Waswe, Iumi Redi for Taem wea ‘God Bae Givim Earth lo Iumi’?

REDI FOR MEKEM EARTH KAMAP PARADAES

Taem Jehovah talem Adam and Eve for “fulimap disfala earth, and lukaftarem,” hem showimaot hao gogo full earth bae kamap paradaes. (Gen. 1:28) Olketa wea bae stap lo earth for olowe mas obeyim datfala sem komand. Bat distaem no eni ples lo earth hem paradaes olsem garden blo Eden. So bihaen lo Armageddon bae iumi garem bigfala waka for klinim disfala earth!

Diswan mekem iumi tingim bigfala waka wea olketa Israelite need for duim bihaen olketa kam bak from Babylon. No eniwan stap lo land blo olketa for 70 year. Bat Isaiah sei Jehovah bae helpem olketa for mekem ples blo olketa for luk naes moa. Datfala profesi sei: “Hem bae mekem wilderness blo Zion for olsem Eden and drae ples blo Zion olsem garden blo Jehovah.” (Isa. 51:3) Jehovah helpem olketa Israelite for duim datwan and bae hem helpem iumi for mekem earth kamap paradaes moa. Iumi savve duim samfala samting distaem wea showimaot iumi laek for duim datfala waka lo niu world.

Wanfala samting iumi savve duim hem for keepim haos and area blo iumi klin and tidy, nomata olketa neiba blo iumi no duim datwan. Iumi savve help for klinim and duim maintenance lo Kingdom Hall and Assembly Hall. Sapos fitim, maet iu savve apply tu for volunteer for duim disaster relief waka. Olketa samting hia bae showimaot iumi hapi for helpem olketa brata and sista blo iumi, and maet helpem iumi for lanem samfala skill wea iumi savve iusim lo niu world.

REDI FOR LUKAFTAREM PIPOL WEA RESURRECT

Stretawe bihaen Jesus resurrectim gele blo Jairus, hem talem olketa for givim kaikai lo hem. (Mark 5:42, 43) Hem no big waka for lukaftarem gele wea 12 year nomoa. Bat tingim waka wea iumi bae duim lo future taem “evriwan wea stap insaed long grev bae herem toktok bilong hem and laef bak,” olsem Jesus promisim. (John 5:28, 29) Nomata Bible no talem staka samting abaotem datfala taem, luk olsem bae iumi need for helpem olketa for kasem kaikai, ples for stap, and kaleko. Wat nao iumi savve duim distaem mekem iumi redi for helpem olketa? Ting raonem olketa kwestin hia.

Taem iumi herem circuit overseer bae visitim kongregeson blo iumi, waswe, iumi laek invaetem olketa for kam kaikai lo haos blo iumi? Taem wanfala Bethelite reassign lo field, or wanfala circuit overseer finis from datfala waka bikos lo age blo hem, waswe, iumi savve helpem olketa for faendem ples for stap? Sapos wanfala regional or spesol convention bae kamap lo area blo iumi, waswe, iumi willing for volunteer for duim eni waka bifor or bihaen lo convention, or for welkamim olketa delegate?

REDI FOR TEACHIM OLKETA WEA RESURRECT

From wanem Acts 24:15 storyim, iumi expectim staka billion pipol bae resurrect. Staka lo olketa no garem chance for lane abaotem Jehovah bifor olketa dae. Bat olketa bae garem datfala chance bihaen olketa resurrect.a Olketa wea faithful for worshipim God distaem bae teachim olketa hia. (Isa. 11:9) Charlotte, wea preach lo Europe, South America, and Africa, luk forward for duim datwan. Hem sei: “Mi luk forward for teachim pipol wea bae laef bak. Taem mi read abaotem samwan wea laef lo bifor, mi savve tingim: ‘Sapos disfala man savve lo Jehovah, bae laef blo hem gud tumas.’ Mi luk forward for teachim olketa abaotem Jehovah and plan blo hem.”

Bae iumi teachim tu olketa wea faithful lo Jehovah wea laef bifor Jesus kam lo earth. Bae hem wanfala nambawan privilege for explainim lo Daniel hao olketa profesi wea hem raet abaotem bat hem no minim, olketa kamap tru. (Dan. 12:8) Or maet iumi savve helpem Ruth and Naomi for lanem hao Messiah hem kam from famili laen blo olketa. Bae iumi hapi tumas for teachim pipol evriwea lo earth, and lo datfala taem bae iumi no deal witim olketa pressure and problem wea iumi feisim distaem!

Wat nao iu savve duim distaem wea bae helpem iumi for redi for teachim olketa wea resurrect? Wanfala samting, hem for iumi waka hard for kamap gudfala teacher, and for busy lo preaching waka. (Matt. 24:14) Nomata iumi no savve duim staka samting lo preaching waka bikos iumi olo or sik, taem iumi duim best blo iumi lo datfala waka iumi showimaot iumi redi for teachim olketa wea laef bak.

Hem gud for iumi tingim olketa kwestin hia. Waswe, iumi luk forward for taem wea God bae givim earth lo iumi? Waswe, iumi luk forward for taem wea iumi bae mekem earth for kamap paradaes, and iumi lukaftarem and teachim pipol wea resurrect? Iumi barava luk forward for duim olketa samting hia, so hem gud for iumi busy distaem for waka hard lo olketa samting wea bae mekem iumi redi for laef lo niu world!