Lukluk Long World
Shirt for Olketa Penguin
Olketa volunteer evriwea long world wakem winim 1,000 shirt and sendem go long Tasmania, Australia. Hu nao bae werem? Olketa fairy penguin—smolfala bird wea hevi bilong hem samting olsem wan kilogram and wea stap long wanfala ples wea planti taem oil kapsaet long hem. National Post bilong Canada sei: “Taem olketa klinim olketa seleva, olketa swallowim datfala toxic oil, wea stap long feather bilong olketa. Olketa volunteer mekem olketa werem shirt for stopem olketa for no swallowim datfala oil [bifor] olketa man savve klinim olketa.” And tu, Post report hao olketa shirt hia helpem olketa penguin for no kol. Jo Castle, woman wea toktok for Tasmanian Conservation Trust, sei hao olketa bin iusim olketa shirt olsem for olketa nara bird bilong sea long Northern Hemisphere tu, bat olketa “changem design bilong olketa for olketa smolfala penguin long southern hemisphere.”
Olketa Pikinini Soldia
“Winim 300,000 pikinini—samfala wea kasem 7 year nomoa—go ahed for faet olsem soldia long 41 kantri raonem world,” hem nao toktok from wanfala report bilong Associated Press. Age bilong klosap evriwan hem midolwan 15 go kasem 18 year. Olsem Coalition to Stop the Use of Child Soldiers hem sei: “Witim wei wea olketa iusim pikinini for faet long front-laen, olketa iusim olketa tu for faendem land mine, for olsem olketa spy, for karem olketa samting and olsem sex slave.” Olketa savve givim olketa drug long pikinini for mekem olketa no savve fraet. Wanfala boy soldia long Sierra Leone wea age bilong hem 14 year sei hao sapos eniwan les for tekem olketa drug hia olketa bae killim hem dae. Wanfala young wan long North Africa hem sei olsem abaotem wei wea hem joinim faet long 1999 taem hem 15 year: “Olketa putim evri pikinini wea 15 and 16 year long front-laen taem army hem gogo bak. Mi witim 40-fala pikinini. Mi go ahed for faet for 24 hour. Taem mi lukim hao thrifala fren bilong mi nomoa laef, mi ranawe go bak.” Report bilong datfala Coalition hem sei hao olketa gavman savve mekem olketa pikinini for kamap soldia bikos long “wei bilong olketa pikinini—olketa cheap, hem isi for mekius long olketa and for mekem olketa no fraet for kill and obey witim wea for no tingting.”
Niu Record for Bible Transleison
“Distaem man savve kasem full wan or samfala part bilong Bible long 2,261 languis, diswan hem 28 moa languis winim 12 month bifor,” hem nao samting Bible Society bilong Britain hem talem. “Full Bible hem stap long 383 languis, 13 languis moa winim 12 month bifor.” Full buk bilong Hebrew or Greek Scripture, wea olketa savve kolem tu Old and Niu Testament, stap long 987 languis distaem.
Danger From Blood Transfusion
“Wanfala long thrifala man kasem blood transfusion wea, for fitim olketa Health gaedlaen bilong [New South Wales], olketa no need for kasem,” hem nao samting wea nius pepa bilong Australia, Sydney Morning Herald hem talem. “Olketa gaedlaen hia sei blood transfusion hem for olketa sikman wea haemoglobin level hem kasem seven or anda.” Dr. Ross Wilson, wea duim disfala research long wei for iusim blood, explainim hao wei for “givim transfusion wea sikman no needim hem savve killim dae datfala sikman from hem mekem heart bilong hem stop.” Research wea Dr. Wilson duim six year bifor showimaot hao “insaed wanfala year, samting olsem 18,000 [Man bilong Australia] dae from samting wea kamaot from medical treatment wea olketa kasem.” Dr. Wilson sei hao olketa doctor mas tingim olketa health gaedlaen bilong blood transfusion evritaem olketa givim wanfala transfusion and tu olketa sikman mas savve abaotem olketa gaedlaen hia mekem olketa savve kwestinim olketa doctor.
Olketa Danger From Wei for Smoke
“Wanfala long eitfala pipol wea dae from lung cancer hem from olketa breathim smoke from cigarette wea nara man smokem,” hem nao toktok bilong Naohito Yamaguchi wea waka for National Cancer Center Research Institute bilong Japan. Olketa scientist savve long diswan from wanfala research long 52,000 pipol wea dae from lung cancer. And tu, Asahi Shimbun niuspepa talem hao “research wea olketa duim for longfala taem hem showimaot hao carbon monoxide wea hem poison and olketa samting wea kosim cancer hem moa strong insaed smoke wea kamaot from cigarette wea samwan smokem winim smoke wea datfala man for smoke breathim.” Long 1999 wanfala research bilong gavman long Japan wea insaed diswan hem 14,000 pipol, faendem hao 35 percent long olketa wea stap long ples for waka or skul and 28 percent long olketa wea stap long haos breathim smoke from cigarette wea nara man smokem. Yamaguchi sei: “Pipol wea smoke mas luksavve hao olketa go ahed for spoelem olketa wea no smoke gogo bae mas separatem tufala sekson hia.”