Distaem staka pipol no go long church bikos church no helpem olketa for followim Bible and no givim comfort long olketa. Why nao hem gud for go long olketa meeting bilong Olketa Jehovah’s Witness? Wanem nao bae iu kasem long olketa meeting hia?

Bae iu hapi from iu stap witim pipol wea lovem and tingim narawan. Long taem bilong olketa aposol, olketa Christian hipap long olketa kongregeson. Olketa kongregeson hia garem olketa meeting wea olketa savve worshipim God, studyim olketa Holy Raeting, and encouragem narawan. (Hebrew 10:24, 25) Taem olketa hipap tugeta witim olketa spiritual brata and sista, olketa feel olsem olketa stap witim olketa trufala fren wea lovem olketa. (2 Thessalonica 1:3; 3 John 14) Mifala duim sem samting olsem olketa Christian hia and kasem tu gud samting from datwan.

Bae iu lanem hao for followim olketa Bible principle. Long olketa meeting bilong mifala, olketa man, woman, and pikinini savve hipap tugeta, olsem long taem bilong Bible. Olketa man wea savve hao for teach iusim Bible for helpem mifala savve hao for followim olketa Bible principle long laef bilong mifala. (Deuteronomy 31:12; Nehemiah 8:8) Evriwan wea kam long olketa meeting hia savve singim olketa song and givim koment for showimaot faith bilong olketa.—Hebrew 10:23.

Bae olketa meeting strongim faith bilong iu. Aposol Paul hem sei olsem long wanfala kongregeson long Rome: “Mi laekem tumas for lukim iufala. . . . Mi laekem iumi evriwan strongim narawan. Faith bilong iufala bae strongim mi, and faith bilong mi bae strongim iufala tu.” (Rome 1:11, 12) Long olketa meeting bilong mifala, wei for hipap evritaem witim olketa nara Christian hem strongim faith bilong mifala and helpem mifala for gohed followim olketa Bible principle.

Mifala welkamim iu for kam long eni meeting bilong mifala mekem iu kasem olketa gud samting hia. Olketa meeting hia hem free nomoa and no eni kolekson.

• Long wanem wei nao olketa meeting bilong mifala semsem witim olketa meeting bilong olketa Christian long taem bilong olketa aposol?

• Wanem gud samting nao iumi savve kasem taem iumi go long olketa meeting?

Mifala evritaem go long olketa Christian meeting bilong mifala nomata hem big rain or Kingdom Hall stap farawe. Nomata Olketa Jehovah’s Witness taed bihaen olketa waka full day or laef bilong olketa no isi, olketa barava traem best for hipap tugeta for worship. Why nao olsem?

Hem mekem mifala for stap gud and hapi. Taem Paul storyim olketa wea iumi worship tugeta insaed kongregeson hem sei “iumi mas barava tingim narawan.” (Hebrew 10:24) Disfala toktok savve minim tu for savve gud long olketa. So Paul encouragem iumi for tingim and helpem olketa narawan. Taem iumi savve gud long olketa nara Christian famili, maet iumi faendaot sem hard taem wea iumi kasem, olketa kasem tu, and example bilong olketa savve helpem iumi for gohed strong and no givap.

Mifala garem olketa gudfala fren. Evriwan wea hipap long olketa meeting bilong mifala fren gud tugeta. Samfala taem mifala savve hapitaem tugeta tu. Wanem gud samting nao mifala kasem from diswan? Hem helpem mifala for tinghae long olketa narawan long kongregeson, wea mekem mifala evriwan garem love for narawan. From diswan, taem eniwan long kongregeson kasem hard taem, mifala kwiktaem for helpem olketa bikos mifala evriwan fren gud finis. (Proverbs 17:17) Wei wea mifala fren gud tugeta showimaot mifala lovem and tingim evriwan long kongregeson, no tu-thri nomoa.—1 Corinth 12:25, 26.

Mifala encouragem iu for chusim olketa wea duim wanem God laekem nao for fren bilong iu tu. Olketa Jehovah’s Witness nao pipol wea duim wanem God hem laekem. So plis no hol bak for kam hipap witim mifala.

• Why nao hem gud for iumi hipap tugeta long olketa meeting?

• Wanem taem nao bae iu laek for kam meetim olketa long kongregeson bilong mifala?

Long olketa meeting bilong olketa first Christian bifor, olketa singsing, prea, and readim and storyim olketa Holy Raeting nomoa. (1 Corinth 14:26) Bae iu lukim sem samting nao mifala duim long olketa meeting bilong mifala.

Samting mifala storyim kam from Bible and hem helpem mifala. Long weekend evri kongregeson herem wanfala tok from Bible wea explainim Bible and hao Bible savve helpem iumi distaem. Disfala tok hem for 30 minute. Taem speaker readim and explainim Bible, evriwan luk followim long Bible bilong olketa seleva tu. Bihaen tok hem finis, “Wastaoa” Study kamap wea evriwan long kongregeson welkam for tekpart insaed. Diswan hem for wan hour. Disfala study hem followim wanfala article insaed Wastaoa magasin wea hem for studyim long kongregeson. Olketa article hia helpem mifala for followim wanem Bible hem talem. Datfala sem information nao evri kongregeson long world studyim tu, wea namba bilong olketa kongregeson hia hem winim 110,000.

Mifala kasem training long hao for teach gud. Mifala meet long midol week tu for enjoyim nara meeting wea garem thri-fala part, wea garem title Christian Laef and Ministry Bilong Iumi. Mifala iusim information wea kam from wanfala buk wea garem title Laef and Ministry Meeting Buk and mifala savve kasem datfala buk evri month. First part long disfala meeting hem, Gud Samting From Bible. Datfala part helpem mifala for minim wanfala part long Bible wea mifala readim bifor datfala meeting. Nextfala part long meeting hem, Duim Gud Ministry Bilong Iu, wea hem garem olketa demonstration for showim hao for storyim Bible long olketa narawan. Wanfala man bae givim kaonsel wea bae helpem olketa wea duim demonstration for kamap gud long wei for read and story long pipol abaotem Bible. (1 Timothy 4:13) Lastfala part hem, Laef Bilong Christian, and hem bae helpem mifala for followim olketa Bible principle. Hem garem kwestin and ansa part wea helpem ­mifala for minim gud Bible.

Taem iu kam long olketa meeting bilong mifala bae iu sapraes nao long nambawan Bible education wea mifala kasem.—Isaiah 54:13.

• Wanem nao iu bae herem long olketa meeting bilong Olketa Jehovah’s Witness?

• Wanem meeting bilong mifala nao iu laek for kam long hem?

Taem iu lukluk long disfala brochure, waswe, iu lukim olketa piksa wea showim Olketa Jehovah’s Witness werem gudfala kaleko taem olketa go long meeting bilong olketa? Why nao mifala laekem lukluk and kaleko bilong mifala for mas fitim and showimaot respect?

For showimaot respect long God bilong mifala. Hem tru, God no tingim nomoa lukluk bilong iumi. Hem interest long samting wea stap long mind and heart. (1 Samuel 16:7) Bat taem mifala hipap for worship, samting wea mifala barava laekem nao hem for showimaot respect long hem and olketa narawan long kongregeson tu. Sapos mifala standap front long wanfala judge long kot, mifala bae mek sure lukluk and kaleko bilong mifala hem showimaot respect for position bilong hem. Bat Bible sei Jehovah God hem “Judge bilong full earth.” So hem barava fitim for lukluk and kaleko bilong mifala mas showimaot respect long hem and for ples wea mifala worship insaed tu.—Genesis 18:25.

For showimaot mifala followim samting wea Bible talem. Bible encouragem olketa Christian for werem kaleko wea “showimaot respect and gudfala tingting.” (1 Timothy 2:9, 10) Kaleko wea showimaot respect hem kaleko wea no showim tumas body and wea no stael tumas. Man wea garem “gudfala tingting” olsem bae chusim kaleko wea no ova tumas and wea fitim. Staka kaleko stap for man chusim wea fitim nomoa. Taem lukluk and kaleko bilong man hem fitim and showimaot respect, datwan savve “mekem pipol barava tinghae long teaching bilong God wea sevem iumi” and mekem hem for kasem praise. (Titus 2:10; 1 Peter 2:12) Wei wea mifala werem gudfala kaleko for olketa meeting savve helpem nara pipol for garem gudfala tingting abaotem worship wea mifala givim long Jehovah.

Maet iu tingse iu no garem eni kaleko wea fitim for iu werem long Kingdom Hall. No wari tumas abaotem datwan. Iu no need for werem expensive kaleko, just samting wea klin and fitim nomoa.

• Waswe, hem important for tingim wanem kaleko nao hem fitim taem iumi worshipim God?

• Olketa wanem scripture nao helpem man for savve long lukluk and kaleko wea fitim?

Sapos iu studyim Bible distaem witim wanfala Jehovah’s Witness, maet iu readim firstaem information wea iutufala bae studyim bifor hem kam for study witim iu. Sapos iu duim sem samting bifor iu go long wanfala meeting, datwan bae helpem iu for kasem plande gud samting from datfala meeting. Bae iu kasem gud samting sapos iu mekem datwan hem wei bilong iu.

Disaedem wea for study and wanem taem for study. Wanem taem nao iu savve study gud and no eni samting disturbim iu? Waswe, early morning nao hem gudfala taem, or maet long evening bihaen olketa pikinini sleep? Nomata sapos iu no savve study for longfala taem, disaedem hao long nao iu savve study, and trae for no letem eni samting disturbim study bilong iu. Faendem wanfala kwaet ples, and offem olketa samting wea savve disturbim iu, olsem mobile, radio, or TV. Sapos iu prea bifor iu study, datwan bae helpem iu for no tingim olketa nara samting, bat tingim nomoa samting wea iu bae studyim insaed Bible.—Philippi 4:6, 7.

Andalaenem information, and redyim koment. First samting for duim hem for trae garem lelebet idea abaotem wanem iu bae studyim. Ting raonem title bilong article or chapter, and wei wea olketa subheding join witim theme. Lukluk long olketa piksa and ting raonem olketa review kwestin wea mekhae long olketa main point. Then readim each paragraf and trae for faendem ansa for kwestin wea olketa putim for datfala paragraf. Iusim Bible for readim olketa scripture insaed paragraf and ting raonem hao olketa scripture hia sapotim information insaed paragraf. (Acts 17:11) Bihaen iu faendem ansa, andalaenem or haelaetim tu-thri word or toktok long paragraf wea bae helpem iu for rememberim datfala ansa. Then long meeting, iu savve apim hand bilong iu sapos iu laekem and talem wanfala short koment abaotem datwan.

Wei for studyim olketa difren subject wea kamap long olketa meeting evri week bae helpem iu for lanem staka moa samting abaotem Bible.—Matthew 13:51, 52.

• Wanem kaen schedule nao bae helpem iu prepare for olketa meeting?

• Wanem nao iu savve duim for helpem iu givim koment long meeting?

Start long taem bifor kam, Jehovah laekem evri famili for spendem taem tugeta, mekem famili hem strong, and mekem olketa insaed famili strongim wei wea olketa fren witim God tu. (Deuteronomy 6:6, 7) Dastawe Olketa Jehovah’s Witness markem taem evri week for famili worship tugeta. Famili storyim tugeta olketa spiritual samting wea fitim need bilong olketa. Nomata iu stap seleva, iu savve markem taem for studyim wanfala Bible subject wea iu interest long hem for helpem iu fren gud witim God.

Hem taem for fren gud witim Jehovah. “Fren gud witim God and bae hem fren gud witim [iu].” (James 4:8) Taem iumi lane abaotem olketa wei bilong Jehovah and olketa samting wea hem duim, datwan helpem iumi for savve gud long hem. Wanfala isi wei for startim famili worship bilong iu, hem for famili readim Bible tugeta, maet long wei for followim Bible reading schedule for Laef and Ministry Meeting. Iu savve markem each wan long famili for readim samfala verse and then evriwan savve storyim samting wea olketa lanem from datfala reading.

Hem taem for evriwan long famili fren gud tugeta. Olketa hasband and waef, and parents and olketa pikinini, evriwan fren gud taem olketa studyim Bible tugeta. Famili worship wea kamap evri week mas samting wea evriwan long famili barava luk forward long hem and wea mekem olketa hapi. Parents savve chusim olketa subject wea bae helpem famili and wea fitim age bilong olketa pikinini. Olketa savve iusim samfala article long Wastaoa and Awake! magasin or go long website bilong mifala long jw.org. Iu savve storyim problem wea olketa pikinini feisim long skul and hao for deal witim datwan. Maet hem gud for famili lukluk long wanfala video long JW Broadcasting (tv.jw.org) and then iufala savve storyim datwan tugeta. Maet famili savve practicem olketa song wea bae kamap long olketa meeting, then bihaen famili worship, evriwan savve enjoyim lelebet kaikai and samting for drink.

Disfala spesol taem for famili worshipim Jehovah evri week bae helpem evriwan long famili enjoyim wei for studyim Bible, and Jehovah bae barava blessim wei wea iu duim olsem.—Psalm 1:1-3.

• Why nao iumi markem taem for duim famili worship?

• Wanem nao parents savve duim for helpem evriwan long famili enjoyim famili worship?

Why nao pipol hia luk hapi tumas? Olketa attendim wanfala assembly bilong mifala. Long bifor, God talem pipol bilong hem for hipap thrifala taem evri year. Mifala enjoyim wei for meet tugeta long olketa bigfala hipap olsem tu. (Deuteronomy 16:16) Evri year mifala garem thrifala hipap. Mifala garem tufala circuit assembly wea hem for wanfala day, and wanfala regional convention wea hem for thrifala day. Wanem gud samting nao mifala kasem from olketa hipap hia?

Olketa strongim wan mind bilong mifala. Long bifor, olketa Israelite barava hapi taem olketa praisem Jehovah witim staka narawan wea hipap. Mifala tu worship tugeta long olketa spesol hipap. (Psalm 26:12, footnote; 111:1) Olketa hipap olsem givim chance for mifala stap tugeta witim Olketa Jehovah’s Witness from nara kongregeson or from nara kantri. Mifala spel long midolday for kaikai long ples wea mifala hipap wea datwan givim mifala chance for story tugeta and meetim samfala moa wea mifala no meetim yet. (Acts 2:42) Mifala evriwan feelim kaen love wea mekem evriwan wea worshipim Jehovah long full earth wan mind tugeta.—1 Peter 2:17.

Olketa helpem mifala fren gud witim God. Olketa Israelite kasem gud samting taem olketa “minim toktok” long olketa Holy Raeting wea narawan explainim long olketa. (Nehemiah 8:8, 12) Mifala tu tinghae long samting wea mifala lanem from Bible long olketa assembly bilong mifala. Evri program hem base long wanfala scripture long Bible. Olketa tok and demonstration barava interesting and teachim mifala hao for duim wanem God hem laekem. Olketa experience wea samfala talem abaotem hao olketa gohed for worshipim Jehovah nomata long olketa hard taem wea kasem olketa hem barava encouragem mifala. Long olketa regional convention, olketa Bible drama helpem mifala for lanem gud samting from wanem Bible hem storyim. Long evri assembly, olketa wea disaed for givim laef bilong olketa long God olketa baptaes.

• Why nao wei for hipap long assembly hem taem for evriwan hapi?

• Wanem gud samting nao iu savve kasem sapos iu go long wanfala assembly?

No longtaem bifor Jesus dae, hem sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.” (Matthew 24:14) Bat hao nao bae olketa duim disfala waka for preach evriwea long world? Olketa mas followim example wea Jesus showimaot taem hem stap long earth.—Luke 8:1.

Mifala trae for story witim pipol long haos bilong olketa. Jesus trainim olketa disaepol bilong hem for preachim gud nius from haos tu haos. (Matthew 10:11-13; Acts 5:42; 20:20) Olketa wea preachim gud nius long taem bilong olketa aposol preach long olketa ples wea olketa kasem assignment for preach. (Matthew 10:5, 6; 2 Corinth 10:13) Long distaem tu, waka bilong mifala for preach hem organize gud, and evri kongregeson garem olketa area wea organization bilong mifala markem for olketa preach insaed. Diswan helpem mifala for obeyim komand bilong Jesus for preach “long evriwan.” —Acts 10:42.

Mifala trae for preach long pipol long eni ples wea olketa stap. Jesus showimaot example taem hem preach long olketa pablik area olsem long saed sea and long wanfala well. (Mark 4:1; John 4:5-15) Mifala tu storyim Bible long pipol long eni ples wea olketa stap, olsem long street, olketa bisnis area, park, wharf, and mifala savve iusim telephone. Mifala savve preach tu long olketa neiba, wakfren, skulfren, and olketa relative, long taem wea hem fitim for duim datwan. Evri samting hia helpem staka million pipol evriwea long world for herem “gud nius abaotem wei for sev.”—Psalm 96:2.

Waswe, iu savve tingim eniwan wea iu bae laek for storyim gud nius abaotem Kingdom bilong God long hem and gud samting wea Kingdom bae duim long future? Hem gud iu savve long disfala message bilong hope, bat bae hem gud tu for iu sharem witim staka narawan mekem olketa tu savve garem datfala hope!

• Wanem “gud nius” nao iumi mas talemaot?

• Long wanem wei nao Olketa Jehovah’s Witness followim example bilong Jesus for preach?

Staka taem datfala word “pioneer” minim man wea go firstaem long wanfala area and mekem wei for olketa narawan savve kam bihaen. Jesus hem olsem wanfala pioneer bikos God sendem hem kam long earth for duim wanfala ministry wea bae mekem wei for pipol kasem laef. (Matthew 20:28) Distaem, olketa follower bilong hem followim example bilong hem long wei for spendem staka hour for trae helpem pipol “kamap disaepol” bilong hem. (Matthew 28:19, 20) Samfala fit for duim samting wea mifala kolem pioneer waka.

Pioneer hem preachim gud nius full taem. Evri Jehovah’s Witness duim waka for preachim gud nius abaotem Kingdom. Samfala savve kamap regular pioneer wea minim olketa savve duim preaching waka for 70 hour evri month. Olketa hia waka for selen maet tu-thri day nomoa mekem olketa garem taem for duim datfala ministry. Olketa narawan olketa chusim for kamap spesol pioneer long olketa ples wea no staka Jehovah’s Witness stap for preachim gud nius. Olketa hia duim preaching waka for samting olsem 130 hour evri month. Olketa pioneer hapi nomoa for garem simpol laef and olketa trustim Jehovah for givim samting wea olketa needim. (Matthew 6:31-33; 1 Timothy 6:6-8) Olketa wea no savve duim ministry full taem savve duim auxiliary pioneer samfala taem, wea minim olketa duim preaching waka for 30 or maet 50 hour evri month.

Pioneer duim moa samting bikos hem lovem God and pipol. Olsem Jesus, mifala lukim pipol barava needim help for fren gud witim God. (Mark 6:34) Bat mifala garem information wea savve helpem olketa distaem, and wea bae helpem olketa for garem nambawan hope for future. Olketa pioneer lovem pipol so olketa willing for iusim taem and strong bilong olketa for helpem pipol fren gud witim God. (Matthew 22:39; 1 Thessalonica 2:8) From olketa duim olsem, datwan strongim faith bilong olketa, helpem olketa for fren gud witim God tu, and mekem olketa barava hapi.—Acts 20:35.

• Wanem nao wanfala pioneer?

• Why nao samfala laek for pioneer full taem?

Wanfala main samting wea Olketa Jehovah’s Witness duim hem for trainim pipol long spiritual wei. Olketa Jehovah’s Witness garem olketa spesol skul for trainim olketa full-taem minister, mekem olketa savve ‘barava duim gud ministry bilong olketa.’—2 Timothy 4:5.

Pioneer Service Skul. Bihaen wanfala regular pioneer hem pioneer for wanfala year, hem bae attendim wanfala skul wea bae kamap long wanfala Kingdom Hall, and wea gohed for sixfala day. Goal bilong disfala skul hem for helpem pioneer barava fren gud witim Jehovah, for kamap gud long evri difren part long ministry, and for gohed duim pioneer waka.

Skul for Olketa Kingdom Pablisa. Disfala skul wea hem gohed for tufala month hem for trainim olketa pioneer wea willing for lusim hom bilong olketa for go pioneer long eni ples wea garem need. Hem olsem olketa sei: “Mi long hia! Sendem mi.” Olketa followim example bilong Jesus Christ, wea hem nambawan man for preach abaotem Kingdom. (Isaiah 6:8; John 7:29) Maet living long ples wea olketa muv go long hem, hem moa simpol, so olketa mas change for fitim datwan. Maet culture, weather, and kaikai long there hem barava difren from hom bilong olketa. Maet olketa mas lanem wanfala niu languis tu. Disfala skul trainim olketa singol brata and singol sista and olketa hasband and waef, wea midolwan long 23 and 65 year. Hem helpem olketa for garem olketa Christian fasin wea olketa bae needim long assignment bilong olketa. Datfala training hem mekem olketa fit for duim staka samting long organization bilong Jehovah.

Watchtower Bible Skul Bilong Gilead. Long Hebrew languis, mining bilong datfala word “Gilead” hem join witim datfala word “Witness.” Start kam long 1943, winim 8,000 missionary wea kasem training long Gilead Skul go for givim witness long “evri ples long earth,” and staka gud samting nao kamaot from datwan. (Acts 13:47) Bifor olketa missionary kasem Peru, datfala kantri no garem eni kongregeson. Distaem, datfala kantri garem winim 1,000 kongregeson. Taem olketa first missionary kasem Japan, datfala kantri garem samting olsem tenfala Jehovah’s Witness nomoa. Distaem, Japan garem winim 200,000 Witness. Disfala skul hem gohed for faevfala month, and olketa student barava studyim gud Bible. Olketa wea savve attendim disfala skul nao hem olketa spesol pioneer, missionary, olketa Bethelite, or olketa wea duim circuit waka. Olketa hia kasem bigfala training wea helpem olketa for duim gud waka bilong Jehovah wea gohed raonem world.

• Wanem nao goal bilong Pioneer Service Skul?

• Datfala Skul for Olketa Kingdom Pablisa hem for hu?