Mifala Fren Gud for 60 Year and Bae Fren for Olowe

FAEVFALA month bifor diswan, long February, 122 pioneer go long South Lansing, New York, for attendim mek-17 class bilong Gilead Skul. Insaed long disfala grup wea laek for kamap missionary hem fofala young man wea iumi storyim antap. Nem bilong olketa hem Lowell Turner and William (Bill) Kasten wea tufala from Michigan, Richard Kelsey from Iowa, and Ramon Templeton from California. Taem datfala class hem gohed, fofala brata hia kamap olketa gudfala fren.

Long datfala evening wea fofala brata hia ring go long hom, datfala skul hem klosap for finis. Long datfala day Brata Nathan Knorr from world headquarter hem kam for story witim olketa student, and evriwan barava luk forward long datwan. Fofala brata hia talemaot finis olketa laek for kasem assignment for go long sem kantri, sapos hem fitim. Long datfala visit bilong Brata Knorr nao olketa faendaot kantri wea olketa kasem assignment for go long hem!

Evriwan herehere gud taem Brata Knorr story long datfala class and announcem kantri wea each wan bae go long hem. Olketa first wan wea hem kolem nem bilong olketa for kam long platform nao hem fofala brata hia. Fofala barava hapi taem olketa herem olketa kasem assignment for go long sem ples! Wea nao bae olketa go? Evri narawan long class hapi and klap big taem Brata Knorr announcem bae fofala brata hia go long Germany.

Olketa Jehovah’s Witness raonem world tinghae tumas long wei wea olketa brata and sista long Germany gohed faithful anda long rul bilong Hitler wea start long 1933. Staka student tingim yet kaikai, kaleko, and olketa nara samting wea olketa givim go long olketa brata and sista long Europe bihaen long World War II. Pipol bilong God long Germany showimaot nambawan example long wei for faithful, no fraet, and trust long Jehovah. Long datfala taem Lowell hem ting olsem: ‘Distaem bae mifala meetim and savve gud long olketa faithful brata and sista hia.’ Dastawe evriwan hapi tumas and mas ring go long hom long datfala evening!

TAEM OLKETA GOGO FOR GERMANY

Long July 27, 1951, fofala brata hia go insaed long ship wea nem bilong hem Homeland, and lusim New York for go long Germany. Datfala gogo hem for 11-fala day. Brata Albert Schroeder, wea hem instructor long Gilead Skul, and bihaen, kamap member bilong Governing Body, hem lanem fofala brata hia tu-thri toktok long German languis. Long datfala gogo, fofala story long samfala passenger from Germany for trae lanem samfala nara word. Bat olketa faendaot pipol from difren part long Germany talem olketa word long difren wei, so datwan mekem fofala konfius nomoa!

Bihaen olketa gogo long sea for 11-fala day and olketa toroaot samfala taem tu, fofala brata hia kasem Hamburg long Germany long Tuesday morning, August 7. Long datfala taem hem sixfala year bihaen World War II hem finis, and olketa sorre tumas taem olketa lukim staka samting wea war hem spoelem. Then, olketa tekem train for go long ples wea branch office hem stap long Wiesbaden.

Olketa gogo long train for full naet and long early morning long Wednesday, wanfala brata wea nem bilong hem Hans meetim olketa long train station and tekem olketa go long Bethel. Long Bethel, wanfala olo sista wea no savve long English nao meetim olketa. Nomata sista hia no savve story long English, hem tingse sapos hem tok big, datwan bae helpem fofala brata hia for minim hem. Nomata hem gohed for tok big, olketa evriwan no minim each other. Gogo, Brata Erich Frost, wea hem branch servant and savve story long English hem kam and welkamim olketa. Datwan mekem fofala brata hia hapi.

Long end bilong August, fofala hia attendim “Clean Worship” Assembly long Frankfurt, wea hem firstfala convention wea olketa attendim long Germany. Long datfala convention 47,432 nao attend, and 2,373 nao baptaes. Diswan mekem fofala brata hia laek for gohed strong long missionary waka bilong olketa. Bat tu-thri day bihaen, Brother Knorr talem olketa bae olketa gohed stap long Bethel and waka long there.

Long bifor Ramon no acceptim wanfala invitation for go long Bethel long United States, bikos hem laek for duim missionary waka. And Richard and Bill no ting for waka long Bethel. Bat gogo olketa luksavve man wea evritaem letem Jehovah leadim hem, bae hem kasem gud samting. Dastawe hem wise for followim direction bilong Jehovah winim wei for followim samting wea man seleva laekem. Man wea luksavve long diswan bae hapi for duim wanem Jehovah laekem long eni ples and long eni assignment wea hem kasem.

VERBOTEN!

Staka long Bethel famili long Germany Branch olketa hapi taem olketa brata hia from America stap witim olketa bikos olketa ting for lane for story long English witim olketa. Bat wanday wanfala samting happen long dining rum wea mekem olketa luksavve bae olketa no savve duim datwan. Brata Frost, wea hem man for story witim feeling, hem start for story long German languis abaotem wanfala serious samting. Klosap evriwan long Bethel famili stap kwaet, and lukluk daon nomoa long pleit bilong olketa. Fofala brata hia no minim wanem hem talem, bat gogo olketa luksavve samting wea Brata Frost storyim hem abaotem olketa. So taem Brata Frost tok big and sei “VERBOTEN!” (“Tambu!”), and hem talem datwan big tu-thri taem, fofala brata hia start for wari nao. Olketa no savve wanem nao olketa duim wea mekem Brata Frost tok long wei olsem!

Taem olketa finis kaikai, olketa Bethelite kwiktaem go bak long rum bilong olketa. Bihaen, wanfala brata hem sei olsem long fofala brata hia: “Iufala mas savve long German languis, mekem iufala savve helpem mifala. Dastawe Brata Frost sei hem VERBOTEN for mifala story long iufala long English, go kasem taem wea iufala savve story long German languis.”

Bethel famili obeyim wanem Brata Frost talem. Datwan helpem fofala brata hia for lanem German languis, and tu, datwan helpem olketa for luksavve nomata maet hem no isi long firstaem for followim kaonsel wea wanfala brata talem, wei for obey savve mekem iumi kasem gud samting. Kaonsel wea Brata Frost givim showimaot hem laek sapotim organization bilong Jehovah and hem lovem olketa brata.a From Brata Frost garem olketa gudfala wei olsem, fofala brata hia fren gud witim hem!

LANE FROM EXAMPLE BILONG OLKETA FREN

Iumi savve lanem staka gud samting from olketa fren bilong iumi wea lovem God, and example bilong olketa savve helpem iumi for fren gud witim Jehovah. Fofala brata hia lanem staka samting from staka German brata and sista wea faithful, and olketa lane from each other tu. Richard sei: “Lowell hem savve lelebet long German languis and hem kwiktaem lane for story gud long hem, bat mi thrifala stragol for lanem datfala languis. From hem nao born firstaem long mifala, evritaem mifala savve askem hem sapos mifala garem eni kwestin abaotem languis or eni nara samting.” Ramon hem sei: “Bihaen mifala stap long Germany for wan year, mi hapi tumas taem wanfala brata from Swit-zerland sei mifala savve iusim haos bilong hem long there for holiday! Mi barava luk forward long tufala week wea mifala bae no need for story long German languis! Bat mi no tingim samting wea Lowell bae duim. Hem sei mifala mas readim and story raonem text evriday, long German languis! Mi lelebet kros bikos hem mekem mifala duim datwan evriday. Nomata olsem mifala lanem wanfala important samting. Hem gud for evritaem obeyim olketa wea lovem iumi, nomata samfala taem iumi no agree witim wanem olketa talem. From mifala garem datkaen tingting mifala kasem staka gud samting and hem helpem mifala for followim instruction wea kam from organization bilong Jehovah.”

Gogo fofala brata hia luksavve and tinghae tu long gud samting wea each wan long olketa savve duim, wea hem nao samting Philippi 2:3 hem talem. Hem sei: “Iufala mas hambol and ting long narawan olsem hem winim iufala.” So staka taem Ramon, Lowell and Richard askem Bill for duim samfala waka wea olketa savve hem nao bae duim gud winim olketa. Lowell sei: “Staka taem mifala askem Bill nao for deal witim olketa problem wea kamap. Mifala savve fraet for deal witim samfala problem or no savve wanem for duim, bat Bill hem savve tumas for deal witim olketa problem long gudfala wei.”

MARIT BILONG OLKETA HAPI

Gogo each wan long fofala brata hia laek for marit. From olketa lovem Jehovah and laekem tumas for duim full-taem service, datwan strongim wei wea olketa fren tugeta, and olketa laek for faendem waef wea garem semkaen tingting olsem olketa. Wei for duim full-taem service helpem olketa for luksavve man wea givim samting hem barava hapi winim man wea kasem samting, and wei for sapotim Kingdom hem important winim samting wea man seleva laekem. So fofala brata hia chus for maritim olketa sista wea insaed full-taem service finis. From datwan, fofala evriwan garem marit wea strong and hapi.

Wei for fren witim Jehovah nao savve strongim marit and wei for fren witim narawan. (Eccl. 4:12) Nomata waef bilong Bill and Ramon tufala dae finis, tufala savve long hapi wea man savve kasem from waef wea sapotim hem and wea faithful. Waef bilong Lowell and Richard laef yet and gohed for sapotim tufala. Bill hem marit moa and hem duim wise samting bikos hem chusim wanfala waef wea mekem hem fit for gohed long full-taem service.

Long olketa year bihaen, fofala brata hia kasem olketa difren assignment. Olketa assignment hia long Germany, Austria, Luxembourg, Canada, and America. From datwan, olketa no savve stap tugeta evritaem. Nomata olketa stap long olketa difren ples, olketa savve raetem leta or ringim narawan, and hapi witim narawan taem hem hapi and krae witim narawan taem hem krae. (Rom. 12:15) Hem spesol samting for garem olketa fren olsem, and olketa olsem present from Jehovah. (Prov. 17:17) Staka pipol long world distaem no garem olketa tru fren olsem! Bat evri Christian savve garem staka fren olsem. Iumi Olketa Jehovah’s Witness garem staka fren raonem full world, and nambawan samting nao, iumi fren witim Jehovah God and Jesus Christ.

Fofala brata hia kasem samfala hard taem tu, olsem iumi evriwan. Samfala hard taem hia nao hem taem waef hem dae, taem olketa garem bigfala sik, taem olketa mas lukaftarem dadi and mami wea olo, wei for lukaftarem pikinini taem olketa gohed duim full-taem service, wei for feel olsem olketa no fit for duim niu assignment wea olketa kasem, and distaem olketa problem bilong olketa olo. Nomata olsem, olketa luksavve olketa fren wea lovem Jehovah savve helpem each other for deal witim eni hard taem.

MIFALA LUK FORWARD FOR FREN OLOWE

Lowell baptaes taem hem 18 year, Ramon taem hem 12, Bill taem hem 11, and Richard taem hem 10. Fofala evriwan startim full-taem service bifor olketa kasem 22 year. Olketa showimaot nambawan example bikos olketa followim samting wea Ecclesiastes 12:1 talem, wea sei: “Taem iu young yet, tingim Nambawan God wea wakem iu.”

Sapos iu wanfala young Christian brata, hem gud tumas for iu acceptim invitation bilong Jehovah for duim full-taem service. Sapos iu duim olsem maet iu kasem olketa nambawan privilege olsem fofala brata hia. Olketa duim circuit waka, distrik waka, waka olsem zone overseer, waka long Bethel and member long Branch Komiti, teach long olketa Kingdom Ministry Skul and Pioneer Service Skul, and givim tok long olketa convention. Fofala brata hia hapi tumas from olketa savve waka wea olketa duim hem helpem staka thousand pipol! Olketa fit for duim evri samting hia bikos taem olketa young olketa acceptim invitation bilong Jehovah for worshipim hem witim full heart and strong bilong olketa.—Col. 3:23.

Distaem Lowell, Richard, and Ramon waka tugeta moa long branch office long Selters, long Germany. Sorre samting, Bill dae long 2010. Hem spesol pioneer long America long datfala taem. Wanfala long olketa hem dae bihaen 60 year wea olketa barava fren gud tugeta! Bat God bilong iumi Jehovah no savve forgetim olketa fren bilong hem. Iumi sure taem Kingdom bilong hem rul, olketa Christian wea fren bilong olketa dae bae lukim olketa moa.

No longtaem bifor Bill dae, hem raet olsem: “Insaed long 60 year wea mifala fren gud tugeta, no eni samting spoelem wei wea mifala fren. Wei wea mifala fren hem samting wea barava spesol long mi.” Thrifala fren bilong Bill agree witim datfala toktok, and bikos olketa tingim taem wea Bill bae laef bak long niu world, olketa sei tu, ‘Bae mifala fren for olowe.’