‘Waswe, Mi Fit for Preach Tu?’
Plande brata and sista long staka kantri showimaot nambawan example long wei for faithful for duim preaching waka nomata olketa garem problem saed long health. Tingim example bilong wanfala sista wea nem bilong hem Dalia, wea stap long Vilnius, kapitol taon bilong Lithuania.
Dalia hem samting olsem 35 year. From taem hem born, hem garem sik cerebral apoplexy. Datfala sik mekem hem paralyze and no savve toktok gud. Taem hem story, olketa long famili bilong hem nomoa savve minim gud wanem hem talem. Dalia stap witim mami bilong hem, Galina wea lukaftarem hem. Nomata datfala sik mekem Dalia safa and wari, hem garem gudfala tingting abaotem future. Why nao olsem?
Galina sei: “Long 1999, kasin bilong mi Apolonija, visitim mifala. Mifala luksavve Apolonija wea hem wanfala Jehovah’s Witness, savve gud long Bible, and Dalia askem hem staka kwestin. Gogo, Dalia studyim Bible witim Apolonija. Samfala taem mi savve joinim tufala long study for helpem Apolo nija minim wanem nao Dalia talem. Mi luksavve Dalia kasem gud samting from wanem hem lanem, so mi tu laek studyim Bible.”
Taem Dalia start for minim tru samting wea Bible teachim, datwan mekem hem for evritaem tingim wanfala kwestin. Gogo, hem askem Apolonija: “Nomata mi paralyze waswe, mi fit for preach tu?” (Matt. 28:19, 20) Apolonija tok kaen olsem long Dalia: “Iu no wari. Jehovah bae helpem iu.” Tru tumas, Jehovah helpem Dalia.
Hao nao Dalia duim preaching waka? Samfala sista helpem Dalia for raetem olketa leta wea story abaotem Bible. Firstaem, Dalia bae storyim wanem hem tingim. Then olketa sista bae raetem datwan long leta. Dalia savve preach tu long wei for sendem olketa text message long mobile. Taem weather hem gud, samfala long kongregeson savve tekem Dalia long park or long street for preach.
Dalia and mami bilong hem gohed gud long spiritual wei. Tufala dedicate long Jehovah and baptaes long November 2004. Long September 2008, samfala brata and sista wea story long languis bilong Poland startim wanfala niu grup long Vilnius. Datfala grup needim samfala pablisa moa, so Dalia and mami bilong hem joinim olketa. Dalia sei: “Samfala taem mi savve wari sapos mi no preach and month hem klosap finis. Bat no longtaem bihaen mi prea abaotem datwan long Jehovah, samwan bae kam tekem mi for go preach.” Wanem nao tingting bilong Dalia abaotem sik wea kasem hem? Hem sei: “Sik hia mekem mi paralyze, bat hem no spoelem mind bilong mi. Mi hapi tumas for talem olketa narawan abaotem Jehovah!”