WASWE, IU SAVVE FINIS?
Long bifor, wanem nao olketa wea buildim ship savve iusim for stopem wata for no go insaed ship?
Lionel Casson, wea studyim olketa ship from bifor, storyim wanem olketa duim long taem wea Rome hem rul. First samting, olketa putim tar insaed ples wea olketa timba hem join long botom and saed bilong datfala ship. Then olketa “kavarem olketa join hia witim tar, or tar wea olketa mixim witim wax, and maet olketa kavarem tu full aotsaed and insaed bilong datfala ship.” Staka year bifor olketa long Rome duim datwan, olketa bilong Akkad and Babylon tu iusim tar for stopem wata for no go insaed ship bilong olketa.
Staka Soft Tar Olsem Diswan Stap Long Olketa Ples Wea Bible Story Abaotem
Long Genesis 6:14, Bible sei Noah tu duim diswan taem hem buildim ark. Tar hem samting wea stap antap long graon long samfala ples.
Samfala tar savve soft and samfala hem strong tu. Olketa wea buildim ship bifor savve iusim tar wea soft bikos hem isi for olketa paintim go long ship bilong olketa. Bihaen datfala tar hem drae hem kamap strong, and datwan nao stopem wata for no go insaed ship bilong olketa.
Staka tar hem stap long olketa ples wea Bible story abaotem. Datfala Valley long Siddim, long Dead Sea area, hem garem “staka pool wea fulap long tar.”—Genesis 14:10.
Long bifor, wanem nao olketa savve duim for mekem fish hem no rotten?
Start kam long bifor, fish hem wanfala main kaikai bilong staka pipol. Samfala aposol bilong Jesus olketa man for fishing bifor. Olketa savve fishing long Sea long Galilee. (Matthew 4:18-22) Long datfala area, samfala ples for draem fish hem stap.
Karving Wea Showim Olketa Man For Fishing Long Egypt Bifor
Pipol long samfala ples still iusim sem teknik wea pipol long Galilee bifor iusim for mekem fish no rotten. Firstaem olketa savve aotem bele bilong fish and wasim long wata. Datfala buk Studies in Ancient Technology explainim wanem olketa duim bihaen datwan: “Olketa putim solt insaed gill and mouth bilong fish and olketa rabem long scale bilong hem. Bihaen, olketa leim leaf and putim solt long leaf. Olketa putim samfala fish antap, and then putim solt moa long hem. Olketa duim datwan tu-thri taem, then olketa putim leaf antap long datfala hip fish. Bihaen olketa leavim datfala hip fish for 3-5 day, then olketa tanem datfala hip and leavim for nara 3-5 day. Taem olketa duim diswan, solt hia mekem datfala fish for drae, and hem kamap strong.”
Iumi no savve hao long nao fish wea olketa draem olsem savve stap bifor hem nogud. Bat masbi hao olketa draem fish olsem hem waka gud, bikos olketa long Egypt bifor savve exportim drae fish go long Syria.