Waswe, iu savve long eni Jehovah’s Witness? Maet wanfala long mifala hem stap long area bilong iu, waka witim iu, or skul witim iu. Or maet enitaem mifala kam story witim iu abaotem Bible. Why nao mifala kam storyim biliv bilong mifala long nara pipol? Mifala Olketa Jehovah’s Witness wanem kaen pipol?

Mifala semsem nomoa olsem nara pipol. Mifala kam from olketa difren ples and garem difren kaen living. Taem mifala no kamap Witness yet, samfala long mifala bilong difren religion and samfala no biliv long God. Bat mifala evriwan spendem taem for lukluk gud long olketa teaching bilong Bible bifor mifala kamap Witness. (Acts 17:11) Mifala bilivim wanem mifala lanem and disaed seleva for worshipim Jehovah God.

Wei for studyim Bible hem helpem mifala. Mifala tu feisim olketa problem and garem olketa wik point olsem nara pipol. Bat from mifala traem best for followim wanem Bible talem evriday, mifala lukim living bilong mifala hem kamap gud. (Psalm 128:1, 2) Diswan nao wanfala reason for mifala storyim long pipol olketa gud samting wea mifala lanem long Bible.

Mifala traem best for followim wanem Bible talem. Bible helpem mifala for stap gud and hapi, respectim nara pipol, honest, and kaen long pipol tu. Wei for followim wanem Bible talem helpem mifala for garem gudfala health, duim gud samting long laef, garem gudfala wei, and hem helpem olketa famili bilong mifala for stap gud. From mifala savve “God hem no favorim eniwan,” datwan mekem mifala kamap wanfala spiritual famili evriwea long world, nomata wanem nao kala skin bilong mifala or kantri wea mifala kam from. Nomata mifala semsem nomoa olsem nara pipol, organization bilong mifala barava difren from eni nara organization.—Acts 4:13; 10:34, 35.

• Wanem kaen pipol nao Olketa Jehovah’s Witness?

• Hao nao wei for studyim Bible helpem Olketa Jehovah’s Witness?

Staka pipol tingse Olketa Jehovah’s Witness hem nem bilong wanfala niu religion. Bat winim 2,700 year go finis, profet Isaiah hem sei pipol wea worshipim trufala God olketa “witness” bilong God. (Isaiah 43:10-12) Bifor long 1931, nem bilong mifala hem olketa Bible Student. Why nao mifala changem datfala nem for kamap Olketa Jehovah’s Witness?

Nem hia showimaot hu nao God bilong mifala. Nem bilong God, Jehovah, hem stap staka thousand taem insaed long olketa oldfala copy bilong Bible. Staka Bible transleison aotem datfala nem Jehovah and changem witim olketa title olsem Lord or God. Bat trufala God hem talem Moses nem bilong hem nao Jehovah. Hem sei: “Diswan nao hem nem bilong mi for olowe.” (Exodus 3:15) Taem hem talem datwan, hem showimaot hem difren from evri nara laea god. Mifala hapi tumas for garem nem bilong God wea holy.

Nem hia showimaot waka bilong mifala. Abel nao firstfala witness bilong Jehovah. Bihaen long hem, samfala narawan wea insaed long bigfala “sekson bilong olketa witness” hem Noah, Abraham, Sarah, Moses, David and samfala moa. (Hebrew 11:4–12:1) Olsem samwan wea witness long wanfala kot case, mifala barava laek for talemaot tru samting abaotem God bilong mifala.

Mifala followim example bilong Jesus. Bible sei Jesus hem “datfala faithful and tru witness.” (Revelation 3:14) Jesus sei ‘hem talemaot nem bilong God long olketa pipol long world,’ and hem “talem olketa tru samting” abaotem God. (John 17:26; 18:37) Dastawe hem fitim for olketa trufala disaepol bilong Christ for garem nem bilong Jehovah, and story abaotem hem long nara pipol. Diswan nao hem samting wea Olketa Jehovah’s Witness waka hard for duim.

• Why nao olketa Bible Student changem nem bilong olketa for kamap Olketa Jehovah’s Witness?

• Start long wanem taem nao Jehovah garem olketa witness long earth?

• Hu nao nambawan Witness bilong Jehovah?

Bible sei bihaen Christ hem dae, olketa man wea teachim laea samting bae kamap insaed kongregeson and spoelem olketa tru teaching. (Acts 20:29, 30) Gogo datwan nao samting wea happen. Olketa joinim olketa idea bilong heathen religion witim olketa teaching bilong Christ. Nomata olketa sei olketa Christian, worship and teaching bilong olketa hem barava difren nao. (2 Timothy 4:3, 4) So wanem nao mekem iumi sure iumi savve long olketa tru teaching insaed Bible long distaem?

Taem for Jehovah showimaot olketa tru teaching. Bible sei ‘long taem wea world hem gogo for finis, pipol bae savve long staka tru samting abaotem God.’ (Daniel 12:4) Long 1870, wanfala smol sekson wea laek for savve long olketa tru teaching luksavve staka samting wea olketa church teachim hem no kam from Bible. So olketa start for lukaotem olketa tru teaching insaed long Bible, and Jehovah helpem olketa for minim olketa tru teaching hia.

Wanfala sekson wea studyim gud Bible. Olketa Bible Student hia followim sem wei for study wea mifala gohed followim long distaem. Olketa storyim wanfala difren Bible subject long each taem. Taem olketa readim wanfala part bilong Bible wea olketa no minim, olketa lukaotem olketa narafala scripture for helpem olketa savve long mining bilong hem. Taem mining bilong hem kamap klia and hem fitim olketa narafala part long Bible, olketa raetem wanem olketa lanem. From olketa iusim Bible nomoa for minim olketa tru teaching, olketa luksavve long tru samting abaotem nem and Kingdom bilong God, plan bilong hem for olketa man and disfala earth, samting wea happen long pipol wea dae finis, and datfala hope for laef bak moa. Taem olketa minim gud olketa tru teaching, datwan mekem olketa free from olketa laea teaching and worship wea no stret.—John 8:31, 32.

Kasem 1879, olketa Bible Student luksavve olketa mas helpem nara pipol tu for savve long olketa tru teaching. So long datfala year, olketa start for printim The Watchtower magasin wea mifala gohed printim yet long distaem. Distaem mifala preach long pipol long 240 kantri, and mifala printim olketa buk and magasin long samting olsem 750 languis. Winim eni narataem bifor, hem isi tumas for pipol kasem trufala savve abaotem God!

• Bihaen Christ dae, wanem nao happen long olketa tru teaching?

• Wanem nao mekem mifala fit for luksavve long olketa tru teaching insaed Bible?

For staka year Olketa Jehovah’s Witness iusim, printim, and givimaot olketa difren Bible transleison. Bat gogo mifala luksavve need hem stap for garem niu Bible transleison wea bae helpem pipol for garem “stretfala savve abaotem olketa tru teaching,” wea hem samting wea God laekem. (1 Timothy 2:3, 4) So long 1950, mifala releasem samfala part bilong English New World Translation Bible. Mifala transleitim New World Translation Bible long winim 130 languis finis.

Pipol needim wanfala Bible wea hem isi for minim. Languis hem savve change and staka Bible transleison garem olketa word and toktok wea hard for minim distaem. Nara samting tu, olketa faendem olketa old copy bilong Bible wea stret winim olketa narawan, wea diswan mekem hem moa isi for minim gud Hebrew, Aramaic, and Greek languis wea olketa raetem Bible long hem.

Pipol needim wanfala transleison wea barava stret. Olketa wea transleitim Bible shud no changem followim tingting bilong olketa seleva, bat olketa shud traem best for barava followim toktok bilong olketa man wea raetem Bible long firstaem. Nomata olsem, staka wea transleitim Bible no putim nem bilong God, Jehovah, insaed long Bible bilong olketa.

Pipol needim wanfala Bible wea mekhae long God. (2 Samuel 23:2) Olketa putim bak nem bilong Jehovah insaed long New World Translation Bible long 7,000 taem wea datfala nem hem stap long olketa oldfala copy bilong Bible, olsem piksa long daon hem showimaot. (Psalm 83:18) From olketa duim bigfala research for staka year, disfala Bible transleison hem isi for man readim and hem helpem iumi for minim gud tingting bilong God. Nomata wanem Bible transleison nao iu garem, mifala encouragem iu for readim Bible evriday.—Joshua 1:8; Psalm 1:2, 3.

• Why nao Olketa Jehovah’s Witness luksavve pipol needim wanfala niu Bible transleison?

• Wanem nao hem gud for man duim evriday sapos hem laek for savve wanem God laekem?