Kasem Gud Samting From Wei for Study
Wanem nao iu savve duim for enjoyim wei for studyim Bible? Wanem nao savve helpem iu for kasem gud samting from wei for study? Bae iumi storyim thrifala samting wea savve helpem iumi for kasem gud samting from wei for studyim Bible.
1 PREA: First samting hem for prea. (Ps. 42:8) Why nao olsem? Iumi shud ting long wei for studyim Bible olsem part long worship bilong iumi. Dastawe iumi need for askem Jehovah for givim holy spirit and for helpem iumi redyim mind and heart taem iumi study. (Luke 11:13) Barbara, wea missionary for longtaem sei: “Mi evritaem prea bifor mi readim or studyim Bible. Datwan mekem mi feel olsem Jehovah hem hapi long wanem mi duim and hem bae helpem mi.” Taem iumi prea bifor study datwan savve helpem iumi for minim and followim wanem iumi lanem.
2 TING RAONEM: Samfala pipol kwiktaem readim Bible and no ting raonem wanem olketa readim, bikos olketa busy. Datwan mekem olketa no kasem gud samting from wei for studyim Bible. Carlos, wea worshipim Jehovah for winim 50 year luksavve hem important for markem taem for ting raonem wanem hem studyim mekem hem savve kasem gud samting from datwan. Hem sei: “Long bifor mi savve readim staka page long Bible each day. Bat distaem, mi readim samting olsem 2-fala page nomoa. Datwan mekem mi garem taem for ting raonem and for lanem samting from wanem mi readim.” (Ps. 77:12) Taem iumi ting raonem wanem iumi studyim, datwan helpem iumi for savve long wanem God laekem iumi for duim.—Col. 1:9-11.
3 FOLLOWIM: Hem important for luksavve hao wei for studyim Bible savve helpem iumi. Gabriel, wanfala young brata wea evritaem duim study seleva, sei: “Wei for study helpem mi for winim olketa problem wea kamap long laef, and hem helpem mi tu for savve hao for helpem olketa narawan. Mi traem best for followim wanem mi lanem.” (Deut. 11:18; Josh. 1:8) Iumi savve lanem staka samting from Bible wea savve helpem iumi.—Prov. 2:1-5.
REVIEW: Hem nambawan privilege for lane abaotem wisdom bilong Jehovah wea stap long Bible! (Rom. 11:33) Taem iu studyim Bible, prea firstaem and askem Jehovah for givim holy spirit and for helpem iu redyim mind and heart bilong iu. Taem iu gohed for read, stop samfala taem for ting raonem wanem iu readim. Then duim samting followim wanem iu lanem. Taem iumi duim thrifala samting hia bae iumi kasem gud samting from wei for studyim Bible.