Kwestin From Reader

Wanem nao mining blo toktok lo Leviticus 19:16 (NW) wea sei for no “standap againstim laef blo samwan,” and wanem nao iumi savve lanem from datwan?

Jehovah talem olketa Israelite for mas holy. Hem storyim samting wea bae helpem olketa for holy. Hem sei: “Iufala no spredim olketa laea wea savve spoelem narawan. Iufala mas no standap againstim laef blo samwan. Mi nao Jehovah.”​—Lev. 19:2, 16, NW.

Datfala toktok “standap againstim” hem transleison blo wanfala Hebrew toktok. Wanem nao hem minim? Wanfala buk wea storyim Bible buk blo Leviticus sei: “Disfala Hebrew toktok hem hard for transleitim bikos hem wanfala idiom (toktok wea garem difren mining).”

Samfala savveman sei datfala toktok lo verse 16 join witim toktok lo verse 15, wea sei: “No teksaed taem iu judgem samwan. No saed witim samwan bikos hem poor or from hem rich. Taem iu judgem samwan iu mas followim justice.” (Lev.  19:15, NW) Sapos wanem olketa savveman talem hem tru, datfala toktok “no standap againstim laef blo samwan” savve minim olketa Israelite no savve duim samting wea no stret lo kot, bisnis, or lo famili, and shud no laea for kasem samting olketa laekem. Hem tru, pipol blo God shud no duim olketa samting hia, bat luk olsem verse 16 no storyim datwan.

Tingim hao lo first part lo verse 16 God talem olketa Israelite for no spredim olketa laea wea savve spoelem narawan. Taem samwan spredim olketa laea abaotem narawan for spoelem hem, datwan savve kosim bigfala problem. (Provebs 10:19; Eklesiastes 10:12-14; 1 Tim. 5:11-15; Jas. 3:6) Samwan wea duim olsem savve min for spoelem narawan. Maet samwan savve laea abaotem narawan nomata datwan bae lead go lo dae blo hem. Olsem example, tufala nogud man min for laea abaotem Naboth, and datwan mekem hem lusim laef blo hem. (Fas Kings 21:8-13) So olsem Leviticus 19:16 (NW) storyim, taem samwan “standap againstim” narawan, datwan savve minim from man hia spredim olketa laea abaotem narawan, datwan kosim dae blo hem.

Samwan maet spredim olketa laea abaotem narawan bikos hem les lo hem. Wan John 3:15 sei: “Eniwan wea heitim brata bilong hem, hem man for killim man dae. Iufala savve finis, eniwan wea killim dae olketa nara man bae no kasem laef olowe.” Tingim tu, lo verse 16 God sei for “no spredim olketa laea abaotem narawan,” then lo verse 17 hem sei: “Iufala mas no heitim brata blo iufala lo heart blo iufala.”​—Lev. 19:17, NW.

So datfala toktok lo Leviticus 19:16 (NW) wea sei “no standap againstim laef blo samwan” hem strongfala kaonsel for olketa Christian. Iumi mas no heitim and spredim olketa laea abaotem narawan. Sapos iumi les or jealous lo samwan and iumi start for spredim olketa laea story abaotem hem, datwan minim iumi standap againstim hem, and maet datwan showimaot iumi heitim hem. Olketa Christian mas no duim datwan.​—Matt. 12:36, 37.