Day wea Twin Towers Foldaon

OLKETA samting wea happen long September 11, 2001, long New York City, Washington, D.C., and Pennsylvania bae stap olowe long mind bilong planti million, maet planti billion pipol long world. Wea nao iu stap taem iu lukim or herem nius abaotem datfala attak long World Trade Center long New York and long Pentagon long Washington?

Wei wea staka property and, moa important, laef bilong staka pipol barava finis kwiktaem, mekem olketa man stop lelebet and tingting.

Waswe, iumi lanem eni samting abaotem wanem iumi chusim and olketa samting wea important long laef bilong iumi? Long wanem wei nao datfala barava sorre samting hem showimaot klia samfala gudfala fasin bilong olketa man—fasin for sakrifaesim seleva, for kea, for go ahed strong, and for no selfish? Disfala article and wan wea kam bihaen bae trae for ansarem mek-tu kwestin hia.

Story Bilong Olketa wea No Dae

Stretawe bihaen datfala nogud samting long New York, ples wea olketa train go anda long graon hem sat, and planti thousand pipol baeleg go aot from Manhattan—planti akrosim Brooklyn and Manhattan bridge. Olketa savve lukim klia olketa office and factory building bilong world headquarters bilong Olketa Jehovah’s Witness. No longtaem bihaen, samfala refugee from datfala trabol go long olketa building hia.

Alisha (long raet saed), dota bilong wanfala Witness, hem wanfala first wan for arrive. Dust and asis kavarem hem evribit.a Hem sei: “Taem mi insaed train for go long waka, mi lukim smoke kamaot from World Trade Center. Taem mi kasem area bilong datfala trabol, mi feelim hem hot tumas and glass hem evriwea long graon. Pipol ran olabaot, and police trae for mekem evriwan lusim datfala area. Hem luk olsem ples wea war hem go ahed.

“Mi ran insaed wanfala building klosap for haed. Then mi herem bigfala bosta taem mek-tu plane hem bangam south taoa. Hem hard for storyim samting mi lukim, blak smoke hem evriwea. Olketa talem mifala for muv go aot from datfala danger area. Mi go insaed wanfala boat wea katkros long East River for kasem Brooklyn. Taem mi kasem narasaed, mi luk go ap and lukim wanfala bigfala saen, ‘WATCHTOWER.’ Headquarters bilong religion bilong mami bilong mi! Stretawe mi go long office building. Mi savve mi long best ples for kasem help. Bihaen mi swim finis mi ringim parents bilong mi long telephone.”

Wendell (long raet) hem waka long Marriott Hotel midolwan long tufala taoa hia. Hem sei: “Mi waka long reception area long taem bilong first bosta. Mi lukim rabis foldaon evriwea. Mi luk go akros long street, and mi lukim wanfala man wea leidaon long graon and bone. Mi aotem jacket and shirt bilong mi and ran long hem for trae aotem fire. Nara man wea go pas hem stop for help tu. Full kaleko bilong hem bone evribit, socks witim olketa shoe nomoa stap. Then olketa fireman kam and tekem hem for kasem medical help.

“No longtaem bihaen, Bryant Gumbel bilong CBS Television nius hem ring kam long telephone for story witim samwan wea lukim samting wea go ahed. From famili bilong mi long Virgin Islands herem datwan long TV bilong olketa, olketa savve mi stap laef.”

Donald, bigfala man wea 1.95-meter tol, hem waka long World Financial Center and stap long mek-31storey bilong building, and hem luk stret go long Twin Towers and Marriott Hotel. Hem sei: “Samting wea mi lukim mekem mi seke fogud. Samfala pipol foldaon and samfala jamp from olketa window bilong north taoa. Mi fraet fogud and kwiktaem ran go aot from building wea mi waka.”

Narafala experience hem abaotem wanfala mami wea winim 60 year and tufala dota bilong hem wea winim 40 year. Ruth and sista bilong hem Joni stap witim mami bilong olketa, Janice, long wanfala hotel klosap long Twin Towers. Ruth, wanfala nurse, talem disfala story: “Mi insaed long bathrum. Seknomoa mami and sista bilong mi singaotem mi for kamaot. Mifala stap long mek-16 storey, and tufala lukim olketa pis rabis foldaon pasim window. Mami bilong mi lukim body bilong wanfala man flae go ova wanfala ruf klosap, olsem samting torowem hem.

“Mi kwiktaem werem kaleko, and mifala start for go daon long olketa step. Staka pipol singaot big. Mifala go aot long street. Mifala herem enikaen bosta and lukim fire. Olketa orderim mifala for kwiktaem go south long Battery Park long ples wea ship for go long Staten Island hem stap. Long datfala gogo, mifala lusim Mami bilong mifala, wea garem bigfala sik asthma. Hao nao bae hem stap laef midolwan long smoke, asis, and dust hia? For thirti minute mifala lukaotem hem bat no savve faendem hem. Bat, long datfala taem mifala no wari tumas bikos mami bilong mifala hem garem savve and gudfala tingting.

“Gogo, mifala kasem instruction for wakabaot kasem Brooklyn Bridge and akros go long narasaed. Tingim hapi bilong mifala taem mifala kasem narasaed long datfala bridge wea go for Brooklyn and lukim bigfala saen ‘WATCHTOWER’! Mifala savve mifala sef.

“Mifala kasem welkam and accommodation. Olketa givim kaleko long mifala tu, from mifala no garem eni samting. Bat wea nao Mami? For full naet mifala trae for faendaot sapos hem admit long eni hospital. Long samting olsem haf pas eleven long next morning, mifala kasem wanfala message. Mami hem stap long reception area! Wanem nao kasem hem?”

Janice, mami bilong tufala, hem story olsem: “Taem mifala kwiktaem lusim hotel, mi wari abaotem wanfala fren wea olo wea no fit for go witim mifala. Mi laek go bak and karem hem go aot. Bat hem danger tumas. From evri samting wea happen, mi go difren from tufala dota bilong mi. Nomata olsem, mi no wari tumas, from tufala garem gudfala tingting and Ruth hem wanfala nurse.

“Evriwea mi lukim pipol wea needim help—especially olketa pikinini and baby. Mi helpem evriwan wea mi fit for helpem. Mi go long area wea olketa givim treatment long pipol fitim kill bilong olketa. Mi help long wei for wasim hand and feis bilong olketa police and fireman, wea kava witim asis and dust. Mi stap go kasem samting olsem thri klok long morning. Then mi go insaed last ship wea go long Staten Island. Mi tingse olketa dota bilong mi maet lukaotem sef ples long there. Bat mi no faendem olketa.

“Long morning mi trae for kasem first ship for kam bak long Manhattan, bat from mi no wanfala emergency wakman mi no savve go insaed ship. Then mi lukim wanfala policeman wea mi helpem finis. Mi singaot: ‘John! Mi need for go bak long Manhattan.’ Hem ansa: ‘Kam followim mi.’

“Taem mi kasem Manhattan, mi go bak long Marriott Hotel. Maet chance hem stap yet for helpem fren bilong mi wea olo. Nomoa nao! Datfala hotel hem finis evribit. Datfala area long taon hem kwaet—no eni pipol stap. Olketa taed police and fireman nomoa stap, and olketa luk sorre fogud.

“Mi wakabaot go kasem Brooklyn Bridge. Taem mi kasem end long bridge, mi lukim wanfala saen wea mi barava savve long hem, ‘WATCHTOWER.’ Maet mi faendem tufala dota bilong mi long there. Tufala kam long reception area for meetim mi. Mifala holem each other klos and krae!

“Mi barava sapraes for no kasem eni problem witim asthma bilong mi, nomata bigfala smoke, dust, and asis. Mi prea olowe, from mi laek for helpem pipol and no putim hevi long eniwan.”

“No Eni Ples for Land!”

Rachel, wanfala woman wea 24 year, talem man wea raet for Wekap!: “Mi wakabaot long street bilong mi long Manhattan taem mi herem saond bilong wanfala plane. Mi luk go ap from hem laod fogud. Mi hard for bilivim—mi lukim wanfala big aeroplane wea gogo for land. Mi tingim why nao hem flae low and fast olsem. No eni ples for land! Maet pilot hem lus kontrol. Then mi herem wanfala woman singaot, ‘Plane hia bangam datfala building!’ Bigfala fire bosta from datfala north taoa. Mi lukim barava bigfala blak hol long datfala taoa.

“Hem nao worse samting wea mi lukim long full laef bilong mi. Hem olsem hem no tru. Mi standap nomoa witim mouth bilong mi open. Insaed shortfala taem, narafala plane bangam mek-tu taoa, and gogo tufala taoa foldaon. Mi no savve kontrolem or deal witim feeling bilong mi!”

“Sapos Mi Mas Swim, Bae Mi Swim”

Denise, wea 16 year, hem just arrive long skul bilong hem wea stap long saed bilong American Stock Exchange, thrifala street south from World Trade Center. “Hem just winim 9:00 a.m. Mi savve samting hem happen, bat mi no savve wanem. Mi stap long mek-11 storey bilong skul, insaed history class. Olketa student luk fraet fogud. Teacher bilong mifala laekem mifala for go ahed duim exam. Mifala want for lusim skul and go bak long haos.

“Then building bilong mifala seksek taem mek-tu plane bangam south taoa. Bat mifala no savve yet wanem hem happen. Seknomoa mi herem long radio bilong teacher: ‘Tufala plane bangam Twin Towers!’ Mi ting, ‘Hem no mek sense for stap long skul. Diswan hem terrorism, and Stock Exchange bae nextfala target.’ So mifala go aot.

“Mifala ran go kasem Battery Park. Mi luk go bak for lukim wanem hem happen. Mi luksavve south taoa bae foldaon. Then mi tingse bae hem pushim olketa nara building, mekem evri tol building foldaon. Mi stragol for breathe, from nose and throat bilong mi fulap witim asis and dust. Mi ran go for East River, and mi ting, ‘Sapos mi mas swim, bae mi swim.’ Taem mi ran, mi prea long Jehovah for sevem mi.

“Gogo, mi insaed wanfala ship for kasem New Jersey. Nomata mami bilong mi no faendem mi for winim faevfala hour, mi sef!”

“Waswe, Diswan Nao Last Day Long Laef bilong Mi?”

Joshua, wea 28 year, from Princeton, New Jersey, hem teachim wanfala class long mek-40 storey bilong north taoa. Hem ting go bak: “Seknomoa, hem feel olsem wanfala bomb hem bosta. Evri samting hem seksek, and then mi tingim, ‘Nomoa, hem wanfala earthquake.’ Mi luk go aotsaed, and mi sapraes tumas—smoke and olketa pis rabis flae raonem building. Mi sei long class, ‘Evriwan, lusim evriting. Iumi go nao!’

“Mifala go daon long olketa step, wea start for fulap witim smoke and wata for stopem fire. Bat no eniwan barava fraet. Mi go ahed for prea hao mifala chusim stretfala step for go daon mekem mifala no feisim datfala fire.

“Taem mi ran go daon long olketa step, mi tingim, ‘Waswe, diswan nao last day long laef bilong mi?’ Mi go ahed for prea long Jehovah, and mi feelim peace. Mi nating feelim datfala deep peace bifor. Bae mi nating forgetim datwan.

“Taem mifala kamaot from datfala building, olketa police go ahed for directim pipol. Mi luk go ap long olketa taoa and lukim hao tufala evriwan kat open. Hem olsem wanfala dream.

“Then mi herem wanfala saond wea mekem man fraet—hem barava kwaet, olsem staka thousand pipol fraet for breathe. Hem olsem no eniting long New York hem muv. Bihaen diswan pipol singaot big. Datfala south taoa hem foldaon antap long hemseleva! Smoke, asis, and dust olsem bigfala wave hem speed kam long mifala. Hem olsem wanfala movie. Bat diswan hem really happen. Taem datfala cloud kasem mifala, mifala stragol for breathe.

“Mi kasem Manhattan Bridge and tan and lukim datfala north taoa and bigfala television antenna bilong hem foldaon. Taem mi akrosim datfala bridge, mi go ahed for prea for kasem Bethel, world headquarters bilong Olketa Jehovah’s Witness. Mi hapi winim eni nara taem long laef bilong mi for lukim Bethel. And there long wall bilong factory hem bigfala saen wea planti thousand lukim evriday, ‘Readim Word Bilong God Holy Bible Evriday’! Tingting bilong mi hem olsem ‘Mi klosap for kasem. Just go ahed nomoa.’

“Taem mi ting go bak long olketa samting hia wea happen, hem mekem mi luksavve mi barava need for mek sure samting wea important hem first samting long laef bilong mi.”

“Mi Lukim Pipol Jamp Daon From Datfala Taoa”

Jessica, wea 22 year, lukim samting wea happen taem hem kamaot from wanfala anda graon train station. “Mi luk go ap and lukim asis, rabis, and enikaen pis metal foldaon. Pipol weit for iusim olketa telephone and start for fraet fogud bikos olketa mas weit longfala taem. Mi prea for kwaet fasin. Then nara samting bosta. Metal and glass foldaon from skae. Mi herem pipol singaot, ‘Hem narafala plane!’

“Mi luk go ap and lukim barava nogud samting—pipol jamp daon from olketa hae storey wea smoke and fire hem kamaot. Mi still lukim long mind bilong mi—wanfala man witim wanfala woman. Tufala hol strong long window for lelebet taem. Then tufala mas let go, and tufala foldaon and daon and daon. Hem barava nogud samting for lukim.

“Gogo, mi kasem Brooklyn Bridge, wea mi aotem shoe bilong mi and ran go long Brooklyn long narasaed long datfala river. Mi go long Watchtower office building, wea mi stretawe kasem help for daonem feeling for fraet.

“Datfala naet, long haos, mi readim August 22, 2001 Awake! wea storyim ‘Coping With Post-traumatic Stress.’ Mi barava needim datfala information!”

Datfala bigfala trabol muvim pipol for help long eni wei wea olketa savve duim. Nextfala article explainim datfala part bilong disfala story.

[Footnote]

[Piksa long page 8, 9]

(Lukim pablikeson for olketa nara information)

DESTROE EVRIBIT

1 NORTH TAOA 1 World Trade Center

2 SOUTH TAOA 2 World Trade Center

3 MARRIOTT HOTEL 3 World Trade Center

7 7 WORLD TRADE CENTER

BIGFALA DAMAGE

4 4 WORLD TRADE CENTER

5 5 WORLD TRADE CENTER

L ONE LIBERTY PLAZA

D DEUTSCHE BANK 130 Liberty St.

6 U.S. CUSTOMS HOUSE 6 World Trade Center

N S NORTH AND SOUTH BRIDGE FOR MAN WEA WAKABAOT

LELEBET DAMAGE

2F 2 WORLD FINANCIAL CENTER

3F 3 WORLD FINANCIAL CENTER

W WINTER GARDEN

[Credit Line]

As of October 4, 2001 3D Map of Lower Manhattan by Urban Data Solutions, Inc.

[Olketa piksa]

Antap: South Taoa hem first wan for foldaon

Midol: Samfala ran go long olketa Watchtower building for stap sef

Raet saed: Plande handred fireman and olketa team for sevem man no givap for waka long Ground Zero

[Credit Line]

AP Photo/Jerry Torrens

Andrea Booher/FEMA News Photo

[Credit Line long page 3]

AP Photo/Marty Lederhandler

[Credit Line long page 4]

AP Photo/Suzanne Plunkett