Waswe, Bae Iu Followim Wei wea Jehovah Leadim Iu?
“Evri laea wei mi heitim.”—PS. 119:128.
1, 2. (a) Taem iu laek go long wanfala ples, wanem warning nao iu hapi for kasem and why nao olsem? (b) Wanem nao Jehovah warnim iumi long hem and why nao olsem?
TINGIM diswan. Iu laek for go long wanfala ples. Iu garem fren wea savve long datfala ples. From iu trustim hem, iu askem hem for helpem iu. Hem talem iu which road for followim and wanem for duim mekem iu no kasem nogud samting. Olsem example, hem warnim iu abaotem wanfala saen long road wea no mas klia. Hem sei staka pipol lus taem olketa followim datfala saen. Waswe, bae iu tinghae long warning wea hem talem and followim datwan? Long sem wei, Jehovah hem olsem datfala fren. Hem talem iumi wanem for duim mekem iumi kasem laef olowe. Bat hem warnim iumi tu abaotem olketa nogud samting wea savve mekem iumi for no obeyim hem.—Deut. 5:32; Isa. 30:21.
2 Long disfala study and long study bihaen, bae iumi storyim samfala nogud samting wea Jehovah warnim iumi long hem. Hem duim datwan bikos hem lovem iumi and hem fren bilong iumi. Hem laekem iumi for kasem laef olowe. Hem sorre taem pipol no disaedem stret samting and no gohed worshipim hem. (Ezek. 33:11) Long disfala study, bae iumi storyim thrifala samting wea savve spoelem iumi. First wan, hem wei for followim wanem nara pipol laekem. Mek-tu, hem samting wea iumiseleva laekem. Mek-thri, hem wei for trustim samting wea no savve helpem iumi. Iumi need for luksavve long olketa nogud samting hia and hao Jehovah helpem iumi for againstim olketa. Wanfala man wea raetem Bible sei long Jehovah: “Evri laea wei mi heitim.” (Ps. 119:128) Waswe, iu tu ting olsem? Bae iumi lanem wanem for duim mekem iumi disaed strong for no followim olketa “laea wei.”
No Followim Wanem “Staka Pipol” Laekem
3. (a) Sapos iumi no savve which road for followim, why nao hem danger for followim olketa narawan? (b) Wanem important leson nao stap long Exodus 23:2?
3 Tingim sapos iu go for wanfala farawe ples, bat seknomoa iu no savve which road nao for followim. Maet iu lukim staka followim wanfala road and iu tu laek followim olketa. Bat hem danger for duim datwan. Maet olketa no go long sem ples, or maet olketa lus. Disfala example helpem iumi for minim leson wea Jehovah laek teachim long olketa Israelite long wanfala law wea hem givim long olketa. Jehovah story long olketa judge and olketa witness wea insaed eni kot case. Hem warnim olketa for no followim wanem “staka pipol” laekem. (Readim Exodus 23:2.) From iumi no perfect hem isi tumas for duim wanem nara pipol laekem. Bat datfala leson hem no for olketa judge and witness long wanfala kot case nomoa.
4, 5. Wanem hevi nao Joshua and Caleb kasem, bat wanem nao helpem tufala for no fraet?
4 Iumi tu savve kasem hevi for followim wanem “staka pipol” laekem. Datwan savve happen enitaem, and maet hem no isi for duim stret samting. Olsem example, tingim samting wea kasem Joshua and Caleb. Tufala go witim tenfala man for spaem Promis Land. Taem olketa kam bak, tenfala man hia storyim nogud report wea mekem olketa Israelite fraet. Olketa sei samfala pipol long datfala ples hem olketa giant wea born kam from laen bilong olketa Nephilim, wea hem olketa pikinini bilong olketa bighed angel. (Gen. 6:4) Bat datwan hem nating tru bikos staka handred year bifor, olketa Nephilim dae long taem bilong Flood and olketa no garem eni pikinini. Bat olketa Israelite bilivim wanem tenfala man hia talem bikos olketa no garem strongfala faith. Sapos faith bilong man hem no strong, datwan savve mekem hem no trustim God and kwiktaem bilivim laea idea wea narawan talem. Jehovah talem olketa Israelite for go long Promis Land, bat staka tingse hem no stret for duim datwan. So wanem nao Joshua and Caleb duim?—Num. 13:25-33.
5 Joshua and Caleb no followim wanem staka pipol laekem. Tufala no fraet for talem tru story nomata olketa Israelite no laek for herem datwan and laek for killim tufala dae! Why nao tufala no fraet? Hem bikos tufala garem faith long Jehovah. Man wea garem strongfala faith long Jehovah bae bilivim wanem Jehovah talem and no olketa laea idea wea narawan talem. Taem Joshua and Caleb story abaotem faith wea olketa garem long Jehovah, tufala sei Jehovah evritaem duim wanem hem promisim. (Readim Joshua 14:6, 8; 23:2, 14.) Joshua and Caleb lovem Jehovah and trustim hem. Tufala no laek for duim eni samting wea bae mekem staka pipol hapi and wea mekem Jehovah sorre. So tufala disaed strong for no followim olketa and tufala showimaot gudfala example for iumi.—Num. 14:1-10.
6. Wanem hevi for followim nara pipol nao iumi savve kasem?
6 Waswe, samfala taem iu laek followim samting wea nara pipol duim? Staka pipol no respectim Jehovah. Olketa tingse wanem Jehovah talem abaotem samting wea stret and no stret hem krangge. Olketa laek for followim tingting bilong olketa seleva and laekem iumi tu for bilivim laea idea bilong olketa. Olketa sei olketa movie and computer game wea mekhae long wei for durong, raf fasin, and wea join witim devildevil hem gud nomoa. (2 Tim. 3:1-5) Wanem kaen hapitaem nao iu chusim for iu and famili bilong iu? Waswe, iu disaedem samting followim wanem nara pipol talem and duim? Sapos olsem, datwan showimaot iu followim wanem staka pipol laekem.
7, 8. (a) Hao nao iumi savve “iusim evritaem tingting bilong [iumi] for luksavve long samting,” and why nao datwan hem important? (b) Why nao iu tinghae long example bilong staka young Christian?
7 Jehovah givim iumi nambawan present wea savve helpem iumi for disaedem samting. Hem nao wei for ting raonem samting and for luksavve long wanem hem stret and no stret. Bible sei iumi need for “iusim evritaem tingting bilong [iumi] for luksavve long samting.” (Heb. 5:14) Sapos iumi followim wanem nara pipol talem or duim, iumi no iusim evritaem tingting bilong iumi for luksavve long samting. Staka samting long laef, iumi need for followim konsens bilong iumi and disaed seleva. Pipol wea worshipim Jehovah no expectim narawan for disaed for olketa and givim list bilong olketa movie, buk, and Internet Web site wea olketa shud no lukluk long hem. Sapos iumi followim wanfala list, bae iumi need for garem niu list evritaem. (1 Cor. 7:31) Bat important reason why iumi no expectim narawan for disaed for iumi hem bikos Jehovah laekem iumi for ting raonem wanem Bible talem, prea for hem leadim iumi, and disaedem samting wea bae mekem hem hapi.—Eph. 5:10.
8 Taem iumi disaedem samting followim wanem Bible talem, maet samfala pipol no hapi long iumi. Olketa young wan wea go long skul savve kasem bigfala hevi bikos olketa narawan laek mekem olketa for duim samting wea evri pikinini duim. (1 Pet. 4:4) Iumi hapi for lukim staka Christian nomata olketa young or olo showimaot faith olsem Joshua and Caleb and no followim wanem staka pipol laekem.
“No Duim Samting wea Heart and Eye Laekem”
9. (a) Taem iu go for wanfala ples, why nao hem danger for followim eni road nomoa? (b) Why nao hem important for olketa Israelite obeyim law long Numbers 15:37-39?
9 Mek-tu samting wea savve mekem iumi no obeyim Jehovah, hem samting wea iumiseleva laekem. Tingim diswan. Iu go for wanfala ples, and iu garem map for helpem iu kasem datfala ples. Wanem nao bae happen sapos iu no followim map bat disaed nomoa for followim olketa road wea garem staka naes samting for lukluk long hem? Bae hem hard for iu kasem datfala ples. Tingim nara leson wea Jehovah laek for teachim olketa Israelite. Hem abaotem law wea stap long Numbers 15:37-39. (Readim.) Plande pipol distaem no minim why olketa Israelite mas putim blue string or nara samting long botom long kaleko. Waswe, iu savve why nao datfala law hem important? Hem for mekem pipol bilong God difren from pipol bilong olketa nara nation. Sapos olketa Israelite laek for mekem Jehovah hapi, olketa mas difren from nara pipol. (Lev. 18:24, 25) Bat nara reason stap tu why Jehovah givim datfala law. Bae iumi storyim datwan and savve moa abaotem mek-tu samting wea savve mekem iumi no obeyim Jehovah.
10. Wanem nao showimaot Jehovah savve gud long iumi?
10 Taem Jehovah givim datfala law, hem talem reason why hem duim datwan. Hem sei: “Iufala mas no duim samting wea heart and eye laekem.” Jehovah talem datwan bikos hem savve gud long iumi. Hem savve hem wei bilong iumi for laekem samting wea eye lukim. Dastawe Bible sei: “Heart bilong man hem laea long hem and hem laekem tumas for duim rabis samting. Hu nao hem savve gud long heart bilong man?” (Jer. 17:9) Dastawe Jehovah talem olketa Israelite for no duim samting wea heart and eye laekem. Jehovah savve sapos olketa Israelite lukluk long wanem pipol from olketa nara nation duim, maet olketa laek for duim sem samting tu. Maet olketa Israelite laek for luk olsem olketa pipol hia and for garem sem tingting and followim wei bilong olketa.—Prov. 13:20.
11. Wanem samting nao savve mekem iumi for laek followim samting wea heart and eye laekem?
11 Distaem tu hem isi for iumi laekem samting wea iumi lukim. World mekhae long olketa nogud samting wea body laekem. So hao nao iumi savve followim leson long Numbers 15:39? Maet samting wea iumi lukim mekem iumi for laek werem kaleko followim wanem narawan werem. Pipol distaem laek for werem kaleko wea showim body for mekem narawan garem nogud tingting. Iumi lukim pipol werem kaleko olsem long skul, waka ples, and long ples wea iumi stap. From iumi lukim datwan evritaem, maet iumi tu laek for werem kaleko olsem olketa and no olsem wanfala Christian.—Rom. 12:1, 2.
12, 13. (a) Wanem nao iumi shud duim sapos samfala taem iumi laek for lukim nogud samting? (b) Wanem nao Bible sei iumi shud duim mekem narawan no garem rong tingting?
12 Hem barava important for kontrolem wanem iumi lukluk long hem. Iumi mas no lukluk long eni nogud samting. Job hem faithful and example bilong hem savve helpem iumi. Job mekem promis for no lukluk long eni woman and garem tingting for durong witim hem. (Job 31:1) King David sei: “Mi bae no lukluk long eni rabis samting.” (Ps. 101:3) Eni samting wea savve spoelem konsens bilong iumi and wei wea iumi fren witim Jehovah, hem wanfala “rabis samting.” And for lukluk long eni samting wea savve mekem iumi for garem nogud tingting and laek duim nogud samting hem “rabis samting” tu.
13 Iumi savve kamap wanfala “rabis samting” long narawan sapos iumi duim samting wea mekem olketa for garem nogud tingting. Maet kaleko wea iumi werem mekem olketa for garem kaen tingting olsem. Dastawe hem gud for obeyim wanem Bible talem for werem kaleko wea “fitim and wea showimaot respect.” (1 Tim. 2:9) Sapos iumi werem kaleko wea “showimaot respect,” datwan showimaot iumi no tingim wanem iumiseleva laekem nomoa bat iumi respectim tu tingting bilong nara pipol. Iumi laek for mekem nara pipol hapi winim wei for duim samting wea iumiseleva nomoa laekem. (Rom. 15:1, 2) Staka young wan long kongregeson showimaot gudfala example long wei for werem kaleko. Iumi hapi for lukim wei wea olketa no followim wanem heart and eye laekem. Olketa laek for mekem Jehovah hapi long evri samting wea olketa duim!
No Trustim “Olketa Samting wea No Savve Helpem Iumi”
14. Wanem warning nao Samuel talem long olketa Israelite?
14 Tingim long datfala gogo, iu akrosim wanfala big desert and maet iu tingse iu lukim wata. Bat no eni wata stap! Wanem nao bae happen sapos iu no followim stretfala road and go long ples wea iu tingse wata hem stap? Maet iu lus and dae long desert! Long sem wei, Jehovah savve hem danger for iumi trustim olketa samting wea no savve helpem iumi. Jehovah warnim olketa Israelite abaotem datwan. Olketa nara nation garem olketa king, so olketa Israelite laek for garem king tu. Datwan hem bigfala sin bikos hem showimaot olketa Israelite no laekem Jehovah nao for King. Gogo Jehovah letem olketa for garem king, bat hem sendem profet Samuel for warnim olketa long danger for trustim ‘olketa samting wea no savve helpem olketa.’—Readim 1 Samuel 12:21.
15. Wanem nao olketa Israelite trustim wea no savve helpem olketa?
15 Maet olketa Israelite tingse olketa savve trustim man wea king winim wei for trustim Jehovah. Sapos olsem, datwan showimaot olketa trustim ‘olketa samting wea no savve helpem olketa.’ Hem bae isi tu for olketa trustim olketa nara samting wea kam from Satan. Olsem example, wanfala king savve mekem pipol for worshipim idol. Pipol tingse olketa savve trustim idol wea olketa wakem long timba and ston bikos olketa savve lukim god bilong olketa. Olketa no trustim Jehovah, wea iumi no savve lukim, wea wakem evri samting. Bat aposol Paul sei olketa idol “hem samting nating nomoa.” (1 Cor. 8:4) Olketa idol no savve lukluk, herehere, toktok, or duim eni samting. Nomata iumi savve lukim and tasim olketa idol, hem krangge for worshipim olketa bikos olketa no savve helpem eniwan. Pipol wea trustim olketa idol “bae kamap olsem olketa.”—Ps. 115:4-8.
16. (a) Wanem nao Satan duim for mekem pipol trustim olketa samting wea no savve helpem olketa? (b) Taem iumi comparem Jehovah witim olketa material samting, why nao olketa material samting no savve mekem iumi hapi and stap sef?
16 Satan kleva tumas and hem gohed for mekem pipol trustim olketa samting wea no savve helpem olketa. Olsem example, Satan mekem plande pipol for bilivim wei for garem selen, waka, and olketa naes samting bae protectim olketa and mekem olketa hapi. Pipol tingse olketa samting hia bae stretem problem bilong olketa. Bat hao nao olketa material samting savve helpem man taem hem sik, taem selen long kantri hem nogud, or taem disaster happen? Hao nao olketa samting hia savve helpem olketa taem olketa kasem hard taem? Waswe, samting wea olketa trustim helpem olketa for savve long ansa for olketa important kwestin abaotem laef? Waswe, hem helpem pipol taem olketa klosap for dae? Sapos iumi trustim selen and olketa material samting for helpem iumi, bae iumi no kasem gud samting. Olketa samting hia bae no mekem iumi for hapi, and bae no stopem iumi for kasem sik and dae. (Prov. 23:4, 5) Bat Jehovah no olsem! Hem nao tru God. So iumi savve hapi and stap sef sapos iumi fren gud witim Jehovah. Hem nomoa savve helpem iumi taem iumi kasem olketa problem. Iumi hapi tumas for fren witim hem and no laek for lusim hem and trustim olketa samting wea no savve helpem iumi.
17. Wanem nao iu disaed for duim abaotem olketa warning wea iumi storyim?
17 Iumi hapi tumas Jehovah hem fren bilong iumi and hem leadim iumi for kasem laef olowe. Sapos iumi gohed followim olketa warning wea Jehovah talem, iumi savve laef olowe long future. Long disfala study iumi lanem thrifala samting wea savve mekem pipol for no obeyim Jehovah. First wan, hem wei for followim wanem nara pipol laekem. Mek-tu, hem samting wea iumiseleva laekem. Mek-thri, hem wei for trustim samting wea no savve helpem iumi. Long next study bae iumi lanem thrifala nara warning wea Jehovah givim for helpem iumi heitim and no followim olketa “laea wei.”—Ps. 119:128.
Wanem Nao Tingting Bilong Iu?
Hao nao iu savve followim leson long olketa scripture hia?
[Piksa long page 11]
Waswe, enitaem iu laek followim wanem nara pipol laekem?
[Piksa long page 13]
Why nao hem danger for followim samting wea heart and eye laekem?
[Piksa long page 14]
Waswe, iu trustim samting wea no savve helpem iu?