STUDY ARTICLE 20
Wat Nao Revelation Sei Bae Happen lo Olketa Enemy blo God?
“Olketa hipimap olketa king long datfala ples wea long Hebrew languis olketa kolem Armageddon.”—REV. 16:16.
SONG 150 Lukaotem God for Sevem Iu
ARTICLE BAE STORYIMa
1. Wat nao Bible buk Revelation storyim abaotem pipol blo God?
BIBLE buk Revelation storyim hao Kingdom blo God hem rul finis lo heven and olketa aotem Satan from heven nao. (Rev. 12:1-9) Datwan minim olketa lo heven garem peace, bat iumi lo earth kasem staka nogud samting. Why nao olsem? Bikos Satan kros tumas and hem attakim pipol wea faithful for worshipim Jehovah lo earth.—Rev. 12:12, 15, 17.
2. Wat nao bae helpem iumi for gohed faithful?
2 Nomata Satan gohed for attakim iumi, wat nao bae helpem iumi for gohed faithful? (Rev. 13:10) Wanfala samting wea bae helpem iumi, hem for savve lo olketa samting wea bae happen lo future. For example, lo Revelation, John storyim samfala samting wea klosap for happen. Wanfala nao, olketa enemy blo God bae finis. Distaem bae iumi storyim wanem Revelation talem abaotem olketa enemy hia and wat bae happen lo olketa.
“OLKETA SAMTING WEA PIKSAREM” OLKETA ENEMY BLO GOD
3. Wat nao samfala wild animal wea iumi read abaotem lo Revelation?
3 Lo first verse lo Revelation hem sei staka samting wea iumi readim lo Revelation hem “piksarem” or stand for olketa nara samting. (Rev. 1:1) Lo Revelation, iumi read abaotem samfala wild animal wea stand for olketa enemy blo God. For example, “wanfala wild animal hem kamaot from sea,” and hem garem “tenfala horn and sevenfala hed.” (Rev. 13:1) Then “nara wild animal hem kamaot from earth,” wea toktok blo hem olsem wanfala big snek and hem mekem “fire kam daon from skae.” (Rev. 13:11-13) Then iumi read abaotem nara “wild animal wea kala bilong hem red” and wanfala jury woman hem sidaon antap lo hem. Thrifala wild animal hia stand for olketa enemy wea againstim Jehovah God and Kingdom blo hem for longtaem finis. So hem important for iumi savve hu nao olketa enemy hia.—Rev. 17:1, 3.
FOFALA WILD ANIMAL WEA BIG FOGUD
Olketa “kamaot from bikfala dip si.” (Daniel 7:1-8, 15-17) Olketa stand for olketa world paoa wea affectim pipol blo God start lo taem blo Daniel (Lukim paragraf 4, 7)
4-5. Hao nao Daniel 7:15-17 helpem iumi for minim hu nao olketa wild animal stand for hem?
4 Hu nao olketa wild animal hia piksarem? Samting wea bae helpem iumi for savve, hem for lukluk lo olketa nara buk lo Bible wea explainim mining blo olketa wild animal hia. For example, profet Daniel lukim lo wanfala dream “fofala deferen kaen animol wea i bikfala fogud i kamaot from bikfala dip si.” (Daniel 7:1-3) Daniel storyim hao olketa wild animal hia stand for fofala “kingdom,” wea minim olketa gavman. (Readim Daniel 7:15-17.) Datwan showimaot klia olketa wild animal wea Revelation storyim stand for olketa gavman tu.
5 Disfala article bae helpem iumi for luksavve lo wanem nao samfala samting wea Revelation storyim hem piksarem. Distaem bae iumi storyim olketa wild animal. Firstaem, bae iumi faendaot hu nao olketa wild animal hia stand for hem. Then, bae iumi lukim wat nao hem happen lo olketa. And last samting, bae iumi storyim hao olketa samting wea happen lo olketa hem affectim iumi.
HU NAO OLKETA WILD ANIMAL STAND FOR HEM?
WILD ANIMAL WEA GAREM SEVENFALA HED
Hem “kamaot from sea” and hem garem sevenfala hed, tenfala horn, and tenfala kraon. (Rev. 13:1-4) Hem stand for evri gavman wea rulim olketa man kam kasem distaem. Sevenfala hed stand for sevenfala world paoa wea affectim pipol blo God (Lukim paragraf 6-8)
6. Lo Revelation 13:1-4, wat nao datfala wild animal wea garem sevenfala hed stand for hem?
6 Wat nao datfala animal wea garem sevenfala hed stand for hem? (Readim Revelation 13:1-4.) Revelation sei disfala wild animal hem luk olsem wanfala leopard, bat leg blo hem olsem leg blo bear and mouth blo hem olsem mouth blo lion, and hem garem tenfala horn. Daniel chapter 7 storyim fofala wild animal wea luk olsem leopard, bear, and lion tu. Bat Revelation storyim wanfala wild animal nomoa. Datfala wild animal hem no stand for wanfala gavman or wanfala world paoa nomoa, bat hem stand for staka gavman bikos Revelation sei tu datfala wild animal hem rul “ovarem evri tribe and pipol and languis and kantri.” (Rev. 13:7) So datfala wild animal hem stand for evri gavman wea rulim olketa man kam kasem distaem.b—Eklesiastes 8:9.
7. Wat nao sevenfala hed blo datfala wild animal stand for hem?
7 Wat nao sevenfala hed blo datfala wild animal stand for hem? Revelation chapter 17 helpem iumi for luksavve lo datwan, bikos hem explainim samting abaotem datfala karving wea luk olsem wild animal wea Revelation chapter 13 storyim. Revelation 17:10 hem sei: “[Sevenfala hed] hia piksarem sevenfala king: Faevfala foldaon finis, wanfala hem stap, and narawan hem no kam yet, bat taem hem kam hem mas stap for lelebet taem nomoa.” Lo history, Satan bihaenem staka difren gavman bat “sevenfala hed” hia hem olketa world paoa wea rul blo olketa barava affectim pipol blo God. Lo taem blo aposol John, faevfala lo olketa world paoa hia rul finis, olsem Egypt, Assyria, Babylon, Media and Persia, and Greece. And Rome nao mek-six world paoa wea rul taem John kasem datfala vision. Hu nao datfala mek-seven hed wea bae kamap last world paoa?
8. Mek-seven hed blo datfala wild animal hem stand for which world paoa?
8 Which world paoa nao hem rul lo taem blo end, wea hem nao datfala “day bilong Lord”? (Rev. 1:10) Hem nao datfala England-America World Paoa. So hem nao datfala mek-seven hed blo datfala wild animal wea Revelation 13:1-4 storyim.
WILD ANIMAL WEA GAREM SEVENFALA HED
Datfala wild animal “kamaot from earth” and toktok “olsem wanfala big snek.” Hem mekem “fire kam daon from skae” and duim olketa spesol saen from hem “datfala laea profet.” (Rev. 13:11-15; 16:13; 19:20) Wild animal wea garem tufala horn wea hem tu datfala laea profet, stand for England-America World Paoa. Hem trikim pipol lo earth and talem olketa for ‘wakem karving wea luk olsem first wild animal’ wea garem sevenfala hed and tenfala horn (Lukim paragraf 9)
9. Hu nao datfala wild animal wea “tufala horn” blo hem “olsem horn bilong wanfala pikinini sheepsheep”?
9 Revelation chapter 13 hem sei datfala mek-seven hed, datfala England-America World Paoa, hem olsem wanfala wild animal wea “garem tufala horn olsem horn bilong wanfala pikinini sheepsheep, bat hem toktok olsem wanfala big snek.” Hem “duim olketa barava spesol saen” and “mekem fire kam daon from skae kasem earth and pipol lukim datwan.” (Rev. 13:11-15) Revelation chapter 16 and 19 sei disfala wild animal hem wanfala “laea profet.” (Rev. 16:13; 19:20) Daniel tu sei datfala England-America World Paoa bae “spoelem plande samting.” (Daniel 8:19, 23, 24) Datwan nao wanem hem happen lo World War II. Samfala scientist lo England and America wakem olketa atomic bomb, and tufala lo olketa bomb hia nao army dropim lo Japan for endim war lo Pacific. From diswan, hem olsem England-America World Paoa hem mekem “fire kam daon from skae kasem earth.”
WILD ANIMAL WEA KALA BLO HEM RED
Hem mek-eit king and wanfala jury woman (Bigfala Babylon) sidaon antap lo hem. (Rev. 17:3-6, 8, 11) Firstaem datfala jury woman nao kontrolem datfala wild animal, bat gogo hem distroem jury woman hia. Datfala jury woman stand for evri false religion. Distaem, datfala wild animal stand for United Nations wea sapotim and helpem staka gavman lo world (Lukim paragraf 10, 14-17)
10. Hu nao “karving bilong datfala wild animal” stand for hem? (Revelation 13:14, 15; 17:3, 8, 11)
10 Then Revelation storyim nara wild animal. Hem barava luk olsem datfala wild animal wea garem sevenfala hed bat kala blo hem red. Hem wanfala “karving bilong datfala wild animal” and hem nao “mek-eit king.”c (Readim Revelation 13:14, 15; 17:3, 8, 11.) Bible sei datfala “king” hem stap lo firstaem and then hem no stap, and gogo hem kamap moa. Datwan hem barava fitim United Nations wea sapotim and helpem staka gavman lo world. Firstaem nem blo datfala organization hem League of Nations. Then lo World War II hem no stap, bat gogo hem kamap moa and distaem hem garem nem United Nations.
11. Wat nao olketa gavman duim, and why nao iumi no need for fraetem olketa?
11 Olketa wild animal wea stand for olketa gavman, iusim olketa laea story for mekem pipol againstim Jehovah and pipol blo hem. John sei “olketa king evriwea long earth” hipap tugeta for datfala war blo Armageddon, wea hem nao “bigfala day bilong Olmaeti God.” (Rev. 16:13, 14, 16) Bat iumi bae no need for fraet bikos Jehovah, God blo iumi, bae kwiktaem sevem olketa wea sapotim rul blo hem.—Esikiel 38:21-23.
12. Wat nao bae happen lo olketa gavman?
12 Wat nao bae happen lo olketa wild animal wea stand for olketa gavman? Revelation 19:20 sei: “Datfala man wea sidaon long horse hem kasholem datfala wild animal and datfala laea profet. . . . Taem datfala wild animal and laea profet laef yet, datfala man hem torowem tufala long lake bilong fire wea salfa nao mekem datfala fire gohed for laet.” So taem olketa gavman gohed for rul yet, God bae finisim olketa for olowe.
13. Wanem hard samting nao olketa Christian feisim from olketa gavman lo world?
13 Hao nao diswan affectim iumi? Iumi olketa Christian mas faithful lo God and Kingdom blo hem. (John 18:36) Iumi mas gohed neutral and no teksaed lo olketa samting blo politik. Bat hem no isi for neutral bikos olketa gavman lo world expectim pipol for duim and talem olketa samting for sapotim olketa. Olketa wea sapotim olketa gavman kasem nao mark blo datfala wild animal. (Rev. 13:16, 17) Jehovah bae no hapi lo eniwan wea kasem datfala mark, and hem bae no kasem laef olowe. (Rev. 14:9, 10; 20:4) So hem important tumas for iumi gohed neutral, nomata maet gavman trae forcem iumi for sapotim olketa!
DATFALA JURY WOMAN HEM DISTROE
14. Olsem Revelation 17:3-5 storyim, wat nao John lukim wea mekem hem sapraes?
14 John sei hem “barava sapraes tumas” taem hem lukim wanfala woman wea sidaon antap lo wild animal wea luk raf tumas. (Rev. 17:1, 2, 6) Bible sei hem wanfala “jury woman wea garem bigfala paoa,” and nem blo hem “Bigfala Babylon.” Hem “durong” witim “olketa king long earth.”—Readim Revelation 17:3-5.
15-16. Hu nao “Bigfala Babylon” and hao nao iumi savve lo datwan?
15 Hu nao “Bigfala Babylon”? Datfala jury woman hem no stand for olketa gavman bikos Bible sei hem durong witim olketa king, wea minim olketa bigman lo gavman. (Rev. 18:9) Bible sei hem sidaon antap lo datfala wild animal, wea showimaot hem trae for kontrolem olketa gavman. And tu, hard for datfala jury woman stand for olketa bigfala bisnis blo world blo Satan bikos Revelation kolem olketa hia “olketa bisnisman long earth.”—Rev. 18:11, 15, 16.
16 Lo Bible, datfala toktok “jury woman” savve minim olketa wea sei olketa worshipim God bat lo semtaem worshipim olketa nara god or join insaed olketa samting lo world. (Fas Kronikols 5:25; Jas. 4:4) Bat Bible kolem olketa wea faithful for worshipim God olketa “young gele” or “virgin.” (2 Cor. 11:2; Rev. 14:4, footnote) Lo Babylon bifor hem ples wea false worship hem start. So Bigfala Babylon hem stand for evri false religion lo world.—Rev. 17:5, 18; lukim Web article lo jw.org “What Is Babylon the Great?”
17. Wat nao bae happen lo Bigfala Babylon?
17 Wat nao bae happen lo Bigfala Babylon? Revelation 17:16, 17 ansarem datfala kwestin. Hem sei: “Tenfala horn wea iu lukim and datfala wild animal bae heitim datfala jury woman. Bae olketa tekem evri samting bilong hem and mekem hem naked. Then bae olketa kaikaim body bilong hem and bonem hem long fire. Diswan hem bikos God mekem olketa garem tingting for duim samting wea hem laekem.” Datwan showimaot hao Jehovah bae mekem olketa gavman for garem tingting for iusim United Nations (datfala wild animal wea kala blo hem red) for attakim olketa false religion and finisim olketa.—Rev. 18:21-24.
18. Wat nao iumi savve duim for mek sure iumi no join witim Bigfala Babylon lo sin blo hem?
18 Hao nao diswan affectim iumi? Worship blo iumi hem mas “klin and stret long tingting bilong God wea hem Dadi bilong iumi.” (Jas. 1:27) Bigfala Babylon mekhae lo olketa laea teaching and olketa celebration wea againstim Bible and sei hem olraet for pipol durong and for duim spiritism. Bat iumi mas stap klia lo evri samting hia. And iumi gohed for warnim pipol for “go aot” from Bigfala Babylon mekem olketa no join witim hem lo sin blo hem.—Rev. 18:4.
GOD BAE FINISIM SATAN
BIG SNEK WEA BODY BLO HEM RED
Satan givim paoa lo datfala wild animal. (Rev. 12:3, 9, 13; 13:4; 20:2, 10) Satan bae insaed wanfala hol wea deep tumas for 1,000 year. Bihaen datwan, wanfala angel bae torowem Satan insaed “lake bilong fire and salfa” (Lukim paragraf 19-20)
19. Hu nao “datfala big snek wea body bilong hem red”?
19 Bible buk Revelation storyim tu “wanfala big snek wea body bilong hem red.” (Rev. 12:3) Datfala snek faet againstim Jesus and olketa angel blo hem. (Rev. 12:7-9) Hem attakim pipol blo God and givim paoa lo olketa gavman blo man. (Rev. 12:17; 13:4) Hu nao datfala snek? Hem nao “datfala snek bilong bifor kam, wea nem blo hem Devil and Satan.” (Rev. 12:9; 20:2) Hem nao bihaenem and kontrolem evri nara enemy blo Jehovah.
20. Wat nao bae happen lo datfala snek?
20 Wat nao bae happen lo datfala snek? Revelation 20:1-3 sei wanfala angel bae torowem Satan insaed hol wea deep tumas. Datwan minim Satan bae no garem paoa for duim eni samting. Lo datfala taem Satan bae no savve “laea moa long olketa pipol long evri kantri long world go kasem taem datfala 1,000 year hem finis.” Gogo wanfala angel bae torowem Satan and olketa demon “insaed long datfala lake bilong fire and salfa” wea minim olketa bae finis for olowe. (Rev. 20:10) Lo niu world, Satan and olketa demon blo hem bae no stap nao. Datwan bae hem gud tumas!
21. Why nao iumi hapi abaotem olketa samting wea iumi readim lo Bible buk Revelation?
21 Iumi hapi from iumi minim olketa samting hia wea Bible buk Revelation storyim. Distaem iumi savve nao lo olketa enemy blo Jehovah, and iumi savve tu wanem bae happen lo olketa. Tru nao, “man wea readim big disfala profesi, and wea herem and followim bae hem hapi”! (Rev. 1:3) Bat bihaen God finisim olketa enemy blo hem, olketa wea faithful bae enjoyim olketa wanem blessing? Bae iumi storyim datwan lo next article.
SONG 23 Jehovah Hem Start for Rul
a Bible buk Revelation storyim samfala samting wea stand for olketa enemy blo God. Bible buk Daniel helpem iumi for minim olketa samting hia. Lo disfala article, bae iumi comparem samfala profesi lo Daniel witim samfala profesi lo Revelation. Datwan bae helpem iumi for savve hu nao olketa enemy blo God. Then bae iumi storyim tu wat bae happen lo olketa.
b Nara samting wea showimaot datfala wild animal wea garem sevenfala hed hem stand for evri gavman, hem from hem garem “tenfala horn.” Staka taem lo Bible, namba ten hem minim samting wea complete.
c No eni kraon stap lo olketa horn blo datfala karving olsem datfala first wild animal. (Rev. 13:1) Diswan hem bikos datfala karving hem “kamaot from sevenfala” nara king and hem depend lo olketa king hia for givim paoa lo hem.—Lukim Web article lo jw.org “What Is the Scarlet-Colored Beast of Revelation Chapter 17?”