Samting Iumi Lanem From Jesus
Hao for Followim Christ
Taem pipol showimaot faith long Jesus, staka taem hem savve sei: “Iu kam followim mi.” (Matthew 9:9; 19:21) Wanem nao hem minim for followim Jesus and showimaot iu wanfala Christian? Tingim ansa for thrifala important kwestin.
Hao nao iu shud deal witim pipol?
▪ Disaepol bilong Jesus shud followim wanem hem talem long wei for deal witim olketa narawan. Example nao, Jesus sei: “Samting wea iufala laekem pipol for duim long iufala, sem samting nao iufala mas duim long olketa.” Hao sapos samwan mekem iu feel nogud? Jesus sei: “Kwiktaem for stretem eni problem witim man wea” againstim iu. Hem talem tu olketa follower bilong hem: “Sapos iufala no forgivim nara pipol wea sin againstim iufala, Dadi bilong iufala bae no forgivim sin bilong iufala.”—Matthew 5:25; 6:15; 7:12.
Jesus talem disfala toktok long olketa wea marit: “Iufala herem hao olketa sei, ‘Iu mas no duim adultery.’ Bat mi talem iufala distaem, eniwan wea gohed for lukluk long wanfala woman and laek for durong witim hem, hem duim adultery finis witim hem long heart bilong hem.” Wanfala tru Christian bae letem olketa teaching bilong Jesus for affectim tingting and heart bilong hem.—Matthew 5:27, 28.
Olketa tru Christian bae no tingim wanem olketa seleva laekem, bat duim samting for olketa narawan. Jesus no tingim hemseleva. Olsem example, long wanfala taem wea olketa duim bigfala preaching waka, Jesus and olketa aposol bilong hem busy tumas, gogo olketa no garem taem nao for kaikai. So Jesus and olketa aposol go insaed boat and go long kwaet ples for rest lelebet. Bat pipol savve long ples wea hem bae go long hem so olketa kwiktaem ran go long datfala ples. Bible sei: “Taem Jesus go aot from boat, hem lukim staka pipol. Hem barava sorre tumas long olketa, bikos olketa olsem olketa sheepsheep wea no garem eni man for lukaftarem olketa. So hem teachim olketa plande samting.” (Mark 6:30-34) Iu savve followim wei bilong Jesus for duim wanem God laekem iu for duim, nomata hem no isi samfala taem.
Why nao iu shud talemaot gud nius?
▪ Jesus teachim olketa follower bilong hem for talemaot gud nius. Hem talem olketa aposol: “Taem iufala go, iufala preach and sei: ‘Kingdom bilong God hem kam klosap nao.’ ” (Matthew 10:7) Olketa follower bilong Jesus garem important message for talemaot. Jesus prea olsem: “For olketa kasem laef olowe, olketa mas lane abaotem iu, wea iu nomoa trufala God.”—John 17:3.
Jesus talem finis wanfala waka wea staka million follower bilong hem bae duim. Hem sei: “Olketa bae talemaot disfala gud nius abaotem kingdom long evri ples long world mekem pipol long evri kantri mas herem.” (Matthew 24:14) Sapos iu lane finis abaotem Kingdom bilong God and bilivim wanem Bible talem, bae iu barava laek for talemaot olketa samting wea iu savve finis. Taem olketa follower bilong Jesus start for story abaotem Kingdom bilong God, olketa story long olketa relative.—John 1:40, 41.
Why nao iu shud baptaes?
▪ Taem Jesus baptaes long Jordan River, maet hem prea olsem long God: ‘Mi kam for duim wanem iu laekem.’ (Hebrews 10:7) Sapos iu laek for duim wanem God laekem, hem gud for iu baptaes tu. Jesus sei: ‘Teachim pipol long evri kantri for kamap disaepol bilong mi, baptaesim olketa.’—Matthew 28:19.
Wanem gud samting nao iu kasem from iu baptaes, and wanem nao iu mas duim? Olketa follower bilong Jesus wea baptaes duim wanem God laekem witim full strong bilong olketa. Jesus storyim Law bilong God wea sei: “Iu mas lovem God bilong iu Jehovah long full heart bilong iu. And iu mas iusim full soul.” (Matthew 22:37) Hem talem tu: “Sapos eniwan laek followim mi, hem mas givim laef bilong hem for God.” (Matthew 16:24) Man wea baptaes showimaot hem disaed finis for givim laef bilong hem long God, and no followim wanem hemseleva laekem. Olketa wea fren gud witim God olsem savve askem God for gudfala konsens.—1 Peter 3:21.
For savve moa, lukim chapter 18 long disfala buk, wea Olketa Jehovah’s Witness pablisim.