Bihaen Adam and Eve lusim garden blo Eden, tufala garem staka pikinini. First son blo tufala, Cain, hem kamap man for wakem garden, and second son blo tufala, Abel, hem wanfala shepherd.

Wanday Cain and Abel mekem olketa offering for Jehovah. Iu savve wat nao offering? Hem wanfala spesol present. Jehovah hapi lo offering blo Abel, bat hem no hapi lo offering blo Cain. Datwan mekem Cain kros fogud. Jehovah warnim Cain dat wei wea hem kros tumas bae mekem hem for duim nogud samting. Bat Cain no laek lisin.

So Cain sei lo Abel: ‘Kam iumi tufala go wakabaot.’ Taem tufala stap seleva, Cain attakim and killim dae brata blo hem. Wat nao Jehovah bae duim? Jehovah panisim Cain taem hem sendem hem go farawe from famili blo hem. God stopem Cain for no kam bak moa.

Wat nao leson for iumi? Maet iumi start for kros if samting no happen followim hao iumi laekem. If iumi feel kros tumas or olketa narawan luksavve iumi kros and warnim iumi abaotem datwan. Iumi shud kwiktaem change and kontrolem feeling blo iumi, bifor feeling for kros tumas kontrolem iumi.

From Abel lovem Jehovah and evritaem duim stret samting, Jehovah bae no forgetim hem. God bae mekem Abel laef bak moa taem Hem mekem earth kamap paradaes.

Gogo staka pipol nao stap lo earth. And staka lo olketa wei blo olketa nogud tumas. Nomata samfala angel lo heven tu duim nogud samting. Olketa lusim hom blo olketa lo heven and kam daon lo earth. Why nao olketa duim datwan? For olketa savve garem body olsem iumi and maritim olketa woman lo earth.

Olketa woman hia garem olketa son lo olketa angel hia. Olketa son hia growap and strong and raf tumas. Olketa spoelem pipol. Jehovah bae no letem olketa samting hia for gohed happen. So hem disaed for iusim flood for finisim nogud pipol hia.

Bat wanfala man hem difren. Hem lovem Jehovah. Nem blo hem Noah. Hem garem wanfala waef and thrifala son, nem blo olketa hem Shem, Ham, and Japheth, and each wan lo thrifala son hia garem waef. Jehovah talem Noah for wakem wanfala big ark, mekem hem and famili blo hem savve sev insaed from datfala Flood. Ark hem wanfala big maeti box wea savve float ontop lo wata. And tu, Jehovah talem Noah for tekem staka animal go insaed ark mekem olketa tu savve sev.

Semtaem nomoa, Noah start for wakem datfala ark. Noah and famili blo hem wakem datfala ark for samting olsem 50 years. Olketa wakem datfala ark followim evri samting wea Jehovah talem olketa for duim. And lo datfala taem, Noah warnim tu pipol abaotem datfala Flood. Bat no eniwan lisin lo hem.

Then hem taem nao for go insaed datfala ark. Iumi lukim wat nao happen.