Mifala no garem olketa bigman wea kasem wages. Mifala followim example bilong olketa firstfala Christian. Olketa man wea fit kasem waka for lukaftarem kongregeson bilong God. (Acts 20:28) Olketa elder hia mature and olketa leadim and lukaftarem mifala. Olketa no duim diswan from eniwan forcem olketa or from olketa laek for kasem samting for olketa seleva, bat olketa duim bikos olketa willing and laek for helpem narawan. (1 Peter 5:1-3) Wanem waka nao olketa duim for helpem olketa long kongregeson?

Olketa tingim and lukaftarem mifala. Olketa elder leadim olketa long kongregeson and help for protectim olketa from eni samting wea savve spoelem wei wea olketa fren witim God. Olketa savve God givim disfala important waka long olketa, so olketa no bossim pipol bilong hem, bat olketa traem best for helpem olketa gohed strong and for hapi. (2 Corinth 1:24) Olsem man wea lukaftarem olketa sheepsheep hem traem best for protectim evri sheepsheep bilong hem, olketa elder traem best for savve gud long olketa man wanwan insaed kongregeson.—Proverbs 27:23.

Olketa teachim mifala for duim wanem God hem laekem. Evri week olketa elder teach long olketa meeting bilong kongregeson for strongim faith bilong mifala. (Acts 15:32) Olketa faithful man hia lead long waka for preach tu. Olketa waka witim mifala and trainim mifala long hao for duim gud ministry bilong mifala.

Olketa encouragem mifala wanwan. For helpem mifala fren gud witim God, olketa elder visitim mifala long haos or story witim mifala long Kingdom Hall. Olketa iusim Bible for helpem and comfortim mifala.—James 5:14, 15.

Olketa elder duim olketa waka long kongregeson and staka long olketa mas waka for selen and garem olketa famili responsibility tu. Olketa barava needim taem for lukaftarem gud olketa samting hia tu. So hem fitim for iumi tinghae and respectim olketa brata hia wea duim bigfala waka.—1 Thessalonica 5:12, 13.

• Wanem waka nao olketa elder long kongregeson duim?

• Long olketa wanem wei nao olketa elder helpem mifala wanwan?

Bible storyim tufala sekson wea duim olketa waka long kongregeson. Tufala sekson hia nao “olketa elder and ministerial servant.” (Philippi 1:1) Staka kongregeson garem tu-thri elder and ministerial servant. Wanem waka nao olketa ministerial servant duim for helpem mifala?

Olketa helpem olketa elder. Ministerial servant hem man wea fren gud witim Jehovah. Hem willing nomoa for duim eni waka wea olketa givim long hem and hem duim gud datfala waka. Ministerial servant savve young olsem 20 year nomoa, or hem savve wanfala mature man. Staka waka nao olketa duim long kongregeson saed long wei for organize and maet samfala physical waka tu. Diswan mekem olketa elder free for tingim nomoa waka for teach and for helpem olketa long kongregeson gohed faithful and fren gud witim God.

Samfala waka wea olketa duim. Samfala ministerial servant garem waka for welkamim olketa long kongregeson taem olketa arrive kam long meeting. Samfala moa lukaftarem olketa microphone, orderim olketa buk and magasin, lukaftarem selen bilong kongregeson, and organizem wea nao kongregeson bae duim preaching evri week. Samfala garem waka for help repairim and lukaftarem Kingdom Hall. Maet olketa elder savve askem olketa for helpem olketa olo. Nomata wanem waka nao olketa ministerial servant kasem, olketa willing for duim datwan and evriwan long kongregeson respectim olketa bikos long gudfala waka wea olketa duim.—1 Timothy 3:13.

Olketa showimaot gudfala Christian wei. Brata wea showimaot hem wanfala strong Christian savve kamap ministerial servant. Taem olketa duim tok or demonstration long olketa meeting, olketa strongim faith bilong mifala. From olketa lead long waka for preach, olketa mekem mifala strong for duim preaching tu. From olketa waka gud witim olketa elder, datwan mekem evriwan feel hapi, and encouragem evriwan for garem wan mind. (Ephesus 4:16) Gogo, olketa tu kasem mark for kamap elder.

• Wanem kaen man nao fit for kamap ministerial servant?

• Hao nao olketa servant helpem kongregeson for gohed gud?

Staka taem long olketa Christian Greek Scripture iumi savve read abaotem Barnabas and aposol Paul. Tufala hia olketa traveling overseer wea visitim olketa kongregeson long datfala taem. Why nao olsem? Olketa barava tingim and laek for helpem olketa spiritual brata and sista bilong olketa. Paul sei hem laek for “go visitim olketa brata” for chekim hao nao olketa. Hem willing for go visitim and strongim olketa nomata gogo bilong hem for kasem olketa bae plande handred kilometer. (Acts 15:36) Olketa traveling overseer distaem laek helpem and strongim olketa kongregeson tu.

Olketa kam for strongim kongregeson. Circuit overseer savve visitim evri kongregeson long wanfala circuit tufala taem evri year, and hem stap for wanfala week long each kongregeson. Iumi savve kasem barava gud samting from olketa strongfala Christian hia, and sapos olketa marit, iumi savve kasem gud samting from waef bilong olketa tu. Olketa traem best for story witim olketa wea young and wea olo, and olketa barava interest for go witim mifala for duim preaching and olketa Bible study. Olketa go witim olketa elder for visitim and encouragem samfala wea needim help, and olketa givim olketa tok long meeting and long assembly for encouragem mifala.—Acts 15:35.

Olketa showimaot olketa interest long evriwan. Olketa circuit overseer barava interest for helpem evriwan long kongregeson fren gud witim God. Olketa meet witim olketa elder and ministerial servant for savve long hao nao evriwan long kongregeson and for givim advaes long hao olketa brata hia savve duim gud responsibility bilong olketa. Olketa helpem olketa pioneer for duim gud ministry bilong olketa, and barava laek for story witim olketa niu wan wea just start for kam long olketa meeting for savve long hao nao olketa gohed. Evri brata hia willing for waka hard witim iumi for helpem iumi. (2 Corinth 8:23) Iumi shud trae for garem sem faith olsem olketa.—Hebrew 13:7.

• Why nao olketa circuit overseer visitim olketa kongregeson?

• Hao nao iu savve kasem gud samting from visit bilong olketa?

Stretawe bihaen wanfala natural disaster happen, Olketa Jehovah’s Witness arrange for helpem olketa spiritual brata and sista wea datfala disaster spoelem olketa. Diswan showimaot love wea mifala garem for olketa nara brata. (John 13:34, 35; 1 John 3:17, 18) Long olketa wanem wei nao mifala givim help?

Mifala donatem selen. Taem wanfala big hangre kamap long Judea bifor, olketa Christian long Antioch sendem selen for helpem olketa spiritual brata bilong olketa long there. (Acts 11:27-30) Hem semsem long disfala taem tu. Taem mifala herem olketa brata bilong mifala long nara kantri kasem hard taem olsem, mifala savve givim donation long kongregeson bilong mifala and datfala selen hem go for provaedem eni relief wea olketa bae needim.—2 Corinth 8:13-15.

Mifala givim olketa nara help tu. Olketa elder wea stap long ples wea disaster happen duim waka for lukaotem each member bilong kongregeson for mek sure evriwan stap sef. Olketa savve arrangem wanfala relief komiti for provaedem kaikai, wata, kaleko, ples for stap, and medicine. Staka Witness volunteer for help long datfala relief waka. Olketa peim pasis bilong olketa seleva for go help long waka for repairim olketa haos and Kingdom Hall. From mifala evriwan garem wan mind and lanem plande samting from staka relief waka wea mifala duim finis, mifala fit for arrangem help kwiktaem. Mifala helpem “olketa wea garem sem biliv” bat mifala traem best tu for helpem olketa nara pipol nomata long wanem religion nao olketa.—Galatia 6:10.

Mifala iusim Bible for comfortim pipol. Bihaen long wanfala disaster pipol barava needim comfort. Long taem olsem, iumi kasem strong from Jehovah, wea hem nao “God wea givim comfort.” (2 Corinth 1:3, 4) Mifala hapi for storyim olketa promis long Bible witim pipol wea needim comfort for helpem olketa savve klosap nao Kingdom bilong God bae finisim olketa hard taem olsem wea mekem pipol for safa.—Revelation 21:4.

• Why nao olketa Witness fit for duim samting kwiktaem bihaen wanfala disaster hem happen?

• Wanem comfort from Bible nao iumi savve sharem witim olketa wea disaster kasem olketa?

No longtaem bifor Jesus dae, hem story tugeta witim fofala disaepol bilong hem: Peter, James, John, and Andrew. Hem storyim profesi abaotem saen wea bae showimaot hem stap long olketa last day, and then hem askem wanfala important kwestin. Hem ask: “Hu nao datfala wakaman wea faithful and wise wea Boss markem hem for lukaftarem olketa nara wakaman and for givim kaikai long olketa long barava taem?” (Matthew 24:3, 45; Mark 13:3, 4) Jesus hem talem klia long olketa disaepol hem bae markem wanfala grup for gohed givimaot spiritual kaikai long olketa follower bilong hem long olketa last day. Hu nao datfala grup?

Hem wanfala smol grup bilong olketa anointed Christian. Datfala “wakaman” nao hem Governing Body bilong Olketa Jehovah’s Witness. Datfala grup givimaot spiritual kaikai wea olketa narawan wea worshipim Jehovah needim, and olketa givimaot long barava taem wea olketa needim tu. Iumi depend long disfala wakaman wea faithful for ‘gohed givim iumi kaikai long barava taem.’—Luke 12:42.

Hem lukaftarem famili bilong God. (1 Timothy 3:15) Jesus givim long olketa bigfala responsibility for lukaftarem evri waka long organization bilong Jehovah long earth. Olketa lukaftarem selen bilong organization, directim waka for preach, and iusim arrangement bilong kongregeson for teachim mifala. Datfala “wakaman wea faithful and wise” givimaot spiritual kaikai wea mifala needim long barava taem. For duim diswan hem iusim olketa buk wea mifala iusim long ministry, and olketa program long olketa meeting and olketa hipap bilong mifala.

Datfala wakaman hem faithful for teachim nomoa samting wea Bible teachim, and for preachim datfala gud nius. Hem wise long hao hem lukaftarem olketa samting bilong Christ long earth. (Acts 10:42) Jehovah hem blessim waka hia long wei wea staka moa pipol kamap olketa Witness bilong hem, and long wei for provaedem staka spiritual kaikai wea iumi needim.—Isaiah 60:22; 65:13.

• Hu nao Jesus markem for givim spiritual kaikai long olketa disaepol bilong hem?

• Long wanem wei nao datfala wakaman hem faithful and wise?

Long taem bilong olketa aposol, wanfala smol grup, wea hem nao, “olketa aposol and olketa elder long Jerusalem,” disaedem olketa important samting for evri nara Christian wea God anointim. (Acts 15:2) From olketa story raonem samting wea Bible talem and letem spirit bilong God for leadim olketa, olketa savve disaedem samting wea evriwan long olketa agree long hem. (Acts 15:25) Sem samting hem happen distaem tu.

God iusim Governing Body for duim samting wea Hem laekem. Olketa anointed brata long Governing Body barava interest long Bible and olketa garem bigfala savve long hao for organizem waka and for disaedem olketa samting saed long worship. Olketa meet tugeta evri week for tingim need bilong pipol wea worshipim Jehovah evriwea long earth. Olsem olketa duim long taem bilong olketa aposol, Governing Body givim direction wea followim Bible. Olketa savve iusim leta or olketa traveling overseer and olketa narawan for givim datfala direction. Diswan mekem pipol bilong God for garem wan mind long evri samting. (Acts 16:4, 5) Governing Body lukaftarem waka for redyim and givimaot spiritual kaikai. Olketa givim encouragement and help for evriwan savve gohed busy long waka for preach, and markem olketa brata for duim olketa waka insaed organization.

Governing Body followim samting wea holy spirit showimaot. Governing Body evritaem lukaotem direction from Jehovah God wea hem rulim evri samting, and from Jesus Christ wea hem Hed bilong kongregeson. (1 Corinth 11:3; Ephesus 5:23) Olketa long Governing Body no tingse olketa leader bilong pipol bilong God. Olketa hia witim evri nara anointed Christian, “gohed followim datfala Pikinini Sheepsheep [Jesus] long eni ples wea hem go.” (Revelation 14:4) Governing Body barava tinghae long prea bilong iumi for olketa.

• Hu nao governing body long taem bilong olketa aposol?

• Wanem nao Governing Body distaem duim for lukaotem direction from God?

Bethel hem wanfala Hebrew nem wea minim “Haos bilong God.” (Genesis 28:17, 19, footnote) Datfala nem hem barava fitim for olketa building wea Olketa Jehovah’s Witness wakem evriwea long world for olketa organizem and sapotim waka for preach. Governing Body stap long world hedquarter long New York State, U.S.A., and hem lukaftarem waka wea gohed long olketa branch office wea stap long staka kantri. Evri branch office garem olketa wea waka long hem and mifala kolem olketa wanfala Bethel famili. Olketa olsem wanfala famili bikos olketa stap tugeta, waka tugeta, kaikai tugeta, and wan mind for studyim Bible tugeta.—Psalm 133:1.

Hem spesol ples wea olketa famili member hia willing tumas for duim waka. Long evri Bethel, olketa Christian man and woman stap wea barava willing for duim wanem God hem laekem and olketa duim waka for Kingdom full taem. (Matthew 6:33) No eniwan long olketa kasem pei, bat olketa kasem rum for stap, kaikai, and smol allowance for peim samting wea olketa needim. Evriwan long Bethel garem waka for duim. Samfala waka long office, or long kitchen. Samfala waka for printim olketa buk, waswas kaleko, duim klining, maintenance, or olketa nara waka.

Ples wea evriwan busy long waka for sapotim preaching. Main goal bilong evri Bethel hem for givim chance for staka pipol savve lanem tru samting wea Bible teachim. Olsem example, tingim disfala brochure. Governing Body nao lukaftarem waka for redyim disfala brochure. Olketa iusim Internet for sendem diswan go long staka handred transleison team evriwea long world wea transleitim and then sendem go moa long samfala branch office wea garem big machine wea savve kwiktaem printim staka thousand brochure olsem. Then olketa sendem olketa brochure hia go long winim 110,000 kongregeson. Olketa Bethel famili nao duim evri waka hia for sapotim barava important waka for preachim gud nius bifor end hem kam.—Mark 13:10.

• Hu nao waka long Bethel, and wanem nao olketa kasem for helpem olketa duim waka bilong olketa?

• Wanem important waka nao evri Bethel sapotim?

Olketa Bethel famili member waka long olketa difren department. Waka bilong olketa hem for sapotim preaching waka long wanfala kantri or maet winim wanfala kantri. Maet olketa waka long wanfala transleison team, printim olketa buk and magasin, sendem go olketa buk wea kongregeson orderim, wakem olketa video and audio recording, or duim nara waka.

Branch Komiti lukaftarem evri waka hia. Governing Body markem wanfala branch komiti long evri branch for lukaftarem waka long branch office. Komiti hia garem thrifala member or maet winim thrifala member. Olketa komiti member hia olketa elder wea fit. Branch komiti givim report evritaem long Governing Body abaotem hao waka hem gohed long ples wea olketa lukaftarem and eni problem wea kamap. Olketa report hia helpem Governing Body for disaedem olketa subject wea bae fitim for storyim long olketa niu buk, long olketa meeting, and long olketa assembly and convention. Governing Body savve sendem samfala brata for visitim olketa branch office for helpem branch komiti saed long waka bilong olketa. (Proverbs 11:14) Brata wea duim datfala visit bae givim tok long wanfala spesol program for encouragem olketa brata and sista wea datfala branch office lukaftarem.

Sapotim olketa kongregeson. Olketa brata long branch office appruvim olketa niu kongregeson. Olketa organizem waka bilong olketa pioneer, missionary, and circuit overseer long kantri wea branch lukaftarem, and olketa organizem olketa assembly and convention. Olketa organizem tu waka for buildim olketa niu Kingdom Hall, and olketa mek sure olketa kongregeson kasem olketa buk and magasin wea olketa needim. Evri waka wea olketa duim long branch hem for organizem and sapotim waka for preach.—1 Corinth 14:33, 40.

• Long wanem wei nao olketa Branch Komiti helpem Governing Body?

• Wanem waka nao olketa duim long branch office?

For mekem mifala savve talemaot datfala “gud nius” long “pipol long evri kantri, tribe, and languis,” mifala wakem olketa buk long samting olsem 750 languis. (Revelation 14:6) Wanem nao insaed bigfala waka hia? Long staka kantri, mifala garem olketa wea raetem olketa article long olketa buk and magasin, and tu, samfala transleitim olketa article hia long languis. Evriwan hia Olketa Jehovah’s Witness.

Olketa raetem article long English firstaem. Governing Body nao lukaftarem waka long Raeting Department long world hedquarter. Disfala department organizem olketa man wea raet long hedquarter and long samfala branch office tu. Olketa wea raetem olketa article hia pipol from olketa difren ples. So mifala savve raet abaotem olketa subject wea pipol evriwea long world interest for readim and wea affectim olketa.

Olketa transleitim olketa article. Bihaen olketa raetem and appruvim olketa article, olketa iusim Internet for sendem go long olketa transleison team evriwea raonem world, wea transleitim and chekim gud olketa article hia. Olketa traem best for chusim olketa toktok long languis wea barava garem sem mining olsem English.—Ecclesiastes 12:10.

Computer mekem datfala waka hem fast. Computer no savve changem man wea raetem article or wea transleit. Nomata olsem, olketa computer program helpem olketa for duim datfala waka kwiktaem. Olketa Jehovah’s Witness wakem computer program wea olketa kolem Multilangauge Electronic Publishing System (MEPS) wea helpem olketa for transleit long staka languis and then putim olketa piksa and nara samting long article mekem hem redi for printim.

Mifala duim bigfala waka hia for languis wea no staka pipol story long datfala languis tu! Why nao olsem? Bikos samting wea Jehovah laekem nao hem for “evri difren kaen man mas sev and for garem stretfala savve abaotem olketa tru teaching.”—1 Timothy 2:3, 4.

• Wanem nao insaed waka for raetem and printim olketa buk bilong mifala?

• Why nao mifala transleit long staka languis?

Evri year, organization bilong mifala wakem and givimaot staka handred million Bible and olketa buk wea no garem eni kost. Mifala wakem and lukaftarem staka Kingdom Hall and branch office. Mifala sapotim staka thousand Bethelite and missionary, and organizem relief long taem bilong natural disaster. So maet iu laek for savve, hao nao mifala kasem selen for evri samting hia?’

Mifala no askem smol haf long wages, or duim kolekson. Nomata waka wea mifala duim for talemaot gud nius hem kostim staka selen, mifala no askem selen long eniwan. Winim wan handred year bifor, Wastaoa magasin sei Jehovah nao sapotim waka bilong mifala so no enitaem bae mifala begim or askem pipol for givim selen for sapotim diswan. And kam kasem distaem, mifala nating duim datwan!—Matthew 10:8.

Donation wea pipol willing for givim sapotim waka bilong mifala. Staka pipol tinghae long waka wea mifala duim for teachim Bible, and olketa givim donation for sapotim datwan. Olketa Witness seleva tu hapi for givim taem, strong, selen, and olketa nara samting for sapotim wanem God laek for duim long earth. (1 Chronicles 29:9) Long Kingdom Hall and long olketa assembly and convention bilong iumi, olketa contribution box stap sapos man laek for givim donation. Or iu savve go long website bilong mifala, jw.org, for givim donation online. Staka donation hem kam from olketa wea maet no garem staka samting, olsem datfala widow woman wea poor wea Jesus tinghae long hem taem hem putim tufala coin nomoa long contribution box long temple. (Luke 21:1-4) So diswan showimaot eniwan nomoa savve markem lelebet selen for donation “followim wanem hemseleva tingim.”—1 Corinth 16:2; 2 Corinth 9:7.

Staka pipol willing for givim donation and laek iusim samting olketa garem for mekhae long Jehovah and sapotim disfala waka for Kingdom. Mifala barava sure, Jehovah bae gohed mekem heart bilong pipol hia willing for sapotim diswan.—Proverbs 3:9.

• Wanem nao mekem organization bilong mifala difren from olketa nara religion?

• Wanem nao mifala iusim donation for hem?

Mifala kolem ples wea mifala worship, Kingdom Hall, bikos main Bible teaching wea mifala storyim long there nao hem abaotem Kingdom bilong God, wea hem nao main samting wea Jesus storyim long ministry bilong hem tu.—Luke 8:1.

Kingdom Hall nao ples long community for tru worship. Kingdom Hall nao ples wea Olketa Jehovah’s Witness organizem waka for preach long community. (Matthew 24:14) No evri Kingdom Hall sem size or sem design, bat olketa simpol and winim wanfala kongregeson savve iusim sem Kingdom Hall. Distaem mifala wakem staka thousand niu Kingdom Hall (samting olsem faevfala evri day) bikos long staka pipol wea kam for worshipim Jehovah. Hao nao mifala fit for duim datwan?—Matthew 19:26.

Selen hem from donation wea pipol givim for datfala waka. Olketa kongregeson sendem olketa donation hia long branch office. Then branch office iusim datfala selen for buildim or repairim olketa Kingdom Hall.

Olketa volunteer nao wakem olketa Kingdom Hall hia and olketa no kasem pei. Long staka kantri olketa garem olketa Kingdom Hall Construction Grup. Olketa construction grup and nara volunteer savve buildim wanfala Kingdom Hall and then muv go long next Kingdom Hall project nomata maet datwan hem barava long bush. Construction grup nao helpem olketa kongregeson for buildim Kingdom Hall bilong olketa. Long olketa nara kantri, samfala brata lukaftarem waka for buildim or repairim olketa Kingdom Hall. Nomata olketa brata wea garem savve long datfala area olketa kam for help, long evri building project, big haf long olketa volunteer nao hem olketa long kongregeson wea bae iusim datfala Kingdom Hall. Spirit bilong Jehovah witim help wea pipol givim from full heart and strong bilong olketa nao mekem mifala savve duim disfala waka.—Psalm 127:1; Colossae 3:23.

• Why nao mifala kolem ples for worship, Kingdom Hall?

• Wanem nao mekem mifala fit for wakem olketa Kingdom Hall evriwea long world?

Evri Kingdom Hall bilong Olketa Jehovah’s Witness hem ples long community for worshipim Jehovah. So for klinim and repairim Kingdom Hall hem wanfala privilege and hem important part bilong holy worship bilong mifala. Evriwan savve share for duim diswan.

Volunteer bihaen meeting for duim samfala klining. Bihaen long evri meeting, olketa brata and sista hapi for duim lelebet klining just for stretem bak evri samting. Wanfala taem evri week olketa klinim evri samting. Wanfala elder or ministerial servant directim datfala waka. Maet hem followim list long olketa samting wea need for klin. Samfala waka nao hem for brumim and mopim floor, stretem olketa chair, klinim olketa toilet and window, bonem rabis, brushim grass, and prunim olketa tree. Wanfala day evri year olketa arrange for duim bigfala klining tu. Wei wea mifala encouragem olketa pikinini for duim samfala klining teachim olketa for respectim ples for worship.—Ecclesiastes 5:1.

Volunteer for repairim Kingdom Hall. Evri year olketa lukluk gud long Kingdom Hall for chekim sapos eni need hem stap for repairim samting. Wei for duim olsem bae keepim gud Kingdom Hall and mekem kongregeson bae no need for duim olketa expensive repair. (2 Chronicles 24:13; 34:10) Kingdom Hall wea klin and wea luk naes hem ples wea fitim for iumi worship insaed. Taem iumi share for klinim and repairim Kingdom Hall, datwan showimaot iumi tinghae long Jehovah and long ples wea iumi worship. (Psalm 122:1) Diswan mekem pipol long community tinghae tu.—2 Corinth 6:3.

• Why nao iumi mas keepim gud ples wea iumi worship?

• Wanem nao olketa arrangement for klinim Kingdom Hall?

Waswe, bae iu laek for duim research mekem iu lanem moa samting abaotem Bible? Waswe, iu laek savve moa abaotem wanfala scripture, man, ples, or nara samting insaed Bible? Or waswe, iu laek for savve sapos Bible garem information for helpem iu long wanfala problem wea iu garem? Sapos olsem, library long Kingdom Hall savve helpem iu.

Hem garem olketa tul for duim research. Maet iu no garem evri buk wea Olketa Jehovah’s Witness wakem long languis bilong iu, bat library long Kingdom Hall bae garem. Maet hem garem tu samfala difren Bible, wanfala dictionary, and olketa nara buk for duim research insaed. Iu savve iusim disfala library bifor and bihaen long olketa meeting. Sapos wanfala computer stap, maet hem garem Watchtower Library insaed. Diswan hem wanfala program wea garem staka buk bilong mifala insaed and wea iu savve duim search long eni subject, word, or scripture.

Hem helpem olketa student long Laef and Ministry Meeting. Iu savve iusim library long Kingdom Hall taem iu redyim tok bilong iu. Skul overseer nao lukaftarem disfala library. Hem mek sure olketa niu buk stap insaed and hem keepim gud datfala library. Skul overseer or man wea teachim Bible long iu savve showim iu hao for faendem information wea iu needim, bat iu no savve tekem eni buk hia go bak long haos. Iumi mas lukaftarem gud olketa buk hia taem iumi iusim, and no raetem eni samting insaed olketa.

Bible storyim tokpiksa abaotem man wea digdig for faendem gold and silver wea haed long graon and sei iumi mas olsem tu taem iumi lukaotem information wea bae helpem iumi savve gud long God. (Proverbs 2:1-5) Library long Kingdom Hall savve helpem iu for faendem datfala information.

• Olketa wanem tul for duim research nao stap long library long Kingdom Hall?

• Hu nao savve helpem iu for iusim library?

Jesus Christ sei long olketa disaepol bilong hem: “Sapos iufala letem olketa man lukim laet bilong iufala, olketa bae lukim olketa gudfala samting wea iufala duim. Diswan bae mekem olketa for praisem Dadi bilong iufala long heven.” (Matthew 5:16) For followim samting wea Jesus talem, mifala iusim olketa niu samting distaem and Internet tu. For kasem information abaotem biliv bilong Olketa Jehovah’s Witness and waka wea mifala duim, go long website bilong mifala long jw.org. Wanem samting nao bae iu lukim?

Ansa from Bible for olketa kwestin wea staka pipol askem. Iu savve faendem ansa for samfala barava important kwestin wea pipol askem. Olsem example, iu savve readim olketa tract olsem Waswe, Wei for Safa Bae Finis? and Waswe, Man wea Dae Savve Laef Bak? long website bilong mifala long winim 600 languis. Iu savve lukim Niu World Bible long winim 130 languis, witim tu, olketa buk for studyim Bible olsem datfala buk Wanem Nao Really Samting wea Bible Teachim? and olketa niu Wastaoa and Awake! magasin. Staka long olketa buk hia iu savve readim or herem online, or iu savve daonlodim long MP3, PDF, or EPUB. Iu savve printim tu-thri page from wanfala buk long languis bilong man wea interest and sharem datwan witim hem! Olketa saen languis video stap long staka languis, and iu savve daonlodim olketa Bible reading drama, witim olketa nara Bible drama, and olketa naes music for enjoyim tu.

Tru information abaotem Olketa Jehovah’s Witness. Iu savve readim tu nius and lukim olketa video abaotem waka wea mifala duim evriwea long world, olketa samting wea affectim Olketa Jehovah’s Witness, and relief waka wea mifala duim long taem bilong natural disaster. Iu savve lukim announcement abaotem olketa convention and information abaotem hao for contactim olketa branch office bilong mifala.

Olketa samting hia mekem pipol fit for lukim laet bilong truth nomata long wea nao olketa stap long earth. Pipol long evri kantri, nomata long Antarctica tu, kasem gud samting from diswan. Mifala prea for “message bilong Jehovah hem savve gohed kasem staka ples kwiktaem” for mekem hem kasem glory.—2 Thessalonica 3:1.

• Long wanem wei nao jw.org helpem moa pipol for lanem olketa tru teaching insaed Bible?

• Wanem samting nao bae iu laek for lukim long website bilong mifala?