Keepim Olketa Spesol Samting Long History

HISTORY abaotem pipol bilong Jehovah hem interesting tumas. Iumi savve lanem staka samting from olketa buk, piksa, leta, olketa experience and olketa nara spesol samting wea join witim worship, preaching waka, and history bilong iumi. Why nao hem gud for keepim and lane abaotem olketa old samting hia? Long Israel bifor, olketa hed long famili savve storyim long pikinini olketa law and gud samting wea Jehovah duim finis mekem olketa savve “trustim God.”—Ps. 78:1-7.

Long bifor, wei for duim research abaotem samfala samting helpem olketa wea worshipim Jehovah for duim samting wea mekem plan bilong Jehovah kamap tru. Olsem example, taem samfala laek for stopem olketa Israelite for no wakem temple long Jerusalem, samfala wakaman chekim olketa record long Ecbatana, kapitol taon bilong Media, and faendem wanfala pepa wea King Cyrus nao saenem for letem olketa Israelite wakem temple. (Ezra 6:1-4, 12) From datwan, olketa Israelite wakem moa temple followim plan bilong God. Wei wea Luke duim research abaotem olketa samting bifor helpem hem tu for “chekim gud evri story” wea hem raetem long Gospel.—Luke 1:1-4.

Governing Body laek helpem iumi for savve long history abaotem organization bilong Jehovah. Wanfala member long Governing Body story olsem abaotem wei for keepim olketa old samting: “Sapos iumi laek for savve wea iumi go, iumi mas savve tu long wea nao iumi kam from.” From datwan, olketa startim wanfala niu department long world headquarter long Brooklyn, New York, wea hem nao Writing Archives Department, and Writing Komiti nao lukaftarem.

OLKETA SPESOL SAMTING LONG HISTORY

Iumi savve forgetim olketa samting bifor sapos iumi no keepim olketa record. Olketa wea waka long Writing Archives waka hard for keepim and raetem olketa record abaotem history bilong Olketa Jehovah’s Witness. Staka piksa wea olketa keepim showim wanem hem happen long history bilong iumi. Olketa keepim tu olketa Bible buk, olketa experience bilong olketa brata and sista, and olketa nara spesol samting wea pipol bilong Jehovah iusim bifor. Olketa samting hia helpem iumi for lane abaotem organization bilong Jehovah and for trustim olketa promis bilong hem.

Long samfala Wastaoa study magasin bae hem garem article “History Bilong Iumi,” wea bae helpem iumi for lane abaotem olketa samting wea Writing Archives keepim and recordim. Olsem example, long nara article bae hem story abaotem Dawn Mobile. Wanem nao Dawn Mobile? Hu nao iusim datwan? Wanem taem nao olketa iusim, and why nao olketa iusim? Datfala article bae garem olketa piksa tu.

Olketa spesol samting abaotem history wea stap long Writing Archives helpem iumi for lane abaotem organization bilong Jehovah. Iumi bae lane abaotem staka bifor wea faithful and no fraet for worshipim Jehovah. Bae iumi lane tu abaotem olketa wea hapi for worshipim Jehovah and hard taem wea olketa kasem, and abaotem wei wea Jehovah evritaem sapotim and leadim pipol bilong hem. (Deut. 33:27) Iumi trustim Jehovah bae blessim waka bilong olketa long Writing Archives. Waka wea olketa duim bae helpem iumi for wan mind and gohed for duim wanem Jehovah laekem.

[Piksa long page 31]

Waka wea Writing Archives Duim

Bifor olketa brata and sista wakem Bible buk, DVD, and olketa nara samting, olketa man for raet, artist, and olketa wea duim research savve iusim information wea stap long Writing Archives Department. Dastawe olketa long Writing Archives traem best for kolektem and lukaftarem gud staka samting saed long history. Olketa tekem samfala samting from olketa branch office, Bethel department, kongregeson, olketa brata and sista, and from olketa nara ples. Bae iumi storyim waka wea Writing Archives duim:

Kasem and Chekim: Writing Archives gohed for kolektem olketa spesol samting. Olketa brata and sista wea famili bilong olketa worshipim Jehovah for longtaem finis nao givim samfala samting or letem organization for keepim or iusim. Wei for chekim and studyim olketa samting hia bae helpem iumi for savve moa abaotem history bilong iumi and wanem olketa brata and sista bifor duim.

Raetem List: Writing Archives garem staka thousand difren kaen samting wea samfala hem winim 100 year. Olketa keepim tu list bilong evri samting.

Fixim and Keepim Gud: Olketa mekem gud olketa oldfala buk and olketa nara samting. Olketa putim long computer olketa document, piksa, samfala article long niuspepa, movie, and samfala samting wea olketa recordim. Olketa duim olsem mekem hem isi for olketa lukim long computer and for keepim sef olketa oldfala samting.

Ples for Keepim and Hao for Faendem: Olketa keepim evri samting long ples wea sef mekem hem no lus and for mekem laet and wata no spoelem. Olketa wakem wanfala program long computer mekem hem isi for man wea duim research for faendem olketa oldfala samting hia.

[Piksa long page 32]

1. Piksa bilong “Photo-Drama of Creation.” 2. Subscription pepa. 3. Saond car. 4. Kava bilong April 15, 1912, Watch Tower. 5. Prison pepa for J. F. Rutherford. 6. WBBR microphone. 7. Phonograph. 8. Box for karem olketa buk. 9. Samfala note. 10. Telegram for J. F. Rutherford.