8 “Hades” and “Sheol” Hem Grev Bilong Olketa Man

Tenfala Ples wea Datfala Word Hades hem Stap

Maet mining bilong datfala word “Hades” hem “ples wea no eniwan lukim.” Hem stap tenfala taem long olketa Christian Greek Scripture long olketa verse hia: Matthew 11:23; 16:18; Luke 10:15; 16:23; Acts 2:27, 31; Revelation 1:18; 6:8; 20:13, 14. Long Solomon Islands Pidgin Niu World Bible, datfala word “Hades” hem stap long olketa footnote long olketa verse hia.

Long olketa Hebrew Scripture, word wea garem sem mining olsem “Hades” hem “Sheol,” and disfala word hem stap 66 taem long New World Translation bilong olketa Hebrew Scripture long English. Long Acts 2:27, Peter talem toktok long Psalm 16:10 wea showimaot Hades hem garem sem mining olsem Sheol and hem minim grev bilong olketa man (wea mekem hem difren from datfala Greek word taʹphos, wea minim wanfala grev nomoa). Long Latin languis, word wea semsem olsem Hades hem in·ferʹnus (samfala taem hem inʹfe·rus). Hem minim “ples andanit long graon,” wea savve minim grev. So datfala word in·ferʹnus hem garem sem mining olsem Greek word Hades and Hebrew word Sheol.

Long Bible, olketa word “Hades” and “Sheol” evritaem join witim dae and pipol wea dae finis, no witim laef or pipol wea laef.—Revelation 20:13.

Sheol Long Olketa Hebrew Scripture

Olketa savveman garem staka difren tingting abaotem wea nao datfala Hebrew word sheʼohlʹ hem kam from, bat luk olsem hem kam from datfala Hebrew verb שׁאל (sha·ʼalʹ), wea minim “for ask.” Disfala verb showimaot mining bilong Sheol hem ples wea askem or demandim evri man for go long hem, bikos evri man wea dae go long hem. Datfala ples hem insaed long graon. Hem evritaem join witim pipol wea dae finis, and hem minim grev bilong olketa man, or ples insaed graon (no insaed sea) wea olketa wea dae finis olketa stap. Bat datfala Hebrew word qeʹver hem difren bikos hem minim grev bilong wanfala man or ples wea olketa berem hem.—Genesis 23:4, 6, 9, 20.