Hao for No Gohed Tingim and Duim Waka blo Iu Taem Iu Finis Waka

From plande pipol iusim technology distaem, olketa savve contactim iumi enitaem nomoa. So maet boss blo iu, olketa wakfren, or pipol wea iu bae duim waka for olketa maet contactim iu lo enitaem lo day or naet or lo eni day lo week. Bat diswan bae mekem hem hard for iu rest and spendem taem witim marit partner blo iu and for duim olketa samting wea moa important.

• Wanem iu shud savve

• Hao for balance

• Wanem olketa wea marit talem

• Samting for storyim

Wanem iu shud savve

• Technology savve mekem iu spendem taem for duim waka winim wei for spendem taem witim marit partner blo iu. So taem iu kasem phone kol, e-mail, or text message taem iu no lo waka, maet iu tingse iu mas kwiktaem ansarem datwan.

  “Luk olsem hem hard nao for iumi spendem taem witim famili bihaen iumi finis waka bikos taem iumi kasem olketa e-mail and phone kol saed lo waka, iumi tingim datwan nao and no marit partner blo iumi.”—Jeanette.

• For iu balance lo haomas taem iu spendem lo waka and witim famili blo iu, iu need for mekem wanfala plan. Sapos iu no garem plan, taem wea iu spendem lo waka bae start for spoelem taem wea iu shud spendem witim marit partner blo iu.

  “Hem isi for forgetim marit partner blo iu bikos maet iu tingse, ‘Hem bae minim nomoa. Bae hem forgivim mi. Mi bae spendem taem witim hem bihaen.’”—Holly.

Hao for balance

• Tingim marit partner firstaem. Bible sei: “No eni man mas separatem samting wea God joinim finis.” (Matthew 19:6, New American Bible, Revised New Testament) Sapos iu bae no letem eni man “separatem” iu from marit partner blo iu, bae iu no letem waka blo iu tu for duim datwan!

  “Samfala pipol wea iumi duim waka for olketa tingse olketa savve contactim iumi enitaem olketa laekem bikos olketa peim iumi. Bat from marit partner blo mi moa important, mi savve talem olketa for no contactim mi lo olketa day wea mi no waka, bat bae mi contactim olketa lo nara day.”—Mark.

  Tingim diswan: ‘Waswe, samting wea mi duim showimaot marit blo mi hem moa important winim waka blo mi?’

• Samfala taem bae iu need for sei no lo waka. Bible sei: “Man hemi hambol, nao hemi waes.” (Provebs 11:2) Man wea hambol bae willing for no acceptim samfala waka or for markem narawan nao for duim datfala waka.

  “Mi wanfala plumber, so taem samwan kolem mi for kwiktaem kam fixim problem blo hem bikos hem stress abaotem datwan, mi savve talem hem for contactim nara plumber for helpem hem sapos mi no savve duim datfala waka lo taem wea hem laekem.”—Christopher.

  Tingim diswan: ‘Waswe, mi willing for no acceptim samfala extra waka bikos mi savve datwan bae mekem marit partner blo mi tingse mi no tingim hem? Waswe, marit partner blo mi tingse mi willing for duim datwan?’

• Markem taem for spendem tugeta. Bible sei: “Evrisamting hemi kamap long barava taem blong hem.” (Eklesiastes 3:1) Taem iu busy tumas lo waka, hem barava important for iu markem taem for spendem witim marit partner blo iu and then mek sure iu duim datwan.

  “Taem mitufala busy tumas, mitufala savve markem taem for duim samting tugeta wea no eniwan savve disturbim mitufala, olsem for kaikai tugeta or wakabaot lo saedsea.”—Deborah.

  Tingim diswan: ‘Waswe, mi markem taem for spendem witim marit partner blo mi and no letem nara samting disturbim mitufala? Waswe, bae marit partner blo mi agree witim ansa blo mi?’

• Offem mobile phone and computer. Bible sei: “Luksavve long olketa samting wea barava important.” (Philippi 1:10) Waswe, samfala taem iu savve offem mobile phone or computer blo iu mekem waka no disturbim iu?

  “Mi traem best for finis waka lo taem wea mi markem. Then lo datfala taem, mi savve offem olketa notification lo phone.”—Jeremy.

  Tingim diswan: ‘Waswe, mi fraet for offem phone nogud boss or narawan wea mi duim waka for olketa need for contactim mi? Waswe, bae marit partner blo mi agree witim ansa blo mi?’

• Maet samfala taem iu mas waka. Bible sei: “Iufala no ova tumas.” (Philippi 4:5) Maet samfala taem iu or marit partner blo iu mas waka lo taem wea iutufala savve spendem tugeta. Olsem example, maet waka wea marit partner blo iu duim minim pipol need for contactim hem lo olketa evening and lo weekend. Sapos olsem, no ova tumas lo wanem iu expectim from marit partner blo iu.

  “Hasband blo mi ranem smol bisnis, and plande taem olketa emergency kamap wea hem mas deal witim. Samfala taem mi feel nogud, bat mitufala savve spendem staka taem tugeta lo olketa narataem so hem fitim nomoa.”—Beverly.

  Tingim diswan: ‘Waswe, mi showimaot mi luksavve lo waka wea marit partner blo mi mas duim and no askem tumas samting lo hem? Waswe, bae marit partner blo mi agree witim ansa blo mi?’

Samting for storyim

First samting, iutufala savve ting raonem olketa kwestin hia seleva. Then iutufala savve storyim ansa blo iutufala tugeta.

• Waswe, enitaem marit partner blo iu komplen bikos iu gohed duim waka blo iu taem iu arrive bak lo haos? Sapos olsem, waswe, iu agree witim hem?

• Wanem nao iu savve duim for kamap moabeta lo wei for balance saed lo waka and olketa nara samting lo laef?

• Waswe, iu tingse marit partner blo iu savve gohed duim waka blo hem taem hem finis waka? Sapos olsem, iu savve tingim eni taem olsem?

• Olketa wanem samting nao iu laekem hem for changem for hem balance lo waka and olketa nara samting lo laef?