Showim Iu Tinghae lo Wanem Jehovah and Jesus Duim for Iu

Taem fren blo iu givim wanfala naes present for iu, bae iu hao? Bae iu hapi tumas and laek for duim samting for showim iu tinghae lo datfala present. Present wea Jehovah and Jesus givim for iumi hem spesol tumas. Wat nao datwan? Wat nao iumi savve duim for showim iumi tinghae lo datfala present?

1. Wat nao wanfala samting wea iumi savve duim for showim iumi tinghae lo wanem God and Christ duim for iumi?

Bible sei “evriwan wea showimaot faith long [Jesus]” savve kasem laef olowe. (John 3:16) Wat nao hem minim for showimaot faith? Iumi mas biliv lo Jesus, bat datwan hem no inaf. For showimaot faith hem mas showaot lo olketa disison wea iumi mekem and lo olketa samting wea iumi duim. (James 2:17) Taem iumi showimaot faith lo akson and toktok blo iumi, datwan savve strongim frenship blo iumi witim Jesus and Dadi blo hem, Jehovah.​—Readim John 14:21.

2. Wat nao spesol meeting wea iumi savve attendim for showim iumi tinghae lo samting wea Jehovah and Jesus duim?

Lo evening bifor Jesus dae, hem talem olketa follower blo hem nara samting wea olketa savve duim for showim olketa tinghae lo sakrifaes blo hem. Hem storyim wanfala spesol meeting lo olketa, wea Bible kolem “Evening Kaikai Bilong Lord,” wea nara nem blo hem Memorial lo dae blo Christ. (1 Corinth 11:20, footnote) Jesus laekem olketa aposol blo hem and evri tru Christian for tingim dae blo hem. So hem sei: “Gohed for duim diswan for showimaot iufala rememberim mi.” (Luke 22:19) Taem iu kam lo Memorial, iu showim iu tinghae lo bigfala love wea Jehovah and Jesus garem for iumi.

DIG GO MOA

3. Wat nao iumi savve duim for showim iumi tinghae?

Tingim taem iu klosap for draon, then samwan sevem iu. Hao, bae iu forgetim nomoa samting wea datfala man duim for iu? Or bae iu tingim eni samting for duim for showim iu tinghae lo wat hem duim?

Iumi garem chance for laef olowe bikos Jehovah kaen lo iumi. Readim 1 John 4:8-10, then discussim tugeta olketa kwestin hia:

• Why nao sakrifaes blo Jesus hem spesol present?

• Hao nao tingting blo iu abaotem samting wea Jehovah and Jesus duim for iu?

Wat nao iumi savve duim for showim iumi tinghae lo samting wea Jehovah and Jesus duim for iumi? Readim 2 Corinth 5:15 and 1 John 4:11; 5:3. Bihaen iutufala readim each scripture, discussim tugeta kwestin hia:

• Olsem scripture hia talem, wat nao iumi savve duim for showim iumi tinghae?

4. Followim example blo Jesus

Nara samting wea iumi savve duim for showim iumi tinghae hem nao for followim example blo Jesus. Readim 1 Peter 2:21, then discussim tugeta disfala kwestin:

• Wat nao samfala samting wea iumi savve duim for barava followim gud example blo Jesus?

5. Attendim Memorial lo dae blo Christ

For savve wat nao olketa duim lo taem blo first Evening Kaikai blo Lord, readim Luke 22:14, 19, 20. Then discussim tugeta olketa kwestin hia:

• Wat nao olketa duim lo taem blo datfala Evening Kaikai blo Lord?

• Wat nao bred and wine stand for hem?​—Lukim verse 19 and 20.

Jesus laekem olketa disaepol blo hem for rememberim anniversary lo dae blo hem wantaem evri year. Olketa Jehovah’s Witness tu meet tugeta wantaem evri year for rememberim dae blo Jesus followim hao hem talem. For lane abaotem disfala important meeting, pleim VIDEO. Then discussim tugeta kwestin hia.

Rememberim Dae Bilong Jesus (1:41)

• Wat nao olketa samting wea savve happen lo taem blo Memorial?

Bred and wine stand for samting. Bred stand for perfect body blo Jesus wea hem sakrifaesim for iumi, and wine stand for blood blo hem

MAIN POINT

Iumi showim iumi tinghae lo wanem Jesus duim for iumi taem iumi garem faith lo hem and attendim Memorial lo dae blo hem.

Review

• Wat nao hem minim for showimaot faith lo Jesus?

• Wat nao bae iu duim for showim iu tinghae lo wanem Jehovah and Jesus duim for iu?

• Why nao hem important tumas for attendim Memorial lo dae blo Christ?

FAENDAOT MOA

Wat nao dae blo Christ encouragem iumi for duim?

Hem Iusim Body blo Hem for Mekhae lo Jehovah (9:28)

Lanem samfala samting moa abaotem faith and hao iumi savve showimaot faith.

“Garem Faith Long Olketa Promis Bilong Jehovah” (Wastaoa, October 2016)

Lo disfala story, “Distaem Mi Klin and Laef blo Mi Gud Tumas,” read abaotem wanfala woman wea luksavve sakrifaes blo Christ savve helpem hem.

“Bible Changem Laef Bilong Pipol” (The Watchtower, August 1, 2011)

Read abaotem why samfala nomoa kaikaim bred and drinkim wine lo taem blo Memorial.

“Why Nao Wei wea Olketa Jehovah’s Witness Duim Lord’s Supper Hem Difren From Olketa Nara Religion?” (Article lo jw.org)