Olketa Student lo Gilead Skul Kam From Staka Kantri

Evri year, samfala wea duim spesol full-taem service from staka kantri raonem world kasem invitation for kam lo Watchtower Bible Skul blo Gilead, lo Watchtower Educational Center lo Patterson, New York.a Lo disfala skul, olketa student lane for duim gud olketa assignment wea olketa kasem insaed organization blo Jehovah. Disfala training hem helpem olketa for strongim and sapotim olketa kongregeson and olketa branch office raonem world.

Olketa student lo Gilead skul kam from staka kantri. Olsem example, mek-147 class, lo 2019, garem 56 student from 29 kantri. Evri Gilead student insaed spesol full-taem service finis, olsem Bethelite, circuit overseer, missionary, or spesol pioneer.

Longtaem lelebet bifor class hem start, samfala department lo hedquarter start for redyim samfala samting. Olsem example, World Hedquarter Travel Department (WHQ Travel) peim olketa aeroplane ticket for olketa student. For datfala mek-147 class, kost for wanfala student kam lo Patterson and go bak moa lo assignment blo olketa hem samting olsem $1,075 (U.S.). Olketa student from Solomon Islands mas go insaed fofala aeroplane for kasem Patterson and nara thrifala for go bak bihaen skul hem finis, wea minim gogo blo olketa hem winim 35,400 kilometer! Ticket blo each student hia hem $2,300 (U.S.). For daonem kost, WHQ Travel iusim wanfala computer tul for faendem olketa best price. And nomata olketa bookim wanfala ticket, olketa iusim datfala computer program for gohed lukluk for samfala week or month moa for chekim best price. WHQ Travel savve daonem kost blo ticket tu lo wei for iusim points wea samfala brata and sista kasem from olketa airline company and then givim olsem contribution.

Plande lo olketa student mas garem visa for go lo United States. Legal Department lo world hedquarter hem helpem olketa student for kasem diswan. Kost blo visa and registration hem samting olsem $510 (U.S.) for each student.

Wanem gud samting nao iumi kasem from training wea olketa student hia kasem? Hendra Gunawan hem wanfala elder lo Southeast Asia. Wanfala hasband and waef wea tufala graduate lo Gilead skul stap lo kongregeson blo hem. Hem sei: “Bifor, kongregeson blo mifala no garem eni regular pioneer. Bat bihaen tufala hia arrive, example blo olketa encouragem tufala moa for kamap pioneer. Gogo, wanfala sista lo kongregeson attendim Skul for Olketa Kingdom Evangelizer!”

Sergio Panjaitan hem waka witim thrifala Gilead graduate lo wanfala Bethel lo Southeast Asia. Hem sei: “Training wea olketa kasem hem no just blessing for olketa, bat hem blessing for mifala evriwan tu. Olketa lanem staka samting! Bat winim wei for laekem narawan tinghae lo olketa, olketa sharem wanem olketa lanem. From diswan encouragem mifala, hem mekem mifala fit for encouragem olketa narawan.”

Hao nao organization peim evri kost for disfala skul? Selen hem from olketa contribution for waka raonem full world. Staka iusim donate.jw.org for givim olketa contribution hia. Thankiu tumas iufala willing for givim samting for sapotim disfala skul for olketa student wea kam from staka kantri.