Waswe, Iu Shud Changem Tingting Bilong Iu?

SAMFALA young Christian long wanfala kantri disaed for go lukim wanfala movie. Olketa fren bilong olketa long skul sei hem naes movie. Taem olketa kasem datfala movie theater, olketa lukim piksa wea advertisem datfala movie hem showim pipol wea holem olketa hae paoa gun, and olketa woman wea werem kaleko wea showim body. Wanem nao bae olketa young Christian hia duim? Waswe, bae olketa go insaed and lukim nomoa datfala movie?

Evriday iumi mas mekem olketa disison. Samting wea iumi disaedem savve strongim wei wea iumi fren witim Jehovah, or savve spoelem datwan. Samfala taem, maet iu plan for duim wanfala samting, bat bihaen iu tingting raonem datwan moa, iu changem tingting bilong iu. Waswe, diswan showimaot iu man wea no strong for disaedem samting, or waswe, diswan hem gudfala wei for garem?

TAEM HEM NO FITIM FOR IU Changem Tingting Bilong Iu

From iumi lovem Jehovah, iumi dedicate long hem and baptaes. Iumi promis for gohed faithful long hem, and iumi laek for duim wanem iumi promisim. Nomata olsem, Satan wea hem enemy bilong iumi hem laek for mekem iumi no faithful. (Rev. 12:17) Iumi disaed finis for worshipim Jehovah and obeyim wanem hem talem. Sapos iumi changem tingting bilong iumi and no worshipim Jehovah moa, maet bae iumi lusim laef bilong iumi.

Winim 2,600 year go finis, King Nebuchadnezzar wea rul long Babylon hem wakem wanfala maeti image long gold, and hem givim komand for evriwan mas baodaon and worshipim datwan. Eniwan wea no duim datwan bae olketa torowem hem insaed long fire. Thrifala young man wea worshipim Jehovah, wea nem bilong olketa Shadrach, Meshach, and Abednego, no baodaon long datfala image, so king torowem olketa insaed long fire. Olketa willing for dae bikos olketa laek for evritaem faithful long God, bat Jehovah duim mirakol for sevem olketa.—Dan. 3:1-27.

Staka year bihaen, king bilong Persia putim wanfala law wea stopem man for prea. Profet Daniel savve sapos pipol lukim hem prea long God, olketa bae torowem hem insaed hol bilong olketa lion, and bae olketa lion kaikaim hem. Nomata olsem, hem gohed for prea long Jehovah thrifala taem evriday. Hem no changem tingting bilong hem for evritaem faithful long God, and from datwan, Jehovah sevem hem from olketa lion.—Dan. 6:1-27.

Pipol bilong God distaem tu duim wanem olketa promisim long God taem olketa dedicate. Long wanfala skul long Africa, wanfala grup bilong olketa Witness pikinini no laek for join insaed long ceremony for salutim flag. Olketa teacher sei bae olketa pikinini hia expel sapos olketa no joinim olketa nara student for duim datwan. No longtaem bihaen, minister bilong education hem visitim datfala taon and story witim samfala Witness pikinini hia. Olketa pikinini hia no fraet and explainim long kaenfala wei why olketa no salutim flag. Bihaen, olketa teacher no forcem olketa pikinini hia for duim datwan moa. So olketa young Christian hia savve go long skul and no eniwan savve forcem olketa for duim disfala samting wea Jehovah no hapi long hem.

Tingim tu example bilong Joseph wea waef bilong hem kasem cancer and dae. Famili bilong Joseph respectim samting wea hem laekem saed long arrangement for funeral. Bat olketa relative bilong waef bilong hem no insaed long truth, and olketa laek for duim samfala kastom samting long funeral wea God no hapi long hem. Joseph sei: “From mi no agree witim samting olketa laek duim, olketa trae for story witim olketa pikinini bilong mi, bat olketa tu strong for sei no.” Olketa relative laek for duim samfala kastom samting wea join witim dae bilong waef bilong Joseph, bat Joseph talem olketa for no duim datwan long haos bilong hem. Olketa savve kastom samting wea olketa laek for duim hem againstim wanem Joseph and waef bilong hem bilivim. So bihaen olketa story raonem datwan witim Joseph, olketa go duim datfala kastom samting long nara haos.

Joseph sei tu: “Long datfala taem wea mifala sorre, mi barava askem Jehovah for helpem famili bilong mifala for no brekem olketa law bilong hem. Hem ansarem olketa prea bilong mi and hem helpem mifala for gohed strong nomata mifala kasem hevi.” Joseph and olketa pikinini bilong hem disaed strong for faithful long Jehovah long evri samting.

TAEM WEA HEM GUD FOR Changem Tingting Bilong Iu

Long 32 C.E., wanfala woman from Phoenicia askem Jesus for aotem demon wea spoelem gele bilong hem. Nomata woman hia askem Jesus staka taem, Jesus no ansarem hem. Jesus sei long olketa disaepol bilong hem: “God sendem mi kam long pipol bilong Israel nomoa, wea olsem olketa sheepsheep wea lus.” Taem woman hia gohed for ask, Jesus sei long hem: “Hem no stret for tekem bred bilong olketa pikinini and torowem go long olketa smol dog.” Woman hia showimaot hem garem bigfala faith taem hem sei: “Datwan hem tru Lord, nomata olsem, olketa smol dog savve kaikaim olketa pis bred wea foldaon from tebol bilong man wea ownim olketa.” So Jesus changem tingting bilong hem, and hem healim gele bilong datfala woman.—Matt. 15:21-28.

Wei wea Jesus willing for changem tingting bilong hem long taem wea fitim showimaot hem followim example bilong Jehovah. Olsem example, God sei bae hem killim dae olketa Israelite wea wakem datfala gold buluka, bat taem Moses askem Jehovah for no duim datwan, Jehovah willing for changem tingting bilong hem.—Ex. 32:7-14.

Aposol Paul tu hem willing for changem tingting bilong hem. Long firstfala missionary gogo bilong Paul, Mark hem lusim hem. So Paul no laek for tekem Mark witim hem moa. Bat bihaen, Paul luksavve Mark hem kamap mature and bae hem fit for helpem hem. So Paul sei long Timothy: “Tekem kam Mark witim iu taem iu kam bikos hem savve helpem mi long ministry.”—2 Tim. 4:11.

Wanem nao iumi lanem from diswan? Jehovah hem perfect, bat hem willing for changem tingting bilong hem from hem God wea showimaot mercy, hem patient, and hem garem love. Iumi no perfect, and staka taem iumi no minim evri samting, so iumi tu shud willing for changem tingting bilong iumi. Olsem example, maet iumi savve changem hao iumi ting long narawan taem iumi minim gud samting wea kasem hem.

Maet samfala taem hem gud for changem tingting bilong iumi saed long olketa theocratic goal. Maet iumi studyim Bible and attendim olketa meeting, bat iumi hol bak for baptaes. Or maet iumi fit for pioneer, bat iumi hol bak for duim datwan. And maet wanfala brata no laek for kamap ministerial servant or elder long kongregeson. (1 Tim. 3:1) Waswe, hem nao samting wea kasem iu? Waswe, iu ting hem gud for iu changem tingting bilong iu abaotem diswan? Jehovah laekem iu for garem olketa privilege hia and kasem hapi wea kamaot from wei for helpem olketa narawan, and for duim wanem God laekem.

Ella, wea waka long wanfala branch office long Africa sei olsem: “Long firstaem wea mi kam long Bethel, mi no ting bae mi stap longtaem. Mi laek for worshipim Jehovah long full soul bilong mi, bat mi no laek lusim famili bilong mi tu. Long firstaem, mi barava missim famili bilong mi! Bat roommate bilong mi encouragem mi, so mi disaed for gohed stap long Bethel. Bihaen mi stap long Bethel for tenfala year, mi laek for gohed waka long Bethel for olketa brata and sista bilong mi.”

TAEM IU MAS Changem Tingting Bilong Iu

Samfala taem, iumi mas changem tingting bilong iumi. Olsem example, Cain hem jealous long brata bilong hem and “barava kros tumas.” God luksavve Cain laek for duim nogud samting, and hem warnim Cain for kontrolem kros bilong hem, bikos sapos nomoa, sin wea “weit aotsaed long door” bae winim hem. Cain disaed for no followim wanem God talem, and hem no laek for changem tingting bilong hem. Nogud samting wea kamaot from diswan nao Cain killim dae brata bilong hem!—Gen. 4:2-8.

Tingim tu King Uzziah. Long firstaem hem man wea savve obeyim Jehovah and fren gud witim God. Bat gogo Uzziah hem bighed. Hem go insaed long temple for bonem incense, nomata hem no wanfala priest. Taem olketa priest warnim hem for no duim datwan, hem no laek changem tingting bilong hem. Uzziah “hem kros fogud” long olketa priest and no laek herem wanem olketa talem. From datwan, Jehovah mekem hem kasem leprosy.—2 Chron. 26:3-5, 16-20.

Tingim tu example bilong Joachim, wea mas changem tingting bilong hem. Hem baptaes long 1955 bat hem disfellowship long 1978. Hem disfellowship for winim 20 year bifor hem changem tingting bilong hem, hem repent, and hem reinstate. Taem wanfala elder askem hem why nao hem weit longtaem tumas bifor hem kam bak, Joachim sei: “Mi kros and mi praod tu. Mi sorre from mi weit longtaem tumas olsem. Taem mi disfellowship, mi savve Olketa Jehovah’s Witness nao tru religion.”

Maet iumi tu mas changem tingting and wanem iumi duim samfala taem. Sapos iumi willing for duim datwan, Jehovah bae hapi long iumi.—Ps. 34:8.