tu waef blo Abraham. Diswan showimaot Abraham marit moa bihaen Sarah hem dae, and hem still fit for garem pikinini yet, nomata 40 years go pas finis bihaen Jehovah duim datfala mirakol wea mekem Abraham fit for garem pikinini. (Ro 4:19; Ge 24:67; 25:20) And hem showimaot hao laen blo Israel hem join go tu lo samfala tribe blo Midian and Arabia.
Olketa raetem tu nem blo Leah, Rachel, and olketa concubine blo Jacob witim olketa son blo olketa. (Ge 35:21-26) Diswan helpem iumi for luksavve hao Jehovah deal witim olketa son hia bihaen. Datwan tu reason why olketa raetem nem blo olketa nara woman lo geneology. Taem man kasem inheritance bikos lo mami blo hem, maet nem blo datfala woman hem stap tu. (Nu 26:33) Tamar, Rahab, and Ruth nao thrifala spesol example. Lo each situation, samting wea olketa woman hia duim hem spesol wea datwan lead go lo wei wea nem blo olketa stap lo laen blo Messiah, Jesus Christ. (Ge 38; Ru 1:3-5; 4:13-15; Mt 1:1-5) Samfala example blo olketa woman wea nem blo olketa insaed geneology hem lo 1 Chronicles 2:35, 48, 49; 3:1-3, 5.
JANUARY 23-29
GUD SAMTING FROM BIBLE | 1 CHRONICLES 4-6
“Olketa Prea blo Mi Showimaot Mi Wat Kaen Man?”
w10-E 10/1 23 ¶3-7
Man wea “Herem Prea”
Jabez hem man for prea. Hem startim prea lo wei for ask strong lo God for blessing blo hem. Then hem askem thrifala samting wea showimaot hem garem strongfala faith.
First samting, Jabez prea strong lo God and hem ask olsem: “Plis mekem mi for garem samfala land moa.” (Verse 10) Jabez hem gudfala man. Hem no greedy for trae tekem land blo nara man. Luk olsem reason hem askem datwan hem bikos lo pipol, no land. Maet hem ask for hem kasem samfala land moa mekem staka moa pipol wea worshipim Jehovah savve stap insaed.
Mek-tu, Jabez ask strong for “hand” blo God stap witim hem. Tokpiksa hand blo God hem paoa blo hem wea hem savve iusim for helpem olketa wea worshipim hem. (1 Chronicles 29:12) For kasem olketa samting wea hem barava laekem, Jabez askem God wea hem willing tumas for helpem olketa wea showimaot faith lo hem.—Isaiah 59:1.
Mek-thri, Jabez hem ask olsem: “Protectim mi from eni nogud samting, mekem datwan hem no spoelem mi.” Maet disfala toktok, “mekem datwan hem no spoelem mi,” minim Jabez no prea for Jehovah stopem nogud samting for kasem hem bat for hem protectim Jabez from wei wea datfala nogud samting savve mekem hem sorre tumas, wikdaon, and datwan spoelem hem.
Prea blo Jabez showimaot hem laek protectim tru worship and faith blo hem, and showimaot hem trustim God for herem prea blo hem. Wanem nao Jehovah duim? Lo end blo disfala story lo Bible wea short tumas, hem sei: “So God givim nao evri samting wea hem askem.”
Faendem Gudfala Point
Olketa Main Point From Buk Bilong First Chronicles
5:10, 18-22. Long taem bilong King Saul, olketa tribe long east bilong Jordan win long faet againstim olketa Hagrite nomata namba bilong olketa Hagrite hem tu taems moa big winim namba bilong olketa tribe hia. Diswan happen bikos olketa strongfala man bilong olketa tribe hia trust long Jehovah and askem hem for help. Iumi tu mas garem full trust long Jehovah taem iumi gohed insaed spiritual faet nomata olketa enemy staka winim iumi.—Ephesians 6:10-17.
JANUARY 30–FEBRUARY 5
GUD SAMTING FROM BIBLE | 1 CHRONICLES 7-9
“Jehovah Savve Helpem Iu for Duim Eni Hard Assignment”
Olketa Main Point From Buk Bilong First Chronicles
9:26, 27. Olketa Levite wea lukaftarem olketa gate kasem wanfala bigfala responsibility. Olketa kasem key for gate bilong olketa holy area bilong temple. Olketa nating miss for openem olketa gate each day. Iumi kasem responsibility for faendem pipol insaed territory bilong iumi and helpem olketa for worshipim Jehovah. Fitim iumi for showimaot hao Jehovah savve trustim and depend long iumi olsem olketa Levite wea lukaftarem olketa gate!
Waswe, Iu Olsem Phinehas Taem Hard Samting Kamap?
Phinehas garem bigfala waka for duim long Israel bifor. Nomata olsem, hem no fraet, hem garem fasin for luksavve, and depend long Jehovah for helpem hem taem hard samting kamap. Jehovah hapi long wanem Phinehas duim for lukaftarem pipol bilong hem. Samting olsem 1,000 year bihaen, Ezra sei: “Phinehas wea hem son bilong Eleazar, hem leader bilong olketa bifor and Jehovah helpem hem.” (1 Chron. 9:20) Iumi laekem Jehovah for duim sem samting for olketa wea leadim waka long kongregeson and for evri Christian wea faithful for worshipim hem.
Faendem Gudfala Point
Singsing Long Jehovah!
6 Jehovah talem olketa profet hao pipol bilong hem mas singim olketa song for praisem hem. Olketa Levite wea singsing no need for duim samfala waka wea olketa nara Levite duim mekem olketa garem taem for raetem olketa song and for practicem.—1 Chron. 9:33.
FEBRUARY 6-12
GUD SAMTING FROM BIBLE | 1 CHRONICLES 10-12
“Barava Laek for Duim Wanem God Laekem”
“Teachim Mi for Duim Wanem Iu Laekem”
12 Iumi savve lanem nara samting from example bilong David. David luksavve hao for followim olketa principle and hem laek for duim datwan long laef bilong hem. Disfala word principle hem minim wanfala tru samting wea helpem iumi for disaed gud, and wea helpem iumi for minim tingting bilong Jehovah abaotem samting. Staka taem iumi savve lanem wanfala principle from wanfala law bilong Jehovah, wea hem nao samting David duim. Olsem example, wanday David sei hem “laekem tumas for drinkim wata from datfala hol for keepim wata long Bethlehem.” Bat long datfala taem olketa Philistine nao tekova long Bethlehem. Thrifala soldia bilong David putim laef bilong olketa long danger taem olketa go insaed long datfala taon for tekem kam wata for David. Bat ‘David no laek drinkim datfala wata, and hem kapsaetem long graon for givim go bak long Jehovah.’ Why nao hem duim datwan? David sei: “From mi respectim God, hard tumas for mi duim diswan! Waswe, bae mi drinkim blood bilong thrifala man hia? Olketa putim laef bilong olketa long danger for tekem kam disfala wata.”—1 Chron. 11:15-19.
13 David savve Law hem sei man mas no kaikaim blood, bat mas kapsaetem long graon for givim go bak long Jehovah. Hem minim tu why nao Law talem diswan. David savve “soul bilong evri samting wea laef hem stap long blood.” Bat olketa soldia hia givim David wata, no blood, so why nao David no laek for drinkim? Hem no drinkim datfala wata bikos hem luksavve long wanfala principle insaed long datfala law abaotem blood. Hem savve Jehovah ting long blood olsem samting wea barava spesol. From olketa man hia putim laef bilong olketa long danger for go tekem kam disfala wata, long tingting bilong David, sapos hem drinkim datwan, datwan bae showimaot hem no ting long blood bilong olketa olsem samting wea barava spesol. So David no drinkim datfala wata, bat hem disaed for hem mas kapsaetem long graon.—Lev. 17:11; Deut. 12:23, 24.
Letem Olketa Law and Principle Bilong God Trainim Konsens Bilong Iu
5 Sapos iumi laekem olketa law bilong God for helpem iumi, iumi mas duim moa samting winim wei for readim and for savve abaotem olketa nomoa. Iumi need for lovem and tinghae long olketa law hia. Bible talem iumi for: “Barava heitim olketa rabis samting and hol strong long samting wea hem stret.” (Rome 12:9) Bat hao nao iumi savve duim datwan? Main samting hem for lane for garem sem tingting olsem Jehovah. Tingim disfala example: Maet iu garem problem for no sleep gud. Doctor talem iu for kaikaim olketa healthy kaikai, exercise, and changem samfala samting long laef bilong iu. Bihaen iu followim samting wea doctor talem, iu luksavve datwan helpem iu! Taem olsem, iu bae barava tinghae long doctor hia bikos hem helpem iu for stap gud.
6 Long sem wei, Creator bilong iumi givim olketa law for protectim iumi from olketa nogud samting wea kamaot from sin and tu for helpem iumi stap gud. Olsem example, Bible teachim iumi hao iumi bae kasem gud samting sapos iumi no laea, raverave, steal, durong, raf, or duim spiritism. (Readim Provebs 6:16-19; Rev. 21:8) Taem iumi kasem olketa gud samting wea kamaot from wei for duim wanem Jehovah laekem, datwan bae mekem grow wei wea iumi lovem and tinghae long Jehovah and olketa law bilong hem.
Faendem Gudfala Point
it-1-E 1058 ¶5-6
Heart
Serve Witim “Full Heart.” Real heart blo man hem mas complete mekem hem waka gud, bat tokpiksa heart hem savve divaed. David prea olsem: “Mekem heart blo mi complete mekem mi fraet lo nem blo iu,” wea showimaot heart blo man savve divaed abaotem samting hem lovem and fraetem. (Ps 86:11) Maet kaen man olsem garem ‘heart wea divaed’ wea minim worship blo hem hafhaf. (Ps 119:113; Re 3:16) Man savve garem tu dabol heart taem hem trae for waka for tufala boss, or taem hem talem wanfala samting bat hem tingim nara samting. (1Ch 12:33; Ps 12:2, ftn) Jesus barava tok againstim kaen laea olsem.—Mt 15:7, 8.
For mekem God hapi, heart blo man mas no divaed, or garem dabol heart, bat hem mas worshipim God witim full heart. (1Ch 28:9) Diswan minim man mas barava waka hard bikos heart savve laea lo man and laek for duim nogud samting. (Jer 17:9, 10; Ge 8:21) Samting wea savve help nao, hem for prea from heart (Ps 119:145; La 3:41), studyim Bible evritaem (Ezr 7:10; Pr 15:28), strong for preachim gud nius (comparem Jer 20:9), and associate witim olketa narawan wea worshipim Jehovah witim full heart.—Comparem 2Ki 10:15, 16.
FEBRUARY 13-19
GUD SAMTING FROM BIBLE | 1 CHRONICLES 13-16
“Kasem Gud Samting Taem Iu Followim Direction”
Waswe, Enitaem Iu Ask, “Wea Nao Jehovah?”
12 Bihaen Israel kasem bak ark bilong covenant and for planti year keepim long Kiriath-jearim, King David laek for muvim datfala Ark go long Jerusalem. Hem story witim olketa chief and hem sei for muvim Ark ‘sapos hem gud long olketa and Jehovah hem willing.’ Bat hem no barava faendemaot will bilong Jehovah saed long diswan. Sapos hem duim olsem, hard tumas for olketa putim datfala Ark antap long wanfala wagon. Bae olketa Kohathite Levite karem long shoulder bilong olketa, olsem kliafala instruction bilong God talem. Nomata David planti taem luk aotem direction bilong Jehovah, long datfala taem hem fail for duim olsem long stretfala wei. Barava nogud samting kamaot from datwan. Bihaen, David talemaot: “God bilong iumi Jehovah hem kros long iumi, bikos iumi no luk aotem hem followim stretfala wei.”—1 Chronicles 13:1-3; 15:11-13; Numbers 4:4-6, 15; 7:1-9.
Waswe, Enitaem Iu Ask, “Wea Nao Jehovah?”
13 Gogo, taem olketa Levite karem go datfala Ark from haos bilong Obed-edom go long Jerusalem, olketa singim wanfala song wea David raetem. Hem garem disfala reminder wea kam from heart: “Luk aotem Jehovah and strong bilong hem, luk aotem feis bilong hem evritaem. No forgetim olketa nambawan samting wea hem duim, olketa mirakol and olketa judicial disison bilong mouth bilong hem.”—1 Chronicles 16:11, 12.
Faendem Gudfala Point
Worshipim Jehovah, wea Hem King for Olowe
14 David tekem kam long Jerusalem datfala ark bilong agreement. Long datfala day wea evriwan hapi, olketa Levite singim wanfala song for praisem Jehovah and olketa talem important toktok wea stap long 1 Chronicles 16:31. Olketa sei: “Talemaot long olketa nation: ‘Jehovah hem kamap King!’” Bat from Jehovah nao King for olowe, why nao verse hia sei hem kamap King long datfala taem? Jehovah hem kamap King taem hem markem David for duim samting God laekem. Hem barava important for iumi minim wei wea Jehovah hem kamap King. Bifor David dae, Jehovah promisim hem rul bilong hem bae gohed for olowe. Hem sei: “Mi mas mekem pikinini bilong iu, wea hem son bilong iu, kamap bihaen long iu, and mi bae mekem kingdom bilong hem rul for olowe.” (2 Sam. 7:12, 13) Disfala promis kamap tru winim 1,000 year bihaen, taem “pikinini” bilong David hem showaot. Hu nao datfala pikinini, and wanem taem nao hem kamap King?
FEBRUARY 20-26
GUD SAMTING FROM BIBLE | 1 CHRONICLES 17-19
“Gohed for Hapi Nomata Iu No Fit for Duim Samfala Samting”
w06 7/15 19 ¶1
Tingim Olowe Olketa Gud Samting Abaotem Organization Bilong Jehovah
DAVID long Israel bifor hem wanfala man wea olketa Hebrew Scripture talem plande samting abaotem hem. Hem wanfala shepherd, man wea savve pleim music instrument, profet and king, and hem barava trust long Jehovah God. Wei wea David barava fren gud witim Jehovah muvim hem for laek buildim wanfala haos for God. Kaen haos olsem, wea hem nao temple, bae kamap main ples for tru worship long Israel. David savve hao datfala temple and waka wea bae gohed long there bae mekem pipol bilong God garem bigfala hapi and olketa blessing. Dastawe David hem sing olsem: “Hapi nao man wea iu [Jehovah] chusim and wea iu kosim hem for kam, mekem hem savve stap insaed long olketa courtyard bilong iu. Mifala bae barava satisfae long gudfala samting abaotem haos bilong iu, datfala holy ples bilong temple bilong iu.”—Psalm 65:4.
Hapi lo Olketa Samting wea Iumi Duim for Jehovah
11 Datfala tokpiksa helpem iumi for luksavve hem important for waka hard and duim gud eni waka iumi duim for Jehovah, and datwan nao bae mekem iumi barava hapi. So hem gud for “barava busy” lo preaching waka and lo kongregeson. (Acts 18:5; Heb. 10:24, 25) Iumi laek for prepare gud for olketa meeting mekem iumi savve givim koment wea strongim narawan, and duim gud eni student assignment wea iumi kasem lo midol week meeting. Sapos olketa askem iumi for duim eni waka lo Kingdom Hall, kam lo taem wea olketa markem and duim gud datfala waka. Tinghae and waka hard for kamap gud lo eni assignment iumi kasem. (Provebs 22:29) Taem iumi waka hard and duim gud eni waka iumi kasem, bae iumi barava hapi. (Gal. 6:4) And tu, bae iumi hapi nomata narawan kasem wanfala privilege wea iumi laekem.—Rome 12:15; Gal. 5:26.
Faendem Gudfala Point
w20.02 12, box
Iumi Lovem Tumas Dadi blo Iumi Jehovah
Waswe, Jehovah Tingim Mi Tu?
Waswe, enitaem iu askem iuseleva olsem, ‘Why nao Jehovah interest for savve lo mi, nomata staka billion pipol nao stap lo disfala earth?’ Staka gud pipol tu garem kaen tingting olsem. King David hem sei: ‘Lod Jehovah, yu nao yu God, an mifala pipol long wol i olsem samting nating nomoa. Nomata olsem, yu tingim mifala olowe. Hao nao yu save duim olsem?’ (Sams 144:3) David hem barava sure dat Jehovah savve gud lo hem. (Fas Kronikols 17:16-18) And thru lo Bible and organization blo hem, Jehovah helpem iu tu for luksavve dat hem lukim love wea iu showimaot for hem. Tingim samfala scripture insaed lo Bible wea savve helpem iu for barava sure lo datwan:
• Taem iu no born yet Jehovah lukim iu finis.—Sams 139:16.
• Jehovah savve wanem nao lo heart blo iu, and hem savve lo tingting blo iu.—Fas Kronikols 28:9.
• Jehovah seleva lisin lo evri prea blo iu.—Sams 65:2.
• Wanem iu duim savve affectim feeling blo Jehovah.—Provebs 27:11.
• Jehovah seleva laekem iu for kam klos lo hem.—John 6:44.
• Sapos iu dae, Jehovah savve gud lo iu and hem bae fit for resurrectim iu. Hem bae givim iu wanfala niu body and mind and putim bak evri memory blo iu and evri wei wea iu garem bifor.—John 11:21-26, 39-44; Acts 24:15.
FEBRUARY 27–MARCH 5
GUD SAMTING FROM BIBLE | 1 CHRONICLES 20-22
“Helpem Olketa Young Wan for Duim Waka blo Jehovah”
“Teachim Olketa Samting Hia Long Olketa Man wea Faithful”
8 Readim 1 Chronicles 22:5. Maet long tingting bilong David, Solomon hem no fit yet for duim bigfala waka olsem. Bae datfala temple hem mas “barava luk naes,” bat Solomon hem “young nomoa and no garem bigfala savve” long datfala taem. Nomata olsem, David hem savve Jehovah bae helpem Solomon for duim datfala spesol waka. So David duim wanem hem fit for duim for sapotim Solomon long datfala big waka.
“Teachim Olketa Samting Hia Long Olketa Man wea Faithful”
7 Maet David hem barava feel nogud from hem laekem tumas for wakem datfala temple for Jehovah. Nomata olsem, hem barava sapotim son bilong hem Solomon for wakem datfala temple. David organizem waka for hipimap iron, copper, silver, gold, and timba. And tu, hem organizem olketa wakaman for wakem datfala temple. David no feel nogud bikos Solomon nao bae kasem praise for buildim datfala temple, wea gogo olketa kolem temple bilong Solomon. Bat hem encouragem Solomon and sei: “Son bilong mi, Jehovah bae stap witim iu, and bae hem helpem iu for wakem datfala haos bilong Jehovah, wea hem God bilong iu, olsem hem promisim finis long iu.”—1 Chron. 22:11, 14-16.
Parents, Waswe, Iu Helpem Pikinini Bilong Iu Kamap Fit for Baptaes?
14 Olketa elder savve helpem parents taem olketa storyim long olketa pikinini gudfala samting abaotem olketa spiritual goal. Wanfala sista wea pioneer for winim 70 year tingim taem wea Brata Charles Russell encouragem hem taem hem six year. Hem sei: “For 15 minute hem story witim mi abaotem olketa spiritual goal bilong mi.” Tru nao, olketa gudfala toktok and wei for givim encouragement savve affectim man for full laef bilong hem. (Provebs 25:11) And tu, olketa elder savve invaetem parents and pikinini for help long eni Kingdom Hall project and askem olketa young wan for duim waka wea fitim age and strong bilong olketa.
15 Hao nao olketa long kongregeson savve helpem olketa young wan? Olketa savve showimaot olketa tingim olketa young wan. Taem olketa luksavve olketa young gohed for grow long spiritual wei olketa savve encouragem olketa. Waswe, hem givim naesfala koment from heart bilong hem or duim wanfala part insaed midol week meeting? Waswe, hem gohed faithful taem hem kasem test or hem iusim chance wea hem garem for preach long skul? Sapos olsem, praisem hem for datwan. Iumi savve markem goal for story gud witim wanfala young wan bifor and bihaen long meeting. Taem iumi duim olsem, olketa young wan bae feel olsem olketa part long kongregeson bilong Jehovah.—Sams. 35:18.
Faendem Gudfala Point
Olketa Main Point From Buk Bilong First Chronicles
21:13-15. Jehovah givim komand long angel for stopem datfala trabol bikos Hem barava feel sorre long bigfala wei for safa wea pipol bilong Hem kasem. Tru tumas, “olketa wei wea hem showimaot mercy hem staka tumas.”