Kwestin From Reader

Taem Satan talem Eve hao sapos hem kaikaim frut blo datfala tree blo savve lo gud and nogud samting, hem bae no dae, waswe, Satan teachim lo Eve datfala idea wea staka distaem bilivim abaotem soul wea no savve dae?

Luk olsem nomoa. Satan datfala Devil no talem Eve dat sapos hem kaikaim frut blo datfala tree wea God stopem, hem bae dae bat nara part lo hem (wea samfala distaem sei hem nao soul wea no savve dae) bae gohed laef samwea. Thru lo wanfala snek, Satan talem klia lo Eve dat bae hem nating dae. So Satan minim Eve bae gohed laef and laef blo hem bae gud winim wanem hem garem lo datfala taem bikos hem bae kamap independent from God.—Jenesis 2:17; 3:3-5.

Sapos datfala laea teaching wea pipol distaem bilivim abaotem soul wea no savve dae, hem no start lo Eden, then wanem taem nao datwan hem start? Iumi no savve. Bat, iumi savve evri false religion finis lo Flood lo taem blo Noah. So no eni idea blo false religion stap bihaen lo Flood, bikos Noah and famili blo hem nomoa laef and olketa worshipim Jehovah nomoa.

So disfala teaching abaotem soul wea no savve dae, wea pipol distaem bilivim, masbi hem start bihaen lo taem blo Flood. Taem God konfiusim olketa languis lo Babel and pipol go lo olketa didifren ples lo earth, masbi olketa tekem witim olketa datfala idea hao olketa man garem soul wea no savve dae. (Jenesis 11:8, 9) Nomata wanem taem nao datfala false teaching hem start, iumi sure Satan datfala Devil wea hem “dadi bilong wei for laea,” hem nao bihaenem datwan and hem hapi taem hem lukim datwan hem spred go evriwea lo world.—John 8:44.