Hao Nao Jehovah Bae Rememberim Iu?

“REMEMBERIM mi, O God bilong mi.” Planti taem Nehemiah barava askem God thru long olketa toktok hia. (Nehemiah 5:19; 13:14, 31) Taem man wari tumas, hem fasin bilong hem for tan go long God for ask strong witim kaen toktok olsem.

Bat, wanem nao insaed mind bilong pipol taem olketa askem God for rememberim olketa? Hem klia, olketa hope for God duim moa samting winim wei for rememberim nem bilong olketa nomoa. Iumi sure hao olketa hope long sem wei olsem wanfala long tufala man for brekem law wea olketa killim dae saed long Jesus. Man hia, no olsem narawan, askem Jesus olsem: “Rememberim mi taem iu kasem kingdom bilong iu.” Hem wantem Jesus no for rememberim nomoa hu nao hem bat for duim samting for hem tu—for resurrectim hem.—Luke 23:42.

Evritaem Bible showimaot hao wei wea God “remember” minim hem duim gud samting. Olsem example, bihaen floodwata fulap long earth for 150 day, “God rememberim Noah . . . , and God mekem wanfala wind for blow pas ovarem earth, and wata hem start katdaon.” (Genesis 8:1) Samfala handred year bihaen, Samson, wea olketa Philistine aotem eye bilong hem and chainim, hem prea olsem: “Jehovah, rememberim mi, plis, and strongim mi, plis, distaem nao.” Jehovah rememberim Samson taem hem givim hem bigfala strong mekem hem savve pei bak againstim olketa enemy bilong God. (Judges 16:28-30) And for Nehemiah, Jehovah blessim olketa hard waka bilong hem, and trufala worship kamap gud moa long Jerusalem.

Aposol Paul sei olsem: “Olketa raetem evri samting bifor for teachim iumi, mekem thru long wei wea iumi stand strong and thru long comfort from olketa Scripture iumi savve garem hope.” (Romans 15:4) Sapos iumi rememberim Jehovah taem iumi duim will bilong hem, olsem olketa faithful servant bilong hem bifor, iumi savve sure Jehovah bae rememberim iumi taem hem helpem iumi for kasem olketa need bilong iumi evriday, taem hem saportim iumi long olketa test bilong iumi, and taem hem sevem iumi from judgment bilong hem for pipol wea no followim God.—Matthew 6:33; 2 Peter 2:9.

Iu Laekem Samwan for Visitim Iu?

Nomata long disfala world wea garem staka trabol, iu savve kasem hapi from stretfala savve bilong Bible abaotem God, Kingdom bilong hem, and nambawan purpose bilong hem for olketa man. Sapos iu laekem moa information or iu laekem samwan for kam long haos bilong iu for conductim wanfala free Bible study witim iu, plis raet go long Jehovah’s Witnesses of the Solomon Islands Trust Board Inc., Box 166, Honiara, or long wanfala address wea fitim long page 30