Kwestin From Reader

Wanem samting nao maet mekem man fit for baptaes moa?

Samfala samting maet mekem man wea baptaes finis for laek baptaes moa bikos maet hem ting samfala samting no stret taem hem baptaes. Maet long taem wea hem baptaes, hem gohed duim samfala samting wea no stret wea no eniwan savve long datwan. Sapos olketa savve and hem man wea baptaes finis, maet hem disfellowship. Waswe, hem fit for dedicate long God long datfala taem? Sapos hem finis for duim samting wea againstim wanem Bible talem, hem fit for dedicate long Jehovah. Dastawe maet man ting hem need for baptaes moa sapos hem duim nogud samting olsem taem hem baptaes.

Bat waswe sapos wanfala brata or sista duim bigfala sin bihaen hem baptaes and wanfala judicial komiti mas story witim hem? Maet brata or sista hia sei taem hem baptaes hem no minim evri samting wea hem duim and baptism bilong hem no stret. Taem olketa elder story witim brata or sista wea duim bigfala sin, olketa shud no askem hem abaotem baptism bilong hem or sapos hem tingse dedication and baptism bilong hem stret or nomoa. Diswan hem bikos long taem wea hem baptaes hem herem Bible tok abaotem mining bilong baptism. Hem sei yes tu long tufala kwestin wea olketa askem abaotem dedication and baptism. Then hem go changem kaleko bilong hem and olketa baptaesim hem insaed long wata. From hem duim olketa samting hia, datwan showimaot hem barava minim hao samting wea hem duim hem serious samting. So olketa elder bae ting long hem olsem brata or sista wea baptaes finis.

Sapos brata or sista askem olketa elder sapos baptism bilong hem stret or nomoa, olketa elder savve talem hem for readim information long The Watchtower bilong March 1, 1960, page 159 and 160, and February 15, 1964, page 123 go kasem 126, wea storyim evri samting abaotem wei for man baptaes moa. Man seleva nao mas disaedem sapos gogo hem bae baptaes moa bikos long samfala samting wea hem duim taem hem baptaes (wea wanfala nao hem sapos hem no minim staka samting long Bible taem hem baptaes).

Wanem nao samfala samting wea olketa Christian shud tingim abaotem wei for stap long sem haos witim olketa narawan?

Evriwan needim ples for stap. Bat staka pipol distaem no garem haos bilong olketa seleva. Maet from selen hem hard, man hem sik, or olketa nara samting mekem famili and staka relative for stap long sem haos nomoa. Long samfala ples long world, staka relative maet stap long wanfala rum nomoa and hem hard for eniwan stap seleva and duim wanem hem laekem.

Hem no waka bilong organization bilong Jehovah for mekem staka rul abaotem wanem hem stret for olketa Christian saed long wei for stap tugeta long sem haos. So hem gud for olketa Christian tingim olketa Bible principle for luksavve sapos ples wea olketa stap and hu nao olketa stap witim hem fitim tingting bilong God or nomoa. Wanem nao samfala Bible principle wea olketa savve tingim?

Wanfala main samting wea iumi mas tingim nao, sapos iumi stap witim nara pipol, waswe, bae datwan spoelem wei bilong iumi and wei wea iumi fren witim Jehovah? Wanem kaen pipol nao olketa? Waswe, olketa worshipim Jehovah? Waswe, olketa followim wanem Bible talem? Aposol Paul sei: “No laea long iufala seleva. Sapos iufala stap witim nogud pipol bae olketa spoelem gudfala wei bilong iufala.”​—⁠1 Cor. 15:⁠33.

Jehovah talem hem rong for man durong and hem rong for duim adultery. (Heb. 13:⁠4) So hem no stret for tufala wea no marit for sleep long sem rum bikos God nating acceptim datwan. Olketa Christian bae no stap long sem haos witim olketa wea gohed for durong.

Nara samting tu, Bible sei sapos iumi laekem God for hapi long iumi, iumi mas “ranawe from wei for durong.” (1 Cor. 6:​18) Dastawe hem no wise for olketa Christian stap long sem haos witim narawan wea bae isi for mekem feeling for laek durong kamap. Tingim sapos samfala Christian stap tugeta long sem haos. Waswe, kaen wei for stap olsem savve mekem test kamap? Waswe sapos tufala wea no hasband and waef stap seleva long haos bikos evriwan go aot? Bigfala test bae kamap tu sapos boy and gele wea fren stap long sem haos. Hem wise for stap klia long kaen wei for stap olsem.

Hem bae no fitim tu for tufala wea divorce for gohed stap long sem haos. From tufala sleep tugeta taem tufala marit, maet gogo tufala laek sleep tugeta moa nomata olketa divorce.​—⁠Prov. 22:⁠3.

Wanfala important samting for tingim tu hem hao pipol long community ting long wanem iumi disaedem. Maet wanfala Christian tingse wei for stap tugeta long sem haos hem gud nomoa, bat sapos kaen wei for stap olsem hem mekem olketa long community start for story abaotem datwan, hem samting wea wanfala Christian mas barava ting raonem. Iumi no laek for duim eni samting for mekem pipol ting daonem nem bilong Jehovah. Paul sei: “Iufala mas no duim eni samting wea bae mekem olketa Jew, olketa Greek, and kongregeson bilong God stambol. Mi trae for duim samting for mekem evriwan hapi. Mi no tingim miseleva nomoa bat mi trae for duim gud samting for staka pipol, mekem God savve sevem olketa.”​—⁠1 Cor. 10:​32, 33.

Hem no isi for olketa wea laek for followim wanem Jehovah laekem for faendem ples for stap wea fitim. Nomata olsem, olketa Christian mas “evritaem duim olketa samting wea Lord hapi long hem.” Olketa mas no letem eni nogud samting gohed long haos bilong olketa. (Eph. 5:​5, 10) Diswan minim olketa Christian mas prea long God for helpem olketa and olketa mas no letem eni samting spoelem body bilong olketa, wei bilong olketa, and nem bilong Jehovah tu.