Olketa Reference for Laef and Ministry Meeting Buk
© 2023 Watch Tower Bible and Tract Society of Pennsylvania
NOVEMBER 6-12
GUD SAMTING FROM BIBLE | JOB 13-14
“Sapos Man Hem Dae, Hao, Hem Savve Laef Bak Moa?”
w99-E 10/15 3 ¶1-3
Pipol Trae for Laef Longtaem
STAKA distaem tu agree witim toktok hia abaotem hao laef short tumas, nomata Moses raetem datwan 3,500 year go finis. From bifor kam, pipol no satisfae from iumi enjoyim laef for short taem nomoa and then iumi olo and dae. Dastawe lo history blo olketa man, olketa traem enikaen wei for mekem man laef longtaem.
Lo taem blo Job, olketa lo Egypt savve kaikaim bol blo olketa animal for trae mekem olketa luk young. Wanfala main goal blo olketa wea wakem medicine lo taem bifor kam hem for faendem treatment wea savve mekem man laef longtaem. Staka man hia tingse laea gold wea olketa wakem bae mekem man for laef olowe and tingse wei for iusim olketa gold pleit taem olketa kaikai bae mekem man laef longtaem tu. Olketa Chinese man bifor tu tingse wei for duim meditation, brithing exercise, and diet, savve changem body blo man and mekem hem for no savve dae.
Explorer from Spain, Juan Ponce de León hem barava lukaotem eni wei for no kamap olo. Lo datfala buk Hermippus Redivivus, wanfala doctor lo mek-18 century sei, olketa shud keepim olketa young gele lo wanfala smol rum lo spring season and trae for kollectim brith blo olketa. Hem sei, for olketa kollectim brith blo olketa hia lo container and then man savve brithim mekem hem laef longtaem. Bat iumi savve, olketa samting hia no mekem man for laef longtaem.
Waswe, Tree wea Olketa Katem Daon Savve Grow Bak?
SAPOS iumi markem wanfala olive tree wea luk old and bend olobaot witim wanfala cedar tree long Lebanon wea barava luk naes, maet iumi ting datfala olive tree hem no spesol nomoa. Nomata olsem, olketa olive tree savve grow long olketa ples wea olketa nara tree no savve grow gud long hem. Samfala olive tree laef for samting olsem 1,000 year finis. Olketa rut bilong olive tree hem strong and savve go deep insaed long graon. Nomata olketa katem daon wanfala olive tree, bat hem savve grow bak moa. Sapos olketa rut bilong hem laef yet, bae datfala tree hem grow bak moa.
Faithful man Job hem savve sapos hem dae, hem bae laef bak moa. (Job 14:13-15) Hem iusim example bilong wanfala tree, maet olive tree, for showimaot hem sure God bae mekem hem laef bak. Job sei: “Nomata tree tu hem garem hope. Sapos olketa katem daon, hem savve grow bak moa.” Taem hem rain bihaen hem drae fogud, wanfala olive tree wea olketa katem daon savve grow moa and garem “olketa niu branch olsem wanfala young plant.”—Job 14:7-9.
w11-E 3/1 22 ¶5
“Bae Iu Barava Laekem Tumas”
Toktok blo Job teachim iumi spesol samting abaotem Jehovah. Hem barava lovem pipol olsem Job, wea letem hem for trainim and mekem olketa kamap pipol wea hem laekem tumas. (Isaiah 64:8) Jehovah tinghae tumas lo olketa wea faithful lo hem. Hem “barava laekem tumas” olketa loyal wan wea dae finis for laef bak. Wanfala savveman storyim dat “no eni nara toktok lo Hebrew languis hem olsem datwan, wea showimaot man hem barava laekem tumas for kasem samting.” So Jehovah hem no forgetim olketa wea worshipim hem, and hem laekem tumas tu for mekem olketa laef bak.
Faendem Gudfala Point
it-1-E 191
Asis
Pipol iusim tu asis for piksarem samting wea iusles and no important. Olsem example, Abraham sei lo Jehovah, “Mi dust and asis nomoa.” (Ge 18:27; lukim tu Isa 44:20; Job 30:19.) And Job sei toktok blo thrifala man wea shud comfortim hem, hem olsem “olketa saying blo asis.”—Job 13:12.
NOVEMBER 13-19
GUD SAMTING FROM BIBLE | JOB 15-17
“Eliphaz Showimaot Rong Wei for Givim Comfort”
Againstim TIngting wea No Stret!
Long thrifala taem wea Eliphaz story, hem talem idea hao God askem olketa servant bilong hem for duim tumas samting and nomata wanem nao olketa duim, olketa no savve mekem hem hapi. Eliphaz talem Job hao God “no trustim olketa servant bilong hem. And hem accusim olketa angel bilong hem.” (Job 4:18) Bihaen, Eliphaz sei olsem abaotem God: “Hem no trustim olketa holy wan bilong hem, and nomata skae hem no klin long eye bilong hem.” (Job 15:15) And hem ask olsem: “Waswe, datfala Olmaeti Wan hem hapi long wei wea iu raeteous?” (Job 22:3) Bildad agree witim hem, from hem sei: “Moon hem stap and hem no braet; and olketa star nating klin long eye bilong [God].”—Job 25:5.
Iumi mas careful long kaen tingting olsem wea savve spoelem iumi. Hem savve leadim iumi for garem tingting hao God askem iumi for duim tumas samting. Diswan savve barava spoelem wei wea iumi fren witim Jehovah. And tu, sapos iumi garem tingting olsem, wanem nao bae iumi duim taem iumi kasem discipline wea iumi needim? Winim wei for hambol for acceptim datwan, maet heart bilong iumi kamap “kros long Jehovah,” and iumi keepim datfala kros. (Proverbs 19:3) Datwan savve barava spoelem wei wea iumi fren witim God!
Followim Example Bilong Jesus for Hambol and for Kaen
16 Toktok bilong iumi. Wei for kaen bae mekem iumi laek for talem toktok wea “comfortim olketa wea sorre.” (1 Thess. 5:14) Wanem nao iumi savve talem for encouragem olketa? Iumi savve talem olketa iumi barava tingim olketa. Iumi savve talem olketa iumi tinghae long gudfala wei bilong olketa and samting wea olketa duim. Iumi savve talem olketa Jehovah tinghae long olketa, dastawe hem leadim olketa for kam long truth. (John 6:44) Helpem olketa for luksavve Jehovah barava tingim pipol bilong hem wea “safa” or “kasem hard taem.” (Ps. 34:18) Wei for tok kaen savve barava strongim olketa wea needim comfort.—Prov. 16:24.
Faendem Gudfala Point
Olketa Main Point From Buk Bilong Job
7:9, 10; 10:21; 16:22—Waswe, toktok hia showimaot Job hem no biliv long resurrection? Disfala toktok hem abaotem samting wea klosap for kasem hem. So wanem nao hem minim? Maet hem minim sapos hem dae, pipol wea stap long datfala taem bae no lukim hem moa. Bae olketa no lukim hem go bak long haos bilong hem and no eniwan bae tingim hem go kasem taem wea God markem. And tu, maet Job talem diswan from hem savve no eni man savve resurrectim hemseleva from Sheol. Job 14:13-15 hem barava showimaot klia hao Job hem garem hope long future for garem resurrection.
NOVEMBER 20-26
GUD SAMTING FROM BIBLE | JOB 18-19
“No Lusim Olketa Brata and Sista blo Iu”
Wanem Nao Iumi Lanem From Olketa Taem wea Jesus Hem Krae
9 Iumi savve comfortim olketa wea sorre taem samwan olketa lovem hem dae. Jesus krae witim Martha and Mary, and hem lisin and comfortim tufala. Iumi tu savve comfortim olketa wea sorre. Dan, wanfala elder wea stap lo Australia sei: “Bihaen waef blo mi dae, mi barava needim olketa narawan for comfortim mi. Samfala fren blo mi barava willing for lisin lo mi taem mi krae and storyim feeling blo mi, nomata lo daytaem or lo naet. Olketa helpem mi tu lo olketa nara samting, olsem for wasim car blo mi, shopping, and kuki for mi. And staka taem olketa prea witim mi tu. Olketa nao trufala fren wea redi for ‘helpem mi long hadtaem’ wea kasem mi.”Provebs 17:17
Taem Samwan wea Iumi Lovem Disfellowship
16 Gohed helpem and comfortim famili blo samwan wea disfellowship. Iumi need for encouragem and showimaot love lo olketa. (Heb. 10:24, 25) Samfala taem olketa hia tingse samfala lo kongregeson no laek story witim olketa, and datwan mekem olketa feel olsem olketa tu disfellowship. Iumi mas no duim datwan! Olketa young wan wea dadi or mami disfellowship barava needim encouragement. Maria, wea hasband blo hem disfellowship and lusim famili sei: “Samfala brata and sista kam lo haos for kukim kaikai and helpem mi for study witim olketa pikinini blo mi. Olketa sorre and krae witim mi and story for mi taem narawan talem laea samting abaotem mi. Olketa barava encouragem mi!”—Rome 12:13, 15.
w90-E 9/1 22 ¶20
Waswe, Iu Laek for Ministerial Servant or Elder?
20 Body of elders shud luksavve taem man finis from elder or ministerial servant, nomata hemseleva nao disaed for duim datwan, bae hem savve feel sorre. Sapos hem no disfellowship and olketa elder luksavve hem wikdaon, olketa shud helpem hem lo spiritual wei. (1 Thessalonica 5:14) Olketa shud helpem hem for luksavve kongregeson needim hem. Nomata hem kasem kaonsel taem hem lusim privilege blo hem, sapos hem hambol and tinghae, maet bae hem no tek longtaem nomoa bifor hem kasem samfala privilege moa lo kongregeson.
Faendem Gudfala Point
w94-E 10/1 32
Wei for Tok Kaen Savve Barava Encouragem Man
Bat taem Job needim encouragement, Eliphaz and nara tufala man wea kam witim hem, no tok kaen lo Job. Olketa sei masbi Job haedem wanfala sin wea hem duim, dastawe hard taem kasem hem. (Job 4:8) The Interpreter’s Bible hem sei: “Samting wea Job needim nao hem for samwan hem kaen and tingim hem. Bat wat hem happen nao, olketa kaonselem hem and talem olketa toktok wea showimaot olketa nating minim hem.” From Job barava feel nogud lo samting wea Eliphaz and nara tufala talem, hem sei: “Hao long nao iufala bae mekem mi kros, and spoelem mi lo olketa toktok?”—Job 19:2.
Iumi no laek for mekem eni servant blo Jehovah for feel nogud bikos lo toktok blo iumi wea no kaen and no tingim man. (Comparem Deuteronomy 24:15.) Wanfala proverb lo Bible hem sei: “Samting iu talem savve protectim or finisim laef blo man; so iu mas acceptim samting wea kamaot from wanem iu talem.”—Proverbs 18:21, TEV.
NOVEMBER 27–DECEMBER 3
GUD SAMTING FROM BIBLE | JOB 20-21
“Wei for Raeteous Hem No Depend lo Wei for Rich or Poor”
Waswe, God Ting Long Iu Olsem Iu Rich?
12 Toktok bilong Jesus hem showimaot hao wei for God ting long iumi olsem iumi rich hem difren from wei wea man hipimap olketa material samting for hemseleva, or for kamap rich long material wei. So Jesus hem sei wei for hipimap olketa material samting or for enjoyim olketa samting wea iumi ownim shud no main samting long laef bilong iumi. Bat iumi shud iusim olketa samting wea iumi garem for helpem iumi strongim wei wea iumi fren witim Jehovah. Taem iumi duim olsem God bae ting long iumi olsem iumi rich. Why nao olsem? Bikos diswan hem mekem wei for iumi kasem plande blessing from hem. Bible talem iumi: “Blessing bilong Jehovah—hem nao mekem man rich, and hem no addim eni pain witim datwan.”—Proverbs 10:22.
Faendem Gudfala Point
w95 1/1 20 ¶19
Win Ovarem Satan and Olketa Work Bilong Hem
19 Servant bilong God, Job tu garem “olketa tingting wea no stap long peace” wea Satan givim thru long Eliphaz and Zophar. (Job 4:13-18; 20:2, 3) Job kasem “worry,” wea mekem hem “toktok olabaot” abaotem “fraet” wea spoelem mind bilong hem. (Job 6:2-4; 30:15, 16) Elihu hem listen gud long Job and really helpem hem for lukim hao Jehovah hem moa wise long olketa samting olsem. Distaem tu, olketa elder wea meanim samting savvy show aot they care for olketa wea kasem problem and no putim moa “hevi” long them. But, olsem Elihu, they patient for listen long them and use-im kaenfela oil bilong Word bilong God. (Job 33:1-3, 7; James 5:13-15) So anywan wea kasem problem long feeling, wea tru wan or no moa, or wea “fraet . . . long olketa dream, and thru long olketa vision” olsem Job, hem savvy faendem kaenfela comfort from Scripture insaed long kongregeson.—Job 7:14; James 4:7.
DECEMBER 4-10
GUD SAMTING FROM BIBLE | JOB 22-24
“Hao, Eni Man Savve Helpem God Tu?”
Againstim Tingting wea No Stret!
Datfala idea wea sei God askem iumi for duim tumas samting hem klosap semsem witim kaen tingting for sei God ting olketa man iusles. Long mek-thri taem wea Eliphaz story hem askem disfala kwestin: “Waswe, God needim man, mekem eniwan wea garem fasin for luksavve fit for helpem hem?” (Job 22:2) Eliphaz talem idea hao God no needim man. Bildad talem sem samting tu: “Hao nao man nating hem savve stret front long God, or hao nao man wea born long woman savve klin?” (Job 25:4) Sapos kaen tingting olsem hem tru, Job wea wanfala man nating, hem no fit for tingse hem raeteous front long God!
Samfala pipol distaem feel nogud long olketa seleva. Olketa samting wea savve mekem disfala feeling kamap hem maet from famili wea man growap insaed, hevi long laef, wei for heitim man wea garem difren kala skin, or difren tribe. Bat, Satan and olketa demon bilong hem tu hapi for spoelem man. Sapos olketa savve mekem wanfala man for tingim hao nomata wanem hem duim hem no savve mekem Olmaeti God hapi, hem moa isi for man wikdaon. Gogo, datfala man maet isisi go difren, or maet min for lusim God.—Hebrews 2:1; 3:12.
Olketa problem saed long health and taem man start for kamap olo savve stopem iumi for duim samfala samting. Sapos iumi markem samting iumi duim for kingdom taem iumi young, healthy, and strong witim samting wea iumi duim distaem, maet hem luk smol nomoa. Hem barava important for luksavve hao Satan and olketa demon bilong hem laekem iumi for tingse nomata wanem iumi duim iumi no savve mekem God hapi! Iumi mas againstim kaen tingting olsem.
w95-E 2/15 27 ¶6
Hao for Deal Witim Olketa Problem
Thrifala fren blo Job mekem Job feel nogud go moa bikos olketa no talem wisdom blo God bat talem tingting blo olketa seleva nomoa. Eliphaz hem sei ‘God no trustim olketa wakaman blo hem, and hem no warim sapos Job hem raeteous or nomoa.’ (Job 4:18; 22:2, 3) Dat kaen toktok hem barava no tru and savve mekem man for wikdaon! Dastawe Jehovah tok strong lo Eliphaz and nara tufala man hia bikos olketa talem toktok wea nating showimaot respect lo Hem. Hem sei, “Samting iufala talem abaotem mi hem nating tru.” (Job 42:7) Bat then olketa talem nara samting wea just worse moa.
Olketa Young Wan wea Mekem Heart Bilong Jehovah Hapi
10 Olsem Bible hem storyim, Satan hem kwestinim no just loyal fasin bilong Job nomoa, bat bilong evri narawan wea servem God—iu tu. Tru nao, Satan hem tok abaotem evri man taem hem sei long Jehovah: “Evri samting wea wanfala man [no Job nomoa bat eniwan] garem bae hem givim for sevem soul bilong hem.” (Job 2:4) Waswe, iu lukim hao iu insaed important kwestin hia? Olsem Proverbs 27:11 showimaot, Jehovah hem sei iu savve givim wanfala samting long hem wea minim Hem savve givim ansa long man wea tok daonem hem, Satan. Tingim—Sovereign Bilong Universe hem askem iu for share for givim ansa long datfala barava important kwestin long history. Iu kasem nambawan responsibility and privilege! Waswe, iu savve fulfillim wanem Jehovah hem askem from iu? Job hem duim. (Job 2:9, 10) Jesus and staka narawan bifor tu duim, and staka long olketa young tu. (Philippians 2:8; Revelation 6:9) Iu tu savve duim olsem. Bat, no forget, no eni wei for no teksaed hem stap. Thru long samting wea iu duim, iu bae showimaot iu saportim nogud toktok bilong Satan or iu saportim ansa bilong Jehovah. Hu nao bae iu chus for saportim?
Jehovah Hem Kea for Iu!
11 Waswe, hem really important long Jehovah wanem iu chus for duim? Staka pipol bin faithful mekem hem givim ansa long Satan, so waswe, hem needim iu for duim tu? Hem tru, Devil sei no eniwan servem Jehovah from wei for lovem hem, toktok wea kasem pruv finis hao hem laea. Nomata olsem, Jehovah laekem iu for saed witim hem long kwestin saed long hu nao fit for rul bikos hem kea for iu olsem man wanwan. Jesus hem sei: “Father bilong mi long heven hem no laekem eniwan long olketa smol wan hia for dae.”—Matthew 18:14.
12 Hem klia, Jehovah hem interest long wanem iu chus for duim. Moa important, diswan affectim hem. Bible talem klia hao gud or nogud fasin bilong pipol savve affectim olketa deep feeling bilong Jehovah. Olsem example, wei wea olketa Israelite evritaem bighed hem “givim pain” long Jehovah. (Psalm 78:40, 41) Bifor long Flood bilong taem bilong Noah, “heart bilong [Jehovah] feel sorre” taem “nogud fasin bilong olketa man hem big tumas.” (Genesis 6:5, 6) Tingim wanem diswan hem minim. Sapos iu followim rong wei, iu savve mekem Creator bilong iu feel sorre tumas. Diswan no minim God hem wik or hem duim samting followim feeling. Bat, hem lovem iu and kea for iu. Long narasaed, taem iu duim wanem hem stret, heart bilong Jehovah hem hapi. Hem hapi no from hem savve givim ansa long Satan nomoa, bat bikos hem savve rewardim iu tu. And hem barava laek for duim datwan. (Hebrews 11:6) Iu garem wanfala loving Dadi, Jehovah God!
Faendem Gudfala Point
Iusim Olketa Spiritual Goal for Givim Glory Long Creator Bilong Iu
Tingim wei wea Jehovah creatim universe. For showimaot taem wea hem creatim olketa difren samting, Jehovah talem datfala toktok “evening hem kamap and morning hem kamap.” (Genesis 1:5, 8, 13, 19, 23, 31) Each taem hem start for creatim samting, hem garem klia idea abaotem goal bilong hem for datfala day. And God fulfillim purpose bilong hem for creatim olketa samting. (Revelation 4:11) Datfala laen dadi Job hem sei: “Soul bilong [Jehovah] laek for duim samting, and bae hem duim.” (Job 23:13) Jehovah mas barava satisfae for lukim “evri samting wea hem wakem” and talemaot hao hem “gud tumas”—Genesis 1:31.
For mekem olketa goal bilong iumi kamap really samting, iumi tu mas barava want for kasem olketa. Wanem nao savve helpem iumi for garem strongfala feeling olsem? Nomata taem earth hem no garem eni sheip and hem stap nating, Jehovah luksavve hao long future hem bae gud tumas—wanfala spesol samting wea barava luk naes, wea givim glory and honor long hem. Long sem wei, feeling bilong iumi for barava want for kasem goal wea iumi aftarem savve kamap moa strong taem iumi ting raonem olketa gud samting wea kamaot from wei for kasem datfala goal. Diswan nao samting wea kasem Tony wea hem 19 year. Hem nating forgetim first samting hem tingim taem hem visitim wanfala branch office bilong Olketa Jehovah’s Witness long Western Europe. Start long datfala taem, Tony hem ting raonem disfala kwestin: ‘Waswe sapos mi stap and serve long ples olsem?’ Tony tingim datwan olowe, and hem go ahed for reach aot for datfala goal. Hem hapi fogud samfala year bihaen taem olketa appruvim application bilong hem for serve long datfala branch!
DECEMBER 11-17
GUD SAMTING FROM BIBLE | JOB 25-27
“Iumi No Need for Perfect for Gohed Faithful”
it-1-E 1210 ¶4
Faithful
Job. Job hem laef bihaen lo taem blo Joseph and bifor lo taem blo Moses. Bible sei hem man “wea no garem eni blame, [Hebrew, tam] wea duim stret samting, fraet lo God, and wea hard for duim eni nogud samting.” (Job 1:1; lukim JOB.) Wei wea man faithful hem part lo datfala issue between God and Satan. Samting wea showimaot diswan hem olketa kwestin wea God askem lo Satan abaotem Job taem olketa angel hipap lo heven. Satan sei Job no worshipim God bikos hem lovem hem, bat bikos hem laek for kasem gud samting from God nomoa. Satan kwestinim sapos Job hem faithful lo God. Nomata God letem Satan for spoelem evri samting wea Job garem and for killim dae olketa pikinini blo hem, Job gohed for faithful. (Job 1:6–2:3) Nomata olsem, Satan sei Job hem selfish, and hem willing for lusim olketa property blo hem and olketa pikinini blo hem mekem hem savve sevem laef blo hemseleva nomoa. (Job 2:4, 5) Nomata Satan mekem Job kasem wanfala nogud sik, and waef blo hem tok lo hem, and thrifala fren barava tok daonem hem and talem samting wea no followim tingting and standard blo God (Job 2:6-13; 22:1, 5-11), Job sei hem bae gohed faithful lo God, and hard for eniwan mekem hem feel olsem hem no faithful. Hem sei. “Go kasem taem mi dae, mi bae faithful! Mi hol strong lo wei blo mi for duim stret samting, and hard for mi let go lo hem. Heart blo mi no talem eni samting againstim eni samting mi duim lo laef blo mi.” (Job 27:5, 6) Wei wea Job faithful showimaot enemy blo God, Satan, hem man for laea.
No Lusim Wei for Faithful!
3 Staka taem disfala toktok, faithful, hem minim wei wea olketa wea worshipim Jehovah garem strongfala love for Jehovah and lovem hem long full heart. Diswan minim for evritaem duim wanem hem laekem. Tingim samfala interesting information long Bible abaotem diswan. Wanfala main mining long Bible for datfala toktok “faithful” hem nao: Wei for complete, barava gud, or full wan. Olsem example, olketa Israelite savve sakrifaesim animal long Jehovah, and Law sei olketa animal hia mas barava gud wan. (Levitikas 22:21, 22) Pipol bilong God mas no offerim animal wea no garem wanfala leg, ear, or eye, and olketa mas no offerim animal wea garem sik tu. Hem barava important long Jehovah for olketa mas offerim animal wea barava gud, wea complete, or full wan. (Malakae 1:6-9) Hem isi for iumi minim why Jehovah laekem olketa samting for mas barava gud and complete bikos iumi tu feel olsem. Taem iumi baem samting, olsem wanfala frut, buk, or wanfala tul, iumi no laekem datfala samting for garem big hol or samfala part bilong hem no stap. Iumi laekem samting wea barava gud, complete, or full wan. Long sem wei, Jehovah laekem love and wei wea iumi faithful long hem for mas complete, or full wan.
4 Waswe, for faithful minim iumi mas perfect? Maet iumi evriwan feel olsem iumi no perfect and iumi mekem staka mistek. Bat tingim tufala reason why iumi shud no wari abaotem datwan. First samting, Jehovah no lukluk for olketa mistek bilong iumi. Bible sei olsem abaotem hem: “Sapos yu raetemdaon olketa sin blong mifala, hu nao save ranawe from panis blong yu?” (Sams 130:1-3) Hem savve iumi sin and no perfect, and hem willing for forgivim iumi. (Sams 86:5) Mek-tu samting, Jehovah savve long wanem iumi fit for duim, and hem no expectim iumi for duim wanem iumi no fit for duim. (Readim Sams 103:12-14.) Sapos olsem, hao nao iumi savve barava complete long eye bilong hem?
5 For olketa wea worshipim Jehovah, main samting wea savve helpem olketa for gohed faithful, hem nao love. Love and wei wea iumi faithful for worshipim Dadi long heven, mas complete, barava gud, or full wan. Sapos iumi gohed lovem hem long full heart nomata taem iumi kasem test, datwan minim iumi faithful. (Fas Kronikols 28:9; Matt. 22:37) Tingim thrifala Witness wea iumi storyim long start bilong study. Why nao olketa gohed faithful? Waswe, datfala young gele no laek enjoyim olketa samting long skul? Waswe, datfala young man laekem olketa mekfani long hem? Or waswe, datfala dadi laek for lusim waka bilong hem? Nomoa. Olketa savve Jehovah garem olketa raeteous standard, and olketa evritaem laek for duim samting wea mekem Dadi long heven hapi. Love bilong olketa for hem nao mekem olketa tingim hem bifor olketa mekem eni disison. Taem olketa duim olsem, datwan showimaot olketa barava faithful.
Faendem Gudfala Point
Organize Followim Wanem Bible Talem
3 Taem iumi lukim olketa samting wea Jehovah wakem, iumi luksavve hem God wea organize gud. Bible sei: “Hem iusim wisdom bilong hem for wakem disfala earth. Hem iusim wei for luksavve for wakem skae.” (Prov. 3:19) Iumi savve lelebet nomoa abaotem olketa samting wea Jehovah wakem. Hem olsem iumi “herem lelebet samting nomoa abaotem hem.” (Job 26:14) Nomata olsem, lelebet savve wea iumi garem abaotem universe showimaot Jehovah hem barava organize gud. (Ps. 8:3, 4) Staka million star wea muv long space olketa no olobaot. And tingim hao olketa planet insaed solar system bilong iumi muv raonem sun. Wei wea olketa samting hia organize hem showimaot Jehovah barava organizem gud gogo bilong olketa. Taem iumi tingim wei wea Jehovah savve tumas for wakem olketa samting long heven and long earth, iumi laek for praisem hem, worshipim hem, and gohed faithful long hem.—Ps. 136:1, 5-9.
DECEMBER 18-24
GUD SAMTING FROM BIBLE | JOB 28-29
“Hao, Iu Garem Gud Nem Olsem Job?”
Showim Loving-Kaeness Long Olketa wea Garem Need
19 Olketa story long Bible wea iumi lukim mekhae long wei wea iumi mas showim loving-kaeness long olketa wea garem need wea olketa seleva no savve duim. For mekem famili laen bilong hem go ahed, Abraham needim Bethuel for waka witim hem. For tekem body bilong hem go bak long Canaan, Jacob needim help bilong Joseph. And for garem pikinini, Naomi needim help bilong Ruth. Abraham, Jacob, and Naomi no savve kasem samting olketa needim sapos no eniwan helpem olketa. Olsem tu distaem, iumi mas showim loving-kaeness long olketa wea garem need. (Proverbs 19:17) Iumi shud followim Job, wea helpem “wan wea garem problem and singaot for help, and boy wea no garem dadi and eniwan wea no garem samwan for helpem hem” and tu “datwan wea redy for dae.” Job mekem tu “heart bilong widow woman for hapi” and kamap olsem “eye bilong blind wan and leg bilong datwan wea cripple.’—Job 29:12-15.
it-1-E 655 ¶10
Kaleko
Staka taem lo Bible hem iusim kaleko for piksarem samting. Olsem hao uniform or spesol kaleko mekem pipol for luksavve man hem member blo wanfala organization, samfala taem Bible storyim kaleko for piksarem samting wea man duim or wei blo hem. Example blo diswan nao hem tokpiksa blo Jesus abaotem kaleko wea pipol werem taem olketa go lo marit. (Mt 22:11, 12; lukim HEADDRESS; SANDAL.) Lo Revelation 16:14, 15, Lord Jesus Christ givim warning for no sleep lo spiritual wei and hem sei if man duim datwan hem olsem olketa aotem kaleko blo hem wea piksarem wei wea hem wanfala faithful witness blo tru God. From “datfala war wea bae kamap long bigfala day bilong Olmaeti God” hem klosap nao, wei for lusim datfala kaleko bae mekem iumi barava kasem nogud samting nao.
w09-E 2/1 15 ¶3-4
Why Nao Nem Hem Important?
Iumi no savve chusim nem blo iumiseleva taem iumi born. Nomata olsem, samting wea iumi duim nao savve mekem iumi garem gud nem or nomoa. (Proverbs 20:11) Hem gud for tingim diswan: ‘Sapos Jesus or olketa aposol savve chusim wanfala nem for iumi, wanem nem nao bae olketa chusim? Wanem nem nao bae barava fitim wei blo iumi?’
Hem important tumas for iumi ting raonem diswan. Why nao olsem? King Solomon sei: “Wei for pipol tinghae lo olketa gudfala wei blo iumi, hem gud winim for iumi garem staka selen.” (Proverbs 22:1) Datwan hem barava tru. Sapos iumi garem gud nem lo community, datwan savve barava helpem iumi. Bat samting wea important winim datwan nao, hem sapos iumi garem gud nem witim God, bae iumi kasem gud samting for olowe. Hao nao olsem? God promis for raetem nem blo olketa wea obeyim hem lo wanfala ‘buk wea garem nem blo olketa wea Jehovah rememberim’ and hem bae givim chance for olketa laef olowe.—Malachi 3:16; Revelation 3:5; 20:12-15.
Faendem Gudfala Point
Smile—Hem Gud for Iu!
Waswe, wei for smile really savve affectim eniting? Waswe, iu rememberim taem smile bilong samwan hem mekem iu no fraet or iu feel relax? Or taem iu no lukim wanfala smile and diswan mekem iu seksek or feel olsem pipol les long iu? Yes, wanfala smile really savve affectim samting. Hem affectim man wea smile and datwan wea hem smile for hem. Job wea Bible storyim hem sei olsem abaotem olketa enemy bilong hem: “Mi smile long olketa—olketa no bilivim—and laet from feis bilong mi olketa no savve aotem.” (Job 29:24) “Laet” from feis bilong Job maet minim braet or hapi bilong hem.
DECEMBER 25-31
GUD SAMTING FROM BIBLE | JOB 30-31
“Hao Job Gohed Keepim Wei blo Hem Klin”
No Lukluk Long Olketa Rabis Samting!
8 Samting wea eye laekem and wea body laekem savve spoelem olketa tru Christian tu. Dastawe Bible encouragem iumi for kontrolem iumiseleva long wanem iumi lukluk long hem and wanem iumi barava laekem. (1 Cor. 9:25, 27; readim 1 John 2:15-17.) Job, wanfala man wea raeteous, luksavve hao samting wea man lukim savve mekem hem for laekem datwan. Hem sei: “Mi mekem promis finis for no lukluk strong long eni gele and no tingting for durong witim hem.” (Job 31:1) Job nating laek for holem eni woman long nogud wei and hem no letem kaen tingting olsem for stap long mind bilong hem. Jesus mekhae long wei wea iumi mas no garem eni rabis tingting. Hem sei: “Eniwan wea gohed for lukluk long wanfala woman and laek for durong witim hem, hem duim adultery finis witim hem long heart bilong hem.”—Matt. 5:28.
Tingim “Wanem Bae Happen Bihaen”
Bifor iu start for duim samting wea iu savve maet hem rong, tingting olsem firstaem, ‘Wanem nao bae mi kasem bihaen?’ Sapos iu tingting raonem firstaem “wanem bae happen bihaen,” datwan bae helpem iu for no duim eni samting wea savve spoelem iu. Olketa wea no laek for lisin long samting wea God talem savve kasem AIDS and olketa narakaen sik. Samfala babule nating, killim dae baby long bele, spoelem wei wea olketa stap gud witim narawan, and spoelem tu gudfala tingting bilong olketa. Aposol Paul hem storyim nao nogud samting wea bae happen long olketa pipol hia bihaen. Olketa “bae no kasem nao kingdom bilong God.”—1 Corinthians 6:9, 10.
Iufala Young Wan, Followim Advaes Long Bible
15 Wanem taem nao iu faendem hem no isi for iu faithful long God? Waswe, hem taem iu stap witim olketa narawan or taem iu stap seleva? Taem iu long skul or long ples wea iu waka, maet hem isi for luksavve long eni samting wea savve spoelem wei wea iu fren witim God. Bat taem iu stap seleva hem isi tumas for duim samting wea savve spoelem gudfala wei bilong iu.
16 Why nao iu shud obeyim Jehovah taem iu stap seleva? Tingim diswan: Iu savve mekem Jehovah feel sorre or hapi. (Gen. 6:5, 6; Prov. 27:11) Jehovah ‘tingim iu’ and wanem iu duim savve affectim hem. (1 Pet. 5:7) Hem laekem iu for lisin long hem mekem iu kasem gud samting. (Isa. 48:17, 18) Taem samfala wakaman bilong Jehovah long Israel bifor no followim kaonsel wea hem talem, hem barava sorre. (Ps. 78:40, 41) Nomata olsem, Jehovah lovem profet Daniel. Wanfala angel sei Daniel hem “man wea barava spesol.” (Dan. 10:11) Why nao olsem? Daniel faithful long God no long taem wea hem stap witim staka pipol nomoa bat taem hem stap seleva tu.—Readim Daniel 6:10.
Faendem Gudfala Point
Lisin Long Wei wea Showimaot Iu Kea
Olketa fren bilong Job lisin long samting olsem tenfala taem wea hem story. Nomata olsem, Job hem sei: “Mi no garem eniwan for lisin long mi!” (Job 31:35) Why nao olsem? Bikos wei wea olketa lisin nating comfortim Job. Olketa nating kea long Job and no laek for minim feeling bilong hem tu. Olketa nating garem fasin for lisin long wei wea minim feeling bilong narawan. Bat aposol Peter givim disfala kaonsel: “Iufala evriwan mas garem wankaen tingting, minim feeling bilong narawan, lovem each other olsem brata, garem fasin for kea, hambol long tingting.” (1 Peter 3:8) Hao nao iumi savve showimaot iumi minim feeling bilong narawan? Wanfala wei hem for showimaot iumi kea abaotem feeling bilong olketa and trae for minim olketa. Iumi savve showimaot iumi kea taem iumi talem olketa kaen toktok olsem, “Datwan mas mekem iu barava feel nogud,” or “Datwan mas mekem iu tingse olketa no minim iu.” Narafala wei wea showimaot iumi minim samting wea datfala man talem iumi, hem for storyim moa long hem samting wea hem talem long iumi. Wei for lisin witim fasin for kea hem minim iumi no lisin nomoa long samting wea man talem, bat hem minim tu, for luksavve long feeling bilong hem.