“Mi Laekem Tumas Martial Arts Bifor”

LAEF BLO MI BIFOR

Wanday, mi kikim nose blo fren blo mi, bat hem accident nomoa. Datfala garekil hem big tumas. Mi barava feel guilty and start for ting raonem sapos mi shud no duim moa martial arts. Reason hem stap for why accident hia mekem mi kwestinim disfala sport wea mi barava interest lo hem for staka year finis. Bifor mi storyim datwan, mi laek explainim olketa samting wea mekem mi interest tumas lo martial arts lo firstaem.

Mi growap lo Buffalo, New York, U.S.A. Famili blo mi olketa barava strongfala Catholic. Mi skul lo olketa Catholic skul, and mi wanfala altar boy tu. Parents laekem mi and sista blo mi for garem gudfala laef. Dastawe olketa letem mi for plei sports bihaen skul finis and duim part-taem waka for selen. So mi lane hao for barava bossim miseleva taem mi young yet.

Taem mi 17, mi start for lanem martial arts. For staka year, mi savve training 6-fala day evri week for thrifala hour each day. For staka hour evri week mi savve ting raonem hao for garem olketa best teknik and mi savve lukim olketa video lo hao for kamap gud lo datwan tu. Mi enjoyim wei for kavarem eye blo mi taem mi practicem olketa teknik, nomata lo taem wea mi duim training witim olketa weapon tu. Mi savve hitim and brekem wanfala pis timba or brik witim hand blo mi. Mi savve tumas hao for duim martial arts, and mi winim staka competition. Martial arts hem kamap main important samting lo laef blo mi.

Mi tingse mi barava win lo laef nao. Mi graduate from university witim barava haefala mark, and mi kamap computer systems engineer for wanfala big company. Company hia barava lukaftarem mi. Mi garem haos, and mi frenim wanfala gele tu. Nomata olsem, mi laekem tumas for savve lo ansa for samfala kwestin wea mi garem abaotem laef.

BIBLE CHANGEM LAEF BLO MI

For kasem ansa for olketa kwestin wea mi garem, mi start for go lo church tufala taem evri week, and mi prea lo God for helpem mi. Then wanday, wei for story witim wanfala fren hem changem laef blo mi nao. Mi askem fren hia, “Waswe, enitaem iu ting raonem reason why iumi laef?” And mi sei lo hem: “Staka problem lo world and staka corruption tu, iaman?” Hem sei hem askem olketa kaen kwestin olsem bifor tu and hem kasem olketa gudfala ansa insaed Bible. Hem givim mi wanfala buk wea garem title You Can Live Forever in Paradise on Earth.a Hem sei hem studyim Bible witim Olketa Jehovah’s Witness. Lo firstaem mi hol bak bikos mi tingse mi shud no readim buk blo nara religion. Bat gogo, wei for laek kasem ansa for olketa kwestin blo mi mekem mi interest for faendemaot sapos samting olketa Witness teachim hem mek sense.

Mi barava sapraes for lanem samting wea Bible teachim. Mi lanem hao plan blo God lo firstaem hem for olketa man laef olowe lo paradaes lo earth, and kam kasem distaem, God hem no changem datfala plan. (Jenesis 1:28) Mi barava sapraes for lukim tu nem blo God, Jehovah, insaed lo King James Bible blo mi and for lanem hao hem nao datfala nem wea mi prea abaotem insaed lo Lord’s Prea. (Sams 83:18; Matthew 6:9) Mi just minim tu reason for why nao God letem olketa man safa kam kasem distaem. Evri samting mi lanem hem barava mek sense lo mi! Mi hapi tumas.

Bae mi nating forgetim feeling wea mi garem taem mi start for attendim olketa meeting blo Olketa Jehovah’s Witness. Evriwan hem kaen and laek for savve lo nem blo mi. Lo first meeting wea mi go lo hem, mi herem wanfala spesol tok abaotem kaen prea wea God bae willing for herem. Mi interest tumas lo datwan bikos mi prea finis lo God for hem helpem mi. Next meeting wea mi go lo hem nao hem Memorial blo dae blo Jesus. Lo olketa meeting hia, mi sapraes for lukim tu olketa pikinini savve luk followim lo Bible taem speaker hem readim scripture. Lo firstaem, mi no savve hao for faendem olketa scripture bat olketa Witness willing tumas for teachim mi lo hao for iusim Bible.

Wei for go lo samfala meeting moa, mekem mi barava tinghae lo gudfala wei wea olketa Witness savve teach. Mi lanem plande samting lo olketa meeting, and hem evritaem encouragem and strongim mi. Then olketa ask sapos mi laek studyim Bible witim olketa.

Samting wea mi lukim lo Olketa Jehovah’s Witness hem barava difren from samting mi lukim lo church blo mi. Mi lukim Olketa Witness garem wan mind and olketa traem best for mekem God hapi. Gogo, mi barava sure olketa hia nao pipol wea showimaot mark blo olketa really Christian, wea hem nao wei for lovem narawan.—John 13:35.

Wei wea mi gohed studyim Bible helpem mi for start followim olketa standard insaed Bible. Bat mi tingse hem bae hard tumas for mi lusim martial arts. Mi barava enjoyim wei for train and duim olketa competition. Taem mi storyim datwan lo Witness wea studyim Bible witim mi, hem sei, “No wari, just gohed for study nomoa bikos mi sure iu bae mekem gudfala disison lo datwan.” Hem nao barava samting wea mi need for herem. Wei wea mi gohed study strongim wei wea mi laek for mekem Jehovah hapi.

Mi change taem mi accident for kikim nose blo datfala man olsem mi storyim finis. Datwan mekem mi for barava ting raonem sapos man olsem mi wea duim martial arts bae fit for kamap wanfala follower blo Christ. Mi readim profesi lo Isaiah 2:3, 4 (NW) wea sei olketa wea followim instruction blo Jehovah “bae no lanem moa hao for faet.” And Jesus teachim pipol for no faet, nomata narawan spoelem olketa. (Matthew 26:52) So hem nao samting wea mekem mi for no duim moa datfala sport wea mi laekem tumas bifor.

Start lo datfala taem mi ‘garem goal for faithful lo God and for trainim miseleva for kasem datwan’ olsem Bible hem talem. (1 Timothy 4:7) Winim wei for olowe duim martial arts, mi iusim taem blo mi for strongim wei wea mi fren witim God and worshipim hem. Datfala gele wea mi frenim hem no agree witim samting mi lanem lo Bible, so hem lusim mi nao. Mi baptaes and kamap wanfala Jehovah’s Witness lo January 24, 1987. No longtaem bihaen, mi kamap wanfala full-taem minister wea savve teachim Bible lo pipol. Mi gohed lo full-taem ministry kam kasem distaem, and mi waka lo world hedquarter blo olketa Jehovah’s Witness lo New York, U.S.A for lelebet taem tu.

GUD SAMTING WEA MI KASEM

From mi savve lo tru samting abaotem God, mi faendem nao samting wea mi lukaotem. Mi savve lo wanem God laekem mi for duim, mi garem nambawan hope for future, and mi barava hapi. Mi gohed enjoyim wei for exercise evritaem, bat kaen training olsem hem no main important samting lo mi. Samting wea important lo mi nao hem for worshipim Jehovah God.

Taem mi duim martial arts, mi savve evritaem tingim hao for defendim miseleva sapos narawan attakim mi. Distaem mi savve tingim nomoa hao for helpem narawan. Bible helpem mi for kamap man wea tingim olketa narawan and for kamap gudfala hasband for naesbola waef blo mi, Brenda.

Lo bifor, martial arts nao samting wea mi barava interest lo hem. Bat mi faendem samting wea barava gud winim datwan. Bible talem why diswan hem olsem. Hem sei: “Training wea man duim for mekem body strong savve helpem hem lelebet nomoa. Bat for faithful long God hem savve barava helpem man long evri samting bikos diswan savve mekem man kasem olketa blessing distaem and long future tu.”—1 Timothy 4:8.