Waka Bilong Olketa Pilgrim

“HARD tumas for mi preach from haos tu haos!” Staka niu Bible study garem kaen tingting olsem abaotem preaching waka! Bat man wea talem datfala toktok antap hem wanfala pilgrim wea savve tumas for givim olketa tok and teachim Bible.

Long end bilong mek-19 century, plande pipol wea readim Zion’s Watch Tower and wea lusim religion bilong olketa, laek kaban witim olketa narawan wea interest tumas for lanem olketa tru teaching long Bible. Datfala magasin encouragem olketa for lukaotem olketa narawan wea garem sem biliv and for hipap tugeta for studyim Bible. Start long 1894, Watch Tower Society sendem aot samfala brata go long olketa grup hia wea laekem samwan for visitim olketa. Gogo olketa kolem olketa brata wea go for duim olketa visit olsem, olketa pilgrim. Olketa pilgrim hia garem savve and waka hard. Olketa hambol, savve gud long Bible, savve tumas for givim tok and teach, and olketa bilivim teaching abaotem ransom. Maet datfala brata hem visit for wan or tufala day nomoa. Olketa Bible Student givimaot pepa for invaetem pipol kam long pablik tok wea pilgrim givim, and for samfala datwan hem firstaem for olketa duim preaching waka. Wanfala evening Hugo Riemer, wea bihaen hem kamap member bilong Governing Body, hem givim tok long pipol wea hipap long wanfala skul. Bihaen datfala tok, hem ansarem olketa kwestin go kasem midolnaet. Nomata hem taed, hem hapi and hem sei datfala meeting hem “naes tumas.”

The Watch Tower hem sei “main goal” bilong visit bilong olketa pilgrim hem for strongim pipol bilong God long olketa meeting wea olketa duim long haos bilong olketa Bible Student. Olketa Bible Student kam from olketa nara taon and ples wea klosap, for herem olketa tok and askem eni kwestin long datfala pilgrim. Bihaen, olketa kaikai tugeta. Taem Maude Abbott hem young gele nomoa, hem go for herem wanfala tok long morning, then bihaen, evriwan hipap raonem longfala tebol aotsaed. Hem sei: “Staka naes kaikai hem stap, olsem pigpig, kokorako, bred, pie, and cake! Evriwan kaikai gogo olketa fulap nao. Then long tu klok mifala hipap for herem nara tok moa.” Hem sei tu: “Bat long datfala taem, evriwan laek sleep nao.” Wantaem, Benjamin Barton, wea hem duim pilgrim waka for longfala taem, hem sei: ‘Sapos mi kaikaim evri kaikai wea olketa brata and sista provaedem, ating bae mi dae finis.’ Gogo olketa long headquarter long Brooklyn sendem wanfala leta wea talem olketa sista bae hem gud for olketa provaedem “simpol kaikai” nomoa for olketa pilgrim and “ples wea olketa savve sleep gud.”

Olketa pilgrim savve tumas for teach and iusim olketa chart and olketa nara samting for mekem tok bilong olketa interesting. Evritaem R.  H. Barber hem givim tok long interesting wei. Taem W. J. Thorn givim tok hem olsem wanfala dadi wea story witim olketa pikinini and grani bilong hem. Wanday, taem Shield Toutjian hem gogo long trak, seknomoa hem singaot, “Stop firstaem!” Hem jamp daon from trak, pikim samfala flaoa wea luk naes tumas, and iusim olketa for storyim creation bilong Jehovah long olketa narawan long trak.

Disfala pilgrim waka hem no isi, especially for olketa wea olo. Bat for samfala, barava hard samting nao hem taem goal bilong disfala pilgrim waka hem change. The Watch Tower bilong March 15, 1924, hem sei “wanfala main waka” bilong olketa tru Christian “hem for givim witness abaotem kingdom. Diswan nao main waka bilong olketa pilgrim.” Start long datfala taem, main waka bilong olketa pilgrim hem for leadim waka for preach from haos tu haos.

Luk olsem samfala pilgrim feel nogud long datwan so olketa lusim datfala traveling waka and samfala startim religion bilong olketa seleva tu. Robie D. Adkins hem story abaotem wanfala pilgrim wea savve tumas for givim tok. Datfala pilgrim hem komplen and sei: “Mi savve nomoa for givim tok long stage. Hard tumas for mi preach from haos tu haos!” Brata Adkins hem sei: “Mi lukim hem moa long convention long Columbus, Ohio long 1924. Nomata staka thousand brata wea hipap long there olketa hapi tumas, hem standap seleva andanit wanfala smol tree and hem luk sorre tumas. Mi no lukim hem moa bihaen datfala taem. No longtaem bihaen, hem lusim organization bilong Jehovah.” Bat Brata Adkins hem lukim tu “staka brata wea hapi and karem olketa buk go long trak bilong olketa,” from olketa willing tumas for preach from haos tu haos.—Acts 20:20, 21.

Nomata staka pilgrim fraet for preach from haos tu haos, olsem olketa pablisa tu, olketa strong for duim datfala waka. Maxwell G. Friend wea hem wanfala pilgrim wea savve long German languis, hem sei waka for preach from haos tu haos hem “nambawan part long waka bilong olketa pilgrim.” Narafala pilgrim wea nem bilong hem John A.  Bohnet, hem sei staka brata and sista agree hem important tumas for pipol bilong God preach abaotem Kingdom. Hem sei staka brata and sista “olketa willing tumas for duim preaching waka.”

For longfala taem finis, olketa faithful brata wea duim traveling waka barava helpem olketa brata and sista. Norman Larson, wea hem Witness for longfala taem hem sei: “Nomata taem mi boy nomoa, mi luksavve olketa pilgrim duim barava gudfala waka.” Hem sei tu: “Olketa barava helpem mi for duim stret samting.” Kam kasem distaem, olketa brata wea no tingim seleva and wea faithful for duim traveling waka helpem olketa nara Christian for sei: “Mifala savve preach from haos tu haos!”

[Blurb long page 32]

Evriwan hapi tumas taem pilgrim hem visit kam!

[Piksa long page 31]

Long 1905, Benjamin Barton visitim samting olsem 170 ples

[Piksa long page 32]

Walter J. Thorn hem wanfala pilgrim wea olketa kolem hem Grani bikos hem olsem wanfala dadi wea kaen tumas

[Piksa long page 32]

J. A. Browne hem go long Jamaica for duim pilgrim waka long 1902 for strongim and encouragem 14-fala smol grup

[Piksa long page 32]

Olketa pilgrim strongim olketa brata and sista, and helpem olketa for wan mind witim organization