Lukaotem Olketa Dolphin Long South
FROM MAN WEA RAET FOR WEKAP! LONG NEW ZEALAND
“HEM nomoa only animal wea lovem man for no eni spesol reason,” Greek man for raet, Plutarch, hem raet olsem. Wanem samting nao hem story abaotem? Hem story abaotem dolphin, wanfala mammal wea bilong sem famili olsem whale.
The World Book Encyclopedia sei “staka scientist biliv hao dolphin hem animal wea garem bigfala savve, olsem olketa chimpanzee and dog.” Olsem Plutarch bin talem, olketa dolphin laekem man no for kasem kaikai nomoa. Bat, hem luk olsem staka long olketa laek kaban witim iumi. Buk Mysteries of the Deep hem sei: “Nomata dolphin no needim man, hem interest and luk olsem enjoy for lukluk long akson bilong iumi olsem iumi laek lukim olketa.” Fofala bilong 32 difren kaen sea dolphin stap long New Zealand: common dolphin, bottle-nosed dolphin, dusky dolphin, and barava smol wan long world—Hector’s dolphin.a
Barava staka dolphin stap long Bay of Islands, wanfala saedsea area long New Zealand wea barava luk naes. Mifala laek tumas for lukim, so mifala lusim taon bilong Russell long boat. Gaed bilong mifala talem hao maet mifala lukim tu olketa killer whale and pilot whale—wea sem famili olsem dolphin, witim olketa bottle-nosed and common dolphin. Hem sei sapos mifala laek lukim olketa, mifala shud lukluk for wata wea savve sut go aot from hol antap hed bilong olketa or for fin bilong olketa. “Samtaem,” gaed hem sei, “olketa nao faendem iumi firstaem!”
Swim Witim Olketa Dolphin
No longtaem bihaen, mifala lukim olketa maeti body bilong olketa bottle-nose dolphin—wea savve kasem 4 meter long—front long mifala, witim fin wea muv fast thru long olketa wave. Olketa enjoy for free raed long wave wea boat mekem. Boat hem stop, and isisi mi and datfala gaed go insaed deep, green sea, wea olketa wild dolphin letem mifala swim witim olketa.
Witim olketa fin evriwea raonem mi and feeling for no sure wea for luk, mi tekwind big and luk daon long olketa gray sheip wea swim andanit long mi. Wanfala dolphin kamap from wata for luk long mi and then hem tan long saed, wea showim white bele bilong hem. Nomata olketa dolphin no savve kam klos tumas, saond wea olketa mekem hem laod. Luk olsem olketa no interest for herem mi copyim saond wea olketa mekem, from olketa lusim mi and then kam bak for go ahed swim raonem mi moa.
Lukaotem Kaikai and Plei
Taem mifala kasem bak boat, mifala followim olketa dolphin go long wanfala bay wea kwaet fogud. Long there mifala lukim staka dolphin wea hard for kaontem—jamp and spreim wata evriwea! Olketa lukaotem kaikai. Main kaikai bilong olketa hem squid, fish, and olketa crustacean. Mifala lukim tu wanem hem luk olsem wei for lane hao for faendem kaikai. Mami dolphin sekem wanfala smol fish witim sonar bilong hem, and baby wan trae for kasem long wei for whipim witim tail bilong hem. Baby dolphin luk olsem bae needim moa leson!
Olketa dolphin spendem staka taem for plei and kaban tugeta. Wanfala swim pas and show-off witim seaweed long fin bilong hem. Gaed bilong mifala explainim hao seaweed hem favorite toy bilong olketa dolphin. Olketa bae putim long fin or nose and plei witim for longtaem. Taem wanfala finis plei, bae narawan pikimap and plei witim moa.
‘Piksa from Saond’
For “lukim” klia olketa samting raonem olketa, olketa dolphin iusim echolocation, wea waka olsem ultrasound scan. Olketa dolphin sendem aot saond, and “olketa piksa” olketa kasem helpem olketa faendem kaikai and nara samting olketa interest long hem—insaed diswan hem olketa man. Olketa dolphin story tugeta witim olketa saond wea hae tiun—wea ten taem moa hae and foa and haf taem moa fast winim toktok bilong man. Winim wei for iusim languis olsem iumi, olketa dolphin iusim saond for wakem ‘piksa.’
Hem klia, staka samting stap yet for man lanem abaotem olketa dolphin. Maet wanday bae iumi minim olketa evribit—hao olketa tingim samting and tingting bilong olketa abaotem iumi. Witim bigfala feeling for tinghae mifala leavim disfala naesfala bay, witim olketa cliff bilong hem and white sandbis, for olketa dolphin. Mifala grow long respect for olketa dolphin and wei for tinghae long Creator bilong olketa.—Revelation 4:11.
[Footnote]
a Olketa narakaen wea savve kasem New Zealand hem hourglass dolphin and southern right whale dolphin wea no garem fin.
[Box/piksa long page 18, 19]
Bringimap Baby
Olketa dolphin no fish bat mammal. Dastawe baby dolphin susum milk from mami bilong hem. Insaed thrifala year wea mami susum, hem bae teachim baby olketa samting hem need for savve for laef. Olsem example, hem lanem wei for iusim echolocation or sonar system bilong hem, insaed diswan hem “saen” bilong hemseleva wea hem bae iusim for endim evri “sentence” bilong hem. Mami bae givim training tu for kasem kaikai, hao for kasem partner, and hao for fren witim olketa nara dolphin.
Taem hem born, tail bilong baby dolphin nao kamaot firstaem, from hem fold insaed mami bilong hem. Olketa baby dolphin wea just born garem laen long body bilong olketa, wea showim hao nao olketa fold insaed bele bilong mami. Wanfala baby bae susu and semtaem swim klos long mami, from hem mekius long strong bilong swim bilong mami bilong hem.
[Credit Line]
© Jeffrey L. Rotman/CORBIS
[Map long page 19]
(Lukim pablikeson for olketa nara information)
NEW ZEALAND
Bay of Islands
[Piksa long page 17]
Bottle-nosed dolphin
[Credit Line]
© Jeff Rotman
[Piksa long page 17]
Hector’s dolphin
[Credit Line]
Photo by Zoe Battersby
[Piksa long page 18]
Dusky dolphin
[Credit Line]
Mark Jones
[Piksa long page 18]
Olketa common dolphin
[Credit Line]
© R.E. Barber/Visuals Unlimited