Sapos Jehovah Sei Samting Bae Happen Hem Mas Happen Nao!

“MI NAO God and no eni nara God hem stap, no eniwan hem olsem mi. Mi savve talem firstaem samting wea bae happen, nomata long bifor kam tu mi savve finis long olketa samting wea no happen yet.” (Isaiah 46:​9, 10) Diswan nao samting wea Jehovah talem, wea hem nomoa fit for talem samting wea bae kamap long future.

Iumi evriwan savve hao man no fit for talem barava samting wea bae happen long future. From Bible talem olketa profesi, and talem tu hao God nao givim kam Bible, datwan shud mekem evriwan wea laek savve long truth for mek sure long diswan. Tingim samfala profesi long Bible wea fulfill finis.

Olketa Nation Long Taem Bifor Kam

God talem hao Babylon, Edom, Moab, and Ammon bae distroe, and bae datwan hem for olowe. (Jeremiah 48:42; 49:17, 18; 51:24-​26; Obadiah 8, 18; Zephaniah 2:​8, 9) Wei wea olketa nation hia finis pruvim hao profesi toktok bilong God hem barava tru.

Hem tru, nomata wanfala strong nation tu, bat gogo hem savve finis, so maet hem isi nomoa for samwan talem hao datwan bae happen. Bat barava important point for tingim nao hem hao Bible talem plande information abaotem hao olketa nation hia bae finis. Olsem example, hem talem olketa samting wea army bilong Cyrus bae duim for tekovarem Babylon. Bible talem hao olketa from Media nao bae tekovarem datfala taon. Hem talem tu hao Cyrus bae leadim olketa soldia anda long hem, and olketa river wea protectim datfala taon bae kamap drae.​—Isaiah 13:17-​19; 44:⁠27–45:1.

Plande taem Bible talem hao bihaen army hem win long faet againstim wanfala nation, datfala nation bae finis for olowe, bat Bible no talem datwan abaotem Jerusalem. God talem hao army bilong Babylon bae distroem Jerusalem. Bat nomata Babylon garem law wea tambuim eni prisoner from nara kantri for go free, God talem hao, gogo, olketa Israelite bae kamap free moa and bae buildim bak Jerusalem. (Jeremiah 24:​4-7; 29:10; 30:18, 19) Diswan hem fulfill, and olketa Jew stap kam kasem distaem.

Jehovah talem tu hao wanfala army bae tekovarem Egypt nomata hem wanfala nation wea bossim olketa nara nation, bat then “bihaen, pipol bae stap long hem moa olsem olketa duim long taem bifor kam.” Gogo, disfala nation wea strong tumas bifor, bae “kamap wanfala kingdom wea no garem bigfala paoa.” (Jeremiah 46:25, 26; Ezekiel 29:14, 15) Diswan tu hem fulfill. Long nara example, Jehovah talem hao Greece bae finis for bossim olketa nara nation, bat no enitaem hem sei Greece seleva bae finis. So wanem nao iumi savve lanem from wei wea olketa profesi bilong Jehovah abaotem hao samfala nation bae finis and samfala bae no finis, olketa fulfill? Iumi lanem hao Word bilong God garem olketa profesi wea tru and wea man savve depend long hem.

Givim Plande Information

Olsem iumi storyim finis, Jehovah givim plande information abaotem olketa samting enemy bilong Babylon bae duim for distroem hem. Olsem tu, buk bilong Ezekiel talem hao taem Tyre hem distroe, enemy bae tekem olketa ston, timba, and dust bilong hem, and putim evri samting hia “insaed sea.” (Ezekiel 26:​4, 5, 12) Haf long datfala taon Tyre hem long mainland, and haf bilong hem stap long wanfala island long sea. Disfala profesi hem fulfill long 332 B.C.E. taem Alexander the Great talem army bilong hem for torowem long sea olketa material from olketa building wea distroe long mainland, mekem olketa buildim wanfala wharf wea go kasem nara haf bilong Tyre long datfala island long sea.

Datfala profesi long Daniel 8:​5-8, 21, 22 and 11:​3, 4 talem olketa interesting information abaotem wanfala “king bilong Greece” wea hem garem barava bigfala paoa. Profesi talem hao hem bae dae long taem wea hem garem bigfala paoa, and olketa bae divaedem kingdom bilong hem for kamap fofala kingdom, bat hem no olketa pikinini bilong hem nao wea bae rulim olketa kingdom hia. Winim 200 year bihaen Daniel raetem disfala profesi, hem showaot hao Alexander the Great nao datfala maeti king. History showimaot hao hem dae taem hem young yet and fofala bigman long army bilong hem nao divaedem kingdom bilong hem midolwan olketa seleva, no olketa pikinini bilong hem.

Olketa wea tok againstim Bible talem hao masbi Daniel raetem disfala profesi bihaen evri samting hia hem happen, bikos hem nao only wei for hem savve hao evri samting hia bae happen. Bat lukluk moa long disfala profesi bilong Daniel. Sapos iumi acceptim hao diswan hem wanfala profesi, iumi barava sapraes long plande information wea Daniel raetem abaotem diswan. Bat sapos hem samting wea Daniel raetem bihaen olketa samting hia happen, iumi laek for savve long why nao Daniel no talem evri samting abaotem datwan, bikos masbi hem savve. Tingim diswan: Sapos samting wea olketa hia talem hem tru, why nao Daniel no talem hao stretawe bihaen Alexander hem dae, tufala pikinini bilong hem trae for kamap king, bat olketa narawan killim tufala dae? Why nao hem no talem hao plande year bihaen Alexander dae nao olketa bigman long army bilong hem divaedem kingdom bilong hem? And tu, why nao hem no talem nem bilong datfala maeti king and fofala bigman bilong hem?

Pipol laek for talem hao profesi hem samting wea man raetem bihaen samting wea profesi storyim hem happen. Bat pipol wea talem datwan no acceptim wei wea samwan savve talem wanfala profesi and olketa no willing for lukim pruv for sapotim datwan tu. From olketa no acceptim wei wea Bible hem Word bilong God, olketa trae hard for explainim profesi followim tingting bilong man. Nomata olsem, God showimaot wisdom bilong hem taem hem givim inaf information long olketa profesi for pruvim hao hem nao givim kam Bible.a

Olketa profesi long Bible savve strongim faith bilong iu sapos iu willing for ting raonem samfala profesi hia and wei wea olketa fulfill. Hao sapos iu studyim samfala profesi long Bible? Olketa chart long page 343 go kasem 346 long buk “All Scripture Is Inspired of God and Beneficial” savve helpem iu for duim datwan.b Sapos iu duim olsem, studyim olketa profesi witim goal for buildimap faith bilong iu. No just kwiktaem for readim olketa information abaotem diswan nomoa, bat tingting raonem hao samting wea Jehovah sei bae happen long future, hem evritaem fulfill.

[Olketa Footnote]

[Box/Piksa long page 24]

OLKETA PRINCIPLE FOR LIVE FOLLOWIM

Tingim diswan. Sem God wea talem olketa profesi abaotem olketa nation wea garem bigfala paoa and then finis, hem talem tu olketa principle long Bible for helpem iumi. Samfala principle hia hem:

Bae iu harvestim samting wea iu plantim.​—Galatians 6:7.

Hapi wea man garem taem hem givim samting hem moa big winim hapi wea hem garem taem hem kasem samting.​—Acts 20:35.

Only wei for iumi hapi nao, hem for satisfaem spiritual need bilong iumi.​—Matthew 5:3.

Sapos iu followim olketa principle hia, iu savve sure olketa bae mekem iu hapi and garem gudfala laef.

[Piksa long page 22, 23]

Word bilong God talem hao olketa nation hia bae finis for olowe . . .

EDOM

BABYLON

. . . bat no olketa hia

GREECE

EGYPT

[Credit Lines]

Pictorial Archive (Near Eastern History) Est.

WHO photo by Edouard Boubat

[Picture on page 23]

Alexander the Great