Masai Pipol wea Interesting And barava Spesol
FROM MAN WEA RAET FOR WEKAP! LONG KENYA
HAE tiun singsing bilong wanfala young Masai (Maasai) boy hem saond go followim valley, and from air bilong morning hem fulap witim wata, saond hia hem go kasem farawe ples. Taem sun long morning hem kamap moa hae, voice bilong boy hia kamap moa strong tu, olsem wanfala bird wea apim voice bilong hem taem sun hem just kamap.
Mi go ahed for lisin taem laet bilong sun hem showim datfala boy wea keepim olketa animal hem standap midolwan olketa buluka bilong dadi bilong hem. Hem werem wanfala longfala red kaleko wea kavarem haf body bilong hem, hem standap stret long wan leg, lean go long handol bilong spia bilong hem and sing go long olketa buluka hia. Mi laek for talem iu abaotem spesol Masai pipol hia.
Welkam Long Land Bilong Olketa Masai
Masai pipol, wanfala interesting pipol wea waka bilong olketa for lukaftarem buluka, stap long olketa big open area bilong Great Rift Valley long East Africa. Olketa Masai stap long Kenya and Tanzania, and olketa garem living wea still followim olketa laen dadi bilong olketa wea stap planti handred year go finis. Taem hem no important long olketa, bat samting wea olketa duim hem depend long taem wea sun kamap and go daon and tu long olketa difren season.
Olketa Masai savve tumas for laef long hard and raf ples long datfala Rift Valley. Olketa wakabaot long farawe ples for lukaotem green grass and wata for buluka bilong olketa. Olketa lukaftarem buluka bilong olketa midolwan olketa wildebeest, zebra, giraffe, and nara animal wea stap long datfala flat area.
Pipol wea Tinghae Long Buluka
Masai pipol biliv evri buluka long earth hem bilong olketa. Disfala biliv hem kam from kastom story hao long firstaem God garem thrifala son and hem givim wanfala present long each wan. First son kasem wanfala arrow for hunting, mek-tu kasem wanfala hou for digim graon, and mek-thri son kasem wanfala stik for lukaftarem olketa buluka. Olketa sei disfala mek-thri son nao hem kamap dadi bilong nation bilong Masai. Nomata olketa nara tribe garem buluka, Masai pipol biliv evri animal hia bilong olketa.
Insaed Masai community, position bilong man hem showaot long haomas animal and haomas pikinini nao hem garem. Tru nao, olketa ting long man wea buluka bilong hem no kasem 50 olsem hem poor man. Witim help from planti pikinini and olketa waef bilong hem, Masai man hem hope for hipimap staka animal go kasem wan thousand animal.
Olketa Masai famili member fren witim buluka bilong olketa. Famili hem savve long voice and fasin bilong each animal. Planti taem olketa putim mark and laen and olketa spesol design long buluka for mekem animal hia luk naes go moa. Olketa singim singsing wea storyim naes lukluk bilong samfala animal and wea talemaot love for olketa animal hia. Olketa barava laekem tumas man buluka wea garem bigfala horn wea bend, and olketa keepim gud baby buluka olsem pikinini wea just born.
Wei bilong olketa Masai, olketa woman nao buildim haos from olketa branch bilong tree wea olketa weavim witim grass and then plasterem witim siti bilong buluka. Olketa haos hia raon and long and olketa buildim long wanfala circle for protectim wanfala fence wea olketa putim buluka bilong olketa insaed long naet taem. Raonem datfala full area olketa putim sharp branch bilong tree wea protectim olketa Masai and buluka bilong olketa from danger animal olsem hyena, leopard, and lion.
Laef bilong olketa Masai hem depend long hao healthy and strong nao animal bilong olketa. Olketa drinkim milk bilong animal hia, and iusim siti bilong hem for kavarem haos bilong olketa. Olketa Masai no savve killim buluka bilong olketa for kaikaim; olketa keepim samfala sheep and goat for datwan. Bat taem olketa mas killim dae wanfala buluka, olketa mekius long evri part bilong hem. Olketa iusim horn olsem container; huf and bon olsem samting for werem long body; and skin for shoe, kaleko, bed kava, and rope.
Interesting and Barava Spesol
Olketa Masai pipol, tol and slim and luk naes. Kaleko bilong olketa garem naesfala kala. Olketa werem olsem lavalava kaleko wea olketa dyem red and blue. Planti woman werem flat nekles wea olketa wakem from bead and headband wea kalakala. Olketa savve werem copper coil long hand and leg bilong olketa. Planti taem olketa man and woman mekem ear bilong olketa long from olketa werem hevi earing and bead. Olketa savve mixim orcher, mineral wea red kala wea olketa smasem for kamap powder, witim gris bilong buluka and paintim long body.
Wanfala evening, saed long fire, mi lukluk taem wanfala grup bilong olketa Masai hipap tugeta for dance. Olketa standap long wanfala circle and muv long semtaem. Taem speed bilong dance hia kamap moa fast, olketa hevi nekles wea olketa wakem from bead hem muv ap and daon and mek-noise long semtaem long shoulder bilong olketa girl. Then, wan bae wan, olketa Masai warrior step go long midol bilong datfala circle, and duim stael kaen jampjamp, hae go long air. Olketa maet dance for longtaem go kasem taem evriwan taed fogud.
Masai Famili Laef
Taem sun hem hot, mi sidaon witim wanfala grup bilong olketa Masai woman anda long shade bilong acacia tree, and lukluk long olketa taem olketa sewim stael bead go long olketa leather skin. Olketa laflaf and toktok and no lukim olketa weaverbird wea antap long datfala tree, wea sewim nest bilong olketa witim drae grass. Insaed long datfala day, olketa woman hia karem wata and firewood, fixim haos, and lukaftarem smol pikinini bilong olketa.
Taem sun hem start for gogo daon, olketa man wea lukaftarem olketa animal start for kam bak witim buluka bilong olketa. Isisi olketa buluka wakabaot kam, huf bilong olketa mekem bigfala red dust wea shaen from laet bilong sun wea gogo daon. Taem olketa woman lukim dust hia from farawe, olketa stretawe leavim waka bilong olketa and mek-redy for olketa buluka wea kakam.
Taem evri buluka insaed long fence, olketa man wakabaot midolwan olketa animal hia, holem horn bilong olketa man buluka and lukim wei wea olketa luk naes tumas. Wanfala smol boy skwisim milk from susu bilong buluka go insaed mouth bilong hem bat mami bilong hem hotem hem. Olketa young girl kwiktaem aotem milk bilong olketa buluka and fulimap container bilong olketa.
Long evening mifala sidaon raonem fire mekem mifala no feelim cold. Man savve smelem smoke and meat wea olketa kukim long fire and tu smel bilong olketa animal wea stap klosap. Wanfala olo man sidaon and talem story abaotem history bilong olketa Masai and danger samting wea olketa Masai warrior duim bifor. Hem stop lelebet taem wanfala lion hem singaot from farawe, and then hem go ahed moa long barava interesting story bilong hem. Gogo, isisi, evriwan go long haos bilong olketa for sleep. Naet hem kwaet, bat only samting man savve herem nomoa hem taem olketa animal wea sleep olketa brith.
Laef Bilong Masai Pikinini
Taem sun kamap, vilij hem laef bak moa. Olketa smol pikinini wea werem nomoa waistband and nekles wea olketa wakem from bead, olketa plei long cold morning air. Laflaf bilong olketa hem samting wea olketa Masai laekem tumas for herem, from olketa lovem pikinini bilong olketa and hope long olketa for future and wei for stap laef.
Wei for teachim olketa pikinini hem samting wea evriwan join insaed—eni olo insaed community savve disciplinem and whipim pikinini wea no obey. Olketa pikinini lane for respectim olketa olo, and olketa kwiktaem lanem olketa wei bilong Masai famili laef. Laef bilong olketa taem olketa smol hem isi tumas, bat taem olketa big ap, olketa young girl lane for duim waka long haos and olketa boy lane for lukaftarem and protectim olketa animal. Dadi and mami lanem long pikinini olketa kastom medicine and teachim olketa abaotem olketa Masai kastom wea affectim evri part long living bilong olketa Masai.
Kamap Full-Grown
Taem olketa grow big, olketa young wan lanem olketa kastom and ceremony wea showaot olketa lusim wei for olsem pikinini and kamap full-grown. Samfala kastom wea olketa lanem nao hem for deal witim sik, accident, marit, and dae. Olketa Masai biliv wei for fail for duim olketa ceremony hia bae mekem olketa kasem curse.
Masai dadi and mami maet arrangem marit bilong dota bilong tufala taem hem baby yet. Girl hia hem engage long man wea garem inaf buluka for peim bride-price wea dadi bilong hem askem. Planti taem bae hem maritim wanfala man wea moa olo winim hem and bae go stap witim olketa narafala waef bilong man hia long haos bilong hem.
Taem olketa young boy insaed Masai community growap big, olketa kaban witim olketa nara young man wea sem age witim olketa. Spesol wei for fren olsem maet go ahed for full laef bilong olketa. Olketa bae lusim wei for olsem boy and kamap warrior tugeta. Olsem olketa warrior olketa bae acceptim responsibility for protectim haos, keepim gud wata bilong community, and protectim olketa animal from wild animal and man for steal. Pipol savve long fasin bilong olketa Masai for no fraet and man savve evritaem lukim olketa karem sharp spia bilong olketa.
Taem olketa warrior kasem 30 year olsem, olketa go long last part bilong gogo for full-grown. Olketa duim bigfala ceremony for go insaed long disfala wei for mature; and then olketa savve marit. Taem olketa kasem important position hia, olketa bae waka hard for faendem waef and mekem namba bilong olketa buluka kamap moa big, and pipol bae askem advaes long olketa and for olketa stretem problem.
Masai and Future Bilong Olketa?
Distaem, olketa spesol kastom bilong olketa Masai start for lus. Olketa Masai no savve go witim buluka bilong olketa long samfala area for faendem grass. Pipol mekem planti land bilong olketa Masai bifor for kamap ples for keepim wild animal or for olketa haos and agriculture for feedim population wea go ahed for grow. Drae season and hard taem saed long selen hem mekem planti Masai for sellim buluka bilong olketa for kasem samting olketa needim. Taem olketa muv go long bigfala taon, olketa feisim semkaen problem wea kasem world distaem wea stap raonem olketa.
Distaem Olketa Jehovah’s Witness go preach long olketa Masai community long East Africa. Olketa printim winim 6,000 copy bilong brochure Hapi for Stap Long Earth Olawe! long Masai languis. So, olketa Masai kasem help for luksavve long wei wea truth bilong Bible hem difren from kastom biliv. Tru nao, hem gud tumas for lukim hao Creator bilong iumi, Jehovah God, hem givim olketa spesol and interesting pipol hia chance for kamap part bilong planti “nation and tribe and pipol and languis” wea bae laef thru long taem wea disfala nogud system bae distroe evribit.—Revelation 7:9.
[Piksa long page 27]
Haos bilong Masai pipol
[Piksa long page 28]
Olketa Masai hipap tugeta for dance
[Piksa long page 28]
Tufala Masai Witness