Kwestin From Reader
Taem Jesus startim datfala arrangement for Evening Kaikai blo Lord, wea nao 70-fala disaepol wea hem bin sendem olketa for go preach? Hao, olketa lusim hem nao?
No eni reason stap for iumi tingse Jesus no hapi lo 70-fala disaepol hia or olketa lusim hem finis, just bikos olketa no stap taem Jesus startim datfala arrangement for Evening Kaikai blo Lord. Really lo datfala taem Jesus laek for stap witim olketa aposol blo hem nomoa.
Jesus appruvim 12 aposol and 70-fala disaepol blo hem. Aot lo evri disaepol blo hem, Jesus chusim 12-fala man for kamap olketa aposol. (Luke 6:12-16) Jesus stap lo Galilee taem hem “kolem kam twelvfala aposol” and “sendem olketa for preach abaotem Kingdom bilong God and for healim pipol.” (Luke 9:1-6) Bihaen, taem Jesus hem lo Judea, hem ‘chusim seventi man’ and hem markem tufala for waka tugeta taem hem divaedem olketa for go preaching. (Luke 9:51; 10:1) So really, Jesus garem staka nara disaepol lo olketa ples wea olketa gohed for preachim message blo hem.
Olketa Jew wea kamap disaepol blo Jesus olketa still celebratem Pasova evri year, maet witim famili blo olketa. (Ex. 12:6-11, 17-20) Taem hem klosap kasem taem for Jesus dae, hem and olketa aposol blo hem go lo Jerusalem. Bat hem no arrange for evri disaepol blo hem from Judea, Galilee, and Perea for kam hipap tugeta for datfala Pasova. Hem klia dat Jesus laek for spendem datfala taem witim olketa aposol blo hem nomoa. Hem sei: “Mi laekem tumas for kaikaim disfala kaikai bilong Pasova witim iufala bifor mi safa.”—Luke 22:15.
Jesus garem gud reason for duim datwan. Jesus klosap for dae olsem datfala “Pikinini Sheepsheep bilong God wea aotem sin bilong evri pipol long disfala world.” (John 1:29) Datwan mas happen lo Jerusalem, bikos for longtaem finis, hem nao ples wea olketa savve offerim olketa sakrifaes lo God. Dae blo Jesus provaedem freedom wea hem gud winim freedom wea kamaot from datfala pikinini sheepsheep wea olketa Israelite famili kaikaim lo naet wea olketa redi for lusim Egypt. (1 Cor. 5:7, 8) Sakrifaes blo Jesus mekem hem possible for twelvfala aposol kamap faondeson member blo Christian kongregeson. (Eph. 2:20-22) Interesting samting, datfala spiritual holy taon Jerusalem hem garem “twelvfala ston” lo faondeson blo hem wea garem nem blo “twelvfala aposol bilong datfala Pikinini Sheepsheep.” (Rev. 21:10-14) Yes, olketa faithful aposol hia garem big waka insaed plan blo God for fulfillim purpose blo hem. So, datwan helpem iumi for minim why Jesus laekem olketa for stap witim hem lo datfala final Pasova and join insaed wat hem startim bihaen, wea hem nao datfala Evening Kaikai blo Lord.
So 70-fala disaepol and staka nara disaepol tu no hipap witim Jesus lo datfala evening. Nomata olsem, evri disaepol wea gohed faithful kasem gud samting from datfala Evening Kaikai blo Lord wea Jesus startim lo datfala taem. Evriwan wea kamap anointed Christian bae part lo datfala covenant for wanfala kingdom, wea Jesus storyim for olketa aposol blo hem lo datfala naet.—Luke 22:29, 30.