Wanem Iu Savve Duim for Fren Bak Witim Jehovah

EVRI year staka brata and sista blo iumi reinstate. Masbi “olketa long heven” barava hapi tumas taem samwan kam bak lo Jehovah! (Luke 15:7, 10) Sapos iu reinstate distaem, iu savve sure Jesus, olketa angel, and Jehovah barava hapi from iu laek fren bak witim Jehovah. Bat maet iu faendem hem no isi for fren bak witim Jehovah. Why nao olsem, and wanem nao savve helpem iu?

WHY NAO MAET HEM NO ISI?

Staka wea reinstate savve ting daonem olketa seleva. Maet iu feel olsem David. Nomata Jehovah forgivim olketa sin blo hem, hem gohed feel iusles. (Sams 40:12; 65:3) Bihaen samfala reinstate, olketa savve feel shame or guilty for staka year. Isabelle hem disfellowship for winim 20 year.a Hem sei, “Mi tingse hard for Jehovah forgivim mi.” Sapos iu garem kaen feeling olsem, maet hem mekem iu laek givap. (Provebs 24:10) No duim datwan.

Samfala tingse hem big samting tumas for duim moa olketa samting lo kongregeson. Bihaen Antoine hem reinstate hem sei, “Mi forgetim nao hao for duim staka samting olsem mi duim taem mi Witness bifor.” From samfala ting olsem, olketa maet hol bak for duim samfala samting.

Tingim disfala tokpiksa. Sapos cyclone spoelem haos blo samwan, maet hem feel olsem hem hard waka tumas and bae tek longtaem for wakem bak datfala haos. Olsem datfala cyclone spoelem haos, bigfala sin spoelem hao man fren witim Jehovah, and maet hem feel olsem hem hard waka tumas for fren bak witim Jehovah. Bat iu savve kasem help.

Jehovah sei lo olketa hia: “Yufala mas kam distaem mekem yumi stretem disfala samting.” (Aesaea 1:18) Luk olsem iu duim samting finis for “stretem” olketa samting witim Jehovah, and hem tinghae lo datwan. Tingim, from iu kam bak lo Jehovah, hem savve iusim example blo iu for pruvim Satan hem laea!—Provebs 27:11.

From iu reinstate datwan showimaot iu laek for fren witim Jehovah, and hem tu laek for fren witim iu. (Jas. 4:8) Hem tru, iu kam bak lo kongregeson, bat iu need for duim samfala samting moa. Iu need for strongim love blo iu for Jehovah wea hem Fren and Dadi blo iu. Hao nao iu savve duim datwan?

OLKETA SAMTING WEA SAVVE HELPEM IU

Masbi iu tingim yet staka samting iu lanem abaotem Jehovah and olketa promis blo hem for future. Bat distaem iu need for duim olketa nara samting moa, olsem preaching waka, go lo olketa meeting, and for associate witim olketa brata and sista. Olketa samting hia bae helpem iu for fren bak witim Jehovah.

Evritaem prea lo Jehovah. Dadi blo iu luksavve maet hem no isi for iu prea lo hem bikos iu feel guilty lo wanem iu duim. (Rome 8:26) Bat hem gud for “gohed for prea” and talem Jehovah iu barava laek for fren witim hem. (Rome 12:12) Andrej storyim taem hem reinstate and sei: “Mi feel guilty and shame tumas. Bat taem mi gohed for prea, mi start for garem peace.” Sapos iu no savve wanem for prea abaotem, readim olketa prea wea King David talem bihaen hem repent, lo Sams 51 and 65.

Readim Bible and duim study. Diswan bae strongim faith and love blo iu for Jehovah. (Sams 19:7-11) Felipe sei: “Bifor mi disfellowship, mi no readim Bible and duim study seleva evritaem, and datwan mekem mi wik lo spiritual wei. Bihaen mi reinstate mi no laek for wik moa, so mi disaed for markem taem evri week for duim study seleva.” Iu tu savve duim sem samting. Sapos iu laekem samwan for helpem iu for chusim olketa subject for studyim, iu savve askem wanfala mature brata or sista.

Fren moa witim olketa brata and sista. Samfala wea reinstate tingse olketa lo kongregeson bae les lo olketa. Larissa sei: “Mi feel shame tumas bikos mi tingse olketa brata and sista no hapi witim mi. Mi gohed warim datwan for longtaem.” Iu savve sure olketa elder and olketa mature brata and sista barava laek helpem iu for fren bak witim Jehovah. (Lukim box “Wanem Olketa Elder Savve Duim.”) Olketa hapi tumas iu reinstate, and olketa laekem iu for gohed gud lo spiritual wei!—Provebs 17:17.

Wanem nao savve helpem iu for fren witim olketa brata and sista? Go lo olketa meeting and joinim olketa lo preaching waka. Hao nao datwan savve helpem iu? Felix sei: “Olketa brata and sista laekem mi for kam bak lo truth and olketa lovem mi. Mi luksavve olketa brata and sista fren blo mi, Jehovah hem forgivim mi, and datwan mekem mi hapi for gohed worshipim Jehovah.”—Lukim box “Wanem Nao Iu Savve Duim?”

NO GIVAP!

Taem iu waka hard for fren bak witim Jehovah, Satan bae laek for mekem iu wikdaon. (Luke 4:13) So duim olketa samting distaem for mekem iu fren gud witim Jehovah.

Jehovah sei olsem abaotem olketa sheepsheep blo hem: ‘Bae mi go lukaotem olketa sipsip blong mi wea lus. Bae mi tekem olketa kambaek. An bae mi putum bandes long olketa wea garekil. Bae mi mekem olketa wea wik fo strong moa.’ (Esikiel 34:16) Jehovah hapi from staka wea disfellowship bifor fren bak witim hem. Iu savve sure hem laekem iu tu for fren bak witim hem.

Wanem Nao Olketa Elder Savve Duim?

Olketa elder main wan for helpem olketa wea reinstate for fren bak witim Jehovah. Bae iumi storyim wanem olketa elder savve duim.

Showimaot love lo olketa. Aposol Paul storyim hao samwan wea repent savve feel “sorre tumas.” (2 Cor. 2:7) Hem maet gohed feel guilty and laek givap. Paul talem olketa lo kongregeson “for forgivim and comfortim” kaen man olsem. Olketa wea reinstate need for luksavve Jehovah and olketa lo kongregeson lovem olketa. Taem olketa elder encouragem and helpem olketa, datwan savve strongim olketa for no givap.

Prea witim olketa. Bible sei: “Prea bilong man wea raeteous hem garem paoa.” (Jas. 5:16) Larissa wea iumi storyim bifor sei: “Mi talem olketa elder wanem mi wari abaotem. Olketa savve prea for mi. Datwan helpem mi luksavve olketa elder laek helpem mi for fren bak witim Jehovah.” Theo sei: “Taem mi herem olketa elder prea for mi, datwan mekem mi sure Jehovah lovem mi and hem tingim olketa gud samting mi duim.”

Fren witim olketa. Olketa wea reinstate needim olketa fren lo kongregeson. Justin, wanfala elder sei: “Hem gud for iumi olketa elder askem samwan wea reinstate for waka witim iumi lo ministry and for go visitim hem. Hem barava important for fren witim olketa!” Henry, nara elder sei, “Taem olketa narawan lo kongregeson lukim olketa elder fren witim samwan wea reinstate, olketa tu laek duim datwan.”

Helpem olketa for duim study. Olketa elder savve helpem samwan wea reinstate for garem schedule for duim study seleva. Darko, wanfala elder sei: “Mi laek for storyim eni naes point wea mi lanem taem mi duim study seleva and hao mi enjoyim study. Mi savve arrange for mifala studyim tugeta article wea bae strongim olketa.” Clayton, nara elder sei: “Mi encouragem samwan wea reinstate for read abaotem olketa lo Bible wea kasem sem samting olsem hem.”

Duim shepherding visit. Olketa wea reinstate maet tingim olketa elder olketa judge nomoa. Bat olketa need for luksavve olketa elder shepherd blo olketa. (Jeremaea 23:4) So olketa elder need for story witim olketa wea reinstate, lisin lo olketa, and praisem olketa for gud samting wea olketa duim. Marcus, wanfala elder, storyim wanem hem duim lo shepherding visit. Hem sei: “Mifala storyim samting lo Bible, and mifala talem hem Jehovah tinghae lo hao hem waka hard for kam bak lo organization. Lo end blo visit, mifala markem nara taem for visitim hem.”

a Mifala changem olketa nem lo disfala article.