Young Pipol Askem . . .

Wei for Join Insaed Spiritism—Hao Nao Hem Savve Spoelem Man?

WASWE, olketa teenager really interest long spiritism? Wanfala grup bilong olketa wea duim research duim survey long 115 primary and secondary skul student for trae for faendemaot samting. Survey hia showimaot olketa namba hia: Winim haf (54 percent) long pipol wea olketa duim survey long olketa sei olketa interest long spiritism, and wan quarter (26 percent) sei olketa “barava interest.”

Olketa wea duim research for University bilong Alaska long Anchorage raet olsem: “Niuspepa and nius insaed magasin storyim hao luk olsem waka bilong satanic cult grow kwiktaem tumas . . . kamap big tumas insaed olketa year wea go pas.” Olketa savveman sei no inaf pruv stap for saportim wei wea olketa sei Satanism kamap big midolwan olketa young wan. Nomata olsem, no eni daot stap hao planti young wan interest long samfala part bilong Satanism and spiritism, nomata hem interest wea for plei raon nomoa.

‘Wanem nao rong long wei for plei raon witim spiritism?’ samfala young wan maet ask olsem. For ansarem diswan, iumi lukim samfala wei wea olketa young wan join insaed spiritism long first taem.

Wei wea Spiritism Switim Man

Wanfala article long U.S.News & World Report talem hao “olketa pikinini and teenager distaem stap long danger long wei for kasem staka information wea mekem man konfius or feel wari evritaem wea man nating tingim 20 year bifor.” Wei for barava interest tumas for savve hem pullim staka young wan for readim olketa buk and magasin, lukluk long video, or lukluk for spiritism long Internet.

Olsem BBC News Online hem talem, TV program wea mekhae long witchcraft and wei for biliv long vampire “encouragem olketa pikinini for interest long witchcraft.” Samfala hevi-metal music tu mekhae long raf fasin or olketa samting bilong demon. Man for raet long niuspepa Tom Harpur raet olsem insaed Toronto niuspepa The Sunday Star: “Mi mas talemaot strongfala warning abaotem wanem hem go ahed for happen [saed long music]. . . . Mi nating lukim eni samting wea barava nogud olsem bifor. Olketa song hia fulap witim krangge samting, wei for demon bossim man, wei for spillim blood, cursim man, evrikaen raf fasin, insaed diswan hem rape, wei for spoelem body bilong seleva, killim dae man, and suisaed. Dae and wei for finis evribit, profesi wea sei world bae finis, for no laek tingim evri gud samting and acceptim evri nogud and wicked samting—hem nao evri samting olketa sing abaotem.”

Waswe, wei for lisin long kaen music olsem savve mekem man for garem olketa nogud fasin? Samting olsem happen long wanfala young wan long United States wea hem 14 year, wea busarem mami bilong hem and then killim dae hemseleva. Olketa wall long rum bilong hem fulap witim olketa piksa bilong pipol for pleim hevi-metal music. Dadi bilong hem sei olsem bihaen: “Talem olketa parent for lukluk gud long wanem kaen music nao pikinini bilong olketa lisin long hem.” Hem sei long week bifor son bilong hem killim dae mami bilong hem, hem go ahed for singim wanfala rock song “abaotem blood and wei for killim dae mami bilong iu.”

Wei for pleim olketa video game stap tu, wea samfala long olketa man plei olsem hem kastom man or narakaen spirit man. Planti long olketa game hia garem raf fasin bilong demon.a

Nomata olsem, research organization Mediascope report olsem: “Olketa report showimaot maet wei for laekem hevi metal music nao hem wanfala samting wea showaot long wei wea man laek for stap seleva, wei for iusim drug or alcohol, sik long mind, suisaed. . . or wei for duim danger samting taem man hem young, bat music hem no kosim olketa fasin hia. Olketa tingse olketa teenager wea stragol witim olketa problem hia maet laekem tumas hevi metal music, bikos olketa toktok long song hia barava talem stret wari bilong olketa.”

No evriwan wea duim research agree long danger bilong wei for lisin long satanic music. Bat waswe, wei for lukluk or lisin evritaem long video, music, or olketa game wea mekhae long raf fasin savve spoelem man? For olketa Christian, wei for plei raon witim spiritism hem mekem danger wea moa big kamap.

Tingting Bilong God Long Spiritism

Long 1 Corinthians 10:20, aposol Paul warnim olketa Christian: “Mi no wantem iufala for share witim olketa demon.” Hu nao olketa demon, and why nao hem danger for share witim olketa? For tok stret, olketa demon hem olketa angel bifor, wea chus for followim Devil Satan. Satan minim “Man for Againstim Man” and Devil minim “Man for Tokspoelem Man.” For fitim samting wea Bible talem, disfala angel wea hem son bilong God bifor hem mekem hemseleva kamap man for againstim man and man for tok spoelem man taem hem chus for go againstim God. Gogo, hem switim olketa nara angel for joinim hem long bighed wei bilong hem. So olketa hia kamap demon.—Genesis 3:1-15; 6:1-4; Jude 6.

Jesus kolem Satan “ruler bilong disfala world.” (John 12:31) Satan and olketa demon bilong hem “kros tumas” bikos klosap nao olketa bae finis evribit. (Revelation 12:9-12) So iumi no sapraes taem pipol wea joinim olketa demon lukim wei wea olketa raf tumas. Wanfala woman long Suriname wea growap long famili wea duim spiritism barava lukim hao olketa demon “enjoyim wei for spoelem man.”b For join witim olketa raf spirit creature long eni wei hem danger tumas!

From diswan, God komandim pipol bilong hem bifor, olketa Israelite, for stap klia from evri wei for duim spiritism. Deuteronomy 18:10-12 givim warning hao “Jehovah barava heitim evriwan wea duim olketa samting hia.” Olketa Christian kasem warning hao God bae finisim evribit olketa “wea duim spiritism.” (Revelation 21:8) God tok strong tu againstim wei for share insaed spiritism. Bible givim komand: “No tasim samting wea no klin.”—2 Corinthians 6:17.

Kamap Free From Wei for Duim Spiritism

Waswe, iu bin mekem mistek for plei raon witim spiritism? Sapos olsem, tingim samting wea happen long taon bilong Ephesus long first century. Planti long there “duim magic.” Bat samfala sapraes long olketa mirakol wea aposol Paul duim witim help bilong holy spirit. Wanem nao kamaot from diswan? “Planti long olketa wea duim magic hipimap olketa buk bilong olketa and bonem olketa front long evriwan. And olketa kaontem price bilong olketa buk hia and hem kasem fifti thousand silver selen. So long bigfala wei word bilong Jehovah go ahed for grow and win.”—Acts 19:11-20.

Wanem nao diswan teachim iumi? Sapos man want for ranawe from paoa bilong olketa demon, hem mas distroem evri samting wea join witim satanic worship! Insaed diswan hem evri buk, magasin, piksa, olketa comic buk, video, olketa magic samting for werem for kasem “protection” and wei for copyim olketa samting bilong demon from Internet. (Deuteronomy 7:25, 26) Torowem eni samting for iusim long divination, olsem crystal ball or Ouija board. And tu, torowem olketa music or video wea garem olketa satanic toktok.

Hem needim strong and wei for disaed strong for duim olketa samting hia. Bat gud samting wea kamaot from diswan hem big tumas. Wanfala Christian woman wea nem bilong hem Jeanc baem wanfala computer game wea firstaem luk olsem hem no savve spoelem man. Taem hem start for pleim disfala game, hem faendem samfala part long hem garem samting bilong spiritism. No longtaem nomoa hem start for garem olketa nogud dream! “Mi getap long midol naet,” Jean hem sei, “and distroem olketa CD bilong datfala game.” Wanem nao kamaot from diswan? “Mi no garem eni trabol moa bihaen datwan.”

Sapos iu showimaot wei wea iu disaed strong for kamap free, iu bae win. Tingim wei for disaed strong wea Jesus showimaot taem Devil trae for switim Jesus for worshipim hem. “Then Jesus sei long hem: ‘Iu klia, Satan! From olketa raetem finis, “Iu mas worshipim Jehovah, God bilong iu and iu mas duim holy service long hem nomoa.”’ Then Devil lusim hem.”—Matthew 4:8-11.

No Faet Seleva Againstim

Aposol Paul talem iumi hao evri Christian “garem wanfala faet. . . againstim olketa wicked spirit long olketa ples bilong heven.” (Ephesians 6:12) Bat no trae for faet seleva againstim Satan and olketa demon bilong hem. Kasem help from parents bilong iu wea fraet long God and olketa elder long kongregeson bilong iu. Maet iu feel shame for talemaot wei wea iu joinim diswan, bat iu bae kasem saport wea iu needim.—James 5:14, 15.

Rememberim tu hao Bible hem sei: “Againstim Devil, and hem bae ranawe from iufala. Kam klosap long God, and hem bae kam klosap long iufala.” (James 4:7, 8) Tru nao, iu garem saport bilong Jehovah God! Hem bae helpem iu for kamap free from trap bilong spiritism.

[Olketa footnote]

[Piksa long page 14]

Torowem evri samting wea join witim satanic worship

[Piksa long page 14]

Keakea long olketa Web site wea mekhae long spiritism