Waswe, Sin Hem No Serious Samting Nao?
NO LONGTAEM go nomoa olketa bigman long church evritaem tok strong long pipol abaotem “sevenfala sin wea barava nogud,” hem nao for laek tumas for durong, ova tumas long kaikai, laekem tumas selen, lesy, kros, jealous, and praod. Staka taem olketa bigman storyim olketa nogud samting wea man bae kasem sapos hem sin and olketa talem pipol for mas repent. Wanfala man for raet hem sei: “Distaem olketa bigman long church no storyim olketa subject wea mekem pipol feel nogud, bat olketa storyim nomoa subject wea mekem pipol for feel gud.”
Samfala man wea raetem niuspepa talem sem samting tu and olketa sei:
▪ “Distaem olketa bigman long church no savve storyim subject abaotem sin, wei for repent, and for kasem forgiveness, bat olketa storyim nomoa wanem man savve duim for feel gud abaotem hemseleva and for lovem hemseleva.”—Star Beacon, Ashtabula, Ohio.
▪ “Luk olsem pipol distaem no luksavve wanem nao sin and olketa ting nating nomoa long sin.”—Newsweek.
▪ “Distaem iumi no savve tingim, ‘Wanem nao God laekem mi for duim,’ bat iumi tingim nomoa, ‘Wanem nao God savve duim for mi?’”—Chicago Sun-Times.
From staka pipol long difren tribe, religion, and politik stap tugeta, pipol no laek judgem narawan for wanem olketa duim and olketa acceptim nomoa wanem nara pipol duim. Long tingting bilong olketa, hem no stret for judgem narawan. Olketa sei hem bigfala sin for judgem narawan. So long tingting bilong pipol, hem olsem: ‘Wanem iu bilivim maet hem gud long iu, bat iu shud no forcem tingting bilong iu long narawan. Distaem pipol duim samting followim wanem olketa tingse hem stret. So hem no iu nomoa wea savve long wanem hem stret. Wanem nara pipol acceptim, hem important olsem wanem iu acceptim tu.’
From pipol garem tingting olsem, olketa iusim olketa difren word for storyim samting. Pipol no savve iusim word “sin” taem olketa storyim olketa serious samting. Sin hem samting wea staka pipol mekfani abaotem. Distaem pipol no sei “olketa durong,” bat “olketa stap tugeta nomoa.” Olketa no “duim adultery” bat olketa “garem O2 nomoa.” Pipol no sei olketa “homosexual” bat olketa laek traem “difren kaen living nomoa.”
Tru tumas, wanem pipol tingim hem “normal samting nomoa” and tingting bilong olketa abaotem “sin” hem change. Bat why nao wei bilong pipol hem difren distaem? Wanem nao mekem pipol changem tingting bilong olketa abaotem sin? And waswe, wanem iu tingim abaotem diswan hem important?