Olketa wea Obeyim God Bae Kasem Blessing

Profet Moses sei sapos iumi obeyim law blo God, bae iumi kasem blessing from God. (Diutronomi 10:13; 11:27) Iumi no obeyim God bikos iumi fraet nogud hem panisim iumi. Olketa naesfala wei blo God nao mekem iumi for laek obeyim hem bikos iumi lovem hem and no laek for duim samting wea bae mekem hem no hapi. Bible sei: “Samting wea showimaot iumi lovem God, hem taem iumi obeyim olketa law bilong hem.”—1 John 5:3.

Bat hao nao wei for obeyim God mekem iumi for kasem blessing? Bae iumi storyim tufala samting.

1. TAEM IUMI OBEYIM GOD BAE IUMI WISE

“Mi nao [Jehovah], an mi nao God blong yufala. Mi nao mi tisim yufala mekem yufala kamap gud. An mi lidim yufala long wei wea yufala mas falom.”—AESAEA 48:17.

Jehovah God, Creator blo iumi, savve gud lo iumi and givim olketa advaes wea iumi needim. Sapos iumi laekem teaching blo hem for helpem iumi for mekem wise disison, iumi mas lanem wanem God laekem iumi for duim from olketa Holy Raeting, and followim datwan.

2. TAEM IUMI OBEYIM GOD BAE IUMI HAPI

“Olketa wea herem toktok bilong God and obeyim datwan nao olketa hapi!”—LUKE 11:28.

Distaem staka million pipol wea obeyim toktok blo God kasem trufala hapi. Olsem example, wanfala man lo Spain hem savve kros kwiktaem and treatim nogud olketa narawan and waef blo hem tu. Wanday, hem read abaotem wanem profet Moses talem abaotem Joseph, son blo Jacob. Hem lanem hao Joseph no savve kros kwiktaem. Olketa salem Joseph for kamap slave and putim hem lo prison for samting wea hem no duim. Nomata olsem, hem hambol, no raf, and garem wei for forgive. (Jenesis, chapter 37-45) Datfala man from Spain sei: “Taem mi ting abaotem example blo Joseph hem helpem mi for hambol, kaen, and kontrolem seleva. From datwan, mi garem hapi laef.”

Olketa Holy Raeting garem samfala advaes moa wea savve helpem iumi for treatim gud olketa narawan. Bae iumi storyim diswan lo next article.