Waswe, Olketa Angel Savve Helpem Iu?

Long wanfala Sunday aftanun, Kenneth and Filomena, wea stap long Curaçao, tufala go visitim wanfala hasband and waef, wea tufala studyim Bible witim tufala.

Kenneth sei: “Taem mifala kasem haos, haos hia sat and car no stap. Mi no savve tu bat wanfala samting mekem mi barava laek for ringim mobile bilong woman hia.”

Datfala woman ansa and sei hasband bilong hem go waka. Bat taem hem savve Kenneth and Filomena aotsaed nomoa long haos, hem openem door and talem tufala for go insaed.

Tufala luksavve woman hia hem krae. Taem Kenneth prea for olketa startim Bible study bilong olketa, woman hia start for krae moa. So Kenneth and Filomena askem hem why nao hem krae.

Datfala woman sei hem laek for suisaed long datfala aftanun, and gohed raetem leta for hasband bilong hem taem Kenneth ringim hem. Hem talem tufala hem garem sik depression, so tufala readim samfala scripture long Bible for comfortim hem. Diswan sevem laef bilong datfala woman.

Kenneth sei: “Mifala thankiu long Jehovah for mekem wei for mifala helpem disfala woman wea sorre tumas. Mifala luksavve Jehovah nao iusim maet wanfala angel or Holy spirit for leadim mifala for ringim datfala woman!”a

Waswe, Kenneth and Filomena talem tru samting taem tufala sei God nao iusim maet wanfala angel or holy spirit for helpem datfala woman? Or waswe, hem lucky bilong woman hia nomoa Kenneth ringim hem long datfala taem?

Iumi no savve. Bat iumi savve God iusim olketa angel for leadim pipol kam long hem. Olsem example, Bible sei God iusim angel for leadim Philip for go helpem bigman bilong Ethiopia wea laek for savve long mining bilong wanfala profesi.—Acts 8:26-31.

Olketa difren religion sei olketa spirit stap, and olketa sei samfala olketa gudfala spirit wea savve duim will bilong God or olketa duim waka for protectim man. Staka pipol bilivim olketa angel stap and savve helpem olketa. Bat olketa narawan no bilivim datwan.

Waswe, olketa angel stap? Sapos olsem, hu nao wakem olketa? Wanem nao truth abaotem olketa angel? Waswe, olketa savve helpem iumi? Bae iumi storyim olketa pruv wea stap.