STUDY 6

Explainim Klia Point Bilong Scripture

John 10:33-36

WANEM FOR DUIM: Explainim scripture bihaen iu readim. No readim scripture then go long next point nomoa. Mek sure olketa wea lisin long iu minim gud hao scripture wea iu readim hem join witim point wea iu storyim.

HAO FOR DUIM:

Strongim olketa main word. Bihaen iu readim scripture, mekhae long olketa word long scripture wea sapotim main point bilong iu. Maet iu savve repeatim olketa main word hia or askem kwestin wea bae helpem audience for luksavve long olketa main word hia.

Sapos iu iusim olketa difren word for explainim wanem scripture talem, mek sure audience luksavve hao datfala verse hem sapotim point wea iu storyim.
Mekhae long point bilong scripture. Sapos iu talem reason why iu bae readim wanfala scripture, maet for pruvim wanfala point, then bihaen iu readim scripture, mekhae long toktok long scripture wea sapotim datfala point.

Keepim Bible open taem iu storyim scripture. Diswan bae helpem olketa wea lisin for luksavve hao samting iu storyim hem join witim toktok long scripture.
Mekem point hem klia. No storyim olketa nara samting long scripture wea no sapotim point bilong iu. Disaed haomas information iu need for storyim for mekem point bilong scripture hem klia. Hem gud for tingim wanem audience savve finis abaotem datfala subject.