“Samting wea Mi Laekem Tumas Mi Kasem Nao”
Long bifor Emilia hem wanfala regular pioneer, bat 15 year go finis hem stop. Insaed olketa year wea just go pas, hem start for tingim moa wei wea hem barava hapi taem hem pioneer, and datwan mekem hem laek for pioneer moa.
Bat from Emilia hem waka full-taem hem no savve pioneer, and datwan mekem hem no hapi. Wanday hem sei olsem taem olketa nara wakaman stap: “Mi laekem tumas for waka part-taem nomoa!” Samwan talem boss and hem go askem Emilia sapos datwan hem tru. Emilia talem boss hem nao wanem hem laek for duim. Bat rul bilong company hem for evri wakaman mas full-taem. So Emilia mas story witim wanfala director bilong company for askem hem for waka part-taem. Hem redyim wanem hem bae talem long datfala meeting witim director, and hem prea long Jehovah for garem peace and for no fraet.
Long datfala meeting Emilia no fraet for ask for waka part-taem, bat hem ask long wei wea showimaot respect. Hem talem datfala director hem savve iusim taem bilong hem for helpem nara pipol taem hem no waka. Hem sei hem wanfala Jehovah’s Witness and hem helpem pipol for lanem Bible. Hem sei tu, staka pipol distaem no savve wanem nao stret and no stret, and olketa needim advaes from Bible for helpem olketa duim stret samting. Emilia talem datfala director bae hem gohed duim gud waka bilong hem for company, bat hem laek for part-taem mekem hem savve garem moa taem for helpem pipol.
Director hem lisin gud long wanem Emilia talem, and hem sei long bifor hem tu tingting for duim volunteer waka. Hem minim why nao Emilia laek for waka part-taem and hem letem hem for duim datwan. Bat hem askem Emilia olsem: “Waswe, iu luksavve bae iu no kasem full pei tu?” Emilia sei hem luksavve long datwan, and bae hem mekem laef bilong hem simpol. Hem sei tu hem savve hapi taem hem helpem pipol. Datfala director sei: “Mi tinghae long pipol wea willing for iusim taem bilong olketa for helpem nara pipol.”
Datwan hem firstaem for company hia letem eni wakaman for waka part taem. Distaem Emilia hem waka fofala day nomoa evri week. Wanfala samting wea mekem Emilia sapraes, company apim wages bilong hem so distaem hem kasem sem pei olsem bifor. Hem sei: “Samting wea mi laekem tumas mi kasem nao. Mi fit for regular pioneer moa!”
Waswe, enitaem iu tingting for changem samfala samting long laef bilong iu mekem iu fit for pioneer? Sapos iu pioneer bifor bat iu stop, waswe, distaem iu fit for pioneer moa?
[Blurb long page 32]
Datfala director sei: “Mi tinghae long pipol wea willing for iusim taem bilong olketa for helpem nara pipol.”