Wastaoa ONLINE LIBRARY
Wastaoa
ONLINE LIBRARY
Solomon Islands Pidgin
  • BIBLE
  • OLKETA PABLIKESON
  • OLKETA MEETING
  • w25 September pp. 20-25
  • Olketa wea “Showim Dat Olketa Laekem Laef Olowe” Bae Acceptim Gud Nius

Disfala sekson no garem eni video.

Sorre, disfala video no savve plei distaem.

  • Olketa wea “Showim Dat Olketa Laekem Laef Olowe” Bae Acceptim Gud Nius
  • Wastaoa wea Talemaot Kingdom Bilong Jehovah (Study)—2025
  • Subheding
  • Olketa Nara Article
  • TAEM PIPOL REDI FOR ACCEPTIM GUD NIUS
  • BIHAEN IUMI STARTIM BIBLE STUDY
  • TAEM OLKETA NIU WAN ATTENDIM OLKETA MEETING
  • Lisin for Ansa blo Olketa Kwestin Hia
    2025-2026 Circuit Assembly Program Witim Circuit Overseer
  • Hao for Increasim Hapi blo Iumi lo Ministry
    Wastaoa wea Talemaot Kingdom Bilong Jehovah (Study)—2024
  • Olketa Disison wea Showimaot Iumi Depend lo Jehovah
    Christian Laef and Ministry blo Iumi—Meeting Buk—2023
  • Hambol for Luksavve Dat Iumi No Savve lo Evri Samting
    Wastaoa wea Talemaot Kingdom Bilong Jehovah (Study)—2025
Samfala Moa
Wastaoa wea Talemaot Kingdom Bilong Jehovah (Study)—2025
w25 September pp. 20-25

STUDY ARTICLE 39

SONG 54 “Diswan Nao Hem Wei”

Olketa wea “Showim Dat Olketa Laekem Laef Olowe” Bae Acceptim Gud Nius

“Evriwan wea showim dat olketa laekem laef olowe, olketa biliv.”—ACTS 13:48.

MAIN FOCUS

Lo disfala article bae iumi lanem wat taem for offerim Bible study and for invaetem pipol for kam lo olketa meeting blo iumi.

1. Hao nao pipol respond lo gud nius wea iumi preachim? (Acts 13:​47, 48; 16:​14, 15)

STAKA pipol lo first century, kwiktaem acceptim Kingdom message wea olketa herem. (Readim Acts 13:​47, 48; 16:​14, 15.) Staka tuday olsem tu, olketa hapi for acceptim gud nius lo firstaem wea olketa herem. Even samfala wea firstaem no interest lo Kingdom message, maet gogo olketa willing for acceptim datwan bihaen. Wat nao iumi shud duim taem iumi faendem pipol lo ministry wea “showim dat olketa laekem laef olowe”?

2. Hao nao waka blo iumi for mek disaepol hem olsem man wea waka lo garden?

2 Tingim disfala example. Waka for mek disaepol hem olsem man wea waka lo garden. Taem samwan go lo garden maet hem bae duim olketa nara waka, olsem for hou or plant bat if hem lukim eni frut wea raep bae hem harvestim nao. Lo sem wei tu, taem iumi faendem samwan wea redi for acceptim message blo iumi, iumi laek kwiktaem helpem hem for kamap disaepol blo Christ. Bat lo semtaem, iumi laek gohed for helpem olketa narawan wea maet needim moa taem bifor olketa redi for followim wat olketa lanem. (John 4:​35, 36) Taem iumi garem wei for luksavve, datwan bae helpem iumi for savve lo best samting for duim. Distaem bae iumi storyim wat iumi savve duim lo firstaem wea iumi meetim pipol wea redi for acceptim gud nius. And tu, wat iumi savve duim for helpem pipol olsem for kamap worshiper blo Jehovah.

TAEM PIPOL REDI FOR ACCEPTIM GUD NIUS

3. Wat nao iumi savve duim taem iumi faendem samwan lo ministry wea interest? (1 Corinthians 9:26)

3 Taem iumi faendem samwan lo ministry wea interest, iumi laek for kwiktaem helpem olketa for start wakabaot followim datfala road wea lead go lo laef. Lo taem olsem, iumi shud no hol bak for offerim Bible study and invaetem olketa for kam lo meeting blo iumi lo datfala firstaem wea iumi story witim olketa.—Readim 1 Corinthians 9:26.

4. Storyim experience blo samwan wea redi for acceptim Bible study stretawe.

4 Offerim Bible study. Samfala wea iumi story witim olketa redi for acceptim Bible study stretawe. For example, lo wanfala Thursday wanfala young woman lo Canada kam lo trolley and tekem copy blo Enjoyim Laef for Olowe! brochure. Sista wea standap witim datfala trolley explainim dat iumi savve iusim brochure hia for duim wanfala free Bible study witim pipol. Datfala woman hem interest and givim contact information blo hem. Lo datfala sem day, woman hia textim datfala sista and ask abaotem datfala study. Taem sista hia sei for go lo hem lo weekend, datfala young woman sei: “Mi bae free tumoro, hao sapos iu kam?” So tufala start study lo datfala Friday. Young woman hia attendim first meeting blo hem lo datfala sem weekend and hem gohed for progress gud.

5. Wat nao iumi need for luksavve lo hem taem iumi offerim Bible study? (Lukim tu piksa.)

5 Bat iumi no expectim dat evriwan iumi meetim bae olsem datfala young woman wea laek for start for study stretawe. Olketa narawan wea interest maet needim iumi for duim moa samting for helpem olketa. Maet first samting iumi need for duim, hem for startim story lo topic wea datfala person interest lo hem. And if iumi gohed garem positive tingting abaotem datfala person and gohed showim interest, no longtaem, maet iumi savve startim Bible study witim hem. Wat nao iumi savve talem taem iumi offerim Bible study? Distaem bae iumi storyim wat samfala brata and sista wea savve hao for startim olketa Bible study olketa talem.

Olketa piksa: 1. Tufala brata story lo wanfala olo man wea sidaon lo varanda lo haos blo hem. 2. Tufala sista givim “Enjoyim Laef for Olowe!” brochure lo wanfala mami front door lo apartment blo hem. Mami karem smol boy blo hem and nara boy blo hem standap saed lo hem.

Wat nao iumi savve duim for mekem olketa hia for laek study? (Lukim paragraf 5)a


6. Wat nao iumi savve talem lo samwan wea interest for mekem iumi story moa next taem?

6 Olketa pablisa and pioneer hia explainim dat lo samfala kantri, taem olketa offerim Bible study olketa no iusim olketa toktok olsem “study,” “Bible course,” or “teachim iu.” Olketa faendem dat hem beta for iusim olketa toktok olsem “discuss,” “share” and “savve gud lo Bible.” And for mekem story gohed moa next taem iu savve sei, “Hem interesting hao Bible hem garem ansa for olketa important kwestin lo laef” or “Bible hem wanfala buk wea savve helpem iumi lo staka difren wei.” Then maet iu sei: “Story blo iumi bae no tek longtaem, insaed 10 tu 15 minutes olsem, bae iumi lanem samfala important samting wea savve helpem iu.” Taem olsem, iumi no need for iusim olketa toktok olsem “markem taem” or “evri week,” wea datwan maet mekem samwan feel dat hem mas duim datfala study nao.

7. For samfala pipol, wat taem nao hem firstaem blo olketa for lanem truth lo Bible? (1 Corinthians 14:​23-25)

7 Invaetem olketa lo meeting. Luk olsem lo taem blo aposol Paul, firstaem blo samfala for lanem truth hem taem olketa kam lo wanfala Christian meeting. (Readim 1 Corinthians 14:​23-25.) Sem samting happen distaem. Staka niu wan progress kwiktaem taem olketa start for attendim olketa meeting blo iumi. Wat taem nao iu shud invaetem olketa? Lo leson 10 lo Enjoyim Laef for Olowe! buk hem garem invitation for Bible student attendim meeting, bat datwan no minim iu mas weit go kasem datfala leson bifor iu invaetem olketa lo meeting. Start from firstaem wea iu story witim samwan, iu savve invaetem hem for kam lo weekend meeting, maet iu savve talem hem title blo pablik tok or wanfala point from Wastaoa Study.

8. Taem iumi invaetem samwan, wat nao iumi savve talem hem abaotem olketa meeting blo iumi? (Isaiah 54:13)

8 Taem iumi invaetem samwan wea interest, explainim dat olketa meeting blo iumi hem difren from hao olketa duim service blo olketa. Lo firstaem wea wanfala woman attendim Wastaoa Study, hem askem sista wea study witim hem olsem, “Hao, conductor blo Wastaoa hem savve lo nem blo evriwan?” Datfala sista explainim dat iumi lo kongregeson traem best for savve lo nem blo evriwan, olsem hao iumi savve lo nem blo olketa lo famili blo iumi. Datfala student lukim hao datwan hem difren from church blo hem. And tu, staka no savve lo reason why iumi go lo olketa meeting. (Readim Isaiah 54:13.) Iumi meet tugeta for worshipim Jehovah, for hem teachim iumi, and for iumi encouragem each other. (Heb. 2:12; 10:​24, 25) From datwan, olketa meeting blo iumi organize gud and hem helpem iumi, hem no includim wei for duim olketa religious ceremony. (1 Cor. 14:40) Olketa Kingdom Hall blo iumi hem braet insaed mekem hem isi for iumi savve lane. And no enitaem iumi sapotim olketa politikol party bikos iumi neutral. And tu, iumi no shout big or argue taem meeting gohed. Bifor student attendim wanfala meeting, maet hem gud for showim datfala video Wanem Nao Mifala Duim Long Kingdom Hall? Datwan bae helpem hem for garem lelebet idea firstaem abaotem olketa meeting blo iumi.

9-10. Hao nao iumi savve helpem samwan wea iumi invaetem for no feel olsem iumi forcem hem for joinim iumi or tekpart lo meeting? (Lukim tu piksa.)

9 Samfala maet hol bak for attendim meeting bikos olketa fraet nogud iumi askem olketa for “joinim religion blo iumi.” Explainim dat iumi savve hapi for garem olketa visitor and iumi no laek mekem eniwan feel olsem iumi forcem hem for joinim iumi or tekpart lo meeting. Evriwan lo famili welkam for attend, includim olketa smol pikinini. Lo olketa meeting, iumi no savve teachim separate olketa pikinini from parents blo olketa. Bat, parents and pikinini sidaon tugeta and lane tugeta. Taem olsem, parents savve wea nao olketa pikinini stap and wat olketa lanem. (Deut. 31:12) Iumi no savve duim olketa kolekson or pasim envelope for putim donation insaed. Instead, iumi followim komand blo Jesus wea sei: “Iufala kasem free, givim free.” (Matt. 10:8) Iu savve storyim tu dat hem no needim expensive kaleko for attendim meeting. God hem luk lo heart, no lo lukluk blo man.—1 Sam. 16:7.

10 If datfala person attend, duim best for mekem hem feel welkam. Introducem hem lo olketa elder and lo olketa nara pablisa. If hem feel welkam, hem bae laek for kam bak moa next taem. During lo meeting, if hem no garem Bible, iusim Bible blo iu and showim lo hem hao datwan join witim wat speaker talem or wat iumi studyim lo meeting.

Sem mami lo nara piksa hapi taem olketa brata and sista lo Kingdom Hall welkamim hem. Hem karem smol boy blo hem and nara boy blo hem story witim nara smol boy.

Taem iumi kwiktaem invaetem samwan for attendim meeting, bae hem kwiktaem kasem gud samting (Lukim paragraf 9-10)


BIHAEN IUMI STARTIM BIBLE STUDY

11. Hao nao iu savve respectim taem and schedule blo Bible study blo iu?

11 Wat nao samfala samting iumi shud tingim taem iumi study witim samwan? Respectim taem and schedule blo hem. For example, hem gud for go lo taem wea iutufala markem for study, nomata sapos hem wei blo pipol lo datfala ples for followim taem or nomoa. And tu, maet hem gud for keepim first study blo iutufala hem short nomoa. Samfala experience pablisa talem hao hem gud for finisim study kwiktaem, nomata datfala person hem laek for study yet. And no story tumas. Letem Bible student storyim tingting blo hem.—Prov. 10:19.

12. Taem iumi startim wanfala Bible study, wat nao goal blo iumi?

12 From start blo study, goal blo iu hem shud for helpem Bible student for savve lo Jehovah and Jesus and for barava lovem tufala. For duim diswan, helpem hem focus lo wat Bible teachim and no lo iuseleva and savve blo iu abaotem Bible. (Acts 10:​25, 26) Taem aposol Paul teach, hem evritaem helpem pipol for focus lo Jesus Christ, wea Jehovah sendem kam for helpem iumi for savve lo Jehovah and lovem Hem. (1 Cor. 2:​1, 2) And tu, Paul talem klia hao hem important for helpem olketa niu disaepol for garem olketa nambawan quality, wea hem comparem lo gold, silver, and olketa spesol ston. (1 Cor. 3:​11-15) Samfala lo olketa important quality hia hem faith, wisdom, wei for luksavve, and for fraet lo Jehovah. (Ps. 19:​9, 10; Prov. 3:​13-15; 1 Pet. 1:7) Iumi laek followim example blo Paul for teach lo wei wea bae helpem olketa Bible student for garem strong faith and klos wei for fren witim loving Dadi blo olketa lo heven.—2 Cor. 1:24.

13. Taem iumi gohed helpem olketa wea iumi study witim, hao nao iumi savve patient and minim olketa? (2 Corinthians 10:​4, 5) (Lukim tu piksa.)

13 Iumi savve followim example blo Jesus for teach lo wei for patient and minim student blo iumi. No askem olketa kwestin wea savve mekem man feel shame. If hem faendem hard for acceptim wanfala point, continue lo wat iutufala studyim, and kam bak moa lo datfala point lo narataem. Winim wei for trae forcem hem for acceptim wanfala teaching bifor hem redi, givim hem taem for truth grow insaed heart blo hem. (John 16:12; Col. 2:​6, 7) Bible comparem olketa false teaching witim wanfala taoa wea iumi trae for tekovarem. (Readim 2 Corinthians 10:​4, 5; lukim English study note “overturning strongly entrenched things.”) Winim wei for pullim daon datfala taoa for foldaon antap student blo iu, helpem hem for mekem Jehovah nao kamap sef ples blo hem.—Ps. 91:9.

Sem olo man lo nara piksa hem studyim “Enjoyim Laef for Olowe!” buk witim tufala brata. Olketa military medal stap lo shelf.

Givim taem for truth hem grow insaed heart blo student (Lukim paragraf 13)


TAEM OLKETA NIU WAN ATTENDIM OLKETA MEETING

14. Hao nao iumi shud treatim olketa niu wan wea attendim olketa meeting blo iumi?

14 Jehovah expectim iumi for treatim evri niu wan semsem nomoa, nomata wat nao culture, position, or baekgraon blo olketa. (Jas. 2:​1-4, 9) So hao nao iumi savve showim love lo olketa niu wan wea kam lo olketa meeting blo iumi?

15-16. Hao nao iumi savve helpem olketa niu wan for feel welkam lo olketa meeting blo iumi?

15 Samfala wea attendim meeting maet kam bikos olketa laek for savve abaotem olketa meeting blo iumi or samwan lo nara territory nao talem olketa for kam. From datwan, iumi shud no hol bak for go story witim olketa. Welkamim olketa, bat no ova tumas. Invaetem olketa for sidaon witim iu. Sharem Bible blo iu and pablikeson wea iumi iusim lo meeting, or givim olketa wanfala copy. And tu, tingim feeling blo olketa. Wanfala man wea kam lo Kingdom Hall talem brata wea welkamim hem dat hem feel shame lo kaleko wea hem werem. Datfala brata helpem hem for no feel shame taem hem explainim dat Olketa Jehovah’s Witness no spesol pipol, olketa semsem witim evriwan nomoa. Gogo datfala man hem baptaes, nomata olsem, hem no forgetim hao datfala brata helpem hem for no feel shame. Bat iumi mas tingim diswan: Taem iumi story lo olketa visitor bifor or bihaen lo meeting and showim interest lo olketa, mek sure iumi no poke noes lo personal laef blo olketa.—1 Pet. 4:15.

16 Iumi savve mekem olketa visitor feel welkam tu taem iumi story witim respect abaotem olketa wea no Witness and biliv blo olketa, maet datwan hem lo taem iumi story bifor lo meeting or taem iumi givim koment or wanfala tok. No iusim olketa toktok wea savve mekem olketa feel nogud or tingse iumi tok spoelem olketa. (Titus 2:8; 3:2) For example, iumi no tok daonem biliv blo olketa wea no garem sem faith olsem iumi. (2 Cor. 6:3) Diswan minim tu, olketa brata wea givim pablik tok mas careful lo hao olketa story. And tu, taem olketa explainim gud olketa toktok or idea wea pablik maet no minim, datwan showim olketa tingim olketa lo audience wea no Witness.

17. Wat nao goal blo iumi taem iumi lo ministry and faendem olketa wea “showim dat olketa laekem laef olowe”?

17 Waka blo iumi for mek disaepol hem kamap moa urgent evriday, and iumi gohed faendem pipol wea “showim dat olketa laekem laef olowe.” (Acts 13:48) Taem iumi faendem samwan, iumi no hol bak for offerim Bible study or invaetem olketa kam lo olketa meeting. Taem iumi duim datwan, iumi helpem olketa for start wakabaot followim road wea “leadim man go for kasem laef.”—Matt. 7:14.

WAT NAO ANSA BLO IU?

  • During lo firstaem wea iumi story witim olketa wea “showim dat olketa laekem laef olowe” hao nao iumi savve helpem olketa?

  • Wat nao samfala samting iumi savve duim taem iumi startim wanfala Bible study?

  • Hao nao iumi savve helpem olketa niu wan for feel welkam taem olketa attendim olketa meeting?

SONG 64 Hapi for Waka Long Harvest

a PIKSA: Tufala brata story lo wanfala man wea bin joinim military wea sidaon lo varanda lo haos blo hem; tufala sista witness lelebet taem nomoa lo wanfala mami wea busy.

    Solomon Islands Pidgin Pablikeson (1988-2025)
    Log Aot
    Log In
    • Solomon Islands Pidgin
    • Sharem
    • Settings
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Setting
    • JW.ORG
    • Log In
    Sharem